麵包機入手

依家的香港唔同以前，以前衣食住行用錢就可以解決而唔需要擔心

如今著的食的用的，好難確保安全，仲要不停漲價

所以近年流行咩都自家製，係有原因的

麵包係其中一樣明顯感到物價上升急速的日用食品

睇住我最愛的OK便利店鮮奶球由$4.9加到$6.5

唔捨得日日食，畢竟佢只係一個無餡麵包...

而屋企附近的高檔bakery，更加唔會日日幫襯

真係計住食一日貴麵包，食返兩日平麵包

(小林家好窮架咋...)

講咁多咪又係為敗物搵藉口  =p

上月新入手PANASONIC麵包機 (SD-PM105)

其實出104時已經想買，一路等等等出105，今年九月終於出左

如果有留意下麵包機行情，都會知道好多人買台版/日版P記

功能&配件都比港版多，價位同港版行貨有競爭性

買P記，因為貪佢夠瘦唔算太阻定，而且多人用 = 多食譜跟 =p

買港版行貨105，因為屋企真係容不下一個大火牛

而最重要係，有朋友m幫手用平價買到，謝謝你!

實物~黎緊仲要為木木添置其他電器eg電熱水壺、奶樽消毒機

廚房檯面已經唔係大，點擺位真係好頭痛...

跟機有兩款唔同功能的葉片，量杯，量匙

為左麵包機，之前我仲買定左

- 可秤到0.1g的TANITA電子磅，量酵母用，購自日本樂天網站

- 麵包界有「神刀」之稱的日本製麵包刀，購自上海街陳枝記

送貨時仲跟埋三盒預伴粉，好好! 收到貨可以即刻開光玩!

跟住包裝指示「車」包粉落去麵包桶，加牛油&水

酵母格擺酵母 (廢話)

揀食譜，揀烤色，揀有無配料，預約第二朝返工前收包~

話咁快就到左第二朝 XD 係睡房已經聞到麵包香啦!

先拎左個麵包出黎攤攤，去梳洗換衫，就可以切片，時時岩岩好 =]

第一包大成功! (如果用預伴粉都唔成功都幾失敗...)

新鮮出爐已經比隔夜包好食得多，再加上小林家製，加分!

之後試過自己量材料，亦試過加唔同配料，十五分鐘內就可以搞掂訓覺~

試驗品有肉鬆包，朱古力包，楓糖包，紅莓包，oreo包...

但唔係每次都成功，有時會太濕 / 太矮 / 太燶 etc

仍需要同佢再夾夾，要學識氣溫同濕度對佢的影響

掌握好基本磅包之後，好想試玩造型包!

希望生木木前有時間玩啦! 如果唔係有排都唔駛玩 =p

講到尾，其實買麵包機長遠係為左木木架~

依家係街買到的麵包，通常都加入大量添加劑

連我另一最愛 - 提子麥包

我都係近排先知原來唔關「麥」事，只係加「麥精」!

當木木開始轉固體食物時，就可以自製健康安全的包包佢食

餵得放心，食得開心 =]