Baby Birthday Ticker Ticker

Wednesday, December 31, 2014

[11m] 木木第一個聖誕

木木第一個聖誕! 遲左四個月我都要寫埋佢 =P

呢張相係我聖誕果期的最愛!




聖誕不外乎就係PARTY PARTY & PARTY!

頭炮係[13dec]廣華babies
呢條裙仔係二手市場買,$40,料靚仲唔止著一年,明年再見




大家著唔同style的聖誕裝




[14dec]116 babies 第二日就同同日朋友仔開p 

今次木木媽book呢間party room都唔錯
好大個波波池,有自然光線



但係d小朋友唔玩波波剩係擒住圍欄望住我地...




買左個鹿鹿蛋糕應應節

(木木爸頂聖誕帽唔岩戴 XD)





[20dec] 上完playgroup,趁早未太多人睇聖誕佈置
剛落堂的木木攰到訓左著~




果晚提早慶祝聖誕節食聖誕大餐!

呢間餐廳入去時燈光好暗,我地一度擔心如果木木大喊要離場
不過木木好乖,無喊過只係到中後段有少少唔耐煩
而且餐廳員工每一個都好鍾意木木,係咁撩佢玩



無得食又係慘d既,所以有檸檬食都好過無啦!




當然仲要去埋尖東睇燈飾! 呢個係我地細個時的聖誕大節目



[21dec] 兩年前的聖誕聚組合,今件破格地去左玩selfie




不過同小朋友BB selfie係好有難度...
兩個大的要不停食物利誘先肯企定影
當大的企好,細果個就會爬左去...



另加 yummy waffle afternoon tea



[25dec] It's my first christmas!



[28dec] 約左一班媽媽bloggers去食聖誕自助餐

不過木木得個睇字無得食...



[29dec] AIA carnival

本來都無諗住去,但木木爸媽年底要清假,最終都係去左
諗住木木唔岩玩都可以睇下D公仔



點知木木好唔鍾意果度的環境,喪喊直至離場

有相為證

Tuesday, December 23, 2014

[10m+] 獅吼 • 嘶哮

春秋二秋係細菌病毒浦頭的好時間,抵抗力弱少少都隨即中招
我家木木就係咁不幸地之前係十個半月大時患左「嘶哮症」...
我都係生木木之後,多左留意小兒疾病,先知有嘶哮症呢樣野
所以都想寫返木木的患病經過俾各位媽媽參考

但首先大家要知道咩係嘶哮症,「嘶哮」唔同「哮喘」

哮喘病係由塵蟎、花粉、食物等致敏原誘發,屬於復發性支氣管疾病
呼氣時喘鳴,亦唔會發出狗吠或海豹叫聲


嘶哮症單次病毒感染引起,通常係副流感病毒,或腺病毒、德國麻疹病毒等
36個以下幼兒屬高危,因為幼兒呼吸道比成人窄
當感染病毒而造成咽喉及氣管急性發炎時,上呼吸道會變腫,引致氣管收窄及阻塞
初期會有發燒、咳嗽、鼻水,之後會出現聲音沙啞、吸氣時喘鳴、呼吸困難,咳嗽聲似狗吠或海豹叫聲
個別嚴重患者會出現呼吸困難,病情可以急速轉差,朝早發燒夜晚已狗吠
香港亦試過有死亡病例,有個一歲女童由求診至死亡只係兩個鐘!
暫時嘶哮症未有疫苗預防,但適時以口服、注射或吸入類固醇就有明顯療效

部分資料來自
蘋果日報︰嘶哮症可致呼吸衰竭 / 晴報︰嘶哮症 男童高危 感冒病毒襲氣管 / AM730: 咳嗽聲如海豹鳴叫 嘶哮症幼童最高危


而木木的病發經過好似delay左咁,就咁發燒燒左四日先出其他病徵

NOV25 (TUE)
我放工返去一抱就覺得佢熱熱地,耳探37.8,微燒,無明顯病徵,食得玩得訓得


NOV26 (WED)
耳探39.3度,木木爸帶去木木去睇醫生,由於無其他病徵,只係有一兩聲咳,醫生都係同我一樣懷疑出玫瑰疹,所以只係俾左退燒水退燒,但每次食完藥幾個鐘又燒返上去

NOV27 (THU)
一早起身繼續高燒,食完藥之後日間幾乎退燒 / 微燒
木木媽心諗,唔通跟住就出疹? 係就好啦...

NOV28 (FRI)
朝早返工時發現木木咳多左同流鼻水,而日間亦只係微燒 / 退燒
但夜晚放工返黎,木木又燒返上38.9度,而且咳同鼻水好明顯已嚴重左
即時已經大致排除左係玫瑰疹的可能性...
因為我明顯聽到木木的咳嗽聲唔同平時
我當時感覺係「好大聲、好惡」(依家諗返應該就係「狗吠聲」)
仲聽到佢喊/咳前好似要吸一口氣咁,同時聽到「her」(應該就係「海豹聲」)
「嘶哮症」三個字立即浮現係我腦海...

我知嘶哮症可以好大件事,已經係度諗緊入院
但木木爸好似唔知事態嚴重咁,仲話未係嚴重到要入院,大家爭持不下

最後我同意觀察埋果晚,第二朝再決定

(作為最敏感的媽媽,下次我會堅持架啦! 不過我理解木木爸點解唔願意,因為我之前同佢講過其他媽媽經驗 > 慘絕人寰,訓唔好食唔好醫院又多菌入左仲嚴重左 bla bla bla...)


NOV29 (SAT)

一早我就帶木木去睇醫生,經商量後都係建議入院比較好
(木木爸仲問我︰真係入呀?) ( 木木媽︰...著火...)
帶住醫生封轉介信去急症室,嬰兒一般會優先處理
所以木木被編做「緊急」類別,一個鐘內已經見左醫生照左X-RAY
幸好X-RAY顯示肺清,但醫生依然建議入院觀察

就係咁,木木重遊舊地,入左佢出世時的醫院。

有個白髮斑斑的高級醫生睇木木,我初初以為木木會怕老人家會喊
(咳/喊時先會明顯「嘶哮」,咁先可以俾醫生臨床診斷)
點知佢只係啤住醫生伯伯,唯有係木木媽描述徵狀俾醫生知
我都有擔心過會唔會係我先入為主覺得木木係嘶哮症,會誤導左醫生
但後來木木對住個初級醫生妹妹喊,連佢都話係好typical的嘶哮徵狀
咁就確診係嘶哮症...

醫院BB床左右可以較圍欄高低,床板又可以調較斜度
仲係粉/啡色,唔錯唔錯 (24小時對住張床,唯有欣賞下佢)



不幸中之大幸係醫生話木木只係輕微嘶哮症,需要食一劑口服類固醇
已經唔輪到你擔心「類固醇喎~唔食藥得唔得?」
因為用類固醇係最直接最快最見效方法



食完藥就開始駁機mon住SpO2 (血含氧量)
嘶哮症係咽喉氣管收窄以致呼吸困難,血含氧量降低
類固醇可幫助放鬆,令血含氧量回升




綑舊野係木木最鍾意玩的腳趾上,你話會點? 仲唔發狂去扯甩佢咩!
我果幾日就係不停趁木木唔為意同佢著返隻襪




到咁上下,木木夠鐘開餐
呢個時候我好感恩自己係一個母乳媽媽,就咁抱木木入房就得
唔駛帶熱水凍水奶粉奶樽奶咀...
之後有時懶得抱黎抱去,就咁係床邊餵都有 =P

{唔知係咪以前興叫「人乳」架呢?)



令我諗返起木木出世時係新生嬰兒特別護理病房
我每隔幾個鐘就碌落去餵但有人唔肯啜 =.=
而呢度係兒科病房,眼見都好少嬰兒,通常都係已離乳的幼兒/小童
但呢度都已經有兩部醫院級泵奶器 (symphony),抵讚!
搞到我心郁郁想試下有幾勁...



介紹完廣華兒科病房,我帶大家返黎探下呢位「獅吼BB」
木木住四人房,其餘三個小朋友都係發燒case, 其中一個都係嘶哮症

呢幾日我同木木爸都感受良多,什麼樣的家長就會教出什麼樣的小孩
佢地至少兩三歲,有一個從來無落過地行,另一個會打醫生護士!
而我亦好驚訝佢地好似無意識要隔離自己小朋友防止交叉感染
成日一齊玩,好彩木木細一大截同佢地唔岩玩...



木木食左類回醇之後好快就退燒,狗吠海豹叫都輕微左
你地睇下佢幾精神,好奇寶寶仲周圍八卦四圍摸~



醫院的BB餐 > 有豬肉味無豬肉蹤影的稀粥
木木本身已經進展到食杰粥,呢種食一陣就唔睬我啦
媽媽永遠都係執口水尾果個...



只可以有一個家長24小時陪伴,作為奶媽當然係我陪木木啦
但我只係陪左木木唔夠12小時就已經俾醫院各大小病菌打倒了
所以木木爸決定佢當通宵更!
係好大挑戰...如果木木半夜醒左,爆喊要媽媽,都唔知點算好...

留醫期間木木好痴身要抱訓,我都由佢
唔舒服+陌生環境嘛,媽媽抱住有大大安全感



幸好等木木訓淋左,可以靜雞雞擺返佢上床
呢個時候木木爸黎醫院接更,我返屋企沖涼訓覺
辛苦晒木木爸啦,通左兩晚頂
亦感謝iPad上的曼聯球賽&陪佢渡過漫漫長夜
(有梳化床,不過醒訓木木爸都唔慌訓到)

而我係屋企就好掛住佢地兩父囡,忍唔住喊左出黎...
(木木媽係好鬼眼淺)




NOV30 (SUN)
第二朝七點幾,木木媽又返醫院接更餵早奶
呢個BB無時停,換片唔肯乖乖訓低,又扭抱
去一去廁所,木木喊到癲左 ><


醫生巡完房話要觀察多一晚,晴天pig pig...



點樣消磨時間我已經唔係好記得啦

數下手指腳趾唱下歌睇下故事書訓下覺...

等到木木爸黎接更,我呢條喪屍又返屋企抖抖
係醫院都唔覺,一返到屋企就覺得對腳唔屬於自己
(好明顯係個囡面前要死頂...)
要撻住幾孖休足時間訓先得



DEC1 (MON)
星期一起碼中午先出得院,木木爸媽都拎左假湊呢隻病豬




早上醫生黎巡房,終於批准出院啦!

不過木木仲有咳同鼻水,醫生話係病毒未清晒
無藥食,要慢慢吽返好



多謝各位姨姨關心 =]



野! 木木爸黎接我地出院,
終於可以返屋企啦! 
雖然我戴住口罩,仍難掩開心之情!



返到姐姐已經大清潔好的屋企,第一時間白白豬再訓返個晏覺先!

木木你要加油,努力啜媽媽奶,唔好再嚇媽媽啦!



感恩木木今次病情輕微,我不至於好緊張擔心到喊果種

至於點解木木會感染病毒,真係不得而知
相信都係返playgroup/ 出席baby gatherings時中招
社交生活不能避免,唯有再做好衛生防衛,洗手洗手同洗手啦!

而今次選擇政府醫院,其實係因為...未幫木木買住院保險... (同我打佢阿媽100大板!)
木木本身係廣華出世,廣華又近屋企,加上以咁細BB黎講
政府資源分分鐘好過私家,住左三日兩夜,只係$100咋! 

之前聽其他媽媽講到政府醫院有幾差,我個人覺得還可以
當然唔抱太高期望,調整自己心態,就唔會有bad feelings
我地出院時漏左個耳溫槍係病房 (唔係最貴果樣都唔漏...),本來心諗實無啦,打電話去搏下,佢地竟然有keep起等我打返去認領! 仲話平時會扔,但知幾百蚊一個唔平所以無扔到!
所以我的經驗係正面的。

唯一唔好係出院時鼻液化驗報告仲未出,護士唔肯之後打電話講返我知
另外就係探病時間人數都好大限制,但都係好事,太多人聚集咪只會阻住病人休息

我地隔離床果個兩歲B,長期有媽媽同婆婆,一日有幾次阿嫲嫲,阿大姑媽,阿爸搏大霧走入黎,嫲係咁係婆婆手上搶孫,婆婆食飯好似屋企開飯咁係個大飯壺裝飯落碗食到成地都係,睇見都覺得佢地一家好煩...(唔,如果住私家仲要私家房,咪無呢D情況囉...)

Monday, December 8, 2014

成長記錄 • 十個月

[16 OCT - 15 NOV 2014]

身高體重

8.52kg > 8.9kg (50th percentile+)
身高︰今次終於記得度,求其大概度到73cm

睡眠作息
夜晚訓覺繼續係差,試過有幾晚木木喊醒得太密 (每15mins就喊)
木木爸火都黎,好彩我係危急關頭之際彈左起身接手湊返木木...
訓得咁差,估計係因為木木鼻唔舒服 (十月中開始一直都未斷尾)
兼且開始轉涼時驚死唔開冷氣,點知焗到木木出晒汗係咁熱醒
接近十個月大時天氣再涼,又差唔多好返晒,終於大細都有覺好訓

初生時我地會幫木木側睡,唔怕嘔奶之後佢自己選擇仰睡

六七個月大左右開始會打側訓,呢個月佢學識左扒係度訓!
但只要baby cot環境安全就唔駛擔心佢會窒息,
而且人的生存意識好高,壓住鼻哥窿佢自然會擰側個頭 =] 
不過有時木木直情跪係度訓,我地會等佢訓著後「撥亂反正」XD

飲飲食食
本月引入的新食材有
蘆筍 青瓜 三文魚 藍莓 PASTA 麵包
零食除左食開星星餅,仲試過yogurt melts

木木食奶好叻,由細到大都係一口氣KO成支奶一滴不剩
人係無完美的,木木食固體就好差,除左上月講過唔鍾意食生果
食粥仔食唔夠三啖就要係highchair企起身,仲想爬上餐檯!
要佢坐返低就爆喊你睇,包保你餵唔到...
初初我堅持食粥仔時一定要坐highchair無電視無音樂無玩具
但漸漸地我都屈服,容許姐姐俾餐具佢拎住玩,務求佢肯乖乖坐定食...
試食星星意粉果日,仲要吐返晒d星星出黎,要出動返濾網「顏」爛先肯食
究竟係時間,用餐環境定係食物本身的問題呢?

而早幾個月已發現木木好鍾意啜菜心,我就諗木木其實係咪鍾意finger food呢?
於是試下整青瓜條甘筍條擺係檯面,木木又真係好捧場自己拎上手食
睇黎我要好好研究下baby-lead weaning呢一門課!

肢體發展
  • 經常自己練習扶野企起身然後off hand,已企到10秒以上
  • 會嘗試由地下爬三大級上大人床
  • 已經可以掙脫bumbo seat再走佬
  • 有時會練習OK手
  • 學會玩口水波
上個月講到古惑星星餅 - 以口叼代手執,今個月已可以用前二指執起星星餅放入口,為左準確瞄中個口,有人仲會出動埋另一隻手hold住星星餅手的手腕!

情感認知
  • 識得開合手同人拜拜 (教左幾個月終於識啦!)
  • 聽音樂會拍手同UN身UN勢
  • 伸手板出黎識得give me five
  • 講「唔可以」會聽話停止佢做緊的危險事...一兩秒咁多
語言能力
終於都「爸爸爸爸爸...」爸都暈! 
不過當事人(木木爸)都承認,木木叫爸爸暫時係無意識的...
叫媽媽就好明顯係有意識...咪就係求救時叫囉!
另外亦「da da da da」學習中

其他碎碎念
痴媽情況持續中,痴媽到木木爸開始有微言呢!
由以前的第一位變成第三位 (姐姐排第二),我都明白會唔好受
因為有次木木訓醒時見到床邊係岩岩放工返黎的媽媽
佢竟然好似唔認得我咁,唔要我抱要姐姐
過左陣個人清醒返先醒起我係佢最愛的媽媽咋!
所以我都成日同木木洗腦話爸爸好愛佢痴爸B痴爸B咁 =P

---------------------------------

忍唔住一句...萌爆!


木木爸帶木木去公園玩,欣賞佢犧牲小睡時間交換親子時間
仲咁勇敢單挑 (木木媽當時返緊工)

不過睇木木一身造型,真係慘不忍睹...



木木的舅父舅母生日
終於去到book左兩年檯都book唔到的SHATIN18食片皮鴨
木木仲收到公公婆婆的日本手信,有自己的小手袋啦~



又長又彎的睫毛,好令人羨慕啊...



Oxford Path BB爬行比賽



萬聖節派對扮蜘蛛B



有陣時會肯自己拎住學習杯喪飲,超正
人奶baby
用飲管果然係叻d =]



同契媽&融融姐姐聚,happy face!



playgroup-ing



十個月大快樂!