Friday, June 23, 2017

林林 • 九至十二週小記

MAY 27 - JUN 2, 2017
[九週] 午餐好難過

雖然依然無嘔過,但估唔到作嘔作悶嘅感覺竟然又返返黎,亦開始尿頻,我仲天真地以為已經過晒添! 不過相比其他食乜嘔乜嘅大肚媽媽,或者兩餐都要在外解決嘅,我知道自己係幸福的 =]


最應該食魚嘅孕婦,依家一食魚就覺得好腥唔想食,仲有午餐(帶飯),每次叮完返黎都唔多想開動,打開蓋聞到陣飯味仲會即刻覺得胃頂,成日好想食垃圾食物,次次木木爸宵夜食韓國黑辛辣麵我都好想搶黎食...上胎我自問都算係勁乖,戒得好清,今胎蟹、芒果、茶啡、生冷野呢啲我依然會戒食,但我諗我會比上胎放縱少少 (聽住先)


唔多「湊米氣」嘅木木媽,結果有一晚宵夜真係忍唔住隊左成個黑辛辣麵,之後果晚就去左我最愛嘅拉麵店,跟住半夜就肚痛痛醒兼肚痾...嗚嗚嗚,睇黎林林唔俾媽媽食立雜野...


因為已經開始食materna,會比較難有便便,睇返上胎係食西梅,呢胎就暫時食yogurt已經好work。


上星期五產檢見到「閃閃」後,最後都忍唔住同木木透露肚裡面有baby呢一件事,始終都要為最近媽媽經常陪唔到佢玩,抱唔到佢有個解釋。未講清楚前,純粹以「媽媽唔舒服」做擋箭牌為由拒絕木木嘅要求,木木反而能夠面對,可以自發搵alternatives;講左之後,木木媽覺得佢係明啲唔明啲,亦未接受到,於是又有啲不穩定嘅行為出現。好了解呢個囡需要時間接受,木木媽會加油,陪木木慢慢適應!


------------------------------


JUN 3-9, 2017

[十週] 肚現現

個肚好似突然現左好多咁,著衫要著超勁鬆先無咁覺眼,知情人仕都話我孕味濃 T.T


胃口依然係咁上下,最唔鍾意食飯食魚,最鍾意食麵,會食食下突然到頂,會即時停手唔想再食落去。長期唔夠訓狀態,陪木木食飯食一半會頂唔順去左訓覺,陪木木訓九成九會自己訓著先,因為訓得多,skip左宵夜,體重回落至88磅,不過木木媽唔擔心,食返兩晚宵夜就會喺返度 =]


有關營養補充品,除左食materna,都開始食DHA,上胎食mumomega / 惠氏藻油,今胎發現美贊臣都出埋一份,為左搶market share,玩吉樽+$38換30粒裝,抵到無朋友,要知道,DHA真係好貴,原價成$10+/粒架~




木木嘅行為問題,喺我同木木爸源源不絕咁灌愛俾佢之後,情況又好轉返。呢粒囡,嘴裡說OK,身體卻很誠實,木木媽之前同佢講媽媽想休息,佢口話OK,但其實心裡面應該好想媽媽陪佢,結果就直接由行為反映出黎 (扭計),我又了解木木多左啦 =] 之後可以的話我都儘量照顧左佢先,真係太太太攰先搵木木爸救命,因為木木可以獨佔媽媽時間,已經開始倒數了...

木木絕對唔係一個母愛泛濫嘅小女孩,佢暫時對肚裡面嘅baby唔大感覺,我唔提起的話佢都唔會aware of,不過叫佢摸下肚皮,叫下林林,佢都願意。無論問過幾多次,佢都係答我想要妹妹,會俾晒佢唔岩著果啲裙仔鞋仔妹妹著,如果係弟弟的話就要我再生一個妹妹(!)...well, let's see!


------------------------------


JUN 10-16, 2017

[十一週] 苦口良藥

記得上胎十一週就已經有人讓座,今胎轉左工,好多時木木爸都車埋我返工放工,就算自己搭車都係搭小巴,所以被讓座機會大減 =P


妊娠反應開始連果少少無乜,只係仍然唔太好住家飯,好恨食街外野,聽人講頭三個月胎兒唔係靠媽媽營養,我就已經喺度盤算我仲可以食多幾多次魚蛋燒賣...上胎我戒得好清,結果木木so far皮膚還好,所以我都應該要公平啲嘅...


有左之後木木婆婆捉我去睇左幾次中醫,其實木木媽唔太鍾意飲中藥,不過真係有需要調理下,順下老人家意。之後婆婆同公公去旅行,我就甩難啦! 停左兩星期唔駛飲藥...然後今個星期,又黎過...之前陪6299去東華三院專科門診睇,順便自己又排新症,仲排左個好老好老女顧問醫師 - 張秀霞,今個星期終於排到有得睇...




我睇BK佢好似幫左好多不孕個案,佢把脈時有個年輕中醫師負責幫佢做電腦輸入,把完就間唔時恰下眼訓 =P 喺東華三院睇中醫除左可以代煎藥,最估唔到係竟然有宅配服務,實在方便到一個點! 其實西醫有講過,懷孕期間鼻敏感會嚴重左,所以我都唔知飲中藥有無效,姑且當安胎藥咁補氣養血啦。

診所對面就係油麻地果欄,睇完去買左啲適合孕婦食嘅車厘子、牛油果,仲買左芒果整芒果布甸俾木木爸食 =] 自製牛油果多士,好健康!




------------------------------


JUN 17-23, 2017

[十二週] 安全過渡第一孕期!

12! 12! 12! 不經不覺,咁就陀左林林三個月啦,多謝林林,木木媽喺呢十二週裡面無嘔無暈,無見紅流啡,只係有少少頂胃同比以前易攰,你同木木家姐都一樣咁錫媽媽呢 =]


上星期仲講緊未有被讓座,本星期由於要搭港鐵外出覆診,就已經有位中年男士讓座啦! 不過我都無坐到,讓左俾另一位伯伯坐。但行路搭車堅係要小心啲大陸人,佢地真係「目中無人」的!


木木爸準備第二次做爸爸,依然未係好識心理上照顧懷孕太太,有時會整喊荷爾蒙亂晒籠嘅木木媽,不過木木爸喺其他方面係好成熟的,例如佢已經日夜苦思點樣再安排家中陳設去迎接林林,我呢...就只係負責shopping的(!)


木木爸知道我唔多想食白飯,就炒飯俾我帶飯 >3




本星期正值父親節,去左洲際食 semi-buffet lunch,木木爸你好好享受,出年應該無得咁悠閒架啦...而我作為一名孕婦,去食自助餐絕對係蝕本貨,沙律雪糕都無我份,最慘係去the steak house無得食牛,望住木木爸個filet mignon流晒口水...



食食下server仲推左兩個巨型wagyu burger出黎(!) 
原本係一片嫩嫩的和牛



最後我請chef幫我將舊和牛變成咁,雖然依然味美,但感覺好灰...

(懷孕飲食小知識 其實孕婦食牛唔一定要食well done,因為最出事嘅李斯特菌只會停留喺肉類表面,只要表面seal至攝氏160度就算安全,裡面係medium都無問題。當然,食完會唔安樂嘅,就寧願唔食啦。而burger就反而需要well done,因為burger meat由肉碎組成,每粒肉碎面都可以有菌,所以一定要煮熟晒。)



上胎完成第一孕期嘅獎勵係多糖多奶多醬格仔餅一底,今胎我仲邊有咁乖,未夠十二週已經食左 > < 本胎完成第一孕期獎勵係...Haagen Dazs一小杯 =]



...由於NIFTY的關係...十二週完結前小林家已經知道林林嘅性別啦 =]
遲少少先開估 =P

Friday, May 26, 2017

林林 • 四至八週小記

APR 22-28, 2017
[四週] 容易懷孕的身體

對上一次懷孕,第二個cycle就中左。
木木媽經期算係準的,但我上胎無用過紅D驗排卵,又懶得朝朝玩度體溫,亦從來對自身反應遲鈍,所以我係唔知自己通常第幾日排卵。
作為計劃下嘅第二胎,木木媽盡左自己最大嘅努力 - 就係用朋友用剩轉贈嘅廿零條試紙,喺開始努力果個月開始check自己排卵日,真係努力到呢...
(真正努力的人,應該早兩三個月開始驗去睇pattern...)



回顧過去一年period duration喺28-30日之間,所以一到DAY31都未見m到,就走去買驗孕棒,喺有少少預感嘅情況下驗到有左,當日已經係[四週第三日]啦。



木木爸反應好冷靜,二人平淡得有少少過份,心諗:咁易中嘅...
講呢句說話唔係要認叻,而係木木媽嘅身體比幾年前係差左,期間經歷過病患同手術 (老左幾年就更加唔駛講)。 所以喺無乜點調理過身體嘅情況下,cycle1就中,我自己都有少少意外。

第二朝就去左家庭醫生度再驗孕拎懷孕證明,跟手去埋廣華排期。有過經驗,今次我已早有準備,地址證明 - OK! 所以亦好順利咁登記左,排到唐氏早孕期檢查。

------------------------------

APR 29 - MAY 5, 2017
[五週] 喂~醒啦! 你有左架啦!

由於無諗過一矢中的,所以個人未係好preggie mode,已安排嘅活動繼續發生,包括同一星期內去左兩次野餐,仲要有心有力整埋嘢食果種(!)



兩邊最親嘅家人都通知左,as always,反應好冷靜...
反而當我地通知有如親人嘅工人姐姐時,我地就好唔冷靜,因為,工人姐姐竟然話做埋餘下嘅合約期就會返去唔續約,我同木木爸簡直係晴天pigpig,之後反覆挽留過好多次,答覆依然堅決,令我不禁擔心林林出世時會係咩境況...

------------------------------

MAY 6-12, 2017
[六週] 請跟隨家姐作風

啲早孕期反應開始嚟啦,同上胎差唔多,都係(1)胸痛,(2),好多時陪木木訓自己都訓埋,又會訓晏覺。今次就比較(3)多胃氣,但依然無嘔,睇嚟林林同木木一樣咁錫媽媽,多謝你 >3

不過由於木木媽由未有前已經開始病緊 (傷風感冒咳),木木婆婆就比較緊張啲,捉左我去睇中醫,開始左我麻麻地嘅中藥安胎生活。雖然唔太喜歡,但的確有感身體無幾年前咁好,自問都有調理需要,而且,爸爸媽媽真係好錫我,每日新鮮煲好中藥之後帶去公司俾我飲,我又點可以唔乖乖保重自己身體呢 =]

------------------------------

MAY 13-19, 2017
[七週] 咁快見肚?

妊娠反應繼續有,不過實在幸運地唔算多,去到一個地步係有時會諗林林仲喺唔喺度...本住第二胎當豬養嘅關係,本胎所有事情皆hea過,第一次產檢打算下星期先去!

另一件可悲嘅事情係,當年個肚曾經撐到咁行,今胎一有左,就無情地好快漲起嚟,林林仲係豆潤咁細粒,都唔好意思話係因為有左,依家個肚圍,已經係上胎十二週時嘅肚...既然漲得咁快,就快快手去買枝Bio Oil,護肚方為上策! 不過又話說回頭,可能我盡得婆婆真傳,上胎一條紋都無,有望今胎依然白白滑滑 (摸下木木先)

木木有日問我:「媽媽你個tummy咁大嘅? 係咪有bb喺入面?」



我保持臉部表情儘量冷靜,內心不停問:佢點解會知㗎? 咁堅嘅!
打算穩定左先同木木講,亦探過佢口風,佢暫時一時一樣,有時想要baby,有時想自己做baby多啲,唯一好肯定係,問佢想要弟弟定妹妹,佢答幾多次都係答妹妹

------------------------------

MAY 20-26, 2017
[八週] 陪月陪坐月

懷孕徵狀似乎已經無乜,胃口好返啲,無再食少少就頂住,亦無咁渴睡。

同時因爲咁,木木爸再犯上胎犯過嘅錯,就係輕視大肚婆嘅荷爾蒙,又整喊左我...自從生左木木做左媽媽,自問EQ每日被磨練而提升唔少,已經少左好似做囡時果種放任式喊法,但原來有左,there's no rule! 喊到收唔到制,喊到一個點,木木爸先醒覺:係喎,呢個女人家下啲荷爾蒙亂晒籠,唔怪得癲左咁喊...希望佢醒醒定定,唔好再撻著我個喊制啦。

除左工人姐姐話唔續約,我又有另一個不得了嘅消息,就係我好老定咁以為媽媽會好似上胎咁幫我坐月,有日諗住多口問句,點知媽媽面有難色...詳細原因我就唔交待了,但我好明白亦接受媽媽幫唔到手嘅原因,無乜嘢嘅,move on立即行動揾個陪月,幸運地嫂嫂當年個陪月好好,嫂嫂亦爽快地幫我問期問價錢約見面,就咁解決左以為會好頭痕嘅一件事 =]

另外,我地亦喺未去照超聲波嘅情況下,就入手左兩件大型嬰兒傢俬,都幾衝動下,希望呢個決定無錯啦 =P

------------------------------

上胎個人兩袖清風尚算得閒,可以個個星期寫,相信今胎絕對無咁嘅時間了,希望可以做到四週一記啦 =]

Tuesday, February 28, 2017

木木媽拋夫棄囡首爾遊 • DAY3 • 阿珠媽搓搓樂

DAY3 may23, 2016

南大門 > 梨大 > 新村站著燒 > 弘大 > 韓服體驗 > 八色烤肉 > 汗蒸幕


堅係最後一站啦! 我地由弘大返去首爾站民宿,準備拖行李去附近一間汗蒸幕。點知我地去到民宿時,host搵左幾個阿珠媽等我地,而阿珠媽知道我地要去汗蒸幕,竟然叫我地兩手fingfing去,蒸完先返黎拎,實在太令人滾動啦!



如果講汗蒸幕,港客通常會去東大門SPAREX,我地當然無時間去東大門,所以去首爾站附近嘅siloam spa。港客通常係凌晨機到,去汗蒸幕訓返覺慳酒店,起碼玩幾粒鐘,而我地只係為一嘗汗蒸幕,加上講黎講去都係「無時間」三個字,我地打算「快蒸」個零鐘...

汗蒸幕大家玉帛相見,所以上網刨遊記時唔會睇到汗蒸幕入面嘅相,我都好好奇究竟會係點呢? 

呢間siloam spa外表望落舊舊地咁,入面有六層︰
B1 澡堂、spa池、紅外線室、搓澡床
1F 櫃台、置物櫃、鞋櫃、簡單商店
2F 食堂、指壓室、休息室、汗蒸幕
3F 休息室
4F 汗蒸幕、休息室
5F 男女分開休息室


1F 櫃台先俾錢 (每位13000won),會得到一條鞋櫃鎖匙,去鞋櫃放好鞋就拎鞋櫃鎖匙去counter換locker鎖匙、一套衫同毛巾,然後就...脫! 光! 光! 帶埋沖涼用品 (需要自備) 去樓下B1/F沖涼。

B1F 先拎個盤同櫈仔,搵個靚位就可以愉快地白白豬! 淨身後可以去另一邊的spa池浸浸浸,有凍冰冰、有竹炭,有個好熱,再另一邊有強力水柱、jacuzzi同桑拿房。

我地三隻剝清光嘅港豬,就係咁騰黎騰去,浸下呢個嗌熱又浸另一個咁,同時排隊等待被搓澡。其實搓澡係是次汗蒸幕體驗重點! 超級期待! 等左好耐上手都未搓完,我地好擔心趕住走等唔到! 當阿珠媽叫我地入去時,實在難掩興奮之情!

搓澡究竟係點樣一回事呢? 首先你要全身赤裸裸咁攤係張膠床上面,僅穿內衣(!)嘅阿珠媽會倒一盤水係你身上,然後戴上搓澡用嘅手套,開始起勢咁摔你嘅肌膚。初初無咩料到架...好快...好快...你就會見到眼前有大量白白灰灰嘅千年老泥摔左出黎! 我都明白你睇我寫會覺得好嘔心,但本人同其餘兩位當時問心堅係興奮 (都有覺得核突嘅),就等如唧左好大粒黑頭出黎咁有成功感!

阿珠媽真係出盡奶力每一吋有可能積聚老泥嘅地方都唔會放過,當我地係條死魚咁左撻右撻...皮膚薄啲可能會有少少痛,不過搓開左會好少少,亦可以同阿珠媽講,全部阿珠媽都係識講普通話的。最後佢地會係咁易按下面同頭,再倒盤水沖走啲老泥就搞掂啦! 

呢種基本「搓搓樂」,盛惠20000won,話有45分鐘,實際應該無,同埋果時已接近半夜十二點,阿珠媽趕收工。搓澡果度有價錢牌,可加其他野如facial,massage等。

正常人沖左涼浸左池之後,會上返1F吹頭換汗蒸幕衫,然後上其他樓層去玩下不同汗蒸幕、或者係休息室大字形攤喺度訓覺 / hea下咁,我地,又係果句啦...上返1F極速換衫,我記得係頭都未吹乾晒已經要挽鞋走啦! 不過我地完成左搓搓樂呢個壯舉,已經非常滿足,下次有機會再去蒸啦,要知道有人肯俾你睇全相,俾你見證住佢身上老泥嘅離去,交情少啲都唔成事架 =]

呢頭變變態態咁細摸自己滑到溜一溜嘅肌膚,果頭半隻腳踏出門口已經要飛奔返去拎行李,再過對面首爾站坐late night bus返機場! 離開蒸幕時係0010,巴士0040開車,全程狂奔! 如果呢架搭唔到,又係會出事...

半夜機場無乜人,得hk express counter大排長龍,搞掂check-in就快快手去退稅,我係明洞買左對pump,都退到10000won架! 仁川機場退稅非常自助,check-in後去D/J區,有機器scan單據,入閘後去gate 24/41,擺本護照入機scan就會嘔cash架啦,就算半夜三更無人看管counter都完全無問題!

退完稅仲要去拎喺 lotte duty free online shop 訂左嘅護膚品,又係方便到癲! 我地喺市區格完價發覺都係online買最抵,DAY2晚先上網order,仲要入閘後先取貨,唔會佔行李重量,too good!

瘋狂的三日拋夫棄囡首爾遊到此結束,落機即刻返工...
YEAH! 相隔大半年後我又完成一個遊記啦! 但期間又已經去左兩次旅行,it never ends!



Wednesday, January 4, 2017

木木媽拋夫棄囡首爾遊 • DAY3 • 花痴CAFE • 韓服體驗在弘大 • 八色烤肉

DAY3 may23, 2016

南大門 > 梨大 > 新村站著燒 > 弘大 > 韓服體驗 > 八色烤肉 > 汗蒸幕


站著燒完之後,條腿其實已經斷左,但依然要繼續行行行...

下一站我地去多姿多采嘅弘大!

行街前,我地想去嘆cafe,首爾咁多靚cafe,行程再趕都要去hea下 
揀左間以鮮花為主題嘅cafe - Florte Flower Cafe






呢度嘅裝修擺設、以至食物擺盤,全部都係花花花花花




而server係清一色oppa! 眼見食客亦清一色係港/韓女
可以借花圈花束黎影相,就好似以下呢三位...我都唔知點形容好 =P



食物方面,鑑於我地已食左好多/仲有好多想食,而呢度唔係為左食嘅
我地就只係叫左三杯好能夠代表到我地三位嘅飲品



間cafe就喺弘大站六號出口直行街口轉左,沿途仲會經過一間叫"stamp mama"嘅scrapbooking shop! 啱晒我地三個!




Florte Flower Cafe
地址: 22 Sinchon-ro 6-gil, Mapo-gu, Seoul, South Korea
電話: 02-322-0122

營業時間: 1030-2300
facebook: https://goo.gl/bsmIv4

弘大我地有另一重點行程 - 韓服體驗!
首爾有幾處地方可以體驗韓服,e.g.明洞M Plaza五樓有得免費玩 

(詳情︰http://big5chinese.visitkorea.or.kr/cht/SH/SH_CH_7_5.jsp?cid=1438923)
而我地因為時間有限,為配合行程我地去弘大嘅 beauty prism
只要消費滿額(每人50000won)就可以免費著韓服影相



三個人要買十五萬won,原來都唔容易! 知道一陣間會有內地旅行團大軍殺到,我地要快快手,成個trip最遊客都係呢件事架啦 ._.

韓服體驗喺樓上,地方都幾大,場景大約十個左右,韓服選擇一般,有男有女無小朋友衫,我地上到去時有對內地母女玩緊,我地三個只能揀妹仔韓服 T.T

妹仔喺花園打掃偷雞賞(假)花



三個妹仔執好檯,可以開飯啦大人~



(想扮晒野時發現啲props全部痴實晒...)


之後湧入大批內地旅客,我地即閃! 
此景點不太推薦,景點資訊我就唔寫啦。

終於開始去行街啦,不過我自己有感買到夠晒皮,反而買左兩件恤衫俾木木爸,其餘時間我好似無乜記憶咁,有記憶已經係跳左去一間叫snobcafe食earl grey cake!


呢間cafe好舒服,我地就係坐係二樓窗邊,好寫意,行到攰黎抖抖堅係唔錯,earl grey cake堅係好食!


snob
地址: 86-53 Sangsu-dong, Mapo-gu, Seoul, South Korea
電話: 02-325-5770
網址: www.snobblue.com

然後,我地去吃晚飯 (!)
作為首爾最後一餐,絕對不能求其食,我地去食八色烤肉,就算晏晝已經食左烤肉都係咁話!



畢竟我地個肚其實已經撐到爆炸邊緣,所以我地都係叫基本八色烤肉,呢八色分別係人參、紅酒、松針、大蒜、香草、咖哩、大醬、辣椒醬,依呢個次序由淡到濃味咁去品嘗。



燒方面唔駛自己操心,有人燒到香噴噴剪好晒,同晏晝站著燒係完全兩回事 XD



另外套餐跟左豆腐海鮮湯,配菜大豆芽呀果啲又係好好食。八塊五花腩三個女仔食,都真係幾滯,原本可以臨尾加個麵/飯炒炒佢,但真係無本事再加...


八色烤肉
地址: 首爾市 麻铺區 西橋洞 363-4 서울 마포구 서교동 363-4
電話: 02-333-1183
營業時間: 1200-0200


飯後絕對要行下消化下,想食的雪冰橋村炸雞只能忍著淚說goodbye T.T 行行下去左chuu,係早幾個月好hit的痴線褲牌子! -5KG,又係幾吸引! 呢度已經無時間影相啦,爭取時間試試試,問阿公借錢都要買,我買左一條穿窿長牛同粉紅短裙呢 =] 

趕喉趕命係為左最後一站 - BUTTER,modern house朋友,主打得意可愛文具+小家品,係弘大站一號出口B2果層就係,收十點,好彩趕得切!




木木媽最鍾意買呢啲唔等駛的野,買得好開心!

Butter
地址: 首爾特別市麻浦區東橋洞159-8 서울특별시 마포구 동교동 159-8 B2
營業時間: 1030-2200
facebook: https://www.facebook.com/ibutter.co.kr
網址: http://buttershop.co.kr


買完趕返去首爾站,搵host拎返行李去下一站 (第一日已經試過早早摷醒佢又夜一夜先拎返行李,真係唔多好意思)...

無錯我地仲有最後一站,話明係crazy grils' trip嘛!

Wednesday, December 7, 2016

木木媽拋夫棄囡首爾遊 • DAY3 • 血拼南大門 • 梨大遊 • 站著吃烤肉

DAY3 may23, 2016

南大門 > 梨大 > 新村站著燒 > 弘大 > 八色烤肉 > 汗蒸幕


話咁快已經到左最後一日,「聽日」凌晨四點幾機,所以今日仍然可以玩足全日。


晨咁早我同契媽b就起身鼠出門口,去童裝集中地 - 南大門血拼!
契媽f可以再訓多陣 =]

subway無南大門站的,要係會賢站落車,就喺首爾站隔離,非常近



六號出口出直行,到路口就轉入去,成條街都係賣童裝 (粉紅色圖示)


主要都係左邊一幢幢商場,每幢商場剩係地面果層已經好夠行
右邊有零星幾間地舖,記得有間賣鞋,有間賣頭飾
我地九點左右到,好多都未掀開塊布,大概九點半就見阿豬媽陸續開工
btw呢度星期日唔開的,記住啦 =]

小朋友衫絕大部分都係走型格/可愛路線,價錢其實唔算平,一般都15000won或以上,但設計真係正到無話可說! 如果資金無限,我可以買滿成個29吋篋都無問題 (小朋友衫細細件,要塞滿大篋都幾誇張)。

幾乎所有舖頭都會掛晒啲衫出黎 / 擺晒落檯面,一目了然,想睇邊件就指住問阿豬媽價錢,想買就可以問佢地拎合適尺碼,大部分韓衫都係分3 / 5 / 7 / 9碼 etc.,有小部分用 xs / s / m etc.,通常一歲著 3 / XS碼,如此類推,木木依家著緊5碼,有啲款可以著到7碼。


你見我齋講無乜相,係因為果度文化唔可以影相,亦唔好講價,我試過有位阿豬媽拎左條新褲俾我,只係最後睇唔岩無要到,佢已經即時用韓文 xyz 我! 抵死...

我買左三件衫三條褲兩條裙一對鞋一頂帽,已經係非常忍手嘅購買結果 XD

之後我地返去民宿接契媽f兼check-out,host佢喺民宿地下有間地舖,可以幫我地保管行李,夜晚先嚟拎,真係very good! 唔係間間民宿都肯咁做架,如果無就要自己去車站 / 遊客服務中心搶locker,仲要俾錢又有時間限制。

-------------------------------------------------

今日依然係shopping day,不過尋晚地下街+今朝南大門瘋買完,我已經無晒彈藥,要買嘅野都七七八八,餘下行程都係眼睛想旅行多。

首爾市區有好多間大學,每間大學附近都會好旺,形成一個個多野食多野買嘅熱點,今日會去兩間大學附近行街,先去梨花女子大學 - 梨大

梨大有幾個地標/影相位,最出名係梨花牆,就喺大學入口
(三位已經即刻著新衫...)




仲有shocking pink高踭鞋,呢度有間必逛可愛文具店kosney



梨大都有街行,感覺係立立雜雜乜都有,但我地嚟梨大主要係為左食平日先開嘅queens bagel,超多款唔同味道嘅cream cheese & bagel可以選擇!



除左queens bagel,仲有好出名嘅issac toast,喺梨大、弘大、明洞等旺區都有。同台灣洪瑞珍一樣,你唔會明點解一件三文治可以賣到開巷,但食過你就會明,我個人覺得issac toast比洪瑞珍更好食,層次豐富啲,唔會只食到打發牛油



食完早餐就夠鐘食午餐啦 (!) 其實我地已經好節制咁兩份bagel三份食,一份issac toast三份食架啦,但都好x飽...為左消除飽肚感去迎接下一餐,我地由梨大步行去新村...

去食午餐之前要去轉便利店先! 因為一陣食午餐果度...要自備白飯的!




去到啦! 我地叫呢間餐廳「企住燒」,如果你上網搜尋就打「站著吃烤肉」


見到呢個門口,你絕對唔會覺得係遊客會去嘅地方...



內裡零裝修,只有一個個鐵桶,顧名思義,大家就係咁企係度燒燒燒。



老闆行埋黎見我地三個人,舉起三隻手指點下頭又走左去,轉個頭就夾三大件帶骨牛肉喺我地個爐上面。呢度只提供呢樣食物,一份150g,15000won (汽水1000won)。所以如果想食白飯泡菜就請自行預備啦,我地就喺沿路嘅CU便利店買飯的,仲叮熱埋添!



上網爬文睇遊記話,呢度賣的韓牛係溫體牛而非冰鮮牛 (加分),加埋佢提供的沾醬,真係好好食! 轉下眼就得返三舊骨啦!



木木媽溫馨提示
- 記得買個白飯帶埋去,送飯好好食! 地鐵出口沿路行過去都有CU便利店
- 週末堅會多人,儘量平日去

- 佢地會有個大膠袋俾你裝住啲袋,不過都係會成身烤肉味

企住燒 서서 먹는 갈비집
地址:首爾特別市 麻浦區 老姑山洞 109-69番地
電話:02-716-2520
營業時間:12:00 - 賣晒就打烊
新村站七號出口,直行,過對面馬路上斜坡 (仲幾斜下...)