Baby Birthday Ticker Ticker

Friday, May 26, 2017

林林 • 四至八週小記

APR 22-28, 2017
[四週] 容易懷孕的身體

對上一次懷孕,第二個cycle就中左。
木木媽經期算係準的,但我上胎無用過紅D驗排卵,又懶得朝朝玩度體溫,亦從來對自身反應遲鈍,所以我係唔知自己通常第幾日排卵。
作為計劃下嘅第二胎,木木媽盡左自己最大嘅努力 - 就係用朋友用剩轉贈嘅廿零條試紙,喺開始努力果個月開始check自己排卵日,真係努力到呢...
(真正努力的人,應該早兩三個月開始驗去睇pattern...)



回顧過去一年period duration喺28-30日之間,所以一到DAY31都未見m到,就走去買驗孕棒,喺有少少預感嘅情況下驗到有左,當日已經係[四週第三日]啦。



木木爸反應好冷靜,二人平淡得有少少過份,心諗:咁易中嘅...
講呢句說話唔係要認叻,而係木木媽嘅身體比幾年前係差左,期間經歷過病患同手術 (老左幾年就更加唔駛講)。 所以喺無乜點調理過身體嘅情況下,cycle1就中,我自己都有少少意外。

第二朝就去左家庭醫生度再驗孕拎懷孕證明,跟手去埋廣華排期。有過經驗,今次我已早有準備,地址證明 - OK! 所以亦好順利咁登記左,排到唐氏早孕期檢查。

------------------------------

APR 29 - MAY 5, 2017
[五週] 喂~醒啦! 你有左架啦!

由於無諗過一矢中的,所以個人未係好preggie mode,已安排嘅活動繼續發生,包括同一星期內去左兩次野餐,仲要有心有力整埋嘢食果種(!)



兩邊最親嘅家人都通知左,as always,反應好冷靜...
反而當我地通知有如親人嘅工人姐姐時,我地就好唔冷靜,因為,工人姐姐竟然話做埋餘下嘅合約期就會返去唔續約,我同木木爸簡直係晴天pigpig,之後反覆挽留過好多次,答覆依然堅決,令我不禁擔心林林出世時會係咩境況...

------------------------------

MAY 6-12, 2017
[六週] 請跟隨家姐作風

啲早孕期反應開始嚟啦,同上胎差唔多,都係(1)胸痛,(2),好多時陪木木訓自己都訓埋,又會訓晏覺。今次就比較(3)多胃氣,但依然無嘔,睇嚟林林同木木一樣咁錫媽媽,多謝你 >3

不過由於木木媽由未有前已經開始病緊 (傷風感冒咳),木木婆婆就比較緊張啲,捉左我去睇中醫,開始左我麻麻地嘅中藥安胎生活。雖然唔太喜歡,但的確有感身體無幾年前咁好,自問都有調理需要,而且,爸爸媽媽真係好錫我,每日新鮮煲好中藥之後帶去公司俾我飲,我又點可以唔乖乖保重自己身體呢 =]

------------------------------

MAY 13-19, 2017
[七週] 咁快見肚?

妊娠反應繼續有,不過實在幸運地唔算多,去到一個地步係有時會諗林林仲喺唔喺度...本住第二胎當豬養嘅關係,本胎所有事情皆hea過,第一次產檢打算下星期先去!

另一件可悲嘅事情係,當年個肚曾經撐到咁行,今胎一有左,就無情地好快漲起嚟,林林仲係豆潤咁細粒,都唔好意思話係因為有左,依家個肚圍,已經係上胎十二週時嘅肚...既然漲得咁快,就快快手去買枝Bio Oil,護肚方為上策! 不過又話說回頭,可能我盡得婆婆真傳,上胎一條紋都無,有望今胎依然白白滑滑 (摸下木木先)

木木有日問我:「媽媽你個tummy咁大嘅? 係咪有bb喺入面?」



我保持臉部表情儘量冷靜,內心不停問:佢點解會知㗎? 咁堅嘅!
打算穩定左先同木木講,亦探過佢口風,佢暫時一時一樣,有時想要baby,有時想自己做baby多啲,唯一好肯定係,問佢想要弟弟定妹妹,佢答幾多次都係答妹妹

------------------------------

MAY 20-26, 2017
[八週] 陪月陪坐月

懷孕徵狀似乎已經無乜,胃口好返啲,無再食少少就頂住,亦無咁渴睡。

同時因爲咁,木木爸再犯上胎犯過嘅錯,就係輕視大肚婆嘅荷爾蒙,又整喊左我...自從生左木木做左媽媽,自問EQ每日被磨練而提升唔少,已經少左好似做囡時果種放任式喊法,但原來有左,there's no rule! 喊到收唔到制,喊到一個點,木木爸先醒覺:係喎,呢個女人家下啲荷爾蒙亂晒籠,唔怪得癲左咁喊...希望佢醒醒定定,唔好再撻著我個喊制啦。

除左工人姐姐話唔續約,我又有另一個不得了嘅消息,就係我好老定咁以為媽媽會好似上胎咁幫我坐月,有日諗住多口問句,點知媽媽面有難色...詳細原因我就唔交待了,但我好明白亦接受媽媽幫唔到手嘅原因,無乜嘢嘅,move on立即行動揾個陪月,幸運地嫂嫂當年個陪月好好,嫂嫂亦爽快地幫我問期問價錢約見面,就咁解決左以為會好頭痕嘅一件事 =]

另外,我地亦喺未去照超聲波嘅情況下,就入手左兩件大型嬰兒傢俬,都幾衝動下,希望呢個決定無錯啦 =P

------------------------------

上胎個人兩袖清風尚算得閒,可以個個星期寫,相信今胎絕對無咁嘅時間了,希望可以做到四週一記啦 =]

Thursday, May 25, 2017

[八週六天] 產前檢查 • 私家 • 1

May 25, 2017 • w8d6 • 劉珮琪醫生 • CRL: 2.286cm • BPM: 180+

自從驗到有左之後,除左有少少妊娠反應,都無話好唔舒服咁,於是,我又開始自己嚇自己,究竟林林仲喺唔喺度呢? 上胎等到七週先去照,今胎懶懶行,拖到八週尾先去照。


正路應該搵返上胎嘅孫醫生,不過孫醫生咁熱門,當年最誇張我試過等三個幾鐘,依家再去睇佢真不敢想像,加上通漲年年加人工無得加,孫醫生診金比起當年我睇已經升左100% (!) 實在無辦法睇佢 T.T

上BK又問下媽媽會,最後都有幾個心水,呢日就book左孫醫生旗下嘅劉珮琪醫生,聽聞都算細心,係東區醫院做左十年,最近先出黎私人執業。

4:45pm appointment, 喺孫醫生石門新開嘅診所,貪佢啲儀器都新嘛 =] 
九週前嘅USG都要喪飲水漲大膀胱,我一不小心飲多左,一路填媽媽會入會表格一路嗌急,勁低B! 最後都等左大半個鐘先到我地入去。

劉醫生係一個女醫生,感覺係好後生,第一次產檢都有問返上胎情況,由於我太急 (!),就拿拿臨上床照照先,一照就見到一個大圓圈乜都無! 咳咳...果個其實係膀胱...

見到林林啦! 
聽到心跳 (180+),見到閃閃,鬆一口氣,仲見到四點手手腳腳添啦!

八週暫時都未有咩可以睇到,只知道CRL正常,週數吻合,下次再見啦林林,要好好長大啊 =]