Baby Birthday Ticker Ticker

Thursday, September 28, 2017

[二十六週五天] 產前檢查 • 私家 • 8

Sep 28, 2017 • w26d5  陳樹武醫生  2 LBS 4 OZ

今胎感覺比上胎少好多產檢咁,上胎好似長期keep住三星期咁密,今胎最少都隔四星期。二十一過照左結構之後,又五星期先再去私家產檢。又因為特別原因,今次無返劉珮琪醫生度睇,改為去睇媽媽會介紹嘅陳樹武醫生。

約左五點,所以上晝返完工之後同木木爸去撐枱腳食個lunch (趁再次喪失自由前要同老公拍多啲拖!) 先返去接木木。

陳醫生診所喺尖沙咀,地點算方便。到埗首先拎試紙去驗左尿,然後磅重、量血壓。坐返低都唔夠一分鐘就叫我地入去。因為第一次睇,陳醫生都有問病歷同上胎產程,我仲俾埋劉子建醫生嘅結構報告佢睇,然後就入房照USG。照嘅過程我感覺好快,最記得係未照前陳醫生話望落我個肚好細 (我心諗,已經比上胎大兩寸...),一照就話「又比起就咁睇大喎」,超快手度左幾個parameters,轉一轉3D就照完,連林林心跳都無度,我只係問左一句「係咪中碼B?」「係」咁就趕左我地走...

陳醫生比平時睇開嘅劉珮琪醫生係仲貴少少的,無DVD,只係將幾張相貼落張咭紙度俾我地帶走...

頭骨橫徑  BPD  6.8cm
肚圍         AC     21.8cm
大腿骨長  FL     5.2cm

係估唔到林林已經有1KG =2.25磅!


實在感覺太hea,係絕對唔會再睇佢的...

Friday, September 15, 2017

林林 • 二十一至二十四週小記

AUG 18-25, 2017 
[二十一週] 重得快漲得快

第二胎真係唔同啲,個肚漲得快,個人亦重得快 (呢點其實唔關第幾胎事OK?)。我自己兩胎都有每星期記錄低體重、脂肪肌肉水份比例、腰圍同肚圍,本身呢胎比上胎開始時已經重左幾磅,廿四吋腰圍亦不復再,肚圍比上胎同期大兩吋,睇黎今次早少少影孕照個肚都可能有睇頭喎!

林林開始喺肚皮跳舞啦! 踢得勁時會見到肚皮郁,連木木都摸到,佢地嘅關係又更進一步 =] 期待之後林林做變形金剛,哈哈!

------------------------------

AUG 26 - SEP 1, 2017 
[二十二週] 二手MODE啟動!

記得上胎二十週一做完結構,廿一週週記題目係「SHOPPING MODE啟動!」開始放心大舉買BB野。今胎已經買左嘅野唔多,好早期以超抵價買左張細木床+床褥,之前迪迪尼六折時買左兩三件超可愛costume,前排amazon做緊母嬰用品免稅免運入左個睡袋同日本製紗巾 ,就未再買其他野住 (阿媽媽,其實你都數左唔少...)

而要新添置嘅野唔多,主要係啲consumables,不過有幾樣野上胎用完已經還返俾朋友 / 俾左人,所以的確要張羅嘅,買新的話,木木媽又有啲肉赤 (第二胎係咁架啦...),所以主打搵二手︰

暖奶器
target $100或以下,牌子 tommie tippie / philips avent,開始搵無耐就遇到,仲係新款avent,上手只用左五個月但好新淨!




電動奶泵
早多幾年媽媽們選擇唔多,通常用美牌medela,到我陀木木時就開始興韓國牌子spectra,價格親民好多,所以上胎我用spectra 9+,到今胎好多人都話大陸野優合平靚正,不過亦有comment話優合大力得黎係死力,我怕易泵傷乳腺,所以我想試下轉用medela,主打搵freestyle型號,最緊要係部主機,parts果啲打算自己再買。最後排到一部freestyle係賣家購自amazon uk,唔駛用變壓器同轉插,hooray! 賣家仲free左個summer infant sleep positioner同一包產婦M巾添



手動奶泵
本來無諗住買,因已有個avent手泵,但上網閒逛時見到一部只賣幾十蚊嘅medela harmony手泵,交收地方亦方便,即要! 個手泵係超級無敵新淨,賣家話用少過五次,我感覺似係全新多啲! 仲有鴨咀同白片跟埋,剩係呢度都幾十蚊啦 =]



CARSEAT
其實以上都唔係最必要亦未至於唔可以買全新,carseat先係我嘅首要目標! 上胎個初生carseat係問朋友借的,今胎決定搵個平平地嘅二手,因為初生carseat (group 0/0+)只係用到大約12-13個月,依家先黎買新 (around $2K+)實在不智。我家果架重型BB車可以配搭carseat用,但只限某一兩個牌子嘅幾個型號,所以都要啲時間搵下。排左一輪之後 (唔夠人快),遇上一個carseat只用過幾次 (出院+幾次的士),不過就擺左喺度好幾年。carseat最重要係no accident,而且實物真係好新淨,連infant head support,strap pad都齊晒,價錢超值,自覺係一個very good deal!



以上全部都係呢一個星期內confirm兼交收,你睇下,一講到買野,木木媽真係寫唔停...
------------------------------

SEP 2-8, 2017 
[二十三週] 我要表揚木木爸

之前曾經有段時間好似同木木爸水溝油咁,好易少少野就著火然後冷戰一兩日,加上荷爾蒙影響,懷孕初期真係無乜喜悅感覺。最近好返好多啦,木木爸關心返大肚婆好多,除左返工管接管送 (無乜機會被讓座),仲自己湊木木起身兼送佢上校車先返黎接我返工,等我可以訓多啲。週末我去聽孕婦講座,佢會湊木木返興趣班晚晚幫我肚肚搽防妊娠紋油,洗切生果俾我睇住電視食,等等等等....

最近工作上都幾唔開心,office要搬遷,要pack箱,要擔心新office氣味同化學品,呢啲老闆唔會有concern過我係大肚婆之餘,仲會因為我請假去產檢俾好多說話我聽,可能係我個工種關係,陀兩胎嘅老闆都係mean到爆,幸好其他部門同事好照顧我,木木爸亦好撐我,連木木都好生性,先覺得好過啲

木木愈來愈有家姐風範啦! 佢雖然未至於會一見到我就要錫下肚=錫baby果種,但比起之前,佢唔會再抗拒我提起林林,仲會自己主動提起林林,令小林家充滿和諧 (即係唔駛點鬧佢) =]

註︰磅數已達100磅,咁快嘅今次...

------------------------------

SEP 9-15, 2017 
[二十四週] 為何老闆總是衰

上星期講到公司搬office,樓上搬樓下,喺呢件事上真係睇盡人情冷暖。除左老闆以外,所有同事都好緊張我,唔俾我搬任何野,唔俾我行近岩岩裝修好嘅新office,唔單止同事,係連裝修判頭裝修佬都係咁。同事仲幫我喺大廈內搵左個temp office俾我,當我向老闆propose呢個提議時,佢剩係識得怪我唔搬野唔執野無生產力! 嬲到一個點,著晒火!

最後老闆安排左我去另一個離屋企遠好多嘅office,表面睇老闆好似好為我著想咁,唔想我坐喺新office吸甲酫,實際上...