Baby Birthday Ticker Ticker

Monday, December 21, 2015

幼稚園學前班,讀唔讀?

答案︰讀

木木爸木木媽都係在職父母,一早決定會安排木木返學前班 (pre-nursery class)

原因唔係想怪獸,兩歲就要識好多野果種
而係希望木木可以過下群體生活,唔駛日日對住四面牆

報名事宜,當然係由木木媽全權打理,木木爸分分鐘面試前一晚先知

至於點揀,其實我都好鬼懶
刨學校網頁、早一年去開放日、買天書睇...我全部都無
只係玩facebook時見到人講又睇下,有whatsapp group又入下咁
都叫掹車邊做左少少功課

報名三寶 - 信封.郵票證件相


信封,郵票,再加個記低幾時報名截止的excel



證件相,之前幫木木整護照去舖頭影左一次
神奇的執相哥哥係木木爸抱住木木的情況下執走左木木爸隻手臂...
報名用的,需要影好少少
facebook上有間studio影「報名相」好勁,個個小朋友都影到好smart咁
乜都懶懶行的木木媽當然book唔到...
結果...呢個世人永遠都係識人好過識字!
最後誠邀身邊兩位專業攝影師朋友幫木木影

第一次係去朋友H屋企影





第二次朋友S黎我地屋企影
第一張乖乖女咁...




第二三張完全係得戚百厭樣!

  

感謝朋友幫忙,因為以木木性格,studio要一埋位即笑即影

佢實黑面,亦不見得攝影師哥哥氹下就會笑...
係朋友屋企,朋友有囡囡有玩具仲可以慢慢黎
係屋企更加唔駛講,仲要係見過好多次的哥哥

大家覺得影得好唔好?


送張連橫九拍過大家笑下 XDXDXD 中間果格最頂癮,你又鍾意邊格?




以前每到學校報名季節,新聞總會報道家長們通宵排隊拎/交報名表

依家唔駛架啦,通常郵寄已經ok
網上報名就更加好,環保之餘又方便在職媽媽
so far報左六間都只係有一間要求到校交表

係...我報左六間,仲有幾間2016年先報
有名幼,有連鎖,有新校,有屋企樓下
預左會撞面試時間,熱身面試亦需要,至於名幼...當去見識下,無壓力!

木木雖則係大B有優勢,但奈何林小姐極慢熬...
祝木木幸運啦。

Tuesday, December 15, 2015

[試用] COMVITA MEDIHONEY®醫療級抗菌麥蘆卡蜂蜜

謝謝COMVITA邀請出席活動及試用 =]

老實講,COMVITA PR同我講時,我以為係關於佢地鼎鼎大名的manuka honey

到我到達活動場地時,先知原來係護膚品!



我係有聽過蜂蜜可以幫助傷口癒合,減低感染機會
MEDIHONEY® 用的蜂蜜唔係平時食用果d, 係醫療級抗菌麥蘆卡蜂蜜
加上CE認可標誌,達到歐盟的醫療器材標準
仲係美國FDA認可可用係醫療用途的蜂蜜產品



產品入面仲有呢幾種成份︰
燕麥仁精華     能紓緩肌膚,有效減低痕癢
蘆薈                臨床實證能有效提升肌膚水分
洋甘菊            能鎮靜、紓緩一般肌膚敏感徵狀
植物脂質        蘊含豐富的人體須脂肪酸,有效鎖水及滋養肌膚,讓肌膚再生、充滿活力



而類固醇、羊毛脂、parabens防腐劑、SLS起泡劑、人工色素和香料、礦物油同基因改造原料等有害成分...都係無的,講咁多,即係想講呢個系列的產品天然安全,包裝簡單不謀暴利,我聞過味道好正常無香精味,大人細路都岩 =]

系列一共有五款產品,包括日常護理用的無皂潔膚露、潤膚露 & 強護護膚露

無皂潔膚露(soap free wash) 
用左無皂低敏配方,摔極都無乜泡,代表無用到化學起泡劑係好野,只係我地用慣左泡泡好勁的產品,要改變呢個習慣啦。

潤膚露 (moisturising lotion) & 強護護膚露 (skintentive cream) 
一枝無乜野時用,一枝勁乾爆晒拆時用。木木媽一到冬天隻腳就會變蛇皮,仲會有血痕(R損),咁多年黎都無乜邊支可以搽一次就可以頂成晚,今個冬天正好試試用! lotion搽上去好吸收無立痴痴,cream搽完就好似有層coating係面,隔左皮膚同空氣咁,唔錯唔錯

另外有兩枝產品係大件事時用的! 

天然特效修護膏 (derma cream) 
專for濕疹用的,有效鎮靜及紓緩紅腫、痕癢肌膚,並平衡肌膚酸鹼值,防止細菌滋生 (其實佢成條line濕疹都岩用的)。身邊有朋友的子女有濕疹困擾,無論外觀/生活都會受影響,絕對有需要用有效兼安全的方法去減輕情況。就算唔係濕疹,突發性的皮膚敏感都可以用啊,有時木木塊面唔知點解紅左一撻,就可以用derma cream。


蜂蜜軟膏 (wound gel) 
聽現場介紹,呢支係勁野! 上文講過蜂蜜有癒合傷口的作用,wound gel可以直接搽係傷口上,厚厚地咁敷,用紗布蓋住,適用於任何表面傷口 (如割傷、燙傷、擦傷及抓傷等)、手術後的傷口、慢性傷口和皮膚潰瘍等情況,好正! 我細個整損時最憎搽紅藍藥水,皮膚染晒色,而且好耐之前已經話唔好再用呢d。咁wound gel就幫到手,傷口可以快d好返,如果唔係,手多多的小朋友一定會去搞,有排都唔會好返...


當日有註冊護士同遊戲導師講解濕疹成因&處理,同埋點樣心理上照顧患濕疹小孩,學到野, 仲有COMVITA&餐廳特別為event用manuka honey而準備的小食及飲品,最重要係木木爸幫我湊住木木,等我可以專心安靜咁聽...



COMVITA
MEDIHONEY®醫療級抗菌麥蘆卡蜂蜜

Tuesday, October 6, 2015

小林家東京之旅 • 準備篇

木木爸曾經講過,兩歲前都唔會帶BB出國旅行,試問我又點頂得順? 
自2013年年頭的SAMUI bday trip就無再去過旅行啦!!!
慶幸我都係一個不屈不撓的老婆,哦左好耐,加上AM夠分換機票
上年11月我終於換左今年11月的沖繩機票

...咦? 木木媽你有無打錯標題?
無無無! 我都以為要等到年尾先有得去
年頭同木木契媽傾傾下,又遇著特價,就買左暑假去首爾的機票!

...咦? 木木媽你真係打錯標題喎!
無無無! 因應今年6月韓國爆發MERS,廉航公司又俾免費改地點
終於最後定案 - 東京!

--------------------------------------------------------------------------------------------

AUG5 夜晚1910機,我同木木爸都只請下午假

第一次帶木木離港外遊,仲要搭廉航,坦白講我都真係好淆底!
我好擔心木木係機上會發癲,會水土不服,會發燒,會絕食...
但都唔驚得咁多,凡事都有第一次嘛 =]
唯有執行李時花多少少心思考慮周詳少少

出世紙, 針卡副本
雖然已有護照同身份證,但touchwood有D咩事
出世紙, 針卡都有助證明身份

貼紙 / 玩具 / 畫筆
係飛機、餐廳的急救品,希望佢肯畫下玩下唔好周圍擒同大叫就好...
貼紙主要搵厚身D的泡棉貼紙,佢自己可以撕起同食左我都知(!)
最平淘寶RMB0.37就有一張,木木你唔駛同我慳住玩,哈哈!



餅餅/ 糖糖/ 汁汁
食物比玩具更有效,因為食緊野時係唔得閒講野的!
木木18個月時開始俾下果汁/果蓉佢飲,已極速成為佢的最愛 (平時無得飲的)
預算每日俾一包佢做下午茶頂下肚


餅餅帶左大半包gerber,糖糖帶左一包yogurt melt
唔知會唔會清晒?


片片
初初我都大安旨意諗住去到買,但契媽問完在日港人之後話
遊客區的藥房或超級市場都無片片賣
為穩陣起見,都係執齊左片片同學習褲帶去
用保鮮袋儘量抽真空,都唔算好重好阻定
我預每日早晚各一條片片,日間三條學習褲 (估計出街都唔會換得太密)



平安藥
咁岩木木係出發前四日有少少鼻水,就順便睇埋醫生
開左退燒、收鼻水同咳藥水,醫生話如果肚痾,就由得佢痾清
另外帶左耳溫槍、退熱貼、薄荷膏以防萬一

衫褲鞋襪
去程行李我地只買左30kg,所以我真係無預太多後備
in case 唔夠,木木爸話買; 木木媽話洗 (民宿有洗衣機)
衫 - 衫最容易整濕/ 整污糟,六日行程我帶左8-9件
褲 - 兩短褲一半截裙,上機著legging
鞋 - 一對舒服的asics就夠
襪 - 一日一對

煮食工具
為左木木一日兩餐,我地搵左間民宿住,貪佢有個設備齊全的廚房
但衛生起見我都自備左唔少,帶舊野去,用完扔~!
用具︰砧板&刀, 海棉&抹布,洗奶樽液,微波爐盒,燜燒罐
材料︰米, pasta, baby food

至於外出食飯時就準備左
摺疊杯+碗, 食物剪, 飯衣, 叉匙, 大量濕紙巾 (減少用紗巾)




如果唔係因為改地點,其實我無諗住去東京的
既然去得,就盡自己能力提供最多保護俾木木啦
所以...我地帶左6L水過去! (其實5L都夠,不過咁岩一箱6L費事拆)
用黎每日俾木木飲同煮飯俾木木食


其實木木腸胃都算係咁,去到之後我唔記得左溝香港煲的凍滾水,飲晒就直接開蒸餾水俾佢飲,仲要無煲過 (後來有媽媽同我講話煲左好D)

人肉奶媽
最後就緊係要帶我呢個人肉奶媽,早晚供應醒神奶奶/催眠奶奶!

希望東京遊記唔會好似之前的沖繩同關西
仲有根本無寫過的honeymoon咁爛尾啦下...

Friday, September 11, 2015

[試用] 玩具“反”斗城及寶寶“反”斗城專門店秋季「開心嬰兒用品節」

收到玩具“反”斗城 PR的邀請時,實在難掩興奮之情!
話晒木木唔少玩具&用品都係來自
玩具“反”斗城的,短短年半間已經進貢不少
玩具“反”斗城更加係shopping mall頭三位必逛之店
是次非常感謝玩具“反”斗城及寶寶“反”斗城專門店邀請木木參加

秋季「開心嬰兒用品節」試用活動

其實次次去
玩具“反”斗城都係好有目標咁買野,都無乜機會等特價
今次認真睇下先知原來「開心嬰兒用品節」都幾多筍野︰

  • 搜羅一系列各大品牌的嬰幼兒產品供爸媽選購,其中更有多款產品以優惠價發售 
  • 連續五星期推出「每週勁減」優惠,多款指定嬰幼兒產品以超值優惠價發售 
    • 「星卡」會員尊享多款折扣優惠,包括: 
    • 購買任何價值港幣 $1,000元以上汽車座椅,可節省港幣 $100元; 
    • 購買任何價值港幣 $1,500元以上嬰兒手推車,可節省港幣 $150元; 
  • 憑秋季「開心嬰兒用品節」宣傳冊子內頁的優惠劵,即可享以下優惠: 
    • 購買嬰兒產品滿淨價港幣 $200元,可節約港幣 $25元; 
    • 購買嬰兒產品滿淨價港幣 $400元,可節約港幣 $45元;
由依家開始直至10月5日!
-----------------------------
玩具“反”斗城送黎一大袋玩具用品,木木見到都呆左,定過神後就緊係摷下八卦下有乜野,直至...整冧晒之後扮無辜企係度...



木木心諗,媽媽從來無試過一次過買咁多野俾我 XD



多謝
玩具“反”斗城!



今次試用產品包羅萬有,分別係
(左上) Pearhead Babyprints珍藏系列
(右上) NUK雙柄透明學習水杯套裝
(下) VTech遙控互動學習車



(上) Fisher Price智玩成長階段 - 小豬學習撲滿 (下) OXO TOT 4件餐具組合



勢估唔到,木木第一時間係要求開OXO TOT 4件餐具組合,而唔係玩具...



OXO TOT的餐具組合一向聞名好用,呢套餐具組合包括叉 / 湯匙 / 訓練碟 / 有蓋碗
叉&湯匙柄身肥大,好好揸手,叉匙金屬部分個shape好好,木木自己食同大人餵都安全又輕鬆, 而大碗個底係有矽膠同好重的,設計可防止移位同反轉, 木木的星星餅一粒不漏 XD



至於餐盤設計亦係協助幼兒自行進食,佢個圓環可以令小朋友兜得住食物,大個左掌握到個技巧可以拆左個圓環出黎



第二件我地試玩Pearhead Babyprints 珍藏系列

木木初生時我都有買D陶泥同木木整手腳模,始終都唔夠呢D成個kit咁方便
小小一盒裡面已包含左不粘泥 / 滾棒 / 打孔器 / 塑形環
仲貼心到包晒三色絲帶任君選擇,整好就可吊起掛係屋企



舊泥由密封袋拎出黎要搓兩至三分鐘直至不粘手為止
有個小朋友有樣學樣之餘仲虎視眈眈...



Pearhead的不粘泥係100%不傷孩童,不需混合同烘烤,而且絕對不易沾污
所以木木搞搞震無幫襯都唔需要擔心佢手污糟



幾經辛苦,先碌到舊無穿無爛的出黎...



下一個挑戰係要木木賜我手手或腳腳一隻...
你估佢仲係初生咁任你舞咩,好難啦! 係咁話「唔要唔要」又要掂又要縮,激死!
好彩呢隻泥係可以重新製作N次都得!



幾經辛苦 (again!) 終於有半製成品,擺係度兩三日就乾架啦
(謎︰究竟木木有幾多隻手指...)



終於到玩具上場啦! 木木爸要求開左呢盒VTech遙控互動學習車先!
好明顯就係有個大唔透的男仔想玩遙控車啦...



木木︰拆快D啦爸爸!
木木爸︰你估我唔想? 我仲心急過你!






呢架遙控車比我想像中勁抽! 反應極快,加埋TURBO制的話,架車會high到咁
以學習黎講,遙控制可培養孩子手眼協調同學習方向
架車向前向後轉圈都會講相應英文架!
鸚鵡木木就係咁不停講"backward backward"



唔單止係一架車咁簡單,佢有幾個mode,書本係學習方向顏色同形狀
音符毛包括17首旋律 + 2首伴唱歌曲



而問號毛係會就住車頭幾個顏色同形狀問問題,要按返正確按鈕
平時主要同木木講廣東話,有D驚訝佢都聽得明英文問題仲答岩一題半題
(可能只係撞彩多...)



第四份呢,係 NUK雙柄透明學習水杯套裝
可能木木自己本身有個杯,佢唔俾人拆呢盒,仲強調係佢表妹的...
well,未能親身試用,上網搵返佢的資料俾大家睇睇

  • 為訓練寶寶獨立飲水,根據寶寶成長所需量身定做的適合寶寶口腔發育的學習水杯套裝系列,是幫助寶寶學習從奶瓶到水杯過渡的最佳幫手。
  • 防溢軟鴨嘴,寶寶自己使用不溢漏;耐咬型硬鴨嘴適用於長牙期喜歡啃咬的寶寶;硅膠吸管柔軟且富有彈性,不傷害寶寶牙齒,NUK特製排氣閥孔可防止瓶內液體外漏,同時不讓已經吸出在外軟管的液體回流至瓶內,保持清潔衛生。所有該系列水杯配件均可互相替換。
  • 本品採用優質聚丙烯超輕材質,是寶寶學習喝水最佳裝備,不含雙酚A。
  • 把手和瓶身之間的空間符合人體工學的設計,更有利於寶寶抓握。
  • 透明的瓶身及刻度可以隨時觀察小寶寶的飲水情況。
  • 同時可與其他NUK寬口系列產品配件替換使用。
單單從外睇,佢有三款嘴,一款飲管,兩款鴨嘴,其實幾好,你知杯呢D架啦,又係要試到大小姐大少爺岩feel為止先得,NUK呢隻一盒有三款唔同功能同質感的嘴,梗有一款岩啦掛?



最後試最有親切感的Fisher Price智玩成長階段 - 小豬學習撲滿
何解親切? 因小林家已養左同一頭豬好耐!
不過兩豬相遇,就會發覺二代豬進化左



新一代Fisher Price小豬學習撲滿瘦左,條腿長左,錢幣輕盈左,overall無咁笨重



小豬學習撲滿透過音樂、可愛聲效讓寶寶認識學會計數、顏色、英文及不同用語。寶寶可投入色彩繽紛的硬幣至小豬撲滿的背上,另有一小門可以進行放下及拿出硬幣,這是供探索的玩具。寶寶可以按下小豬的鼻子,它便會以音樂及歌聲作鼓勵。投下硬幣﹑將它們拿起,再按下小豬的鼻子,必定會抖得寶寶笑個不停。



的確木木超愛呢頭豬,尤其係用mode1按豬鼻時,豬唱住數one two three four five six seven eight nine ten,木木就會興奮到跳舞!



而最主要呢頭豬係訓練小朋友手眼協調能力,入coins時可將頭豬打橫/ 打直交換擺,睇下小朋友識唔識扭動手腕而唔係移動成個人去遷就
仲有可以學下coins上的顏色同數字,十個coins共有五色每色兩個,借黎訓練colour matching都十分好!
而大少少就可以灌輸理財概念,可以玩好耐呢!



不過木木話,呢頭豬最岩拎黎當櫈仔坐!



失敗,笑到癲左!



一件玩具要有啟發性先稱得上好玩具,我相信玩具“反”斗城及寶寶“反”斗城專門店所挑選的,都一定serve到呢個功能,而揀玩具同時可補給埋嬰兒用品,
玩具“反”斗城實在係太方便父母 =]

趁住秋季「開心嬰兒用品節」,go take a look!

Monday, September 7, 2015

成長記錄 • 十九個月

[16 JUL - 15 AUG 2015] 

身高體重
體重︰10.3kg
身高︰唔想再度
牙齒︰6隻 (牙呀牙...你吽完未? 定你根本未出黎?)

飲飲食食
都依然係唔太肯自己「畢」同唔肯坐定定的問題,已經到左唔係好想理佢的地步...唯一肯定係我知道佢其實識「畢」,仲「畢」得OK。睇黎呢粒囡都係有得玩就唔駛食果類,即係最頭
痕果類...
因為鍾意飲湯,去6299屋企食飯會留一碗落鹽前的湯俾佢,初初係用飲管,後來俾隻中式湯匙佢,次次未到口唇邊已經倒濕晒件衫,希望佢自己拿揑到個竅門啦。



自理/活動能力
  • 可以自己爬上大人櫈 & highchair 
  • 可以自己爬上BB車坐好 - 其實都係因為去旅行日日要坐BB車先知佢已經做到 
  • 會嘗試攀BB床,一隻腳擱上床欄,手臂一借力已經半個人係床外面... 
  • 會嘗試自己著鞋同著衫過頭笠但當然仲未做到 
  • 為旅行要訓練用花灑沖涼,以前木木好怕花灑會e嘩鬼叫,可能真係大個左,試一次已OK
情感認知
  • 會嗌媽媽做某件事 e.g. 媽媽坐,然後會嗌自己個名叫自己做 
  • 鍾意扯住人件衫去呢度果度,見到咁會話佢,要拖住手而唔係扯衫 
  • 對屋企邊件物品屬於邊個好清楚,甚至乎有D無介紹過,佢自己見得多會聯想到 e.g. 汽水同遙控器係爸爸的 (well~) 
  • 有次問佢食完餅要做乜野,完全無提水無相關物品係附近的情況下,佢竟然答到我「抹抹手,飲水」! 
  • 知道天空係邊,會指住上面 
  • 搭lift見到陌生人會垂低頭攬實我地大脾,唔想講hello但好肯講byebye XD 
  • 周遭親友包括我地自己會俾手機裡面的相木木睇,導致木木依家一見手機就話要睇,相都影唔到,已下令各人要戒! 
  • 玩煮飯仔,提水下可以煮好先請人食︰擺落煲>開火>炒幾野>落調味料>用碟載住>請人食。如果唔係,會就咁隊俾你食! 
  • 知道爸爸訓緊覺要細聲d講野,仲會"shhh...",當然一出房門就無左件事照舊大叫 
  • 對大小、長短開始有D概念,但顏色就仲係好弱,只知道BLUE係顏色但認唔到 
  • 知道有求於人時要講please,自動波唔駛再提 
語言能力
  • 木木嗌自己個名又唔同左,以前叫「UN牛」依家叫「LAN LAU」
  • 可以自己組合名詞動詞 e.g. 爸爸覺覺豬,媽媽坐呢度
  • "open please"
  • 會講「好丫」吊高個丫音,聽落都幾討好架,好positive咁!
  • 問親佢有無,做左未,佢總係會答「無」同「未」,明明就係有同做左!
食物類
奶奶 包包 餅餅 na-na apple mum-mum 湯 汁汁 提子 cheese
衣服類
襪襪 衫 褲
物件類
波波 燈 bubble 櫈 遮 bottle 車車 car clock 星星 心心 叉 羹 杯 樓梯 眼鏡 bus
人物類
媽媽 爸爸 婆婆 嫲嫲 公公 爺爺 hacey 木木 UN牛 叔叔 姨姨 哥哥 妹妹 姐姐 晴晴 auntie
動物類
貓貓 馬馬 bear 豬豬 panda rabbit turtle dog el-phant bird horse pig duck frog penguin mouse
生活類
白白豬 覺覺豬 poo-poo wee-wee  拍拍手 握握手 抺抺手
動詞類
peekaboo open 抱抱 開 坐 
形容詞類
糟糟 飽飽 靚靚 開心 鍾意 涼 
對話類
拜拜 please 知 好 得 OK yeah 呢度 呢個 yummy 咩呀? 呢邊呀 謝謝 thankyou
ABC 12345678910(Eng & Ctn) sorry 無左 走左

-------------------------------------------------------------------------------------------------------

以前木木好怕掂到D顏料,又一證明佢大個左了,雖然未去到messy play的境界,至少佢願意拎住枝畫筆隨心所慾咁畫



木木媽的兒時讀物 - Wally!



其實大家都話木木似bubu,我日日望住佢兩位又唔覺好似 (絕不葡萄)

反而我地兩個都覺得木木唔似女仔樣,就算夾埋夾都係男仔頭咁...


有一日我發現木木識得盤起對腳坐!



你睇木木幾咁恭恭敬敬!
佢等緊playgroup導師派佢個名同貼紙俾佢呢,要點點頭同講謝謝~



講 "one, two three, smile" 佢會一齊講 "mile" 然後 1/2 happy face



每年書展都會帶木木去探班


歲半打五合一,之後會去旅行所以順手打埋支甲型肝炎

原本打針時只係喊一兩聲,係阿驚青姑娘慌死D血會好似噴泉咁標出黎而極速貼膠布,中間紗布根本就貼唔中針口位,於是又撕返出黎再貼過...大佬,個針口位俾膠紙貼過又撕返走,俾我都爆喊啦,嬲呀! 請木木食餅餅呵返~



叫木木同公仔影相都唔會再喊住要攬實媽媽了(只限唔識郁的公仔)



之前木木會係咁叫媽媽開個磅出黎俾佢磅重
佢依家鍾意自己磅完叫媽媽磅、爸爸
、auntie、BB磅...



木木唔太喜歡minion,目無表情!



最欣賞木木媽整的小蛋糕



木木肯定唔係驚青果類,叫佢坐係石櫈 (階磚),佢會同你坐一陣,然後八卦下周圍,發覺上面仲有一級,會試下坐上去,絕對唔怕跌死...



唉,終於都做左(我覺得)每個小朋友都會嘗試的事 - 玩凡士林!

之前木木已經小試牛刀玩gel頭 (可惜我不在場)
呢日就玩「搽cream cream」,真係無眼睇...



估唔到木木媽要代做功課呢一日咁快黎到...
有日上PG唔知點解安排左一個(對佢地)難度好高的雪糕筒手作

基本上都係D媽媽係度整小朋友負責搞破壞...
木木最後都幫忙將球雪糕擺入威化筒,仲有玩最messy的漿糊...



木木爸教木木行直線



有朋友仔到來一齊玩,特別開心 =]




呢個月木木人生首次離港外遊! 
希望佢媽我可以寫完個囡人生第一次旅行的遊記啦下...


木木︰我十九個月大啦!