小林家手製月餅系列 - 酥皮奶黃月餅

繼冰皮月餅取得大成功之後

信心爆棚，翌日懶懶行咁開工整奶黃月餅

點知整到日落西山都未得，最後要加開一晚夜工先出到爐

仲因為咁病病地…對唔住木木，係媽媽太逞強 > <

所以大家見到的圖片記錄，絕對係虎頭蛇尾的…

我的做法好聽就叫集各家之大成，實質就係左湊右拚 =P

食譜跟blogger膠膠B，出自望月月餅班 

(望月的葉師傅，據稱係半島嘉麟樓/九龍酒店酥皮奶黃月餅始創人)

皮餡比例跟sasa再自己亂黎 (仲要多謝sasa過左好多貼士俾我)

入爐時間跟煮食谷友分享，都係話出自望月

先做餅皮 (後來發覺應該先做餡料，因為餡料需要較長時間冷卻)

同整曲奇餅差唔多呢～ 

1. 無鹽牛油回溫，加入砂糖，用打蛋器打至發白同鬆軟

（小林家已棄用白砂糖)

2. 雞蛋打散，加入(1)，用打蛋器打勻

3. 另一碗內，低筋麵粉同吉士粉一同過篩三次

4. 粉類分幾次加入(2)，用刮刀拌勻

5. 最後用手輕輕搓成粉團，用保鮮紙包住入雪櫃

如果即刻用就凍格30分鐘

如果好似我咁第二日先用都係擺凍格

如果起碼兩日後先用就擺冰格，事前放凍格/室溫回溫

整好餅皮之後，咁岩有朋友賞面黎食小林家冰皮月餅

吹吹水食件餅飲啖茶，再開工整奶黃餡

聽過「一鼓作氣，再而衰，三而竭。」嗎？

我就係泄左初初果道勇氣，之後愈來愈手腳慢，無幾耐就要坐低抖抖

又唔記得每一步都影相記錄，最後仲唔夠時間即日焗埋 > <

過程大概係 1. 吉士粉，奶粉，蛋同蛋黃，糖 mix together

2. 椰奶，淡忌廉，牛油，雲尼拿籽，糖煮至微滾

3. (2) 倒入 (1)，回鍋用中火快手攪煮直至成團

4. 攤凍

5. 咸蛋黃 (木木媽唔得太操勞，買現成咸蛋黃方便快捷) 切碎

噴上少許玫瑰露酒，焗爐預熱後150度焗7分鐘，會見到起泡泡

出爐後再用匙壓成茸，我保留小部分碎粒增加口感

平均加入奶黃餡，用保鮮紙包實雪過夜

6. 翌日放工飯後繼續 >>>

將餅皮同餡料分割，我最後調整的比例大概係皮餡各22g (50g模計)

7. 餅皮搓圓壓扁，包入奶黃餡，用手掌虎口位收口，變成黃波

餅模同檯面撲手粉，黃波放檯面，用月餅模壓成形

直接係已舖烘焙紙的焗盤上甩模

8. 家用焗爐有幾熱預幾熱 (小林家的只有250度)

焗盤放低層2分鐘，中層4分鐘

出爐冷卻10分鐘，上一層蛋液係凸起的文字/花紋位

再入爐中層4分鐘，上一層糖水 (砂糖/水 1:1細火煮溶攤凍)

頂層1分鐘烘面，出爐!

純粹自行記錄，第一次整無乜心得可言

記得餅皮要控制溫度，回溫太耐牛油易溶，太硬身易裂

我索性企係雪櫃旁邊包餡，餅皮一軟身就放入雪櫃一陣

而奶黃餡直情係包一粒先係雪櫃拎一粒出黎～

精挑細選半打最靚仔的影相 =P

係呀，有小部分好醜樣，面目模糊，唔出得場…

本來我仲有買其他模片

但「小林家」太個人化，感覺太良好，唔捨得換其他款 =P

我見煮食谷友焗出黎都係偏淺色，自己就鍾意少少燶邊的感覺

本來第一次整都無信心整得好，估唔到焗爐好生性

完全俾到我想要的效果!

旁邊睇，煮食谷友提到常見的「象腳」問題 (即上瘦下肥) ，無!

至於裂紋就唔多唔少總有，我已經收貨～

切開睇睇個餡，都唔錯啵! (黑色點點係雲尼拿籽)

試食報告︰個奶黃餡好得，唔甜唔膩但香
餅皮就脆身左少少，bubu話似食曲奇餅，我又OK，唔駛咁漿住牙齒
如果餅皮再厚少少可能會酥返? 

開心大滿足還願之作!
遺憾係無時間早兩三星期整，如果唔係就可以大量製作去送禮啦。

今年仲有好友幫我班到半島嘉麟樓、半島酒店、九龍酒店各一盒
木木你未出世已經好有食神啦 =]