新生兒代謝病篩查

代謝病 = 先天性代謝缺陷 (Inborn Errors of Metabolism)，係一種遺傳病，患有代謝病嘅嬰兒身體會缺乏某啲酵素，因而妨礙新陳代謝，導致有毒代謝物積聚，繼而影響器官運作。情況嚴重時更會有生命危險架!

患病嬰兒出世時都沒有明顯病徵，就算察覺到，都可能誤以為係其他嬰兒疾病。代謝病大多係唔可以完全根治嘅，但如果有早期診斷同治療，就可以大大提高治療療效，或者日常生活飲食上可以儘早配合，將影響減到最低。
依家香港平均每四至五千個嬰兒，就有一個患上代謝病。新生兒代謝病篩查都係近年先興起，我地呢代父母可能有輕微代謝病而不自知，又或者係隱性缺陷基因携帶者，如父母都有下一代就會1/4機會遺傳到架啦。

一直公立醫院只係免費提供兩種代謝病篩查 - 蠶豆症 (G6PD) & 先天性甲狀腺功能不足症 (甲低)。至於其他代謝病篩查，政府都已經逐步擴展緊︰

2015年10月先喺伊利沙伯醫院 (QEH)展開「初生嬰兒代謝病篩查先導計劃」，檢驗21種

2016年4月推及至瑪麗醫院 (QMH)，擴展至涵蓋24種

以上呢個先導計劃只係推行18個月，即係18年3月31日就會完? 唔會，因為今年九月時衛生署宣佈計劃成效大，QEH & QMH 今年四月已經將篩查納入常規，仲會兩年內逐部擴展至全港公立醫院，威爾斯親王醫院 (PWH)將會係第三間，今年底推行 。

-------------------------------

點解我要寫呢篇BLOG? 因為呢個新生兒代謝病篩查與小林家，時間上完全係錯晒。當年木木2014年出世，未有呢個篩查，幸好後來木木大概三個月大時，參加左HKU嘅「二代新生嬰兒篩檢計劃」，以下係當年嘅記錄 (成長記錄 • 四個月):

二代新生嬰兒篩檢計劃
DAY100我地送左份禮物俾木木，就係帶佢去俾人拮腳板底 (!)
其實係參加左HKU的「二代新生嬰兒篩檢計劃」
懷孕時已睇過新聞話中大首推同類計劃，$800出世七日內做
果時諗住無咩特別唔駛特別俾錢驗啦~
到木木出世個零月之後，TVB星期二檔案報導左呢個計劃 (節目重溫)
了解多左先知道篩檢的重要性，即刻打去HKU預約
岩岩趕得切係呢個兩年先導計劃完結前參加到，慳返唔少錢
當日係木木腳掌唧左五大滴血落tester度 (叫左一下咋，叻~)
之後會係lab做「串聯質譜」測試，檢驗21種代謝遺傳疾病
免費，所以無報告返，收唔到電話就OK

而林林將會喺廣華醫院出世，偏偏呢間醫院係無初生嬰兒代謝病篩查 T.T 我聽媽媽會講，聯合同瑪嘉烈係可以俾錢 ($1K內)請醫院幫忙抽血，之後唔知係醫院代送去中大代謝病診治中心定自己拎去咁。總之...廣華係乜都無，唉，所以咪要做下功課囉。

-------------------------------

現時有兩大主流篩查方法，分別係採取血液樣本 / 尿液樣本去化驗。
血液樣本
主要由香港中文大學代謝病診治中心提供服務，可以檢查出30+種代謝病。需要喺初生嬰兒食奶滿一天後至出生後第七天之內，喺腳板底桔一下，滴幾滴血液喺卡紙上就可以，只需幾天時間就可以知道檢測結果。不過呢個方法不適用於出世時未滿34週或未夠2kg重嘅初生嬰兒。

香港中文大學代謝病診治中心
地點︰威爾斯親王醫院李嘉誠專科診所南翼二樓婦產科30號窗登記
時間︰星期一、三、五上午 (如有需要可安排下午)

預約電話︰5569 6412 (出左世先好打去book)

查詢電話︰3505 6412

費用︰$1260 (其中$900要俾現金，其餘$360可俾現金 / 簽卡)

需時︰大概兩小時，最好帶定奶粉 / 奶媽 / 片片

備註︰只可以父母帶同其初生嬰兒前往

參考︰http://www.obg.cuhk.edu.hk/wp-content/uploads/IEM-traditional_chi-2017.pdf

住九龍嘅小林家，喺林林初生時入沙田威爾斯有啲遠，木木媽再搵，搵到有私家醫院提供同類服務︰

浸信會醫院

時間︰星期一至五及星期六上午

預約電話︰2339 8461 (兒科) (出左世先好打去book) 2339 7208

查詢電話︰3505 6412 (專科)

費用︰$450/600 (普通/高級醫生診症費) + $1120 (化驗費) = $1570 / 1720

參考︰http://www.hkbh.org.hk/doc/leaflet/IEM_leaflet_dec%2013_chi.pdf

仁安醫院

時間︰星期一至六

預約電話︰2608 3366 (兒科) (出左世先好打去book)

費用︰$620-1120 (診症費) + $1300-1800 (化驗費)

聖德肋撒醫院 (法國醫院)

只會幫喺佢地醫院出世嘅初生嬰兒做

木木媽most likely會去浸會做，比威爾斯貴三舊水但時間flexible d又近啲，而且佢講明係同中文大學合作的，即血液樣本都係send去同一地方驗。仁安我就不推介，一黎貴又唔明碼實價，而且聽電話果位話一個月內去都得，有啲信唔過囉。

尿液樣本

主要由儲臍帶果間cordlife引入，叫「安康檢」，可以檢驗多於100種代謝病，計劃分 38+ / 68+ / 100+，驗得愈多愈貴，豐儉由人。需要喺初生嬰兒出世滿兩天，最少食過一餐，至出生後六個月內都可以做。無需帶BB出去，只需要用試紙去收集尿片嘅尿液，風乾入袋之後就打電話俾cordlife搵專人上門收件，八個工作天就收到報告。

除左cordlife，我見毅力 (即係主打做疫苗計劃果間)都有提供服務，係cordlife合作伙伴，搵邊間都無乜所謂，都係安康檢。

費用︰$1800 for 100+ (cordlife) - 純粹喺已join嘅媽媽度八返黎

毅力就喺宣傳單張寫明價錢，100+ $2388，但我記得之前聽kinetics講座有coupon用可以唔駛咁貴，應該都係$1800左右。

參考︰https://www.metascreen.com.hk/ (cordlife 安康檢)

http://www.kinetics.hk/download/leaflet2017/newbornbb.pdf (毅力)

-------------------------------

無錯，心水清嘅讀者應已發現木木媽揀左血液樣本嘅檢驗方法。初初我都諗，驗血要出世七日內，又要帶林林出去，驗尿俾多少少已經可以驗多幾十種，點計都應該驗尿啦。但後來我知道原來驗尿嘅「安康檢」係一間私人公司引入嘅，就開始對驗尿成效信心動搖。

我相信兩個方法都有一定準確性，而兩方面亦有提到假陽性 / 假陰性嘅結果，如果有異常，都一定會再check。只係我會偏向相信中文大學嘅研究，而當年港大亦係用血液檢驗。網上睇過好多文章，大致都係話︰

- 有啲代謝病 (eg 肉鹼攝取缺陷症) 只可喺血液中量度代謝物異常水平
- 有部分代謝病需要喺出世兩週內用藥先有效果

- 用血液樣本係國際認同嘅篩檢方法、有全球大型參考範圍和決策指標數據庫

(參考︰http://www.obg.cuhk.edu.hk/fetal-medicine/fetal-medicine_services/iem/)

-------------------------------

註︰呢篇文章寫黎係為左幫自己記低做左嘅資料搜集，亦希望分享俾想了解多啲嘅新手父母。以上後半資料都係木木媽遂間親自打電話去問，所以請尊重自己尊重他人，唔好抄襲，真係需要引用時請註明出處，謝謝。
(木木媽都真係好耐無寫過咁資訊性嘅文章...)

林林 • 三十三至三十六週小記

Nov 11-17, 2017 
[三十三週] 緊張憂慮症

真係唔讚得，上星期先話自己訓得好，本星期立刻逆轉，多左夜尿，晚晚都發夢，例如最近我搵唔返木木啲頭帶帽仔手套仔襪仔，夜晚就發返有關嘅夢，上網查返係後孕期症狀之一，因為孕婦開始緊張憂慮...

身體開始覺得唔輕盈，攰左眼訓左，起身坐低都要慢慢黎，會避免彎身踎低，行路已經係成隻企鵝咁，食飽飯個肚會有爆炸嘅感覺，擔心個肚會頂唔住爆妊娠紋。清胎毒徘徊喺想清唔敢太清之間，怕清得太行會早產。咁睇，其實都真係開始緊張憂慮...

而準備林林嘅野已經七七八八，只係差尿片洗衣液洗奶樽液果類consumables (太阻地方，打算十二月先訂貨)，木木間房已經搵左師傅度尺，希望快啲confirm埋個設計圖開工，可以趕得切聖誕前送貨就好了，如果唔係林林啲野都係一袋二袋咁擺唔到出黎。

工作上，為求多少少產後時間，放前一後九，冬至收早後先開始放假。日日望住月曆覺得好漫長，好似有排都未到冬至咁...而木木媽自相依為命嘅好同事離職之後，因裝修問題調左去另一辦公室一個月，之後返返去就一直自己獨佔整個office，雖然工作壓力係大，但起碼可以日日播住胎教音樂做野，亦安排自己唔會OT多過半個鐘。過多兩三星期就有新同事返工，到時我就無得咁自由lu~

------------------------------

Nov 18-24, 2017 
[三十四週] 服毒+清胎毒

十一月中下旬，天氣開始轉冷，咁岩呢個星期木木爸同木木媽公司都分別搞員工活動，仲要都係去白石燒烤! 真係唔多岩大肚臨dum嘅木木媽，不過就算唔去燒野食，我都仍然無乜點戒口，零食照食，真係唔太乖，希望林林皮膚好似家姐咁就好啦。

三十四週我覺得係時候要開始清胎毒，但又好怕太涼唔受得 / 林林早產，所以都好似上胎咁只係煮腐竹雞蛋糖水 & 芝麻糊。



另外亦開始左每晚會陰按摩，幫助減低順產時陰道口撕裂機會，詳情另文再介紹。

------------------------------

Nov 25 - Dec 1, 2017 
[三十五週] 病倒了

呢兩星期嘅天氣好難捉摸，加上木木媽人比較鈍，成日著多/少左衫。結果入完迪迪尼就衰左啦，鼻塞塞鼻水長流，啪粒piriton (孕婦可以食嘅收鼻水藥)已經好暈要訓...要快啲好返呀!

林林中英文名終於都定左啦。之前中英文名都各有兩個心水，一直決定唔到，有問過木木，佢每次都揀同一個中&英文名。木木爸有講過其中一個名俾佢改，但最後都係話俾木木媽話事 =] 有一日我同木木爸講要決定啦，再review啲名一次，點知喺旁邊嘅木木家姐好堅持咁要改佢揀嘅名，結果林林個名就係咁改左(!)

------------------------------

Dec 2-8, 2017 
[三十六週] 走佬袋 

木木媽都真係有夠過份，三十六週先嚟執走佬袋...其實袋內物品一直有逐步購入/搜集，只係今日先的起心肝擺入袋咁。問心上胎喺醫院嘅時間都係十下十下，又無乜點湊過木木，實在無心得可言。我覺得最易被遺忘係一對厚襪，雙腳保暖好重要！仲有記得帶本簿仔同筆去記低BB嘅食奶＆大小便嘅時間同次數，姑娘會問的。




另外陪月亦都嚟左家訪啦，但因為木木間房未搞掂，咩都未set-up好，唯有大概解釋俾陪月聽啲傢俱/廚具嘅安排。幸好之前訂左嘅七年新會大紅陳皮啱啱今日收到貨，陪月姨姨即時幫我炒埋米，太好啦 =]

[三十五週五天] 乙型鏈球菌篩查 • 政府 • 15

Nov 30, 2017 • w35d5

嚟到懷孕後期，又有一關要過，就係驗B鏈。所謂驗B鏈，即係公立醫院免費提供嘅乙型鏈球菌篩查，想知多啲就...請睇返上胎記錄：[三十五週三/四天] 產前檢查+乙型鏈球菌篩查• 政府 • 15

上胎木木媽係中左嘅，生木木時要比人打多一枝抗生素，不過陀呢胎時我問過幾個醫生，都係話無關連，所以希望呢胎唔中少一個風險啦。上次係好快走得的，今次唔同左，驗B鏈前要入六號房聽姑娘教點樣抱BB、點樣餵人奶，其實同廣華產科其中一個講座內容係一樣的，加上係二胎人奶媽的話，會覺得浪費時間...不過都好欣賞醫院為左推動母乳餵哺而增加資源嘅。



聽完講座就去八號房，由姑娘負責抽取樣本，用枝長棉花棒喺陰道同肛門撩一下咁，係唔舒服，但都只係一下兼好快。驗B鏈由於唔係醫生負責，所以只會有半日到診紙的，要留意。

[三十五週五天] 產前檢查 • 私家 • 14

Nov 30, 2017 • w35d5 • 劉珮琪醫生 • 5 LBS 2 OZ • BPM: 155

自從上次睇私家知道林林曳曳，臍帶纏頸兩圈之後，話完全唔擔心就假嘅，都有keep住同林林講叫佢乖乖地放過條臍帶...兩個星期後再照超聲波，希望有好消息!

結果...林林堅係曳嘅，而且已經三十五週，頭已經落盤約五分二，劉醫生話子宮內唔多夠空間俾林林unwind返臍帶啦。唯有希望順產時快快手，條臍帶夠長，唔好令林林心跳減慢，令媽媽唔駛食全餐啦...

不過林林都有驚喜俾到爸爸媽媽，就係竟然仲睇到佢個樣 (但都只得一瞬間)

BPD   8.71cm    35w0d  41%

HC     31.31cm  35w2d  32%

AC     30.11cm  35w1d   29%

FL      6.40cm    35w2d   31%

同兩星期前嘅數字比較，例如 FL percentile可以由70%跌返31%，其實係咪睇醫生點度呢，爭0.x厘米都可以差好遠 ._. 而體重就已經有五磅啦! 再住多五星期的話，唔知會唔會有七磅呢...?

[三十五週兩天] 產前檢查 • 政府 • 13

Nov 27, 2017 • w35d2 • 廣華醫院 • 廖雅麗醫生 • BP 117/67

第五次政府產檢，木木媽睇錯左時間，以為十點原來係十點半，早左半個鐘會點? 原來早到並唔會早叫你名，都一樣要1025先叫我去血壓站，不過等見醫生時間短好多，半個鐘就入得，出黎等三十秒就拎到覆診紙，計埋早到時間都係一個鐘走得，又可以接木木放學啦!

入房見醫生嘅過程都真係無咩好講，都係姑娘聽心跳，醫生度宮底高度就搞掂，我有問醫生林林臍帶纏頸兩圈點算，佢都係講我網上見到嘅數據，話有15%嬰兒出世時係臍帶纏頸，不過知有臍帶纏頸問題就會睇緊啲胎兒心跳，唔理想就會開刀。我好唔想開刀呀，無理由第二胎先整條疤架 ><

下一次產檢係兩星期後啦，但撞左木木學校表演所以改星期三，原來廣華產檢係逢星期一三五上午的。

[三十三週五天] 產前檢查 • 私家 • 12

Nov 16, 2017 • w33d5 • 劉珮琪醫生 • 4 LBS 9 OZ • BPM: 146

連私家都開始要睇密啲啦，三星期再黎睇劉醫生。平時睇劉醫生都唔駛點等咁滯，今日撞正佢要接生，以為有排等，點知都唔算耐喎，都係半個鐘內 (如果係孫醫生的話...)。

(好搞笑，好少見唧GEL唧到咁)



已經三十三週，頭仔已向下，我都估到未必睇到林林個樣，結果真係，林林背住左我地，又玩手玩腳，所以乜都睇唔到，而且已經落左少少盤，相信之後更加睇唔到樣了，唯有等林林出世啦。

不過最估唔到係，條友仔竟然玩臍帶纏頸，仲要纏足兩圈，OMG!
臍帶纏頸我都知係common嘅，當下都唔太大反應，但返屋企再google下，發現common嘅講緊係一個圈，兩個圈嘅percentage已經低左好多，而纏頸兩圈又能夠順產只有15%...即時有啲擔心，唯有日哦夜哦叫林林唔好再玩嘢，落盤前快快unwind返...

BPD   8.24cm    32w4d  31%

HC     29.54cm  32w6d  15%

AC     29.17cm  34w0d   54%

FL      6.29cm    34w5d   70%

頭仔偏細，非常好，易生! 
大腿偏長，非常好，長腿!

一直以來數字上林林都好似大過木木，心血來潮睇返舊blogpost，發覺依家林林比木木同期係重多一磅咁多! 睇黎呢胎有機會唔駛谷胎喎...

林林 • 二十九至三十二週小記

Oct 14 - 20, 2017 
[二十九週] 林林也投訴

呢兩三星期胎動非常頻繁，郁到肚會變形果種，尤其公司新office張檯會頂住個肚，就比以前更容易感覺到肚皮點樣起伏，哈哈! 不過所有胎兒都係好奸嘅，當你想錄低佢嘅時候，佢就會唔郁架啦...

上胎去睇戲時木木會狂踢，踢到我爭啲想離場。今胎依舊不理，近期仲睇左兩套 - kingsman the golden circle & what happened to monday，都係打打殺殺血淋淋果類，睇獵殺星期一時，嘩林林踢到呢...與木木同出一轍!

------------------------------

Oct 21 - 27, 2017 
[三十週] 大妹妹、小妹妹

踏入最後十週啦! 好老土嘅說法但時間真係不經不覺咁流走...好多野都真係要認認真真咁去準備，例如︰去婆婆家拎返啲初生衫返黎洗、去樹記買腐竹 + 整黑芝麻粉準備清胎毒、開始入手走佬袋物品、買定藥材俾陪月用、仲有木木間房要整過張小童床俾佢等等等等，希望個人唔好太懶，十一月底前KO晒佢。

木木雖然接受左林林將會出世嘅事實，不過佢最近又變招，要我做佢家姐，佢做妹妹! 仲日日「家姐家姐」咁嗌我 Orz 我話林林出世之後你做返家姐我做返媽媽啦，佢話唔好，最多佢做大妹妹，林林做小妹妹喎...但當我問到佢到時會唔會願意幫媽媽忙照顧林林，佢就好爽快答應嘅...well let's see! 預左會係一場硬仗!

------------------------------

Oct 28 - Nov 3, 2017 
[三十一週] 木木媽放大假

呢個放大假並唔係一般嘅放大假...因為早前原本book左同家人一齊上遊輪玩，後因發現「個肚籮咁大的我」係唔可以on board的，有嘗試過想賣左個package，但最後都係木木爸照原定計劃帶木木去...

遊輪上wifi package要科金嘅，我叫佢地唔駛買，因就算大吉利是有咩事佢地都落唔到船黎打救我。 而我絕對無「被遺下」嘅hard feeling，因為我先係真真正正撇甩大囝(木木爸) & 二囡 (木木)果個，哈哈! 三囡 (林林) 都只係撐下個肚，我勉為其難俾佢跟住我啦 XD

咁呢兩日我做左啲咩呢? 木木爸問我嘅時候我都唔係好答得出，但我又真係無停過...喺屋企我睇左一集韓劇、幫廁所個儲物櫃做斷捨離、開壇修補各式各樣小物；出街我去左護協買埋走佬袋啲嘢、順便去佳佳食碗芝麻糊清胎毒、去左澳牛行駛我大肚嘅權利(!)




本來我係預算會揀好孕照相去執、整個床鈴俾林林、整條揹帶玩具俾木木嘅，well, 世事總不如預期...right?

(講就咁講，其實都好掛住佢地，尤其夜晚就寢前，幾耐無試過自己一個訓...?)

------------------------------

Nov 4 - 10, 2017 
[三十二週] 直搗...(尷尬的)膀胱

自從我知道林林已經頭仔向下，佢胎動時我就會諗突出黎呢舊應該係手 / 腳，仲終於捕捉到肚皮面翻起千般浪嘅畫面。而且林林仲成日用個頭撞我膀胱，有時一撞我就好似想瀨尿咁滯，又由於我都算係訓得幾好嘅孕婦，無乜夜尿，結果一訓醒個膀胱係超越左100% capacity，俾林林壓到痛! 睇黎臨訓要減少liquid intake先得。

上胎臨盤前肚圍35.5寸，唔算大，今星期已經超越左呢個數字，有36寸啦! 暫時個肚皮都尚算白滑，肚臍未突，希望守得住!

三十二週，影埋第二輯孕照啦，唔敢好似上胎咁盡，成三十五週先影 =P

nov7係結婚週年記念日，facebook & page終於公佈孕訊，一直堅持嘅懷孕記錄可以分享俾大家睇啦 =] 

 

[nov7] 小林先生夫人的七週年銅婚紀念

當我想打呢篇blogpost嘅時候先發現，原來我寫到三週年皮婚 (2013) 就無再寫落去...都係因為木木囉! (賴得就賴) 其實之後幾年都有慶祝，不過無再就正日喺外地慶祝，只係帶埋木木去返證婚嘅地方影張相，出街食餐飯咁。

四週年絲婚 BLT steak
五週年木婚 La Locanda by Giancarlo Perbellini
六週年鐵婚 wooloomooloo

今年係銅婚，或稱羊毛婚，小林太太因為屋企無毛冷而決定叫銅婚(!)，是故七週年牌上附有香港一毫硬幣一枚! 我有check過架，一毫子成份係鋼芯鍍銅合金，qualified的!

之前三年都有帶埋木木出去，今年無帶木木，帶左林林 =P
去左我想食好耐嘅溫野菜，小林先生話我地愈食愈求其...其實大家都開始覺得去邊度慶祝、要唔要買禮物都唔係重點，重點係大家在一起 =] 不過講得出呢句說話，就代表我地老了 T.T

之後先去返註冊場地影相，唔知呢個地方仲可以俾我影到幾多年呢?

七年，有說七年之癢，都叫做平平安安渡過左，仲多左件林林添 =P
下年要帶兩個小朋友黎影八週年啦! 期待!

[三十二週兩天] 產前檢查 • 政府 • 11

Nov 6, 2017 • w32d2 • 廣華醫院 • 孔敏惠醫生 • BP 123/69

第四次政府產檢，終於俾返個早嘅時間我 (0930)，唔駛咁趕返公司之餘仲可以接到木木放學 (在職媽媽好珍惜每次可以接放學嘅機會)。

不過都等到1045先見到醫生，入去前我whatsapp老公，出嚟再whatsapp佢，佢話得果三分鐘，廁所都未去完 XD

今次係女醫生，櫈都唔俾我坐就叫我上床，姑娘先聽心跳，佢搵左陣先聽到，但後面有個高級姑娘就要佢再搵一次聽清楚啲。醫生就用手摸肚，話頭仔已向下，用軟尺度肚底長度，話size正常。再補多句話上次抽血啲血糖OK，唔駛飲糖水 (YEAH!)，走得。

下次產檢會係三星期後，開始變頻密啦。

[三十週六天] 產前檢查 • 私家 • 10

Oct 27, 2017 • w30d6 • 高錦安醫生 • 3 LBS 7 OZ • BPM: 146

等左四星期，終於可以再見到林林啦 (其實係佢阿媽慳皮隔咁耐先再私家產檢)。今次又轉左另一個醫生，因為劉珮琪醫生太full，唯有轉睇同診所嘅高錦安醫生，呢位醫生朋友同媽媽會都睇過話好的。

上胎全程都由孫錫鴻醫生睇，仲記得果時佢岩岩搬新診所，添置左新超聲波儀器，產檢時睇3/4D佢仲興奮過我，自己不停搵最佳角度，仲整色整水調較顏色，好有andy warhol style。呢胎由於照結構、睇3D最黃金時間嘅二十零週都唔喺孫醫生旗下診所睇，所以一直都未有好清楚嘅林林3D照。今次三十週再返去睇，自己都有少少期望...

之前都係去石門診所，今次book左闊別近四年嘅尖沙咀診所，一開門真係嚇親! 以前人都多，但多極都係坐滿梳化，有部份人會落左去harbour city行街。但今日係人山人海，坐滿梳化不特止仲企左好多人，要離開診所都左穿右插咁好誇張! 本來諗住有排等，但姑娘又竟然話下一個到我，唔通個個都睇孫醫生?





高醫生比我想像中年輕，但感覺就無我聽返黎講到咁細心，係咁易問兩句，亦無問我拎結構報告睇就話過隔離照啦。

其實林林同木木都超乖 (喺肚入面計)，一直都無令木木媽辛苦 / 擔心，平平安安咁長大，近排開始聽啲媽媽話臍帶纏頸 (其實好common & 纏幾圈好小事)，我又多口問一句高醫生林林有無，結果當然係無啦 =] 各項數值都合乎週數，胎水充足，林林重大約三磅半，媽媽體重血壓都OK (重左13磅)，所以都好快就照完...

至於林林個樣，高醫生都深明媽媽們需要，有盡力搵林林個樣，都係口腫鼻腫咁啦，哈哈! 希望三星期後再去都仲睇到個樣，因為今日三十週六，林林頭仔已經向左下啦，無乜野都唔好亂郁啦知無?
頭骨橫徑  BPD   7.73cm
頭圍         HC      28.05cm
肚圍         AC      26.59cm
大腿骨長  FL      5.58cm

----------------------------------

產檢如果無帶木木，就係我倆拍拖食好西之日 =]

見LCX開左度小月，上次喺台灣食度小月都已經好幾年前嘅事了，就諗住入去食碗擔仔麵就走人，點知一碗$28，每人最低消費$60，哈哈，奸計不得逞，唯有每人隊多碗魯肉飯 =P

林林 • 二十五至二十八週小記

SEP 16-22, 2017 
[二十五週] 腰痛來了

呢個星期起身開始覺得腰痛，係時候要戴托腹帶了。

------------------------------

SEP 23-29, 2017 
[二十六週] 滴 • 滴 • 滴雞精


胎動感覺︰像一頭伸懶腰的怪獸，而呢隻怪獸仲開始有hipcups =]

之前BB展試左幾間依家好興嘅滴雞精，都有興趣飲下補身，因為明顯感覺到陀林林呢胎，兩邊父母都無上胎咁緊張 (可能諗住都第二胎唔駛點理我 =P)，佢地年紀大左 (唉我自己都老左幾年啦)，唔期望辛苦佢地煲嘢俾我補身，所以滴雞精絕對係方便直接簡單之選。

最後我揀左王朝滴雞精，join左團購whatsapp group，比門市平，大約$33/包，一盒十包，三盒起送貨，但唔好係個團購過千人，admin得一個，處理時間要好耐又易被遺忘，而且入數要俾多幾蚊幾毫個團主賺。

飲用極之方便，冰格拎一包出嚟放入滾水 (已熄火)，浸三分鐘就可以剪開包裝倒出嚟飲，暫時都係weekend先會飲，一星期一兩包，所以未見明顯效用住。

------------------------------

SEP 30 - OCT 6, 2017 
[二十七週] 兩孕傻六年

人地話「一孕傻三年」，真係無錯架! 即係話我岩岩先傻完，依家又再傻過! 最明顯就係記性差到一個點，所有野轉個頭就唔記得。近期最嚴重係之前朋友幫我買左張月餅卷，木木爸幫我交收完交俾我，正常嘅我係會放好入銀包...但呢個星期諗住拎去換時，我翻天覆地咁搵都都搵唔到! 咁就無左一盒好好味嘅奶黃月 T.T 


------------------------------

OCT 7-13, 2017 
[二十八週] 結束第二孕期

時間真係過得好快，轉眼第二孕期就要結束啦! 第二孕期的確係最舒服嘅階段，行得走得，又唔駛太戒口，去迪迪尼都仲得 =]

不過明顯覺得個肚大左好多，有時烏低身會覺得頂住頂住，行路會不自覺會挺個肚出黎，所以密左戴托腹帶，夜晚訓覺亦開始要左轉右轉先搵到個舒服嘅姿勢。

而且天氣終於開始轉涼，秋燥令我流左成個星期鼻血 (血絲居多)，好乖咁即刻煲雪梨蘋果水，早晚必定用油浸肚，再去入手孕婦leggings。

仲有天氣涼左令我減低好想食雪糕嘅慾望，平時都無咁覺，有左就對唔食得嘅特別在意...今個夏天，agnes b出軟雪糕、haagen daze出新口味、個個牌子都做買一送一，木木爸仲買movenpick package...天氣涼啦! 大家都唔準再食雪糕!

希望第三孕期唔會太難過，提醒自己事事小心啲!

木木媽的護膚妝品 • 續

的確我有寫上一篇的 (click here)，就係上一胎懷孕之時。
本胎就一於review下上胎產品+介紹入宮新品 =]

(以下非廣告文，全部都係木木媽真金白銀購入)

護膚品
一如既往，木木媽真係唔係每晚搽幾十樣嘢上面嘅人，不過咁岩用開果幾樣護膚品都剛剛見樽底，就索性轉pregnancy-safe嘅品牌。

今胎用韓國品牌primera =] primera早係木木出世時已經有朋友送過同牌baby body wash，坦白講body wash就一般，但呢個牌子不含呢樣果樣，包裝環保，已經令我有好感。上年去韓國旅行買左幾款試下，覺得好好啊! 成份天然，用植物為主打，所以宣稱孕婦可用。可惜係想買時偏偏無人去韓國玩，最後焗住喺Gmarket訂返黎...



幸好G都有贈品送，babymoon時可以用了 =]



潤唇膏都轉左，本身係用ettusais，但睇唔明啲日文唔知道咩成份，雖然我估應不含石油，但都係唔用好，網購時見到下圖左呢支badger unscented organic lip balm, USDA Certified Organic，成份只係好簡單嘅beewax同其他兩三樣嘢，但滋潤度好足夠，又平 (購入價約HK$17)

中間erbaviva organic lip and check balm好好用，但我唔只係用喺lip & cheek，而係帶出街當萬用膏，有時出出下街/ 返返下工個肚 / 大脾突然好痕，我就會用佢劃幾下，即時舒緩，唔痴立立，又唔會成手cream

圖右係e.raorganics complete cream，本身唔係特別孕婦用，只係見佢呢個美國家庭式營運嘅小品牌成份好好，無多餘化學物，亦適合所有膚質，就買黎試下用。聞落有陣椰子味，偏向杰身但易推，有時我沖涼後揸完belly butter & oil，臨訓前會再封多層complete cream進一步護肚




化妝品
本來已經唔多化妝嘅木木媽，依幾年出門口前仲要張羅木木小姐嘅嘢，就更加無時間...化妝品我依然本住「最緊要個底安全」呢個諗法，不過上胎用過嘅beyorg礦物粉已經俾我打左入冷宮，唔係隻粉唔好，反而係個撲好易俾我撲爛，已經特登去返beyorg配過個撲，好快又爛，我放棄...

今胎得其他媽媽介紹，知道日本有個品牌naturaglace，係孕婦安全之選。有個入門set包括BB cream & 碎粉，夠我得閒用下架啦 =] beyorg有賣呢個牌子，但markup左好多，我搵朋友幫我喺日本帶返黎的。



香水、止汗劑、指甲油
香水其實自從有左木木已經戒左，上胎好憎人工香味，木木出左世埋身餵奶亦唔可以噴香水。呢胎都一樣好討厭，家中珍藏香水已經被塞到不見天日的陰暗角落，我枝jo malone仲益左木木爸...

止汗劑孕婦要避免用走珠型/ 噴霧型，最好用天然消臭石，木木媽用日本牌子soft stone，第一代仲要濕水果款用左好幾年仲用緊，原來依家已經有第二代，係膏狀無需濕水，仲方便呢。

指甲油，一知道有左就立即卸左佢，未來又起碼年幾兩年唔駛再搽...坊間有少數牌子話孕婦可用，但木木媽依然建議安全行先，扮靚行埋一邊。

防妊娠紋產品
上胎主要用bio oil，後期加左支l'occitane輔助，end up產後紋都無條，木木媽覺得功勞係歸婆婆遺傳嘅，因為實在聽過太多無論搽幾多都係爆紋嘅個案...

今胎四、五週已經去搵代購買左枝水貨bio oil，同上胎一樣七週開始搽，搽左一兩星期之後突然有覺悟，立即停用! 發生左咩事? 

原因係上胎我用左bio oil一排之後左右腰位都好痕，一痕我就補油，痕左好耐好耐...但當時唔覺得有問題架喎(!) 今胎照辦煮碗，用左一個星期後又係同一部位開始好痕! 我先猛然醒覺，其實我係咪對bio oil敏感? 之後停用一兩日，立即唔痕! OMG! 我實在太後知後覺，遲左幾年先發現真相...故此我又要找尋另一款防妊娠紋產品...

以下係我今胎嘅護肚大軍︰



anti-stretch mark oil:
左起︰mambino organics body toning oil, e.raorganics belly oil, erbaviva stretch mark oil, weleda stretch mark massage oil



mambino organics - 美國有機母嬰品牌，USDA certified organic，香港sogo, mothercare，網上amazon等有售，喺媽媽group都有聽過其他媽媽有用，入門通常買set - belly butter (見下段) & body toning oil。呢set最早買落，我會晚上同belly butter一齊用，由十二週開始每日用，廿六週用完，大概用左三個半月。

e.raorganics - 美國有機小品牌，USDA certified organic，應該無乜人識，但amazon好評什多，亦只在amazon上銷售，會出現因為小量生產而搞到amazon無貨出要等嘅情況，由此可見產品好「新鮮」而品牌經常好闊佬地send 20% or 30% coupon code。belly oil主要油分來自 sunflower, borage, rosehip, extra virgin oilive, apricot seed & primrose oil。我會早上單搽呢枝油。

erbaviva - 美國有機品牌，USDA certified organic，唔知香港有無得賣，官網買25% off first purchase。比較少人提及，我自己都係買完MO之後驚唔夠成個孕期用先試多一個牌子。

weleda - 來自瑞士嘅老品牌，雖然無USDA certified organic，但品牌口碑好，大部分產品都被推薦，日本都好興呢個牌子，木木媽喺網站iHerb購入。

四枝油其實成份都好安全，搽出黎除左erbaviva之外，其他三隻都算吸收得快
erbabviva除左索得慢，個樽口設計仲好差，成個五豪子咁濶，一唔小心就會倒左半枝去




以性價比黎講︰
mambino organics - set裝價唔識計，如以amazon貨size計，hkd240 / 150ml = $1.6/ml
e.raorganics - hkd176 / 125ml = $1.41/ml
erbaviva - hkd183 / 125ml = $1.46/ml
weleda - hkd138 / 150ml = $0.92/ml

最抵用係weleda!

belly butter / cream:
左︰mambino organics organic oh baby! belly butter
右︰erbaviva stretch mark cream



mambino organics充滿橙香，butter出奇地非常易取易推，到夏天時texture再軟身啲，真係好似牛油咁會溶啲，哈哈! 因為每晚用喺胸、肚、臀、脾，用量頗多，用左兩個月後中間開始見底



erbaviva係cream，估唔到仲難推過butter! 要唧好多要夠搽成個肚，極速用晒，所以erbaviva無論係油定係膏都麻麻地，不推薦。

--------------------------------

分享報告完畢。 上胎無爆，無理由第二胎要失手right? 努力護肚!

嬰兒用品・螢光劑大測試

現今父母，有能力的話都想提供最好嘅俾自己小朋友。
但有時貴買以為品質好嘅嘢，結果原來唔係果下慘。
前排睇新聞，話測試名牌BB衫，十居其九都含高螢光劑!
話有機棉，亦只係指棉花以有機方法種植，並唔代表製衣過程無其他添加

螢光劑全名係「螢光增白劑」，係一種合成染料，有增白嘅效果，所以常被用於紡織物。螢光增白劑毒性不大，但始終係一種化學物質，如BB係敏感底，有機會出現皮膚敏感，例如痕癢或紅腫，亦有說法話螢光增白劑會致癌。

而螢光增白劑有分可遷移性 & 不可遷移性，無遷移性嘅對人體唔會有害，可遷移性嘅螢光物質會藉住洗滌、磨擦、或碰觸而轉移去其他地方或人體皮膚。

眾多嬰兒品牌所送嘅免費贈品，一直都知道就算望落OK，其實品質成疑
所以今胎的起心肝去淘左枝螢光劑測試棒，嚟個大測試!
當然你問我幾廿蚊一枝測試棒信唔信得過，我都唔知架，哈哈!
測試棒用法好簡單，對住布料「嘟」就會顯示螢光劑含量

含量多與少請參照下圖︰

因為無乜點買新衫俾林林，而木木果啲洗左無限次不能作準，所以今次主要針對奶粉/尿片商嘅贈品做測試 (亦比較有機會有驚人結果!)
紗巾類 (贈品)
 雪印 - 0.00 (無)
 美贊臣 - 0.00 (無)
 生寶臍帶升庫 - 0.02 (弱)
 cordlife - 7.03 (強)

紗巾類 (真金白銀購入)
 soft touch - 0.00 (無)
 日本購入，中國製 - 0.00 (無)
 韓國購入，韓國製 - 0.05 (弱)
 日本購入，日本製 - 0.45 (弱)
 日本購入，日本製 - 5.61 (強) OMG...

口水肩類 (贈品)
 雀巢 - 0.00 (無)
 美贊臣 X natures purest - 0.00 (無)
 不知名，淘寶貨 - 0.01 (弱)
 cordlife - 0.08 (弱)
 美贊臣 - 5.57 (強)
 安滿 - 5.87 (強)
 雅培 - 6.07 (強)

被仔 (贈品)
 雀巢 - 0.00 (無)
 美素佳兒 - 2.27 (中)
 美贊臣 - 5.12 (強)
 美贊臣A+款 - 6.22 (強)

其他
 美素佳兒汗巾 - 0.00 (無)
 雅培BB枕頭 - 0.00 (無)
 美贊臣和尚袍 + 手套 - 0.00 (無)
 H&M 帽 - 0.09 (弱)
 雪印咬咬巾 - 0.28 (弱)
 雪印衫仔 - 5.68 (強)


睇完上面嘅測試結果，原來都有部分贈品做到不含螢光劑，亦會有同品牌嘅贈品有啲好多有啲完全無，仲有日本製嘅都唔代表絕對無添加。

你問我仲會唔會用含高螢光劑嘅贈品...都真係未必會，可能你話，唏你咪又係咁大 (經常聽到)，木木果時咪又係咁用...我覺得以前還以前，時代會進步，試下叫啲機不離手嘅大媽唔準再玩candycrush睇下佢肯唔肯? 既然科技與資訊都進步左，就更應該有效利用去改善生活而非故步自封囉。


戴頭盔︰以上測試純屬個人自娛性質，不應視作參考資料，睇完「嘩」下好啦 =]