台北四天紙婚小旅行 • DAY4 • 探探台北動物們

8 NOV 2011 雨
臺台市動物園 > 台北車站 > 西門町 > 台北 > 香港
最後一日啦~ (好滾動，終於有一個遊記係可以寫得完...)

之前都講過，我地唔係去過好多次台灣，剩係台北仲都有好多地方未去過
四日行程，花左八份一時間係呢度 - 臺北市動物園
動物園隔離就係貓空纜車，時間不多無機會搭去貓空茗茶...下次啦~



可愛的入場劵 =]
講開又講，如果大家去台灣都仲會去下觀光景點 (有人去台灣去到好似入長洲行下咁架嘛...)
可以係台灣各機場旅遊服務中心申請「青年旅遊卡」，交通景點飲食有優惠
唔駛錢申請，好過無嘛~ http://www.youthtravel.tw



好耐無去過動物園啦啦啦~ 上次去新加坡又無時間去safari world ><
超級無敵勁興奮不停跑跑跳跳又大叫 (就係咁動物園就多左隻不知名未進化動物...)
我真係好鍾意去動物園! 除左...

兩棲爬蟲動物館! 打死都唔入!
成世女最驚就係呢類野，電視睇到會轉台，依家打緊BLOG都唔敢直望張相!

真動物無得近距離觸摸，假的都照殺 =p
睇返的相，發覺bubu好鍾意挑釁佢地...無鬼聊!
而我就好鍾意同佢地碰鼻鼻 =]

企鵝篤我條腰啊!

熊︰大家好! 我係馬來熊，唔好見我無所事事，我都有事業...線架!
夾俾你睇又點話 XD 我夾~~~



係日本奈良公園有上百隻鹿鹿，想搵隻有角的好難，成年鹿好多都俾人磨走左對角
呢位係台灣的梅花鹿同胞就幸福好多，對靚角力保不失，d紋身仲好清晰添~

遊戲︰呢度有三隻長頸鹿，請問有幾多隻腳?



如果熊貓係可愛的代表，咁呢隻馬來膜就係醜樣的代表...
真係同動物唔同命，大家都係黑白色，點解人地可愛過你咁多，你檢討下啦 ><



一家三口猴子~ (唔記得左佢地邊度鄉下)
最難能可貴之處並唔係見到佢地一家三口樂也融融
而係少有影到相中的馬騮唔係互相R緊痕!



印象中，呢次係我第一次睇樹熊呀!
真正的樹熊懶過樂天熊仔餅好多，個樹丫好似好好挨咁...



呢隻黑熊勁多小朋友圍觀，因為佢的睡姿實在太搞笑~
訓到好似俾人一槍打死左咁 XD
我都有諗過，如果佢係詐訓，突然彈返起身，一定嚇死d小朋友...(包括我)

亞洲象~
我好低b咁特登行埋去班小學生度扮同學...



仲探左好多其他動物，雖然落住微微雨，但係絕大部分動物都好俾面無呢埋，多謝你地~

-----------------------------

搭捷運返台北車站，四日三夜個心都掛住一定要去光南一定要去光南
(本來仲有後面的久大，裝修中，嗚~)



除左補倉，其次目標就係要掃紙~~~掃呀掃，完全無視bubu的存在!
我真係唔知自己揀紙揀左幾耐…



返西門町繼續掃…街～
都話左我只係第二次去台北，所以聞名的老天祿滷味同阿宗麵線我係未食過架...
試完發覺...原來我唔鍾意食糊糊地的麵線，仲要大大碗又熱辣辣又無得坐又趕時間 ><
即刻走去食返d comfort food  - my dearest mister donut，繼光香香雞，又試左coldstone炒雪糕 =]

食完就真係夠鐘返酒店拎行李搭的士過台北車站，照舊搭國光客運~



kitty lounge =] 唔知將來會唔會有機會帶BB去台北旅行用到呢個baby care room?
(無任何深層次意義，唔駛左估右估啦~)

野~! 終於完成一個遊記...咁大把啦! 可以暫時撇甩「虎頭蛇尾王」個朵 =p

靜靜雞話你知，其實今次去台北唔係為慶祝紙婚
而係去巡視我地小林家係台灣的多元化業務...哇卡卡 XD



----------------------------------------------------------------------------------

相關閱讀︰
台北四天紙婚小旅行 • DAY1 • HKG > TPE台北四天紙婚小旅行 • DAY1 • 淡水＋美麗華百樂園＋士林夜市
台北四天紙婚小旅行 • DAY2 • 濛濛的九份
台北四天紙婚小旅行 • DAY2 • 漫遊東區再乾杯
台北四天紙婚小旅行 • DAY3 • 去北投泡個熱呼呼溫泉
台北四天紙婚小旅行 • DAY3 • 85樓的紙婚飯