台北四天紙婚小旅行 • DAY2 • 濛濛的九份

6 NOV 2011 雨
九份 > 東區 > 乾杯

第二日早上plan左上九份，要食飽早餐
just sleep的早餐唔係太多選擇，不過勝在夠正常，唔駛驚食完肚仔痛



由西門站搭捷運去台北車站，行過去臺鐵搭火車
原本我出發前已study左要搭邊種車邊班車架
唔記得因咩事有人撩交嗌 (成年前仲記得，bubu你老婆都幾記仇架喎!)
嬲到我扁晒咀，最後連買左咩飛，上左邊架車，目的地去邊都唔知
(仲要無得買我好想試的台鐵便當!!!)
搭搭下開始見唔對路，唯有係火車上問本地人，知道係八堵要落車去另一個月台轉車先可以去到...



未上九份，係台北市中心已經落起毛毛細雨
「落雨」好似已經成為婚後旅行的標記...



anyway, 終於平安到左瑞芳 =]



09年plan台北行程時，睇過話上九份的巴士係車站對出的頂好超級市場度搭
今次去已經唔係lu~係瑞芳車站前站出口轉左行一小段路，經過警察局就見到



你睇~不過聽埋聽埋，都未聽過有朋友去九份時風和日麗天朗氣清...

而且上到九份即刻感覺到凍左+大風左，記得帶件外套啊~
(不過入到去，又因為太迫人而覺得好熱._.)



去九份主要都係為左食 - 開始掃街!

呢檔賣炸蝦球係入去左邊第一檔，一見到成座蝦山已經好想食
但心諗住quota有限睇定d先，最後臨走前都係忍唔住食左...
[唔好食] 完全俾座蝦山呃左!



魚丸伯仔賣魚蛋，初時唔知咩叫「冬粉」，諗住叫左先算...原來即係粉絲 =]
[好食] 呢個魚蛋山就信得過啦，彈牙爽口!



雪糕花生捲唔知實際叫咩名，個名係我作的 =p
佢有d似我地香港既糖蔥餅，一塊圓形白麵皮
上面舖左由一大磚刨出黎的花生糖碎, 重點中間夾住兩球雪糕!
[好好食] 本身九份凍凍地，再食個雪糕捲真係無得頂~



各式台灣腸完全係行過見到口痕要食，不過本來就係我同bubu的共同至愛 =]
[好好食] 台灣腸真係特別好食架，尤其佢地用炭爐烤過果d，腸衣脆卜卜甜耶耶
入面又肥又香...當然佢亦比廚師腸更無益...



賴阿婆芋圓芋圓係九份另一特色小食，知道最出名係阿柑姨芋圓
但係一路行上去都未見 (無諗過要行到國小咁高先到)
途經賴阿婆，記得都ok就坐低左 XD
阿婆其實都好多人幫襯啊 (可能好多都好似我地咁...)，而芋圓亦好QQ
[好食] 之前未食過，食過就愛上，有衝動想買包返去煮!

關於食應該係咁上下，仲有d九份必吃
eg 阿蘭草仔粿，肯定唔鍾意食就無謂試
繼續向上行，見到九份國小就代表到頂啦 (當然亦途經左阿柑姨 ,._.,||| )

天濛濛又落住雨，到此一遊就行返落去lu~



行返落少少分叉路轉左落，又有另一番景象 - 依山而建的茶樓群
(人地茶樓真係茗茶，唔同我地嘈喧巴閉爭位搶點心的茶樓...)
無閒情逸致慢慢茗茶，係外面欣賞佈局建築啦唯有 =]
(咁點解afternoon tea又有?)



行到落最低就係昇平戲院，關於戲院歷史及發展請自行wiki
(咁算係咩遊...記...)
我最緊張就係要去吸印仔 =p



戲院旁邊有間香草舖子，未行到已經俾芳香撲鼻的薰衣草吸左埋去
兩個放棄自己原來工作的台灣女仔，一手一腳搵地方種薰衣草，造手工薰衣草產品...
(左上) 有得試手工皂，試完之後，忍唔住狂索...真係好香!
之後都買左一舊返香港用，洗完手唔乾，襟用唔易散，最重要係好香~

我地仲坐係舖頭出面的小庭園，寫上山前係車站買的「十分幸福」明信片 =]



九份大致上已經行完，沿路行返落入口 (沿途繼續食食食)，搭公車落返瑞芳車站
臨走前係車站呢間店舖可以寄剛才寫的明信片，有特別的郵戳 =]



其實成朝係九份一直都落住雨，時而傾盤大雨，時而毛毛細雨...
但當落左山之後，就鬼死咁好天...



走lu~係呀我地只係去九份
因為時間緊迫，唔夠玩埋平溪線，十分 / 平溪 / 菁桐都無去到
果期仲要「那些年」大熱，無得去放天燈有少少失望
不過唔緊要啦，下次再去...台北之嘛 =]



DAY2下午同夜晚去左邊呢? 成年前真係唔記得...
無晒貨係手 (相片)，要返屋企執貨先有料寫BLOG啦 =p

----------------------------------------------------------------------------------------

相關閱讀︰
台北四天紙婚小旅行 • DAY1 • HKG > TPE台北四天紙婚小旅行 • DAY1 • 淡水＋美麗華百樂園＋士林夜市