[二十二週四天] 產前檢查 • 政府 • 7

Aug 30, 2017 • w22d4 • 廣華醫院 • 葉嘉榮醫生 • BP 121/67

第二次政府產檢啦～
今胎廣華俾我嘅時間都好晏，十一點幾咁，注定要包尾坐到一點啦 T.T

都係四號房，但今次係年輕男醫生。俾劉子建醫生嘅結構報告佢睇，佢一睇就話：「嘩！好貴㗎喎」(我應該俾咩反應...) 上床俾姑娘揾心跳，揾左幾個位都揾唔到，直至到某個位，姑娘唔算好大力按落去，但就整到我好痛，我只係係咁易講左句「哎呀有啲痛」，姑娘就嚟料係咁UM我「咁可以點丫係得呢個位先聽到心跳嘛」...

落床去返醫生枱，醫生話：「劉教授份結構報告話你無乜問題，咁OK㗎啦」(都係嘅...)突然醒起之前第一次睇劉珮琪醫生話，我上胎中左B鏈，今胎都應會assume我有咁樣處理，於是就問下醫生係咪咁啦。佢知劉醫生喺東區醫院出身，佢就話廣華唔會咁㗎喎，除非你上胎個BB受到感染啦，問我木木當年個情況係點，我話我唔知...因為當年木木一出世就落左兒科，陰差陽錯下幾次都見唔到醫生，直至出院我都唔知其實木木有無任何問題，只係本住「佢俾得木木出院應該係無問題」嘅諗法...點知又俾姑娘話，話兒科醫生要約先有得見，醫生好忙㗎 bla bla bla...(OK又係我唔啱)

反而醫生好好，明明趕住一點食飯都幫我揾返三年前木木個記錄出嚟睇，仲話返俾我聽，當年係因為我生木木時發燒，所以木木先要落兒科觀察下，但其實佢喺兒科乜事都無㗎喎。多謝你呀葉醫生！終於解開左呢個謎！

[二十一週五天] 結構性超聲波檢查 • 劉子建醫生

Aug 24, 2017 • w21d5 • 劉子建醫生 • 15 OZ • BPM: 162

上胎我係喺孫錫鴻醫生度做埋結構的，今胎孫醫生已加到$2500，我睇開嘅劉珮琪醫生無做照結構，之前喺劉子建醫生度做NIFTY，所以好早已經決定以package price做埋中期結構檢查。劉醫生同另一位林勇行醫生都係呢行嘅權威，而呢胎暫時都順順利利，所以都無乜話擔心 / 期待 (第二胎...)

自從上次產檢帶埋木木去，時間就到的話我地都想帶埋木木去探林林，等佢同林林多啲connection。今日約左下午，到達時都無其他孕婦，所以極速磅完重已經有得入房見劉醫生。

照結構同普通產檢有咩唔同? 請稍移滑鼠睇返木木媽上胎文章︰

[二十週六天] 結構性超聲波檢查 • 孫錫鴻醫生

劉醫生都算照得快，唔係停留一個畫面慢慢講你知呢啲係乜果種，不過佢一路照一路自己口噏噏話照左啲咩，睇doppler都有解釋有幾多條血管邊條動邊條靜脈嘅，所以勉強都跟到。姑娘喺旁邊keep住打剔，所以亦唔擔心醫生會睇漏項目。整個過程大約十五分鐘。

劉醫生一句總結︰睇唔到有咩問題，係一個好正常嘅胎兒。

YEAH!!!

頭骨橫徑  BPD   5.3cm     (62.5 percentile)
頭圍         HC     18.22cm (18.5 percentile)
肚圍         AC     16.49cm (42.4 percentile)
大腿骨長  FL      3.54cm   (56.9 percentile)

今次如無意外係最後一次睇劉醫生，上次做NIFTY時唔醒起拎贈品，咁填埋先走。填左好耐，等亦等左好耐，但姑娘遞俾我時真係嚇一嚇! 重到木木爸都投訴 「搞咩咁大袋咁重?」返到屋企先知，原來有成八罐一號初生奶粉，唔怪得! 我不禁心裡自問，難道贈品多寡會同醫生收費掛勾...?

碌過左結構當然要慶祝下! 最大得益者莫過於木木家姐，哈哈



朱古力耐唔耐都有食，醫生話食朱古力不如擔心糖分多過擔心咖啡因!
yummy choco tart & hot choco!



都係果句，過左結構，可以開始SHOPPING啦! (可悲是無咩要買...)

林林 • 十七至二十週小記

JUL 22-28, 2017
[十七週] 肚皮突破三十大關

關於懷孕體重、腰圍肚圍等，一直都有好好記錄，甚至可以同上胎同週數做比較。今胎開始時體重已經比上胎多幾磅，而腰圍亦不復當年24吋...每個星期對比，都係比上胎磅數止跌回升得快，腰圍肚圍又大得快，十七週已經達到30吋肚圍了! 上胎臨生前肚圍35.5吋，唔知今胎會唔會突破呢?

肚肚拍照記錄亦每星期進行中，不過就無上胎咁好心機自己整週數牌，亦會間中甩一兩星期咁...

而木木就明顯乖左，少左扭計，亦多左接受林林，會隔住肚皮同林林玩下。佢好鍾意我問佢情境題，例如︰如果你同林林去公園玩，林林俾大哥哥推跌左，你會點做呀? 佢會答我︰我會即刻跑埋去林林度，然後帶佢返屋企 =]

流感肆虐，立刻去藥房入返盒口罩，老闆話︰你咁細塊面用小童口罩得架啦!



日常肚照

------------------------------

JUL 29 - AUG 4, 2017
[十八週] 論盡的大肚婆

除左既有嘅pregnancy brain (無好轉過ok?)，呢胎個肚漲得快，好似無上胎咁輕盈，仲好鬼論盡 (其實係咪有左都好論盡)。有晚陪木木入睡，自己亦好自然地訓埋一份，訓冧左之後突然電話鬧鐘響! 我怕會嘈醒木木就拿拿淋去整停佢，點知碌過去時唔知點解會碌左落地!

幸好個肚未算太大，林林亦有羊水保護應該無大礙，但自己就撞親個頭擦損手，真係論盡到一個點...

本週開始學孕婦瑜珈，主要想喺炎炎夏日下能夠比較舒適地伸展身體手腳，同時希望多做有助生產嘅瑜珈動作! 目標係快過木木嘅兩個半鐘 =P

受邀出席活動，自以為鬆身裙掩蓋得好好，估唔到放一張全家福上page都已經有眼利網友pm問係咪有喜 =P (當時未公佈)




日常肚照



------------------------------

AUG 5-11, 2017
[十九週] 把心情都弄糟透的荷爾蒙


之前都分享過，呢胎好似好易喊咁，少少事都覺得好委屈，會唔開心，應該真係關荷爾蒙事，因為有左之後嘅喊法係濠啕大哭，然後心情低落一兩日，我都知咁樣對林林唔好，但真係控制唔到。

木木爸其實好錫我，但真係希望佢言語上可以再多啲顧及孕婦感受...

呢胎因為去開果欄果頭睇中醫，就多左去果欄入貨，金車厘子的確好甜! 食完金車唔想再食普通車厘子...



------------------------------

AUG 12-17, 2017 
[二十週] BABYMOON!

小林家+四大長老都係嚴禁大肚婆搭飛機去旅行的，所以我亦無指望過會有babymoon呢件事發生喺我身上。今年年頭，book左十月尾同屋企上royal caribbean郵輪玩，有左之後去check cruise ship T&C，發現上船時要未滿廿四週先可以 (木木媽屆時已三十週)，即時灰左 T.T

唔知木木爸係咪知我無得去唔開心，就提議暑假去澳門，初初諗住住澳門銀河渡假區玩天浪淘園，但諗起滑水梯同激流無我份，澳門各大抵食自助餐又食得唔盡興，就打消念頭。之後諗起哥哥一家去過愉景灣weekend trip，都OK喎! 

繼續閱讀︰懷孕蜜月小旅行︰BABYMOON at DISCOVERY BAY (未寫好)

另外，林林踢得越來越大力了，唔再係小泡 / 小魚感覺，有時都俾佢嚇一嚇，不過隔住肚皮木木爸仲感覺到呢。

趁墟 • BB展

AUG 5, 2017

又到左一年一度嘅荷花BB展，其實喺BB展木木媽唔會點買野，第二胎更加忍手，不過既然個肚2nd trimester又無乜唔舒服行得走得，有免費飛又有大肚媽媽好友一齊去，就去啦～

一係唔好去，一去就早少少去...我同朋友大概0830到達會展，展覽1000開，去排美贊臣條隊前面已經有廿幾人(!) 大部分都帶住個喼，仲已經事前買左coupon book，我同朋友就無咁癲，都係抱住有乜就拎乜嘅心態，只係帶左backpack，準備左個人資料label同埋乾糧。



你見我入到去之後係無影過相，因為都真係幾忙同無手，哈哈! 一入場我地第一時間去左排美贊臣同雪印各限量100嘅孕媽媽福袋，又竟然俾我地排到，仲要3X號籌，一開波已經拎左兩大袋...

之後我地就去排左龍頭奶粉商&尿片商，呢啲參展商通常BB展前已經喺facebook大肆宣傳，可以事前登記定，當日就可以排條快隊，可以快啲拎到禮物!

之後再逐行逐行行，今次行BB展最開心係試左好多間來自台灣嘅滴雞精，分別有王朝 / 娘家 / 晨露 / 田原香，個人感覺娘家最好飲，晨露 & 王朝其次，田原香可能因為連原味都有添加藥材，所以最唔鍾意。

我地由十點入場，到大概四點半朋友先行離去，我就去join埋疫苗計劃先撤退，戰利品如下︰



尿片類，有唔同牌子嘅尿片，可以俾主子試啱邊隻最岩自己pat pat再入貨



剩係孕婦食嘅DHA都有唔少



除左join疫苗計劃，只有soft touch 紗巾擦巾係真金白銀買，下圖其他都應該係超抵價換購先會俾錢換，二胎媽真係好忍得手的!



木木媽覺得咁樣已經好癲，我想像唔到果啲去幾次嘅....