[十六週六天] 產前檢查 • 政府 • 5

8 AUG 2013 • WEEK16 DAY6 • 廣華醫院

有左木木成十六個星期，唔計OSCAR
先係第一次公立醫院做產前檢查
究竟我的薪俸稅交左去邊呢...?

廣華俾左0910的預約時間，我一心以為好似上次OSCAR咁好快搞掂
仲懶醒0850就到左，點知未開門...

入去首先擺低張預約便條，跟住搵個位坐 & 等
由於知道政府產檢無得照USG，我無叫bubu請假陪我
點知現場所見，個個都有人陪...(下次都係叫bubu請假)

之後大概等左大半個鐘，期間大堂中央有個大牛龜電視
loop住播懷孕期營養、分娩準備、分娩完點照顧自己同嬰兒 etc
個人覺得可以留心睇，睇得多上晒腦，我相信唔多唔少總有幫助~

大概1000，姑娘開始叫名，每次叫三個去血壓站
(1) 量血壓
(2) 度高
(3) 驗小便  (預約便條有寫要帶尿液樣本)
(4) 抽血

嬸嬸們講唔上好聲好氣，不過聽到佢地話一個朝早做70+人
而且今日個個都新症，唔熟架步盲中中，唔鬧人算係咁架啦...

呢度大概去左半個鐘，1030叫名入房
點知入到去唔係醫生，係姑娘?
原來未見醫生前姑娘又要核對下資料咁
出返去再等多個半個鐘，1100先有得見醫生!

門牌寫「廖燕媚醫生」，係一位年輕女醫生
後生呢下預左，後來諗返女醫生都係好事
如果俾個後生男醫生檢查...(但男私家醫生又無所謂喎 =p)

求其呢下亦預左，姑娘量度木木心跳，秒速搞掂
還好呢位女醫生好nice，仲話唔好意思佢隻手好凍 (真係堅凍)
我又傻傻下應承做埋婦科檢查，原來即係用鴨咀 ><

即係將一個好似下圖的圓頭鐵拑放入陰道...感覺未至於痛，但unpleasant ><

跟手係咁易摸下個肚就完成，我真係唔知chk左乜野...
最後醫生問我有無諗住產後餵哺母乳，有就送枝原子筆俾我 (!)
臨走前醒起融融媽叫我爭取入「助產士小組」*，點知醫生話唔關佢事
係出面登記處睇我EDD果日滿左額未喎...OK，我出返去等

點知一等，等左大半鐘，1145先至等到再嗌名，拎下次產檢個期
...咁助產士小組呢? 當然無人答到我，問一大輪先知...

「無安排你入」
「點解」
「醫生係排板寫你係低風險，但係你太細粒，所以都係安排跟返醫生」

!!!!!!!!!!!!!!!!!!!!!!!!!!!!!!!!

竟然係因為太細粒...
仲有就係醫生呃我，又話唔關佢事，係佢寫我細粒架喎...

*「助產士小組護理計劃」目的為懷孕婦女提供一項持續及整體之產前﹑分娩及產後的護理服務，希望孕婦在助產士小組成員協助下，順利及愉快地迎接新生命之來臨。凡懷孕婦女，經產科醫生診視，沒有任何嚴重疾病各不良記錄，孕婦可選擇參與此項計劃。於首次產前檢查時，有與趣參與此項計劃之子婦，會由助產士小組成員接見。在取得孕婦的同意下，日後之產前檢查﹑分娩過程及產後護理，亦會由該助產小組成員負責跟進及護理。

入左的話，之後由產檢到分娩時都會由同一個助產士跟進，聽聞助產士細心好多，又唔駛等咁耐，不過入唔到...都無乜野既 =]