成長記錄 • 九個月

[16 SEP - 15 OCT 2014]

身高體重
8.00kg > 8.52kg (50th percentile+)
身高︰無度，但斷估唔會係高妹
另外木木隻脾愈來愈勁，每次帶佢出去浦都有人讚嘆佢肥美的脾脾!
又唔算好米芝蓮，不過可能因為佢細細粒，顯得隻脾太勁 XD



作息時間
以前daytime nap多數半個鐘一次
呢個月有時可以訓到大半個鐘even個幾鐘，有進步!
不過夜晚訓覺就差左，以前可以訓到我七點幾起身叫醒佢
最近木木五點幾開始就會喊/叫醒，如果未開眼可以拍拍就訓返
如果已經爬左起身喊就要抱抱先訓得返，通常之後到我起身前都會再醒多一兩次
木木媽都訓得好差 ><

飲食模式
木木自我復工之後一直維持住3-hr pattern，每日六餐奶(埋身+樽餵)
固體代替左一餐之後變成五奶一固，同媽媽們傾開
普遍babies都已經係三奶兩固 or even 兩奶兩固 (!)
其實嬰兒一歲前奶依然為主，固體係輔助
既然木木飲的係媽媽奶，佢又依然好愛埋身，木木媽唔會心急轉兩固
反而希望木木可以逐步適應接近成人的飲食時間
呢個月嘗試將七點幾 / 十點幾兩餐combine變成四奶一固

時間表
07 早餐 (埋身母乳)
10 小食 (約奇異果大的自家製白麵包)
12 午餐 (粥仔)
16 下午茶 (樽餵六至七安母乳)
18 生果
20 晚餐 (埋身母乳)
00 宵夜 (樽餵六至七安母乳)
下個目標係希望宵夜餐奶可以提早睡前食，然後一覺訓天光 =]

本月引入的新食材有
小棠菜 牛油果 紅菜頭 豆腐 芝士 豬肉 藜麥
如果單獨俾木木試，佢99%都係唔喜歡的，牛油果 & 芝士就係咁壯烈犧牲左
但係芝士加入粥仔又無反應，其實babies都幾易呃 XD

反而最苦惱係木木唔鍾意食生果
蘋果、香蕉、梨、桃 - 試過就咁blend / 蒸完再blend都唔喜歡
媽媽們有何妙法? 仲有咩生果係呢個階段的baby可以食?

肢體發展

• 扶住固定物件已企得好穩，扶住傢俬/床欄可由頭行去尾兼轉彎
• off hand仲企到一兩秒
• 爬得好快，playmat已經滿足唔到佢，最愛爬去雪櫃洗衣機 (要買門欄!)
• 係亂到爆的大人床爬得多，跨越障礙物方面毫無難度
• 擒上已唔岩坐的rocker，想爬上梳化不過未得
• 係玩具箱入面搵玩具出黎玩

呢個月開始俾星星餅練習小肌肉，可以用拇食指拎起但捉唔實，或者會跌落手心後揸實唔識放手。後來俾佢發現原來可以dup低頭用口叼，就唔肯用手，唔俾佢叼就喊! 第一次感到呢個小baby會出古惑，未能得逞會發老脾! ...下個月繼續努力._. 

情感認知

• 講拜拜會伸隻手出黎揮揮下
• 講碰碰頭會撞額頭埋黎然後笑 =]
• 零星地試過無意識咁拍手
• 有時會望住自己隻手掌開合開合咁練習
• 無啦啦會膜拜天地，仲會親吻繪本入面的動物 (但唔親吻爸爸媽媽)
• 開始會係木木媽出門返工時喊，唔肯跟姐姐，放工入門會衝埋黎

語言能力

心情好時會自言自語亂講一通，爸爸媽媽少左講，反而多左一次過發出兩個音節，我諗佢自己聽到都會覺得好有趣 =] 繼續玩口水，仲學識埋玩脷，嗒嗒聲咁 

其他碎碎念
木木自出世以來第二次病左，今次只係發燒+鼻水，兩次都係因為出席比較多babies的聚會，唔知關唔關事呢? 雖然母乳有抗體，但聽聞抗體係保護腸道作用多，俾人傳染的傷風感冒，唯有「求木多福」啦...

---------------------------------

my happy sweetie =D

BB車當high chair坐真係太方便~

A walk in the park during magic hour
木木媽被插鼻 T.T

呆呆的木




木木︰OKOK，我有餅餅食就會乖乖坐係度! (真係有OK手!)

木木你係咪真係訓著左架?



自從木木識爬就無乜點再玩baby gym

有日拎返出黎，有個baby好似見到新玩具咁開心 =]

木木似爸爸係人都知，而呢張相係木木媽到目前為止覺得最似木木爸的

你又覺得似唔似?

公然索吻旁若無人的爸爸!!!

第一次搭渡海小輪，由中環去尖沙咀天星碼頭

木木︰我終於可以食零食啦!



木木︰媽媽你做咩偷望我?

木木媽︰好似係你偷望我多D喎...



@爺爺嫲嫲家




木木︰媽媽你打BLOG打得咁慢，我無眼睇啦!



木木︰我九個月大啦!

[DAY213] GROMIT UNLEASHED

aug31 gromit unleashed@elements

出動大型坐駕，去邊度?

去baby stroller friendly的elements =]

有個來自英國的展覽 "gromit unleased hong kong"

gromit...就係WALLACE & GROMIT入面果隻忠心耿耿的寵物犬!

唔知大家認唔認識佢地?

wallace & gromit系列影片係以stop motion形式拍攝的clay animation

小學時期跟鬼佬學左幾年英文，就係靠睇w&g開開心心咁學

所以我對佢兩位有好深的感情，100%愛不是恨 XD

當然要帶埋木木爸同木木黎朝聖啦!

gromit份報紙穿左個窿...唔通係乜都食的shaun the sheep*咬既?
*shaun the sheep係短片close shave其中一個角色，之後spin-off自己做主角



其實呢個展覽係邀請外國與本地設計師幫gromit搞造型去幫病童籌款

例如︰(左上) marimekko (左下) 幾米 (中下) mac

好有創意別出心裁，我忍唔住要逐個影低佢! (呢種事已經好耐無做...)

木木媽我最喜歡呢隻色彩繽紛的gromit =]

(但我唔記得左佢係出自邊位designer手筆...)

但木木好似唔多like咁...

有興趣的朋友，唔好意思，展覽其實係今年8月尾已經完左...(唔好打我)

我個人會盡量update少少架啦...

[DAY228] RODY小馬派對

九個月的成長記錄未搵齊相，搵搵draft box有咩寫咩 XD

aug31 RODY PARTY

大肚時識落的，加上係產房識的，二十幾位廣華媽媽老友鬼鬼
 (read here︰ [二十九週] 廣華媽媽聚會)

呢班媽媽的嗜好係「團購」，成日一齊買育兒新品好物

其中一樣毒物 - RODY

source: www.harapekodoggybag.com

木木媽無一齊團購，因為早著先機地大肚時已入定貨

買左隻限定版淺粉紅色 =]

當時木木才不過七個幾月岩岩坐穩，細膽木坐唔夠兩秒就扁晒咀

(亮點︰木木肥脾)

坐rody坐到好似坐監咁慘，唯有去玩下其他玩具

呢個我地稱之為「立方體」的又係另一齊齊買的玩具

唔知係唔係因為屋企玩開，babies全部識得自動碌埋去玩

一人一面唔駛爭 XD

場地係其中一位媽媽新開的，木木與太子女對話如下︰

木木︰妮妮，你就好啦，有咁大地方俾你碌! 我屋企碌兩下就撞埋牆啦!

妮妮︰你睇我好我睇你好啦! 碌得多都好攰架!

colourful rodies!!!

裡面仲埋藏左一隻加大碼同一隻老翻，唔知大家搵唔搵到呢?

成長記錄 • 八個月

[16 AUG - 15 SEP 2014]

呢個月的發展好快!
有時木木學識/ 未識的事會寫定係draft先
到真正落筆寫時，發覺月初寫未識的，月尾已經識!

身高體重
7.43kg > 8.00kg (50th percentile+)
木木媽我個個月都唔記得度身高...

作息時間
早上七點零起身，日間小睡三至四次，每次半個鐘左右，晚上九點零入睡
訓少一次晏覺果日，八點零就會扭扭扭，埋身啜夠九點前就會訓著
同佢著睡衣著睡袋搬落床都唔醒，連goodnight song都無得唱...

飲食模式
上個月初嘗固體，慣左食粥仔之後就全力開始嘗試各種不同的天然食材
本月初嘗︰
菠菜 菜心 青豆 / 蕃薯 南瓜 栗米 薯仔 / 蛋黃 雞肉 / 桃 梨
全部都OK無問題，橙黃色蔬菜類尤其喜愛 (甜嘛~)

肢體發展
大肌肉︰初初係入一兩步後波，變成向前爬一兩步又坐返係度，月底前已經學識肚腩離地，用手掌&膝頭哥向前爬，睇少眼已經爬出地墊範圍 / 扶住物件可以自己企起身但未係企得好穩 / 轉姿勢可以由坐變趴 or 趴變坐，企變坐通常係因為跌親 XD

小肌肉︰係木木手的唔係咁易搶返，揸得好實/ 抓物件會用晒五隻手指，未識單用拇指食指，但有意識單用食指去撥野，下個月可以開始俾星星餅練習下 / 會兩隻手掌互相捉住

情感認知
木木正式成為痴媽B~!
話說木木細個時唔多痴我，同佢玩唔笑唔講野，同爸爸玩就笑到卡卡聲又多野講
曾經我唔開心個囡好似唔係好跟我咁，漸漸地木木終於好黏我，唔見左我會喊，玩要lui落我度，人地抱緊會伸手要我
可能有人會覺得咁樣先唔好，要咩人都跟先好
但separation anxiety本來就係嬰兒發展之一，現階段我會好好享受「被需要」的感覺，同時幫助木木慢慢學懂與其他人相處，與世界接軌 XD

語言能力
上個月聽到木木一聲"ma"之後有一輪無再聽過，反而木木爸話聽過好多次木木嗌"ba"...
然後有一次半夜木木喊醒，我出左廳木木爸係咁叫返我入房話木木嗌媽媽。當我返到房佢見到我就無再嗌，聽唔到! 到第二日，木木一喊就「媽~媽媽」咁，媽到我暈但冧死人，我會用個冧死左的樣子去抱木木然後話「媽媽係度~」

初初木木最鍾意講「阿～bu～」，講左一輪就變左bu口水！
日bu夜bu，仲要吸一大啖氣bu到最盡，好好笑架！

唔知點歸類
初初帶木木去游水，佢好怕有水濺去佢塊面度。經過木木媽鍥而不捨咁帶佢去游多幾次，終於無咁怕仲可以潛水! 因而沖涼都唔怕彈到水啦 (但沖涼本身係enjoy的)，可以就咁坐係度用水淋頭，唔駛好似初生咁抱住洗頭 =]
----------------------

見到酒笠就係大笑標準 =]



唔知木木下定決心想做咩呢?



可唔可以唔好咁粗獷呀? 形象呀!



木木喜歡照鏡 =]



星期日木木特別扭計，平時工人湊就乖乖自己訓，媽媽湊就要抱住訓
有一次頂佢唔順，係屋企揹起佢，一分鐘就訓著左! 仲唔即刻卸貨咩 XD



買左個學習杯訓練用飲管飲水，人地話人奶b一啜就識
木木開頭都抗拒，後來我趁佢用手指玩支管時加d聲效 - 叮噇! / 哎唷! / 笨蕉!
引到佢卡卡笑，之後就俾面飲兩啖啦~
不過佢九成係啜左上黎又lur返落去，所以另外再要用匙餵水呢。



木木已經識得「食住上」(扶住物件起身)
BB床板要較低，呢種牢獄生活罪犯不知幾enjoy!



陪伴左木木八個多月的波點睡籃都要退役了



木木第一個中秋節，婆婆送佢一隻傳統小白兔燈籠
反而媽媽只係用左幾蚊雞意思意思地買左個細過手掌心的兔兔燈籠...
出年識玩先買啦 =]



呢個baby，食固體算不過不失啦，唔會追食，但餵到埋口都會俾面開口食咁



每月一整by木木爸
屋企已經儘量唔開電視，但球迷木木爸的足球賽事不得不看
如果木木爸係廳睇電視我會同木木入房玩
但有時早開波我又要煮飯時...唉



最後搭多個happy smile俾大家 =]



木木︰我八個月大啦!
點解媽媽又係求其買個muffin架? 點解我仲未食得架?

奶媽系列 • 做人奶媽甚艱難

呢個題目擺左係draft好耐，趁住木木剛開始進食固體
係時候要wrap up一下呢大半年的奶媽生涯

雖然陀住木木的時候，我好積極咁去聽講座 (其實貪心的小狗係為freebies...)
吸收大量餵哺母乳的資訊，但問心我又唔係真係咁大決心
我形住以我AAAcup的size，就算有奶都唔會多 (誤! 奶量與胸部大小完全無關)
一直都係本住「餵到就餵」，無乜準備過，只係買左個avent手泵鎮宅

生完係醫院期間 (三日三夜)，母女分離左大約兩日兩夜
期間只係一日四次落去兒科埋身，其他時間完全無意識去擠/泵 
(唔谷丫嘛 > 誤! 產後應儘快刺激乳線)

到第三晚木木跟我，因為自己選擇左餵人奶，姑娘唔會再俾奶粉
正式埋身肉搏，結果當然係木木KO左我!
餵足個半鐘都係爆喊，媽媽同bb都累壞...
捱到第二朝，有姑娘單對單教埋身，仲幫我手唧左幾ml黃金初乳我睇
當時非常振奮，以為自己掂過碌蔗啦!
同日出院返屋企繼續雄心壯志餵餵餵...

點知直到夜晚，木木都無乜點wee wee，開始淆底...
加上我生完之後基本上無訓過咁滯
於是被勒令去訓覺，木木轉餵奶粉...
你問我當然唔想，雖精神亢奮，但身體要訓!

之後約九星期產假期間，每一日都努力埋身
初初都埋得唔好架，木木掛住訓，除衫/ R腳板/ 凍面...都無用
永遠都唔知佢究竟有無食到/ 有無食飽
有一期就玩甩咀/ 櫻桃小咀，latch on唔到，餵到人都灰
為左改善技巧，剩係坐月期間都去左健康院三次搵母乳姑娘
但木木勁好戲，姑娘睇住就會乖乖地啜
一返到屋企就故態復萌，激死我!



困難除左有lactation，當然仲有人奶媽最討厭聽到的三個字
補•奶•粉!
木木果時好似餵極唔飽咁，餵完即喊又嘴郁郁
如果我肯，基本上可以掛木木係心口24小時咁餵
但我有時都覺得木木只係需要安全感多過食
當時日頭媽媽幫忙坐月，夜晚木木爸接力
初初佢地兩個成日將「係咪唔夠飽?」掛係嘴邊
媽媽都還好唔會主動話要補，木木爸果時驚死我餓親佢個囡咁
一見木木個嘴郁郁就斬釘截鐵咁話木木唔夠飽要補奶粉!
但我見明明木木的濕片數量係足夠的 (= 夠飽)
為左呢一點我地嗌交嗌左無數次，我喊過無數次
我產假期間所流過的n公升眼淚，超過一半都係黎自呢度...
當我真係好累乳房都軟趴趴時，無奈地我會接受家人補1-2安奶粉
有時木木爸仲靜雞雞補成3安，火呀! 好彩木木通常會食剩 =]

不過以上都係早期發生的事啦
唔知係木木爸被我的堅持感動到，定係覺得我太硬頸放棄左
漸漸地佢都少左要求補奶粉 & 支持餵人奶
最記得係木木經歷猛長期的時候，又去返初生咁食過不停
真係好痴線，我累到諗過叫木木爸補奶粉俾我抖下
係佢同我講「你唔係想全人奶架咩? 唔係話多啜多奶咩? 你換邊俾佢食囉!」

仲要數埋「疑似」塞奶/ 乳線炎/ 真菌感染之苦
成日睇母乳group的媽媽講中左以上幾樣的苦況，好驚自己會中招
於是就好緊張咁mon住對胸，有少少狀況就以為自己瀨野
但我又無去睇醫生，次次都係本著「密密餵，無閉翳」的宗旨平安渡過!
最大鑊都係DAY38試過泵到士多啤梨奶 (血奶)，幸運地無污染到已泵出黎果d
即時停泵，下回再泵又已經無事
依家諗返轉頭，都其實幾符碌 =p

初生不分晝夜地食得密又食得慢，都真係好地獄...
如斯生活係滿兩個月返健康院之時有曙光!
大約week 7我要返健康院做產後檢查，原本只係檢查傷口
但我當然唔會放過搵母乳姑娘的機會，就算木木唔係身邊都問長問短
咁岩果日有個外國lactation consultant黎左，同行仲有各政府醫院的母乳顧問
母乳姑娘好好人安排左幾位同我傾
咁岩果期我又成日以為自己塞奶/ 乳線炎/ 真菌感染
於是乜都打爛沙盤問到篤，佢地又好好人咁幫我評估
過幾日帶木木返健康院，增重合格，餵俾母乳姑娘睇亦話無問題
amazingly，好似突然開竅咁，可以全人奶兼愈餵愈順啦!

搞掂左埋身，又要開始煩另外一樣
臨近復工，要為泵奶做準備，上文提到之前只買定手泵

DAY8兩邊夾埋泵到60ml
唔好睇得果少少兩安奶，泵到我手斷先有 T.T



有見自己都幾大決心餵人奶，於是DAY29決定入手電泵
泵得輕鬆左多左，埋身後若要補奶，都可以儘量用左泵奶先用奶粉
DAY41終於儲到第一包冰奶, 100ml (之前一泵太少無謂儲)



一有時間就泵下儲下，我已經唔算好勤力
復工前大約儲到廿包，每包四安的冰奶
有(冰)奶在手，個人真係安心d架，有咩起事上黎都夠頂一兩日嘛!

下篇分享「在職奶媽仲艱難」!