成長記錄 • 十三個月

[16 JAN - 15 FEB 2015]

身高體重
體重︰9.23kg
身高︰74cm
牙齒︰2隻

飲飲食食
本月引入的新食材有
牛肉 鱈魚 蕃茄 西柚
呢個月又係另一大挑戰! 有一個星期左右，木木唔肯坐highchair，花盡九牛二虎之力坐好，就合實嘴仔唔肯食...煮淋D煮硬D試pasta試下蕃茄酸maymay都唔鍾意，氹又氹過鬧又鬧過，餵到我同木木爸好沮喪，見住木木隻肥脾瘦左勁心痛 ><

然後唔知幾時開始又逐漸正常返，「正常」係指木木的正常情況，即係都會扭玩扭唔食，不過食物最後能夠入晒佢個肚而唔係奉獻晒俾大地，已經好安慰

但呢隻曳豬係正餐先係咁，零食呢D當然無任歡迎，就算跟我地去6299度食飯，俾白飯同一條菜心佢，又食得好滋味，我係咪應該轉大人飯俾佢呢?

肢體發展

• 行得都幾穩陣，有時仲急步走，基本上已經唔再爬，跌低左會用手撐返個人起身，「踎低起身開步走」呢套動作非常流暢，當然仍然有企唔穩的時候
• 屋企playmat差唔多兩吋厚，我地發覺佢明明向前行緊，一到墊邊就會打橫上落，我地大人唔會咁做，應該係佢覺得打橫上落安全D!

情感認知

• 識得吹口哨! 好amazing，佢見到木木爸吹口哨就跟住吹!
• 識得飛吻! 不過似掌自己咀多D，哈哈!
• 問佢 XX 係邊度可以正確無誤指出，當然限於常見的家人同姐姐
• 著衫著鞋著襪可以自己伸隻手/腳入去正確地方
• 知道「HAIR」「MOUTH」「BANANA」「GIRAFFE」
• 叫佢執野 / 俾野某一個人都可以做到

語言能力

• 貓貓 - 無論真貓假貓，見到就會好肉緊咁指住叫
• 爸爸 - 識講貓貓先過爸爸，但相信木木爸都已經好滾動~
• PEPPA - 我地成日問佢peppa pig係邊，佢除左會指，仲會發類似「pep」「per 」的音

------------------------------------------------------------------------
就咁睇木木都好似幾可愛...



鏡頭一轉，就變返爛仔格!



攝於唔食野果排，唔食都算仲要發脾四，俾木木爸罰佢去爺爺嫲嫲家時無人同佢玩



無論係真假電話木木都愛聽，但唔講野架 XD



仲愛一切新奇事物，包括平平無奇的紙箱



多謝波媽同sa姐姐送megabloks
舅父舅母就送左lego
木木你好幸福呀，媽媽細個都係執你舅父D lego尾玩咋



原來木木的新曆農曆都係16十六，非常好記!
木木媽小時生日，嫲嫲會蒸一底蛋糕同我慶祝
於是我又照辦煮碗，點知蒸衰左 =P



食碗面，反碗底...



去公園玩最開心




有件事我連木木契媽們都唔敢講...我搞到阿囡破相!
事緣木木媽生日前一晚如常同木木埋身食奶奶
明明已訓著的木木無啦啦扎醒爭扎，我一時捉佢唔住
佢就飛左落床邊，面向下撞到嘴角爆缸!
好自責，個心已經盤算定要儲錢俾阿囡做laser...
好彩而家條疤痕已經唔覺
好彩木木爸無鏟我上天花板
好彩木木第二朝訓醒都仲對我甜笑

(契媽們如果睇到呢度實即刻炳鑊我甘!)



好彩依家又變返一名小美女~



木木︰我十三個月大啦!

成長記錄 • 十二個月

[16 DEC 2014 - 15 JAN 2015]

身高體重
體重︰9kg > 9.11kg (50th percentile+)
身高︰無高過，73cm
牙齒︰2隻

疫苗注射
一歲要打令人聞風喪膽的三針，分別係 麻疹、流行性腮腺炎及德國麻疹混合疫苗第一針 (俗稱MMR)
肺炎球菌疫苗 booster (俗稱13價)
仲有近年新增的水痘疫苗
三針夾埋要觀察針對12日，期間都有機會發燒
十個有九個打完都會，木木之前打針都試過有發燒反應
今次竟然無事! 只有係有日個人微微熱，感恩 =]
不過打針時木木失禮死人，勁爭扎，連姑娘都話佢大力...

另外一歲亦要做發展評估，遇著個好姑娘，對好動木木好有心機
仲讚木木媽我人仔細細餵到咁耐人奶，yeah!

飲飲食食
本月引入的新食材有
蛋白 木瓜 栗子 蘿蔔 娃娃菜 魚翅瓜 
木木好鍾意食飯，明明已經食左粥仔，再跟我地食晚飯時會手指指要食
不過老爺煮的餸比較重口味，只能俾迷你飯團波，食完仲要lam手指 XD

自十個月大開始轉兩固，初初無減奶，仍然係四奶兩固，只係將晚餐奶轉做睡前奶，半夜前會訓住再埋一次身，其實想減呢餐奶好耐，不過木木爸成日都驚木木半夜餓醒 ._. 呢個月木木媽下定決心唔再餵果餐，1 take就搞掂左! 所以依家係三奶兩固，早晚埋身，下午茶一支八安泵奶 =]

肢體發展

• 唔去參加比賽都唔知原來木木爬得幾快，幾次都係爬得最快果個，又或者咁講，木木係一個容易受誘惑的BB，無論係遙控器定星星餅，一見到雙眼發光發力爬...
• 一個月內，已經由行一兩步跌入我地的懷抱，變成搖搖擺擺行到十步的toddler! 拖住手仔行一段路都無問題

• 識得爬三級上大人床，教左好耐之後亦終於識得擰轉身落床
• 鍾意上樓梯，梯級無論幾高都照抬起隻腳嘗試擱上去
• 因此係屋企都會搵野踩上，包括walker, hi-fi...
• 餵粥仔時佢會用自己隻匙羮畢粥，亦擺到入口，不過唔係次次食到

情感認知

• hello / 拜拜 / 拍手
• 會手指指自己想要的野 / 想去的地方
• 超級無敵鍾意玩peekaboo
• 認得hello kitty同peppa pig, 因為雪櫃有個kitty磁貼，房門又掛左peppa family，姐姐日講夜講，反而問佢爸爸媽媽係邊，佢都未必指得出...
• 依家唔可以亂講「奶奶」，有個BB一聽到就會發狂爬去我身上堆跌我
• 好鍾意沖涼，一聽到話白白豬就急急腳入浴室仲會跨隻腳入浴盤
• 著衫時話手手會俾手你著 XD 著鞋唔駛講都識得自己伸隻腳入鞋
• 仲會嘗試伸隻腳入大人鞋 =p

語言能力
同上個月無乜分別，講得最清楚係「奶奶」
「媽媽」通常求救先講，但都聽過一兩次係望住我叫媽媽
木木爸就慘d，仲係「DA-DA」...
唔高興呀，鬧人時就會講「NA-NA-NA!」

--------------------------------------------------

同契媽們去afternoon tea =]



中同一時興起話返中大下午茶，帶埋木木返母校碌草地
(又係下午茶...)



之前做PAMPERS小記者，收到報酬︰一包片片
可惜木木媽份人太hea，報導得唔夠好，贏唔到一年片片 T.T



木木媽︰木木你好爽喎，唔駛踩有人推
木木︰OK啦...爸爸推快d!





木木's FIRST CHRISTMAS!



BB同貓一樣都係咁貪玩~



木木爸又整鬼佢個囡啦 ><



屋企附近新開左幼稚園，趁OPEN DAY去參觀下
(木木隻脾"jit"左出黎...)



剛睡醒的木木會中下中下，好可愛



木木係坐唔定的寶寶，食粥仔時實要有野揸手先得
拎住玩具不如拎住隻匙更!
開始識得「畢」入口了~



除左正餐，呢個妹妹都仲係乜都擺入口，究竟口腔期幾時會過去?
人地神農嘗百草，我家木木嘗百寶...
所以木木的便便有時會令人驚喜百出，我地發現過...印花! 
係咪好恐怖? 睇少0.0001秒都唔得!

[DAY284] OXFORD PATH bb 爬行比賽

OCT 26
八個月識爬的木木，木木媽一心想幫佢報名參加爬行比賽

點知等呀等，等到十個月先有機會

木木︰其實係媽媽想參加之嘛，點解佢唔自己去爬喎?



去到搞左一大輪先有得落場

「起爬」前的木木，似乎狀態唔錯



今次用木木最愛的遙控器作餌，初期走勢凌厲

卡卡笑住咁向前爬



點知爬到去終點線之前，木木停低左!

佢俾個playma邊吸引左掛住玩...



要不停嗌佢先回過神繼續爬
終於人同遙控器都過終點啦!



比賽好似係計時間，所以呢場爬第一都唔代表贏左

anyway...反正每個baby爬完都可以得到一張「無名證書」

木木媽寫自己個名都仲得 XD



仲有一袋禮物，都幾豐富架，有片片/yogurt melt/洗衣液/濕紙巾等等
木木，點講都好，都算係你人生第一張證書呀!



其實都係志在參與下，影下相等木木大個話返佢知 =]
同埋個比賽係一間kid gym舉辦，爬完可以免費任玩!
木木仲細，帶左佢去波波池，都開心成咁!



木木與朋友仔皓翔 & 婷婷
佢地一味扶住池邊望住我地，都唔知後面仲好玩 ._.

[DAY277] BABY HALLOWEEN

OCT19
廣華媽媽會有個「私竇」，造就左好多baby gatherings
halloween當然又係一個開P好藉口啦!

黎到熱下身先 =]
呢個大玩具屋企都有，但我第一次見木木會咁樣擒上去，失禮晒 ><



大家一齊咬積木 =.=



(設計對白)
oba︰嗚~ 木木小姐你放過我啦! 木木︰你逃唔出我手掌心架啦!
其實係一個唔知自己扯住人，另一個唔知自己俾咩扯住...



換上halloween costume，派對開始啦!
今日木木係一隻可愛小蜘蛛 =]



(設計對白)
gemmie︰我好熱呀! 點解要我做蝙蝠? why?
木木︰忍下啦，扮幾個鐘就收得工架啦...



要多謝木木表嬸贊助呢件蜘蛛衫



同其中兩個南瓜仔合照~ 
據一眾南瓜媽講，呢件淘寶貨激厚，好多南瓜B都熱到發忟憎 @.@



同貓頭鷹小姐合照~



同大黃鴨合照~
喊同打喊露一樣，係有傳染性的!



新穎的蛋糕 > cream cake底 + fondant cookie面 + 南瓜盒星星餅 XD





唔好咬自己隻腳啦囡...



廣華媽媽由大肚時開始，到生仔時加入好多係產前產後房識的媽媽
多人到我地唔想再加人啦，好好維繫呢一個群組的友誼 =]



其中有個骨頭B影大合照時未訓醒，手裡面依然拎住枝魔鬼叉...

成長記錄 • 十一個月

[16 NOV - 15 DEC 2014]

身高體重
8.9kg > 9kg (50th percentile+)
身高︰大概73cm

睡眠作息
凍左好訓左，訓晏覺有時都訓到兩個鐘

飲飲食食
本月引入的新食材有
秋葵 洋蔥 薑 提子 蜜瓜 檸檬

木木初嘗固體時只準佢專注進餐，自問對佢似乎係太嚴苛啦。經我向其他媽媽查問，食得好都係為食性格多。木木並唔算係好為食果類 (以正餐計)，而且坐唔定，專注力麻麻。
所以依家我地會俾一套餐具佢，試過識得擺隻匙羹入口，有時會畢少少粥落去俾佢玩，有時甚至佢會伸隻匙羹/ 手落我拎住果碗粥度，我都由得佢，因為咁樣係佢對食物有興趣的表現。
木木好鍾意有粥係手度架，手會開合開合，黏黏地又有聲音，佢應該覺得好好玩 =] 
順便可培養佢唔怕「污糟」的性格 =P

肢體發展

• 自己用手撐地下然後企起身hold住一陣
• 好想行，木木爸買左walker俾佢學行

情感認知

• 拜拜已經好叻，一講「拜拜」就好似本能反應咁開合開合手
• 婆婆教，講「靚靚」佢會dup低頭望住自己個肚腩，然後雙手拍拍心口
• 會用食指手指指，想人地一齊伸手指同佢玩
• 換片位有小林家合照，問親佢爸爸係邊，佢會向上指仲會指岩人，但離開換片位，木木爸係佢面前問佢，佢都係指上天...
• 超鐘意聽AKB48 (木木爸...)，會聞歌UN屁股

語言能力
朝早訓醒餵奶，木木係急不及待的，當一路拉高件衫打開個BRA戴餵奶枕，一路安撫佢話「等等好快有奶奶食」之時...我聽到木木講「奶奶」!
另外開始有對話感覺，同佢講野佢會有「似乎有意義」的回應，好得意呀 =]

---------------------------

基本上俾任何野木木，佢望兩眼就會...咬。
可憐的小兔

被選中做Pampers小記者試新片片



天氣凍左，要戴帽啦~
雖然自幼習慣戴headband，但要木木戴帽都唔易
如果頂帽緊少少同遮到眼皮就會扯甩佢
呢件hellokitty褸木木又ok喎!
我地讚佢靚靚， 屋企戴足全日都唔扯甩 XD



屋企細都有度好，傢俬一件接一件無空位
木木可以有野扶住由屋頭行到屋尾都得

木木︰戴左帽啦，係咪出車去公園呀?



公園陣間先，媽媽要去超市買食材煮粥仔俾你食呀



係咪無呃你呢? 你放晒D電我地先返屋企架!



今個月木木鍾意扒係度訓，"gut"起個patpat訓唔攰架咩?



聖誕人多，我地早一個星期去睇燈飾



十一個月大快樂!