100磅的獎勵 - kate spade baby bag

話說我一直都好想買個具實用性的媽媽袋

潛台詞︰扮買木木相關用品，實則滿足個人購物意慾

又講真，唔多覺本地有標榜「媽媽袋」的袋賣

估計媽媽們都係自己搵個又大又輕身又多間隔的袋用?

我本來都係咁打算，次次行街都會留意有無袋岩

有次爭d係log-on買左個，最後都係覺得「爭少少」擺低左

後來由媽媽會得知kate spade有出baby bag

「咁岩」又遇著online surprise sale...

睇中呢個原價US349減至US129的baby bag =p

但係計埋運費之後比我預算貴左好多 (一路都係諗住買幾百蚊貨仔)

點算好 (手指互篤) ...

呢個時侯，老公幫我諗左一個藉口

「當係老公獎勵你達到100磅的禮物」

係! 你無聽錯!

因為懷孕初期，無增磅不特止仲回落到結婚前水平
bubu曾經一度擔心我會唔會重得返
連木木契媽都睇死我到最後分分鐘100磅都無

所以，100磅係我一個懷孕期間的小目標
(小目標，因為standard speaking 100磅都係唔夠...)

就係咁，[二十九週]達到100磅的時候
呢個baby bag就黎到我屋企啦 =]

so nice!

隨袋仲有一個同系換片墊 & 奶咀袋

而最重要的袋內間隔, 我影唔到好清楚

索性上網搵圖俾大家睇~

袋的左右都有索繩位可以打直擺奶樽

袋的前後都有大 / 小 / 橡筋 / 拉鏈位擺濕星野

袋底好闊身，實際比望落去可以擺多好多野

加分位係袋的左右各有一條有扣的帶
設計用黎扣住係bb車扶手上，穩陣又安全!

好滿意呢個baby bag呀 =]

唯一唔好係重左少少，但有bubu丫嘛 XD

[三十五週] 清胎毒

[WEEK35] the size of a coconut =]

Now, her hearing is fully developed, and she responds best to high-pitched noises.
If it's a boy, his testes have probably fully descended.

-----------------------------------------------------------------------------------------------------

13-19 DEC 2013 • WEEK35 • weight︰107 lbs • tummy︰35"

本週讓座次數︰2 (20+女 / 50+女)

累計讓座次數︰85 (MTR: 50 / 巴士: 28 / 電車: 7)

胎動感覺︰木木唔知係唔係打側身呢？右邊活動頻繁 XD

木木肚內九個月大啦!
懷孕後期一般都會有「清胎毒」的說法
意思係多食涼性食物，中和返之前懷孕期積落的熱氣
咁BB出世就會皮膚靚啦～

清胎毒食物之選︰
白蓮鬚、綠豆沙、芝麻糊、椰青、西瓜、腐竹糖水 etc

但亦有說法話唔需要清 / 唔可以亂咁清
我都唔知點好，不過望住上面的食物，好多我都唔鍾意食…
而媽媽會好多第二胎媽媽仲話，白蓮鬚飲完即生 / 宮頸開得好慢
所以白蓮鬚我唔打算食 (偏偏老爺就買左話煲俾我飲，俾我狠狠拒絕左)

不過，好彩其中的腐竹糖水我好like!
之前已經係深水埗樹記大手入左三斤慢慢煲!
大概[三十四週]我就開始每星期煲一次

做法︰(求其到爆，唔寫好過寫)
大約3/4煲水，1/4煲腐竹，冰糖適量

腐竹略略沖水去肥膩，撕成細塊備用 (我買腐竹碎，連呢步都慳返)
水滾之後落腐竹，LC+樹記的效果=十分鐘就溶晒
想要少少咬口可以留返小部分腐竹後落
最後落冰糖，甜度自己調較

小林家習慣打蛋花食，或者可以事先烚定隻蛋，煲起擺返落去亦得

另外[三十六週]時亦整左豆腐花，豆漿性涼，我估豆腐花都OK?
哈哈！完全係亂黎 =P

做法︰
買支純豆漿 / 無糖豆漿，另外去藥材舖買兩蚊熟石膏粉都有排玩

豆漿一支(1L)
石膏粉1茶匙 / 粟粉1茶匙 / 凍滾水2湯匙

1. 石膏粉+粟粉+凍滾水攪勻備用
2. 煲滾豆漿, 以一尺高距離撞入(1) (撞之前粉水要再攪勻)
3. 煲面冚上乾布/廚紙, 再冚煲蓋, 靜止30分鐘去凝固
4. 片走表面泡沫, 加紅糖就食得

最後就係黑芝麻粉，唔知同清胎毒關唔關事
只係聽媽媽會話多食BB皮膚滑滑同多頭髮
木木係囡囡，我做人阿媽責無旁貸，哈哈

呢樽係朋友係台灣買即磨再帶返香港同我share
如果係香港買，馬玉山牌聽聞幾好，都係來自台灣

唔係空口食，有人會加落麥皮度
我通常會加一匙落去朝早杯暖奶變黑芝麻奶
等我買埋粘米粉，可以試下自製芝麻糊…

做到清胎毒完全不求人!

孕照 • 木木爸

[二十九週] 最後一日係三週年皮婚週年紀念
朝早產檢，夜晚食飯，剩底個晏晝
原本bubu話去近來大熱的大埔梁九記上倉 (因為我話左想去好耐)
但我又覺得「wedding anniversary去街市入貨」太過九唔搭八
醒起bubu話可以順便去大埔海濱公園影下相
我就靈機一觸，不如去更有意義的地方影啦~!

呢個地方就係我同bubu的母校啦 =]
本來結婚時係計劃左返母校影pre-wedding
最後因為種種原因而擱置左...



如今帶肚裡面的木木去都幾好丫!
到木木識行時又再帶佢返去跑下跳下 =]

我同bubu兩個比較，我係比較有心機影相的一個
bubu有時係「主要物體入左鏡就算」果種人 XD
但有時又會好俾心機好努力去影我，我都好R頭

單靠自然陽光 + 腳架 + SONY RX系細機 + 非專業連業餘都稱唔上的老公
bubu仲要俾草蚊喪咬 (係，不嬲都係咬佢唔咬我) 的情況下
我已經好appreciate bubu & 好滿意個outcome >3<

影完呢張之後，我覺得好唔對路…諗左一陣
發現唔知幾時學院係湖後面起多左棟建築物! 破壞晒…

最後仲去飯堂嘆返個$13西多餐先返歸，爽~

[三十五週三/四天] 產前檢查+乙型鏈球菌篩查• 政府 • 15

16 DEC 2013 • WEEK35 DAY3&4 • 廣華醫院 

政府產檢係我遲左十分鐘的情況下
竟然可以半個鐘搞掂走人
好AMAZING!
快到無內容，唯有講下之後一日的乙型鏈球菌篩查
(點解唔可以約埋同一日丫...)

乙型鏈球菌*篩查 (group b streptococcus screening)
孕婦界俗稱「check B鏈」，2012年開始免費係政府驗埋

*乙型鏈球菌 (GBS) 係一種常見寄存在人類腸道、泌尿和生殖系統的細菌

它如何感染新生兒?
乙型鏈球菌是最常見引致新生兒感染的病菌，其引起早期感染的嚴重發病和死亡率約 5-10%。在香港新生兒乙型鏈球菌早期感染率為 0.1%，感染可分為早期或晚發性

早期性的感染 : 一般發生在嬰兒出生後數小時內, 症狀包括:
呼吸道出現問題,心率和血壓不穩定
腸道和腎臟出現問題
最常見的是肺部感染, 血液感染和腦膜炎

晚發性的感染 : 一般發生在嬰兒出生後一周或幾個月內，常見的症狀是腦膜炎 

新生兒的晚發性感染不及早期性的常見。

我如何知道是否有乙型鏈球菌?
拭子篩查是在妊娠晚期約 35-37 周進行，篩查過程十分簡單、快捷，並不構成任何痛楚，只需採低陰道及直腸拭子樣本，然後送到化驗室進行培菌和敏感測試。因為乙型鏈球菌存在人 體內的時間不定，故孕婦早期的樣本結果並不能反映生產時的狀況，因此在接近分娩期間，約 35-37 周妊娠晚期進行拭子測試最為準確。

若拭子測試樣本呈陽性,怎樣才可以預防孩子受到感染?

並不是每位有乙型鏈球菌寄存母親的新生兒會受到感染，新生兒的感染率約每 100 至 200 個 乙型鏈球菌寄存的孕婦中，大概只有一個嬰兒會受到感染。 拭子測試呈陽性的孕婦，我們建議在你分娩時給你靜脈注射抗生素，可大大降低新生兒受到感染的機會。

第一次晏晝去廣華產科，靜英英咁
同朝早閒閒地過百大肚婆差天共地
亦好快叫左我入房 (次次都係8號房)
姑娘問我知唔知今日黎做咩
知道就自己除晒下半身爬上床
然後姑娘show支好長的棉花棒我睇
話會係陰道同肛門抽取樣本化驗

呢頭講完果頭已經塞左支棉花棒入去
果一刻我係度諗，今朝岩岩poo poo完...好醜怪 ><

雖然話若果不幸中左都無乜大不了
穿水後入產房前打支抗生素就ok, 開刀更加唔駛理
但都希望無啦…

[三十四週] 木木被撞

[WEEK34] the size of a butternut squash =]

She's recognizing and reacting to simple songs, if you're singing them. 

(If you're not, start! She may find them soothing after birth.)
She's also urinating about a pint a day.

-----------------------------------------------------------------------------------------------------

6-12 DEC 2013 • WEEK34 • weight︰104 lbs • tummy︰34.5"

本週讓座次數︰2 (40+女 x2)

累計讓座次數︰83 (MTR: 49 / 巴士: 27 / 電車: 7)

我其實都係一個幾唔顧自己粗身大細的孕婦
有左之後都仲係成日一路行一路玩電話 (咁樣寫實俾人炳上天花板…)
放工步行路線會途徑好旺好旺的超窄行人路
但又好好彩so far都無俾人撞過 (可能只係因為肚細)

[三十四週] 的肚肚終於俾人撞到應一應!
其實依家肚籮咁大我無再邊行邊玩，已經好專心咁行路
有日放工我想食雞蛋仔，就行入果條好窄的行人路
(平時係會行隔離的行車路，都唔安全得去邊)
點知有個阿嬸忽然係人群中正面咁衝埋黎
而左右都係人，無得避的情況下就俾佢撞親木木

撞果下黎得太突然，撞完我擰轉頭望下邊個撞我
阿嬸完全係不顧而去…

回過神我就開始覺得個肚好痛好痛
痛到我烏底身㩒住個肚狂喊…
路過的人開始發現，我感覺到好多人望住我
但過左一陣先有人埋黎問我有無事

其中有對夫婦不停問我有無事有無事有無事
駛唔駛叫白車叫白車叫白車
我根本就function唔到，只係好驚同好痛
唔知點答佢地好，唯有係咁擰頭…
但個男人「唔肯放過我」XD 我就話我想坐低
於是佢去問舖頭借櫈搬出黎俾我坐
後來驚行人路人多，最後又搬返我入舖頭坐
仲買埋水俾我飲，我話俾返錢佢又唔收
臨走前再問左N次有無事駛唔駛叫白車

其實諗返都幾好笑，呢種情況照計係個女人會比較主動同細心
但呢對夫婦係個老公好熱心，仲同我講話
「呢個係我老婆，佢扶你起身行，你唔駛驚…」
「我同老婆都有一囝一囡，唔駛驚，無事既…」

舖頭係三幾個中年男人/後生仔看舖
佢地唔介意我坐係度阻住做生意
我想起身走佢地都唔俾，要我坐多陣先準走

衷心多謝果對夫婦，舖頭，同其他路過有關心過的路人

其實坐坐下都知道自己已經無乜事
可能只係嚇親，木木有胎水保護應該無事
喊完就自己慢慢行返屋企，即刻訓上床bed rest
再打電話俾開緊會的bubu，嚇到佢即刻飛車返屋企睇我
一見到bubu，我又喊過，哈哈

後來感覺到木木有郁就安心返啦
本來諗住過兩日產檢時同醫生講聲，都唔記得左 =P

呢件事我都有賺架，因為bubu自此日日都出車站接我
做我同木木的人肉bumper =]

----------------------------------------------------------------------

有日睇媽媽會fb，有媽媽話隻腳腫到唔見左腳眼
於是我又望下自己粒腳眼，仲係度…但腳掌好似漲卜卜左
叫bubu一齊研究，大家一致裁定…我都水腫啦!
不過只係好輕微，嚴重水腫的話，手指篤落去皮膚唔會即刻彈返上黎架～

媽媽會話，三消三腫就生得喎，唔知係唔係真呢？
我第二朝已經消左腫lu，唔次仲有無下次呢？

如果腫得好勁的話，媽媽會教話可以煲紅豆水消腫

做法︰
煲滾1L水，扔大約50粒紅豆落去，即刻冚蓋熄火
焗半個鐘就飲得，紅豆可以拎黎再整紅豆沙 =]

[三十四週五天] 產前檢查 • 私家 • 14

11 DEC 2013 • WEEK34 DAY5 • 孫錫鴻醫生 • WEIGHT: 4 LB 7 OZ

自從上次等左三個幾鐘
真係有少少怕去見孫醫生，但又好想見木木，好矛盾
想約最早九點亦約唔到 (好多人都打同一個算盤)
最後約左1145唔上唔落的時間…
但意外地只需要等四個就到我地，前後一個鐘左右走得!

今次一照，孫醫生唔講我都見到木木係裡面迫爆
對唔住呀木木，媽媽的肚肚係一個蝸居…

曾經希望上次照到的大口大鼻3D相
係角度問題、係木木玩野、總之就係假象 XD
今次孫醫生好努力咁又俾我地睇到多一次木木的3D樣
結果係…同上次一模一樣 XD

除左已經調頭，孫醫生仲話木木已經落左少少盤
我問即係點，孫醫生就叫姑娘攞個分娩中的膠B俾佢
仲叫姑娘俾個盤骨佢，姑娘當場望住自己個盤骨，呆左…
原來孫醫生係想姑娘用兩隻手做個盤骨形狀俾佢示範
我同bubu見到都忍唔住笑 =P

睇埋parameters
木木的頭圍細左幾日，肚圍細左兩週，大腿骨符合週數
重約四磅七，percentile 7%...
孫醫生依然係話average，適中，好好
表面上我說服到自己
我咁細粒，木木細粒都好正常，木木大隻我都生唔出
但始終見到percentile跌到個位數
都有少少un住un住…

好彩老人家都無乜點問 (可能佢地唔知依家產檢可以知道咁多野)
反而我自己報告，佢地會安慰返我轉頭話咁樣仲好生
希望佢地見到木木真身之後唔好反口啦 XD

2013年8月荷花BB展

3AUG2013

忙於寫每週肚文，好似好悶呀呵? 個個星期都係講自己講木木

其實迎接BB，SHOPPING都係好重要的一部分 XD

有左木木初時無乜意慾購物，果時首要係安全渡過[十二週]

之後未知木木係囝定囡，又唔想發生「買晒粉紅色點知木木係男仔」

後來[十四週]醫生大概估計木木係囡，係接住落黎八月頭的荷花BB展

木木媽已經忍唔住要出手啦!

荷花BB展一年兩次，分別係2月&8月，出年2月應該生左木木&坐緊月

趁呢次8月，懷孕四個月無乜肚行得走得就去下啦~

唔少人話BB展買野其實唔算好抵，我本身亦無打算係呢度買大型用品
志在了解下BB用品市場，拎下freebies咁 =P

之前靠唔同BB資訊渠道已經拎到免費入場票，仲誠邀左融融媽做我軍師
(呢種場合絕對唔適宜搵bubu陪...)
反而真金白銀用$10買左本購物優惠劵，我估freebies應該可以回本...
另外媽媽會教路，預先整定有個人資料的labels，慳返填資料時間
我就係準備左咁多咋，環保袋都無多帶，因為知道場內實有得派



果朝約左融融媽食早餐，兩個一身戰鬥格咁預早排隊入場 XD
一入場的感覺 -「d奶粉商好有錢」...
以前去婚紗展，頭排係法國婚紗, 美心, 奇華 etc, 哈哈!

我初次報到無乜概念，見經過邊個booth有coupon就撕出黎貼label換

「限頭十名免費xxx」果類coupon唔輪到我

無理由為左著數搵木木較飛通場跑嘛 =]

不過現場所見，有好多人都好誇張，一人拎住幾本coupon book

換到一車幾袋咁，佩服佩服...

除左換freebies，事前登記左幾個「乜乜講座」「物物體驗」

最後剩係睇左pampers的尿片示範

見到d promoter妹妹拎住把尺度男仔同女仔唔同尿濕位，都幾好笑 XD

有融融媽陪我癲+做咕喱，拎下拎下都唔少freebies
由尿片、濕巾、口水肩、面霜到食具都有
全部都係實用野用得著架~



因為仲有入場劵剩，我之後係last day又入多次，將本coupon book用到最盡，同埋第一次去所有野都走馬看花，第二次可以專心睇下心儀的用品~



講左咁耐，究竟有無收穫?

意外收穫係我無諗過會有的各類禮劵
融融媽教，去銀行booth填form開戶口開credit card
即時會收到禮劵，有d交埋文件又會再有禮劵 =]



然後有部分實用部分粉紅野，都係肯定平過出面買先入手 =]

實用類︰
- 紗巾, 濕巾, bathing gel
- soft touch訂左一大堆consumables等送貨
粉紅類︰
- grobag 睡袋
- suavinex 奶樽奶咀套裝, 奶咀盒, 奶咀夾, 奶咀鏈

consumables有個new born set
乾棉濕棉紗巾乜都有咁，另外再補幾包/盒乾棉濕棉
比出面唔係平好多，勝在買夠金額有禮物送
重點係可以安排送貨! 我request左最遲12月先送貨

奶樽係荷花買，除左set，散件同出面買一樣價錢
只係我對粉紅野的抵抗力係零...

本來無諗過會係BB展買貴野/大件野

不過見到有個booth有karibu folding bath賣

之前一直struggle緊買karibu定係stokke flexibath

現場係唔同booths睇過兩者實物，覺得karibu內籠見駛d

而且依家karibu價錢平之餘仲要有平時唔多見的顏色 

(平時最常見綠/藍/橙)

係融融媽拍心口話孭上身的情況下，買左 =P

（如果早一年半載，仲有限定粉紅色添呀~）

始終係一個孕婦，由開場玩到晏晝兩三點已經無晒電

而且戰利品已經多到唔敢再拎

辛苦晒融融媽啦，將兩手fingfing的我移交到bubu手上先走

而我同bubu之後就去左慶祝結婚1000天 =]

係呀，結婚1000天，但買野俾木木行先 =P

[三十三週] 洗衣部開工大吉

[WEEK33] the size of a durian =]

She's keeping her eyes open while awake.She's also starting to coordinate breathing with sucking and swallowing.
Her bones are hardening.
And she going through (more) major brain development -- that's one smart baby!

-----------------------------------------------------------------------------------------------------

29 NOV - 5 DEC 2013 • WEEK33 • weight︰103 lbs • tummy︰34"

本週讓座次數︰5 (20+女 / 20+男 / 30+女 / 30+男 / 50+男) 

累計讓座次數︰81 (MTR: 49 / 巴士: 25 / 電車: 7) 

胎動感覺︰木木撐到我肋骨碎裂咁滯...

幫木木添置的用品已經七七八八
因為木木房有大型傢俬未搞掂，所以都仲係一間雜物房咁...
不過有件事真係唔拖得，就係要pre-wash木木的衣服!
新買俾木木的一定要洗，因為新衫可能殘留左製造過程中用到的化學品
而二手衫*雖然已經洗過N次，基於衛生考慮都要洗洗先著

*係呢度多謝各位送出「幸福二手衫」的姐姐 & 佢地的媽媽!
BB大得太快，衫仔著無幾多次就唔岩著，加上可以沾沾福氣
我好welcome二手衫架~!
依家木木的 newborn clothes stock，大約八成係二手衫，兩成係新衫 =]

其實媽媽會好多人十一月已經開始洗衫
因為bubu先係小林家洗衣部主管，都唔係我一個人話洗就洗
十一月尾買埋BB洗衣液同BB衣架
十二月一日洗木木衣服大行動開始!

除左洗衣液同衣架
我仲特登買左清潔洗衣機用的丸丸 (幫襯返自己家族生意 XD)
洗木木衫之前用丸丸行一轉空機先開始洗

唔好睇d衫細細件，一次晾二三十件都唔野少
前後洗左六轉，主要洗初生的和尚袍, 連身夾衣, 包被, 手套腳套
bubu仲好心機到每行都要用同一款夾夾…
但床上用品就仲未洗
預十二月底/一月頭再洗多次~

望住咁細件的初生蛤蟆衣，覺得好可愛呀~!

用托腹帶托住木木 [續]

認真試用mama mia托腹帶都有大概一個月的時間

問我係唔係好有用，我會話唔係

因為我肚肚本身唔大唔墜，亦無腰痛問題

但我相信如果有以上問題的孕婦，托腹帶應該幫到手

有時我週末無帶托腹帶咁去足全日街，返到屋企都真係會覺得腰攰~

之前介紹過mama mia托腹帶的設計，而質地我覺得要用一排先知好唔好

呢條托腹帶的表面係類似foam的物料

裡面係似毛巾的棉料

而接合位係用魔術貼

之前聽過媽媽會分享其他牌子的托腹帶，一戴就成個肚肚起粒粒!

懷孕期間肚皮係會比較敏感，我試用貼住肚肚戴，感覺係舒服

不過我通常都係會著係大肚leggings出面的，去洗手間比較方便 =p

但我戴托腹帶經常遇到一個問題

因為我肚肚唔夠大，托腹帶基本上包左我大半個肚

著起返工衫上黎，托腹帶就會好現形，肚肚起角 ><

又咁...係我無特登買大肚裙啫...

Mamamia以實惠價錢提供一系列高質素母嬰用品
現於全線荷花親子店、新都城百貨公司、爸媽部落等各大商店火熱發售。

Facebook: http://www.facebook.com/mmm.hkg

查詢電話&電郵: 3520 2026 / sales@parakeet.com.hk

更多分享: www.Yes-Parents.com / http://www.facebook.com/YesParents