上美容院の哀歌

上美容院護膚，才只不過約兩年光景，就已經換過四家美容院，夠哀了吧?
開始只因訂婚了，實在有需要「搞搞佢」
自小我已經不懂打扮保養，鄰座同學日夜怒痴雙眼皮膠紙的時候
我可以求其梳下頭，帶著滿臉豆豆兼一派悠然自得的樣子去上學...

雖然是比較遲鈍，但我都大概知道連鎖式經營的美容院有多可怕所以當時主打娘家附近幾家獨立式經營的小美容院每間都用「試做價」做一次facial，試幾家後決定在美容院A落戶開course
可惜好景不常，婚前幾個月美容院A忽然不幹，易手給美容院B原址繼續營業!
那時我還有十次八次facial在美容院A
美容院B說可以繼續做完美容院A的才決定跟不跟他們的
十次八次金額不小啊，無奈地乖乖就範
幸好之後覺得手勢還可以，就跟美容院B開course了。

婚後搬離娘家去另一區住，雖說每星期總有一次回娘家
但總覺得很不方便，不喜歡做完facial後「癲婆look」乘車回家 ><
那時還有大概三、四次，心想完course後一定要轉美容院!美容院B當然也嗅到我豎尾巴了，最後一兩次facial 後「哦」了我很久很久...
又幸好年輕美容師不算太難纏，堅定不移下全身而回!

婚後不能懶，要繼續keep!
剛巧未來嫂子介紹她光顧的一家，是她朋友開的，一來比較放心
二來美容院在我家的步行範圍內
於是就順理成章的在美容院C落戶開course...
再次好景不常，當我做到第四、五次treatment
皮膚變得滑不溜手、吹彈可破之時 (假的，不過真的好多了)
美容院C又又又忽然不幹，原因是舖租太貴...
結果找到美容院D接手，我餘下的treatment又又又再次被過戶 ><

不過今次沒上次般順利，美容院D本來就有兩家分店 (一聽到有分店就好擔心)
是「玩格仔」的那種美容院!!!

－－－－－－－－－－－－－－－－－－－－－－－－－－－－－－－

好啦，以下落黎果d又係要口語化先可以表達到美容院D有幾咁黑人憎!

話說美容院C拍晒心口咁promise
話美容院D一定會幫舊客做埋剩低既facial，之後先考慮join唔join佢地都得咁好啦，我咪放心照平時咁book囉
做facial果日佢地仲有打黎remind booking，好似好細心咁
上到去，話要填過晒d表，OK明白無問題
但係要人地填結左婚未屋企有幾多人收入幾多 < 有咁既需要咩?
係咪想知我搵得多就sell果d「白金魚子醬xx療程」剩係得個名矜貴既package?

填完資料諗住可以入房啦，未得，要去角落頭坐低
話可以consume舊單，不過係要做佢地既treatment (！)
一打開本clear file就揭左去一版每次千千聲既treatment，話照價扣返舊單
我個balance得返千幾蚊，咁咪做得一次?

到我出聲問先話其他都揀得，其實揭黎揭去都係果d價錢，再貴d都仲有
終於揭到一版叫做basic treatment，即係最基本果d保濕、美白、舒緩
睇下個價錢 > $680, $780, $880 (！) 我心裡面已經鬧左十次「痴線架?」
ok fine，就揀最平果個$680
佢地見我揀呢個之後就改口，話唔係照扣balance
而係將我舊單果四次treatment (= 千幾蚊) 變成四個格仔 (！)
然後話$680一個格仔唔夠扣，要扣兩格到呢個時候我已經好嬲好嬲，反口覆舌，見頭先條橋sell唔到就轉橋一定賺盡你為止
唔想再同佢拗，扣兩格就兩格
點知佢地仲夠膽死繼續sell咩乜鬼中藥療程
話個個新客上親黎都要做呢個treatment「清底」
如果唔係以後做咩treatment乜都吸收唔到喎 (！)
我唯有將我本來已經黑既面口再enhance下︰你聽唔到我已經揀左啦咩?

終於入到房，唔駛換robe因為treatment根本唔包肩頸按摩
係咁意捽下塊面就開始針清，一路清就一路探我做邊行搵幾多錢
兼係咁話我塊面有幾爛，上手做得有幾差...
繼而繼續sell果個中藥療程，仲話依家轉都仲得，做完先計 (！)
針得痛不特止仲要求其針下個鼻頭就話針完之後我都無expect會有d咩額外野，諗住倒埋模就走
點知佢搽完一層薄到似有還無既gel mask上面之後
話個basic treatment係唔包倒模 (！)
再話佢地公司既模粉比其他好 (模粉可以點好法呢?)，叫我俾錢加 (！)

到呢個時候已經係極嬲，佢地見我板起塊面，可能知道無可能再係我身上搶到錢就出返去
我咪話gel mask好薄既? 唔駛5mins已經乾左，但係佢地係出面掛住吹水
好耐之後先入黎搞埋d手尾，當然期間繼續講萬能中藥療程...
我都算好脾氣架啦，忍到依家都未破口大鬧
因為我已經下定決心唔會再去，剩返d balance亦由得佢，唔想做潑婦
但佢地仲問會唔會開package，仲話問過management (你自己咪係囉，扮!)
如果開package，最多頭先果個原本扣你兩格既依家扣你一格算啦(多謝晒喎) (！)
雖則黑晒面，我都有少少禮貌咁話覺得唔太適合
然後佢地就話係因為我唔做果個爛鬼中藥療程所以做咩treatment都無效果 (！)

嬲到震，今次堅扯火!
終於忍唔住口鬧返佢地轉頭，然後開門走人
落到街都仲好激動...
繼而即刻打電話俾未來嫂子，叫佢千祈唔好make appointment

事後仲要俾我知道，原來美容院C臨走前係有留低舊客treatment所需要既料同工具架!
即係美容院D話因為無上手既料而做唔返上手既treatment > 又係講大話!

－－－－－－－－－－－－－－－－－－－－－－－－－－－－－－－

點解我可以咁豪氣剩返果幾百蚊都唔要呢?
其實係因為美容院C轉手既時候，不但止要美容院D做埋我地未做完既
同時間亦將balance既金額過返數俾我地所以去美容院D做既全部都係係bonus，唔去都no loss =]

真係勁憎勁憎呢種美容院!
做生意既手法太差劣，做facial明明應該係一個relaxation黎架嘛!
所以一開頭我話只會搵個體戶做就係咁既原因...

anyway，之後當然無再去美容院D啦!
美容院D亦都無打俾我，可能佢地根本唔想接上手舊客迫我走掛?
依家只係想美容院C既美容師出年嫁完之後，快D搵地方開返
我唔想再跟第五間啦，因為C真係做得好好 =]

－－－－－－－－－－－－－－－－－－－－

勁長篇大論，你睇到呢到真係感謝你 >3<