林林 • 十七至二十週小記

JUL 22-28, 2017
[十七週] 肚皮突破三十大關

關於懷孕體重、腰圍肚圍等，一直都有好好記錄，甚至可以同上胎同週數做比較。今胎開始時體重已經比上胎多幾磅，而腰圍亦不復當年24吋...每個星期對比，都係比上胎磅數止跌回升得快，腰圍肚圍又大得快，十七週已經達到30吋肚圍了! 上胎臨生前肚圍35.5吋，唔知今胎會唔會突破呢?

肚肚拍照記錄亦每星期進行中，不過就無上胎咁好心機自己整週數牌，亦會間中甩一兩星期咁...

而木木就明顯乖左，少左扭計，亦多左接受林林，會隔住肚皮同林林玩下。佢好鍾意我問佢情境題，例如︰如果你同林林去公園玩，林林俾大哥哥推跌左，你會點做呀? 佢會答我︰我會即刻跑埋去林林度，然後帶佢返屋企 =]

流感肆虐，立刻去藥房入返盒口罩，老闆話︰你咁細塊面用小童口罩得架啦!



日常肚照

------------------------------

JUL 29 - AUG 4, 2017
[十八週] 論盡的大肚婆

除左既有嘅pregnancy brain (無好轉過ok?)，呢胎個肚漲得快，好似無上胎咁輕盈，仲好鬼論盡 (其實係咪有左都好論盡)。有晚陪木木入睡，自己亦好自然地訓埋一份，訓冧左之後突然電話鬧鐘響! 我怕會嘈醒木木就拿拿淋去整停佢，點知碌過去時唔知點解會碌左落地!

幸好個肚未算太大，林林亦有羊水保護應該無大礙，但自己就撞親個頭擦損手，真係論盡到一個點...

本週開始學孕婦瑜珈，主要想喺炎炎夏日下能夠比較舒適地伸展身體手腳，同時希望多做有助生產嘅瑜珈動作! 目標係快過木木嘅兩個半鐘 =P

受邀出席活動，自以為鬆身裙掩蓋得好好，估唔到放一張全家福上page都已經有眼利網友pm問係咪有喜 =P (當時未公佈)




日常肚照



------------------------------

AUG 5-11, 2017
[十九週] 把心情都弄糟透的荷爾蒙


之前都分享過，呢胎好似好易喊咁，少少事都覺得好委屈，會唔開心，應該真係關荷爾蒙事，因為有左之後嘅喊法係濠啕大哭，然後心情低落一兩日，我都知咁樣對林林唔好，但真係控制唔到。

木木爸其實好錫我，但真係希望佢言語上可以再多啲顧及孕婦感受...

呢胎因為去開果欄果頭睇中醫，就多左去果欄入貨，金車厘子的確好甜! 食完金車唔想再食普通車厘子...



------------------------------

AUG 12-17, 2017 
[二十週] BABYMOON!

小林家+四大長老都係嚴禁大肚婆搭飛機去旅行的，所以我亦無指望過會有babymoon呢件事發生喺我身上。今年年頭，book左十月尾同屋企上royal caribbean郵輪玩，有左之後去check cruise ship T&C，發現上船時要未滿廿四週先可以 (木木媽屆時已三十週)，即時灰左 T.T

唔知木木爸係咪知我無得去唔開心，就提議暑假去澳門，初初諗住住澳門銀河渡假區玩天浪淘園，但諗起滑水梯同激流無我份，澳門各大抵食自助餐又食得唔盡興，就打消念頭。之後諗起哥哥一家去過愉景灣weekend trip，都OK喎! 

繼續閱讀︰懷孕蜜月小旅行︰BABYMOON at DISCOVERY BAY (未寫好)

另外，林林踢得越來越大力了，唔再係小泡 / 小魚感覺，有時都俾佢嚇一嚇，不過隔住肚皮木木爸仲感覺到呢。

趁墟 • BB展

AUG 5, 2017

又到左一年一度嘅荷花BB展，其實喺BB展木木媽唔會點買野，第二胎更加忍手，不過既然個肚2nd trimester又無乜唔舒服行得走得，有免費飛又有大肚媽媽好友一齊去，就去啦～

一係唔好去，一去就早少少去...我同朋友大概0830到達會展，展覽1000開，去排美贊臣條隊前面已經有廿幾人(!) 大部分都帶住個喼，仲已經事前買左coupon book，我同朋友就無咁癲，都係抱住有乜就拎乜嘅心態，只係帶左backpack，準備左個人資料label同埋乾糧。



你見我入到去之後係無影過相，因為都真係幾忙同無手，哈哈! 一入場我地第一時間去左排美贊臣同雪印各限量100嘅孕媽媽福袋，又竟然俾我地排到，仲要3X號籌，一開波已經拎左兩大袋...

之後我地就去排左龍頭奶粉商&尿片商，呢啲參展商通常BB展前已經喺facebook大肆宣傳，可以事前登記定，當日就可以排條快隊，可以快啲拎到禮物!

之後再逐行逐行行，今次行BB展最開心係試左好多間來自台灣嘅滴雞精，分別有王朝 / 娘家 / 晨露 / 田原香，個人感覺娘家最好飲，晨露 & 王朝其次，田原香可能因為連原味都有添加藥材，所以最唔鍾意。

我地由十點入場，到大概四點半朋友先行離去，我就去join埋疫苗計劃先撤退，戰利品如下︰



尿片類，有唔同牌子嘅尿片，可以俾主子試啱邊隻最岩自己pat pat再入貨



剩係孕婦食嘅DHA都有唔少



除左join疫苗計劃，只有soft touch 紗巾擦巾係真金白銀買，下圖其他都應該係超抵價換購先會俾錢換，二胎媽真係好忍得手的!



木木媽覺得咁樣已經好癲，我想像唔到果啲去幾次嘅....

林林 • 十三至十六週小記

JUN 24-30, 2017
[十三週] 又愛又恨的家姐

雖然已經夠三個月，喺公司只係通知左我老闆同最親近的隔離位同事，無乜必要，都唔想特別俾人太早知自己有左 (唔知點解，無得解)。有時都會刻意收下個肚，唔好成隻蟹咁行法。不過個肚 (定腩?) 實在係遮唔住，都開始有零星同事發現，問起都會認嘅。平時公司平均一年大約兩三個staff大肚，自從自己有左之後，已知後面有三個staff跟住大肚，好旺呢! 我第一時間諗到嘅係，希望2017/2018出生率唔好太高...

至於木木，仍然經常徘徊於接受到 / 接受唔到之間。有時佢會叫自己做baby，想我做佢姐姐，唔想自己做林林個家姐，仲會打我個肚話要林林跌出黎；有時就會錫我個肚，會話呢對鞋 / 呢件衫我唔岩著就會俾林林著，如果林林喊，我會呵呵佢，話佢知媽媽就到。

不過講到最哭笑不得係，佢已經識得抽林林水，我同佢講，媽媽食嘅嘢會經臍帶俾林林食，於是有個古惑女就將自己唔想食果啲菜、紅蘿蔔塞俾我食，話係請林林食! 奸得佢!

------------------------------

JUL 1-7, 2017
[十四週] 乾、癢、漲

感恩木木媽身體皮膚一向無乜嘢 (咪講)，但上胎陀木木時都有肚皮痕癢嘅問題，今胎初初都有，但轉左防肚紋產品之後就無問題。但係呢個星期開始，大脾開始好癢好癢好癢 X10000，起晒紅點，R得多會損同結焦 T.T 唔知道係唔係妊娠濕疹呢? 要等下次產檢時問醫生。

全身皮膚亦變得好乾，乾到小腿龜裂，乾到似冬天最凍時嘅情況，連馬油都出動埋，返返下工都要搵嘢搽，好乾呀 ><

好多孕婦都會喺懷孕期乳房漲起，身體自自然然為哺乳做準備。但我上胎呢...依然好似無乜咁，哈哈! 今胎可能因為乳腺之前已經返左兩年工，比較易嗌返醒佢，所以終於有少少料到，大概由AAA變成AA級別咁...

------------------------------

JUL 8-14, 2017
[十五週] 林林來跟陽光玩遊戲

2017年下水禮! 諗返起上胎兩個大人，真係唔會無啦啦夏天去海灘，所以木木喺媽媽肚入面時係無去過海灘的。十五週，肚有少少，身未腫脹，仲可以著下bikini =P



似乎已經有胎動呢，好輕微咁一兩下，等多少少再confirm，話唔埋只係啲腸臑動呢。

------------------------------

JUL 15-21, 2017

[十六週] 胎動再臨



本星期實實在在地感受到胎動! 唔只一下兩下，係接連幾下，連遲鈍木木媽都幾可肯定係啦! 新手媽媽會問胎動係點，我聽通常都係形容似有條金魚游黎游去，而我自己就覺得似一個小水泡由肚底浮上面咁樣。第二胎，果然係快啲。

因為木木嘅關係，之前一直好少時間同林林互動 (而且理性地知道胎兒仲未聽到外間聲音)，當林林開始有胎動之後，木木媽開始多左留意返個肚，好期待下一次嘅胎動! 

不過，公司正值裝修期，林林就慘啦，莫講話佢，木木媽我都好辛苦，日日轟轟轟鑽個不停，點專心做野? (咁唯有打BLOG啦...)，加上沙塵滾滾，自己出入都要格外小心。

講開又講，老闆自從知道我有左，已經多次表面懶關心實質諸多為難，例如要我講得出由依家到放產假前邊日要放sick leave (政府產檢點會知?)，要求我約星期六私家產檢 (我已經唔放全日，唔會讓步轉星期六)，約appointment要約最早/最晏，病假照扣，但就要睇完即仆返公司/做到最後一刻先離開公司等等....佢同上胎果個衰老闆的確不分上下架! 而且我今星期先知，原來同team有另一位同事都有左! 預產期仲只相差兩星期，唔怪得老闆咁癲... 

[十五週六天] 產前檢查 • 私家 • 5

Jul 14, 2017 • w15d6 • 劉珮琪醫生 • 5 OZ • BPM: 163

自從八週後，相隔左七週先再返去劉醫生度覆診 (因期間第十一週去左劉子健醫生度做NIFTY)。今次特登約下午晏少少時間，等我地可以返屋企接埋木木去探林林 =] 木木知道有得探林林都覺得好新奇，但未至於係好興奮期待果種。


石門診所有個play area，所以帶哥哥姐姐黎都唔怕悶親佢地，而且劉醫生都唔駛等太耐，玩一陣就可以入去了。今次一睇，就覺得林林又大左好多! CRL已經爭啲度唔到 (大約9cm)，而重就大約5oz。同上次NIFTY照USG時一樣，林林所有fetus measurement都超過50%， 肚圍 (AC, Abdominal circumference) 仲去到87%，比預產期大左幾日，唔通林林係大碼B? 千祈唔好呀，太大隻木木媽生唔出架 ><

劉醫生有轉3D俾我地睇，但林林暫時未長肉，所以3D照係有啲恐怖，我形容係好似螳螂咁...木木對於一切 (熄燈、媽媽訓上床) 都覺得好新奇，好hyper咁大叫，走來走去，對於on screen嘅林林，就未有太大興趣，下次再帶佢探林林啦。

[十五週三天] 產前檢查 • 政府 • 4

Jul 11, 2017 • w15d3 • 廣華醫院 • 許詠詩醫生 • BP 98/65 

十五週終於第一次去公立醫院產檢! 廣華醫院會將初診孕婦group埋同一日的，所以呢日會比較混亂同耗時。十點準時去到徐展堂門診大樓四樓，先放低預約紙，然後等叫名去 (1) 量血壓、(2) 驗尿 (要事前用樽仔預備好)、(3) 度高磅重、(4)抽血。之後就會進入無了期嘅等待...



同上次唔同，今次等等下有個年輕女實習醫生帶我去另一邊房仔，詳細地問我病歷輸入電腦，準備一陣見醫生用。我問佢有無份會診，佢話無，好大怨氣咁話一日到黑都係打字打字同打字...公立醫療系統承受好大壓力，醫護人員好大怨氣...

喺等待期間，可以睇下牆上無限loop嘅video，或者睇下廣華派嘅書仔，我返去拎返上胎果啲去比較，都係差唔多，但就多左關於餵哺母乳嘅 reinforcement。同時等候大堂亦有位姑娘解釋俾大家聽每次產檢程序。



等左好耐好耐...差唔多專科上午時段結束時 (1PM)，先至嗌到我，當時個等待大堂已經由好多人變到無人咁滯...



今次見一位女醫生，都係問病歷同上胎生產情況，然後就上床打開個肚聽心跳，醫生行埋黎摸下個肚 (佢同上胎年輕女醫生一樣，都係話唔好意思隻手比較冰凍!)，就咁完左。唔同嘅係，醫生竟然問我要到診紙定病假紙。

上胎廣華係死都唔肯俾病假紙的，只會俾半日到診紙，上胎份工還好接受到診紙，但今胎間公司唔接受的! 本來都好苦惱，依家突然間一天都光晒，仲要俾足全日假紙，unbelievable! (可惜衰老闆係唔會俾你放足一日...)

最後成點幾先走得，因為今日係初診日，樓下一定好多姨姨派贈品，我落到去時姨姨們仲喺度，幾個姨姨圍住晒，只需要填一份，姨姨們就會幫你抄其他果啲，贈品就到手，哈哈!