[DAY291] OCEAN PARK

NOV 2
多謝PAMPERS! 好多個月之前係咁易係PAMPERS寫百零二百字
內容都係不外乎將PAMPERS讚到天上有地下無咁
就被選中得到海洋公園成人門票兩張 =]

帶咁細個BB去海洋公園，總有會三姑六婆話咁辛苦自己為乜
係辛苦少少同無得玩機動遊戲，但可以一家人出遊好值得喎!
不過要辛苦木木爸渣咁耐車南下香港仔就真的



一入場木木爸就話要買氫汽球俾木木，俾孤寒木木媽reject左
睇黎木木第時大個少少，一句「我要」木木爸就會衝去俾錢...



多謝工作人員幫我地影合照呢 =] 
其實一入場我已經覺得好陌生，身後果座野我完全唔知係咩黎...
畢竟我對上一次黎應該係08/09年的哈囉喂 =P



所以呢，今次我地一家三口一齊第一次坐海洋列車上山
列車入面又真係幾海洋feel，燈光好「深海」
又有好多海洋動物係LED screen上游來游去



上山後第一站黎到冰極天地，添衣先~



探訪企鵝，木木用好疑惑的眼神去睇每一隻動物
又唔係貓貓又唔係狗狗，咩黎架呢?



過山車與我無緣...我想玩但又想有人陪我玩
木木爸誓死唔玩，木木大個左要陪我玩啊!



途中經過玩激流的地方 ，貪玩木木爸想玩水槍整蠱下面玩緊的人
點知等等下發覺呢對公公婆婆應該係唔會有玩完的一刻...
佢地應該係日子有功，因為射得好鬼準! 
退休的生活真愜意(苦悶)...



早晨陽光柔和溫暖，木木舒服到訓著左
木木媽最怕睇到木木身後果類動物，極速略過~~~



木木媽睇錯資料，原本諗住可以睇第一場海洋劇場
然後去食個靚lunch再落山，點知去到已經做左半場
乜館乜館又已經睇晒



於是我地去坐呢個合家歡的摩天塔 =]



海洋劇場要早少少入去搵位，如果唔係臨開場先入去就要坐到好前
無得高角度欣賞之餘仲要好曬呢
悶悶地無野做，木木話你地慢慢等，我又眠一眠先...



開始啦! 殘忍的木木爸叫醒左木木睇表演
木木都目不轉睛咁望住聰明活潑的海豚
我仲同佢講以前呢度有條殺人鯨海威小姐頂波好叻 XD



玩完山上就坐纜車落山，木木似媽媽，唔驚仲識笑



佢呢個樣係模仿對面腳震震地揸緊相機的木木爸 XD



木木︰爸爸，學下我放開雙手，唔駛攬實條柱!



木木爸肯陪我地坐纜車仲勉強笑得出已經好叻!



落左山去探大熊貓，我地兩個大人都未見過盈盈樂樂呢
木木對黑白分明的大熊貓好有反應，又指又叫



























老邁的安安/ 佳佳 (辨別唔到)



之後轉去威威天地，諗住木木會好興奮啦
點知木木眼訓了，無晒心機
最後我地連夜晚七點果個人工湖水幕表演都無睇就走左lu~



的確帶住個細BB去海洋公園好多野都玩唔到/ 玩玩下要走
但可以俾木木睇到好多動物都好值得呀, 書本點睇都唔夠見到真實好
黎緊又可以再去，因為又贏到PAMPERS海洋公園門票啦 =P

[試用] 噓噓樂紙尿片

感謝噓噓樂邀請木木試穿佢地的透氣輕柔紙尿片 =]

尿片都算係木木生活開支裡面比較重皮一項

因為木木初生時好多朋友都送m字頭日牌尿片

木木著得ok又無紅無漏的情況下，一直都係默默地補購…
心底裡我當然想搵個平靚正品牌替代! 今趟機會實在太好

貼心的噓噓樂仲送上玩具，明係物誘試用專員木木啦XDD

尿片對我黎講最緊要抵，唔漏尿，唔會起尿布疹
尿片對木木黎講最緊要舒服，佢阿媽要換得夠快，唔好阻住佢探索世界

就以官網主打的六大特點去試試佢~
噓噓樂透氣輕柔紙尿片的立體防漏彈性側邊
木木媽摸上手覺得都算軟熟，唔會鞋十十界到肥脾，木木亦無漏尿情況

乾爽透氣表層 / 超薄乾爽吸收體
整塊片片黎講，噓噓樂未算係最薄最軟熟果類，但亦唔差!
比H牌, 綠P牌好，而且因為佢有一層壓到好薄的藍色吸收體，未吸尿前唔會貼實屁股會通爽少少，吸尿後亦唔會話發脹得好厚，屎屎尿尿少機會敷住屁股，自然尿片疹都唔會有

C型動感透氣腰圍，呢D名稱講多無謂
木木媽覺最緊要包晒BB後腰唔好谷起，噓噓樂同木木係夾到的，同埋我鍾意佢後腰位有少少彈性，木木用緊的日牌係無的，同樣都包到屁股，但我拉起貼貼去前面時就覺得有彈性手感好 (連阿媽手感都要照顧埋，真難服待…)

彩色123對位
呢個設計我最LIKE! 對位清晰簡單! 偏執狂木木媽媽有時為要左右對齊會反覆又撕又貼，木木睬我都傻，佢的耐性只容許我貼一次，噓噓樂的三個顏色間距令我未訓醒時都可以一貼到位!

尿濕顯示係尿片前中後三塊小荷葉，有別一般尿濕後會顯色，佢尿濕後係唔見左塊荷葉的

木木用開的日牌搵到最平 (仲要唔知係唔係真野) 都要最少$2+@ (M碼)

相比起台牌噓噓樂價格就非常親民
而且佢並唔係大陸小屁屁們所寵幸的品牌，唔駛擔心搶唔到同埋會有假貨。

辛苦你啦木木，獎你玩玩具 =]

暫時香港噓噓樂提供中碼至加大碼 (M – XXL)
購買點︰藥房或直接打熱線訂貨送到屋企門口，慳力慳時間
媽媽們可以去噓噓樂官網登記索取試用裝試試先︰
http://www.sealer.com.hk/facebook/s/sealer_form.php
仲可以留意住噓噓樂facebook page，不時會有優惠︰
https://www.facebook.com/sealerhk

[13m+] 農曆羊年

正月完結前點都要寫好ge~
同大家拜個有遲唔會無的年 =P
祝大家新年進步!

上年新年木木都仲未滿月，木木媽更加唔駛講，喪屍咁...
今年有好朋友代敗日本櫻花全盒，大大提升佈置意慾
仲有今年終於整左小林家利是封! 好開心!
(好想係咁派利是俾人! 哈哈)



第一封當然要派俾小林家木木 =]
木木媽娘家每年都會寫新年賀語係利是封背面俾自己囝囡
我都打算維持呢個做法~



年初一早上，木木已整裝待發啦!
解說下呢一身造型出處︰

賀年服裝 - 花園街
DUFFY利是袋 - 迪士尼樂園
粉紅蘋果襪 - 淘寶
粉波波鞋 - H&M

賀年衫木木媽大概係新年前一個月就買定
桃紅花花小鳳仙，好靚呀，木木媽買得好 XD
(碌落下面睇全身相會清楚d)

仲有木木舅父舅母送的duffy利是袋，新年最重要裝備，哈哈!




年初二
木木仲細，都係係屋企睇住煙花先
呢次應該係佢有生之年第一次睇咁耐電視 XD

電視的畫面+窗外的煙花聲，木木似乎都明明地
指住「喔! 喔!」咁樣



木木媽少有地下廚煮小林家開年飯，LC雲吞雞!



年初三
赤口不宜拜年，小林家選擇左一家三口去公園玩個下午
仲做左一件bb一歲會做的事!



年初四
相約朋友們於樹屋 =]



同融融，波哥，晉晉，豬脾，大爺一齊扔波



一齊隊...小朋友飲品
多謝融融媽特別準備bb飲品!



以前幾個女仔聚會，依家通常x3，好熱鬧!



晚上同契媽們飯聚 (木木媽食緊墨汁pasta =p)
一連四日農曆新年假就係咁完左
期待明年聽到木木講「新年快樂」!

成長記錄 • 十三個月

[16 JAN - 15 FEB 2015]

身高體重
體重︰9.23kg
身高︰74cm
牙齒︰2隻

飲飲食食
本月引入的新食材有
牛肉 鱈魚 蕃茄 西柚
呢個月又係另一大挑戰! 有一個星期左右，木木唔肯坐highchair，花盡九牛二虎之力坐好，就合實嘴仔唔肯食...煮淋D煮硬D試pasta試下蕃茄酸maymay都唔鍾意，氹又氹過鬧又鬧過，餵到我同木木爸好沮喪，見住木木隻肥脾瘦左勁心痛 ><

然後唔知幾時開始又逐漸正常返，「正常」係指木木的正常情況，即係都會扭玩扭唔食，不過食物最後能夠入晒佢個肚而唔係奉獻晒俾大地，已經好安慰

但呢隻曳豬係正餐先係咁，零食呢D當然無任歡迎，就算跟我地去6299度食飯，俾白飯同一條菜心佢，又食得好滋味，我係咪應該轉大人飯俾佢呢?

肢體發展

• 行得都幾穩陣，有時仲急步走，基本上已經唔再爬，跌低左會用手撐返個人起身，「踎低起身開步走」呢套動作非常流暢，當然仍然有企唔穩的時候
• 屋企playmat差唔多兩吋厚，我地發覺佢明明向前行緊，一到墊邊就會打橫上落，我地大人唔會咁做，應該係佢覺得打橫上落安全D!

情感認知

• 識得吹口哨! 好amazing，佢見到木木爸吹口哨就跟住吹!
• 識得飛吻! 不過似掌自己咀多D，哈哈!
• 問佢 XX 係邊度可以正確無誤指出，當然限於常見的家人同姐姐
• 著衫著鞋著襪可以自己伸隻手/腳入去正確地方
• 知道「HAIR」「MOUTH」「BANANA」「GIRAFFE」
• 叫佢執野 / 俾野某一個人都可以做到

語言能力

• 貓貓 - 無論真貓假貓，見到就會好肉緊咁指住叫
• 爸爸 - 識講貓貓先過爸爸，但相信木木爸都已經好滾動~
• PEPPA - 我地成日問佢peppa pig係邊，佢除左會指，仲會發類似「pep」「per 」的音

------------------------------------------------------------------------
就咁睇木木都好似幾可愛...



鏡頭一轉，就變返爛仔格!



攝於唔食野果排，唔食都算仲要發脾四，俾木木爸罰佢去爺爺嫲嫲家時無人同佢玩



無論係真假電話木木都愛聽，但唔講野架 XD



仲愛一切新奇事物，包括平平無奇的紙箱



多謝波媽同sa姐姐送megabloks
舅父舅母就送左lego
木木你好幸福呀，媽媽細個都係執你舅父D lego尾玩咋



原來木木的新曆農曆都係16十六，非常好記!
木木媽小時生日，嫲嫲會蒸一底蛋糕同我慶祝
於是我又照辦煮碗，點知蒸衰左 =P



食碗面，反碗底...



去公園玩最開心




有件事我連木木契媽們都唔敢講...我搞到阿囡破相!
事緣木木媽生日前一晚如常同木木埋身食奶奶
明明已訓著的木木無啦啦扎醒爭扎，我一時捉佢唔住
佢就飛左落床邊，面向下撞到嘴角爆缸!
好自責，個心已經盤算定要儲錢俾阿囡做laser...
好彩而家條疤痕已經唔覺
好彩木木爸無鏟我上天花板
好彩木木第二朝訓醒都仲對我甜笑

(契媽們如果睇到呢度實即刻炳鑊我甘!)



好彩依家又變返一名小美女~



木木︰我十三個月大啦!