北投 > HELLO KITTY SWEETS > 誠品 > 台北101
結婚一週年正日! 可惜落足一日雨...
除左食餐好，今朝特登安排去北投浸下溫泉，肉帛相見一下 (!)
原來北投站去新北投站呢段車程，有別一般列車
車身車廂配合北投溫泉區，仲要每卡都唔同設計，有趣!
不過車程得一個站，都未認真睇已經要落車...
至於我呢身眼鏡妹頹look...well，浸溫泉咁熱，化妝的話乜都溶晒咪仲恐怖 XD
第一次黎北投，感覺好舒服，靜，空氣清新，好地靈人傑咁
(其實只係因為好鬼早又係平日仲要落緊雨...)
沿途都係花草樹木，雖然係要行上山，都唔算好辛苦
出車站就會見到呢個指示牌，估唔估到我book左邊間?
行人路上的水渠蓋，下面已經係溫泉水，冒煙的!
由於我地揀果間幾乎係山頂咁滯，途中經過好多其他溫泉館
例如呢兩間「美代」同「水都」，都睇過有人recommend，好彩無揀!
「加賀屋」，係我揀的溫泉館 finalists 之一
睇落都唔錯，下次可以試試...
估到未呢? 行到咁高，除左好出名果間「皇家季節」
仲有就係我book左的 「三二行館」(villa 32)
門口好簡約，而內裡別有洞天
就好似一間有錢人家的別墅 (別墅都係有錢人先會有架啦…)
而事實亦真係有個有錢台灣人，整左呢幢只有5間客房的溫泉館 ._.|||
下面果三盤石，都係冒煙的!
我地行程無時間係北投留宿，所以集中搵可以提供「獨立湯屋」的
我俾bubu由兩個finalists揀，bubu一聽到三二行館只得5間房，二話不說就揀呢間!
被安排去03號獨立湯屋，好期待呀!
對唔住…唯一一張panorama out focus…
呢間獨立湯屋大概百零二百呎，麻雀雖小，五臟俱全
梳洗、如廁、淋浴、浸溫泉、梳化休息都有各自空間
梳洗的地方～
有L'OCCITANE沐浴用品同EVIAN礦泉水
雨蓬花洒爽歪歪
主角～睇落細細個其實坐四個人都ok!
而且左邊木窗可以拉開，頭頂的天幕亦可以拉開…變成半露天風呂!
可惜外邊落住毛毛雨＞＜
我地無深究呢個係什麼什麼泉水啦，總之好熱好舒服就ok!
浸個十分鐘就上水淋一淋凍水，落去又浸過，如是者兩個鐘～
側邊仲有張梳化，著住浴袍攤係度亦係好梳乎的事…
至於呢張著返衫的係為大家而設 (!)，happy paper anniversary on nov7 =]
(咦～原來小林先生仲好配合咁著左佢件goerge best 7!)
呢間溫泉館我地好recommend大家去
靚，乾淨，用品高級，私隠度高，岩晒couple
我地book的係獨立湯屋，平日兩個鐘剩浸無記錯大概NT2000
三二行館
http://www.villa32.com
行館外仲見到可愛的心心葉 (三／四瓣唔緊要啦 =] )
暖笠笠咁離開左三二行館，沿路行返落去，途中會經過幾個北投名勝
首先係地熱谷
離遠睇已經見到好大煙!
煙霧瀰漫…至於點解會咁，基於我要拿臨臨寫埋個紙婚之旅
大家有興趣的話請自己google…
(當時我有走去睇簡介架，不過事隔一年已經唔記得晒之嘛 XD)
無冒煙的部分，湖水好藍／綠!
(我同bubu成日對一件物件究竟係藍色定綠色有好大分岐，
為免有人睇完又同我拗，都係唔好define)
再落就到北投溫泉博物館
如果對北投溫泉區的形成好有興趣，可以黎呢個博物館
我睇完都明白晒點解扭開個掣就有熱辣辣的溫泉浸 =P (同樣地，已經唔記得晒)
（右）以前的泉水輸水管
係呢度我見到一個奇景…北投風景優美地靈人傑 (堅持呢度係)
多人黎影婚紗相一d都唔出奇，通常我地影相咪準備d小道具嘅？
你地睇下呢對新人的道具…
係一本好大好大好大本的書! 用木架砌的書! 唔好忘記係外影!
我仲見到有props公司的貨車係附近…好誇張!
可惜我周圍捐都搵唔到位睇正面，好想知本書寫咩 =P
結婚一年的我地，已經無晒影post的衝動
對我黎講，部分原因係…身材已經走晒樣 XD
(不過結婚兩年的呢期，我竟然返到結婚前幾日的磅數同腰圍，奇蹟)
----------------------------------------------------------------------------------------
相關閱讀︰
台北四天紙婚小旅行 • DAY1 • HKG > TPE台北四天紙婚小旅行 • DAY1 • 淡水＋美麗華百樂園＋士林夜市
台北四天紙婚小旅行 • DAY2 • 濛濛的九份
台北四天紙婚小旅行 • DAY2 • 漫遊東區再乾杯
