PN Interview 567

繼續2016年度之面試︰

5th interview / 23 JAN 2016 / 24m

今日面試呢間係神校，經過2015年幾個PN面試
木木媽都幾可肯定呢間學校係唔會睇到木木的潛質 (!)
因為木木都幾慢熱，而呢間學校似乎比較喜歡主動愛表現的小孩
我地好有信心係...志在參與

而今日正值幾十年一遇的寒流
唯有幫木木來一set heat tech全身打底，面試裙再加厚褸
簡單黎講即係包糭 =]




之前幾次面試唔係屋企附近就係木木爸車唔到我地去要搭的士
今次木木爸可以車但最後我地都係選擇搭的士
始終搵位泊車都要時間又可能要行段路
而呢間學校位於屋苑入面，如果唔係d管理員帶路都唔識路

今次仍然係木木媽陪木木去面試
首先係地下一間課室玩下玩具睇下書warm up
跟住全房人一齊上一樓
去一樓要行出學校外再搭lift，寒風中真係唔好講笑...

去到一樓就變左係common area玩玩具，一張檯坐六個小朋友
每人一份玩具，玩到交換晒所有玩具黎玩都仲未到我地...

到可以入課室之際，木木依戀住佢玩緊果隻玩具烏龜，唔肯離開
連老師都行埋黎問咩事，俾佢拎住烏龜先肯行...

課室入面大約六至七個小朋友圍住老師坐，家長坐後面
老師一開波就講明唔可以提水，仲派問卷俾家長做
做還做，都係忍唔住會睇下老師考d咩

• 首先係叫小朋友聽指示出去拎正確的物品 (生果、水樽)，擺去正確顏色的膠籃 > 唔肯
• 跟住有故事揭頁叫小朋友揭再講係咩黎 > 肯揭唔肯講
• 邀請小朋友出去跟老師繞大圈 > 唔肯
• 拎枝飲管花插入去窿窿度 > 初頭唔肯，後來肯
• 最後老師派餅 > 好開心咁自己行出去拎，有講謝謝，仲肯揮手講拜拜...
• 出到去又好順攤咁還返隻烏龜俾老師

出門口前木木額頭撞左埋牆角起左層樓，瘀晒 (好彩係齊蔭遮住睇唔到)，可能心情唔好，木木係唔肯到大叫「唔好呀」再擰轉背想我抱住! 然而老師下令封口，想安慰下佢都唔敢，唔駛問阿貴一定fail硬

叫得神校，expectation的確唔低...
其實細心諗返，木木係面試末段剛剛warm up好可以投入面試，可惜的是面試已經完結...

結果 no second interview，預左陪跑 =]

---------------------------------------------

6th interview / 5 MAR 2016 / 25m

經歷過上回面試的慘烈，木木媽決定放手一搏，下次由木木爸陪同! 其實因工作關係，木木爸平日陪木木的時間仲多過我，要木木單獨跟爸爸完全無問題，跟爸爸仲會無咁痴身，只係有媽媽係度一定揀媽媽 =] 反正已有offer在手，都值得一搏

第一次係星期六下午 (之前都係早上)，時間無咁趕，出事機會似乎低少少...
早上我先帶木木去公園放電，等木木爸可以補下眠
返屋企之後就同木木沖個靚涼，陪佢食午餐，訓返轉晏覺
食飽訓飽的木木心情似乎唔錯，出門口前我地仲請佢食左杯yogurt =]

今次依然搭的士，免卻搵位泊車麻煩
而呢間幼稚園的等候安排係我地面試過之中最好的! 學校準備左好多攤位，由家長義工負責，有手工，泡泡，入波波，樂器等等，早到左絕對唔怕悶親小朋友，而且時間控制得宜，約左果個時間就係果個時間入，無份陪同的另一位家長仲可以去小型書展買下書 (仲要幾抵買!)

我諗大概半個鐘多少少，木木爸同木木就出返黎搵我，睇木木爸個得戚樣就知木木應該perform得幾好! 以下的面試過程由木木爸口述︰

首先係common area玩下玩具warm up下，跟住幾對家長小孩入課室，有位外籍老師講一個小女孩照顧BB的故事，BB喊，老師問有無小朋友可以餵佢飲奶奶/食餅餅 etc，係木木爸推波助瀾下，木木好肯出去!



之後好似話有個大圈，要爬過去拎禮物定唔知點，木木爸話佢咁岩見到課室有隻pluto公仔，就同木木講話係pluto請佢穿過去握手，得左!

加上木木爸話課室牆上貼左張maisy海報，所以都鎮得住木木要佢坐定定....



聽落面試唔太難，不過之前的面試木木唔係大叫唔好就係唔肯開金口或是唔願跟指令，今次似乎表現超班，希望有offer啦 =]

結果 PM offer

---------------------------------------------

7th interview / 14 MAR 2016 / 25m




pn面試最終回，亦係最心儀一間! 雖則話心儀，但其實懶蛇木木媽又無乜為過面試準備，心理準備都係諗住前一晚/果朝先做...係之後得某位媽媽教路，先驚醒原來可以模擬下面試! 既然係最心儀，盡下人事，面試前幾日玩左次mock Interview，絕對唔知道有無幫助...

呢間亦係唯一一間面試日安排係平日! 雖然今次都係打算由木木爸陪同，但木木媽依然請左假跟埋去，以顯示小林家的誠意 (俾自己睇)。

之前面試的連鎖校/大校/神校，面試日係人頭湧湧，唔等返一個鐘都唔駛旨意入咁。但今日面試呢間就唔算多人，而且叫名叫得好快，一次叫六七個名，等左兩round左右就叫木木個名 (老師用普通話叫名，老老實實，我都係第一次聽木木名的國語發音...)

again，以下的面試過程由木木爸口述︰

ROOM 1

• 五張檯，每位老師對一位小朋友，家長坐旁邊，老師問小朋友叫咩名 > 唔答
• 檯上有畫紙/ 毛巾/ 書/ 車/ 筆，要求小朋友俾毛巾 + 車 > 做到
• 要求小朋友畫畫 > 唔肯，爸爸畫左個熊頭，木木先肯畫手手腳腳，老師問咩顏色，木木蚊滋聲咁答對
• 睇故事書，爸爸問下，老師又問下故事書講咩 > 有答
• 最後老師再問多次木木叫咩名 > 貫徹始終，唔答

ROOM 2

• 小朋友坐前家長坐後，NET帶領唱遊 > 發呆
• 有兩個人型紙牌，老師要求小朋友擺膠生果入紙牌人個口入面 > 做到

ROOM 3

• 小朋友坐前家長坐後，小朋友玩檯面玩具，家長填問卷，之後校長入左黎同大家講解面試程序 > 好在有本maisy故事書，但都落過兩次地
• 校長送禮物俾小朋友 > 有講謝謝 & 拜拜

我係common area都真係坐左好耐，接近一個鐘，對入面兩父女黎講都應該唔容易! 期間我見到好多內地大媽/嬸，高出大半個頭的小朋友，應該係超大B，亦同一位媽媽吹左兩句，知道佢小朋友係六月B，未識講野，感覺真係細好多...雖然我家木木係大B，但亦概嘆呢個遊戲真係好唔公平...

另外呢間學校所贈送的小禮物亦好impress到木木媽，之前去面試的學校大多送公仔/玩具(淘寶貨)，唔靚唔適合只造成浪費 (暫時留左位果間係無送禮物的，欣賞)。而呢間學校係送一份手工材料，內裡夾附一份parent's guide，除左可以親子時間一齊玩，仲可以順便教埋顏色大細形狀，good! 有意義之餘亦見學校心思 =]

不過好明顯木木爸今次無上次咁樂觀，佢仲叫我唔好抱有期望...

結果 去台北當日臨上機前上網check...有second interview! 不過校長講過有2nd in亦唔代表d咩，因為有機會係唔駛2nd in直接收，所以估佢唔到

7th interview - 2nd / 2 APR 2016 / 26m

知道2nd in主要係考家長，所以木木媽都不敢怠慢，上網做下功課，又得各位blogger媽媽分享去年/今年面試流程同問題，前一晚都叫做有prep過下...

面試係星期六下午四點 (不用請假太好了)，入等候室時已有三個families玩緊檯面玩具/睇書。2nd in真係唔同，個個小朋友都可以乖乖坐定定。我地臨入學校前先醒起唔記得準備下午茶俾木木! 神奇地學校好似知道我地需要咁，竟然有餅同水提供! 木木施施然然咁食左人地一塊梳打餅先繼續玩玩具(!)

陸續有小朋友被叫名，睇錶似乎好準時咁每十分鐘一個，所以我地都唔駛等好耐，大約二十分鐘左右就叫我地入去。

一入去媽媽我其實好淆底...現場環境L型檯，左邊一位local老師一位NET，右邊校長，角落頭係帶我地入黎的PTH老師。一睇檯面就知係木木對住兩位老師坐，我倆老對住校長坐，三對四之戰，重點係，咁樣坐法木木係背住我地的...如果佢唔肯坐點算? 如果佢坐坐下搵阿媽點算?

無得點算，即時埋位。我可能無拖實木木隻手? 頭先淆緊底時木木已經衝左埋去拎玩具坐低玩...不過佢坐錯左位 =P 幸好安排佢坐返去玩具果邊都無異議，我倆亦唔理得咁多要坐低同校長打招呼

只有十分鐘，校長亦接二連三咁問，現實不如我預期咁樣，校長指定邊位家長答，或者問返1st in時木木爸所答的兩條問卷問題。只係問左大路野，點解揀佢地學校，日常邊個照顧小朋友果d，其餘有一條俾我撞中左有prep過，所以都尚算可以，起碼無口啞啞/講錯野。

timer響起，夠鐘。一望向木木方向，佢係企左係櫈隔離，可能佢唔夠高玩要企起度? 唔知道。臨走木木有拍埋張櫈，有同校長老師say goodbye，仲送左個飛吻。

唔知道結果會係點，只知道一家三口都盡晒力 =]
We do the best, God do the rest.

結果 AM offer

-------------------------------------------

總結，報左八間學校，去左七間面試，有三個AM offer, 兩個PM offer, 一間waiting, 一間reject。數字其實唔重要，offer多少亦不代表什麼，重要係過程中父母可以幫小朋友搵到一間真正適合佢性格同能力的學校。好感恩，我地最心儀的學校收左木木，開始期待木木返學啦 =]