春秋二秋係細菌病毒浦頭的好時間，抵抗力弱少少都隨即中招
我家木木就係咁不幸地之前係十個半月大時患左「嘶哮症」...
我都係生木木之後，多左留意小兒疾病，先知有嘶哮症呢樣野
所以都想寫返木木的患病經過俾各位媽媽參考
但首先大家要知道咩係嘶哮症，「嘶哮」唔同「哮喘」
哮喘病係由塵蟎、花粉、食物等致敏原誘發，屬於復發性支氣管疾病
呼氣時喘鳴，亦唔會發出狗吠或海豹叫聲
嘶哮症係單次病毒感染引起，通常係副流感病毒，或腺病毒、德國麻疹病毒等
36個以下幼兒屬高危，因為幼兒呼吸道比成人窄
當感染病毒而造成咽喉及氣管急性發炎時，上呼吸道會變腫，引致氣管收窄及阻塞
初期會有發燒、咳嗽、鼻水，之後會出現聲音沙啞、吸氣時喘鳴、呼吸困難，咳嗽聲似狗吠或海豹叫聲
個別嚴重患者會出現呼吸困難，病情可以急速轉差，朝早發燒夜晚已狗吠
香港亦試過有死亡病例，有個一歲女童由求診至死亡只係兩個鐘!
暫時嘶哮症未有疫苗預防，但適時以口服、注射或吸入類固醇就有明顯療效
NOV25 (TUE)
我放工返去一抱就覺得佢熱熱地，耳探37.8，微燒，無明顯病徵，食得玩得訓得
NOV26 (WED)
耳探39.3度，木木爸帶去木木去睇醫生，由於無其他病徵，只係有一兩聲咳，醫生都係同我一樣懷疑出玫瑰疹，所以只係俾左退燒水退燒，但每次食完藥幾個鐘又燒返上去
NOV27 (THU)
一早起身繼續高燒，食完藥之後日間幾乎退燒 / 微燒
木木媽心諗，唔通跟住就出疹? 係就好啦...
NOV28 (FRI)
朝早返工時發現木木咳多左同流鼻水，而日間亦只係微燒 / 退燒
但夜晚放工返黎，木木又燒返上38.9度，而且咳同鼻水好明顯已嚴重左
即時已經大致排除左係玫瑰疹的可能性...
因為我明顯聽到木木的咳嗽聲唔同平時
我當時感覺係「好大聲、好惡」(依家諗返應該就係「狗吠聲」)
仲聽到佢喊/咳前好似要吸一口氣咁，同時聽到「her」(應該就係「海豹聲」)
「嘶哮症」三個字立即浮現係我腦海...
我知嘶哮症可以好大件事，已經係度諗緊入院
但木木爸好似唔知事態嚴重咁，仲話未係嚴重到要入院，大家爭持不下
最後我同意觀察埋果晚，第二朝再決定
(作為最敏感的媽媽，下次我會堅持架啦! 不過我理解木木爸點解唔願意，因為我之前同佢講過其他媽媽經驗 > 慘絕人寰，訓唔好食唔好醫院又多菌入左仲嚴重左 bla bla bla...)
NOV29 (SAT)
一早我就帶木木去睇醫生，經商量後都係建議入院比較好
(木木爸仲問我︰真係入呀?) ( 木木媽︰...著火...)
帶住醫生封轉介信去急症室，嬰兒一般會優先處理
所以木木被編做「緊急」類別，一個鐘內已經見左醫生照左X-RAY
幸好X-RAY顯示肺清，但醫生依然建議入院觀察
就係咁，木木重遊舊地，入左佢出世時的醫院。
有個白髮斑斑的高級醫生睇木木，我初初以為木木會怕老人家會喊
(咳/喊時先會明顯「嘶哮」，咁先可以俾醫生臨床診斷)
點知佢只係啤住醫生伯伯，唯有係木木媽描述徵狀俾醫生知
我都有擔心過會唔會係我先入為主覺得木木係嘶哮症，會誤導左醫生
但後來木木對住個初級醫生妹妹喊，連佢都話係好typical的嘶哮徵狀
咁就確診係嘶哮症...
醫院BB床左右可以較圍欄高低，床板又可以調較斜度
仲係粉/啡色，唔錯唔錯 (24小時對住張床，唯有欣賞下佢)
不幸中之大幸係醫生話木木只係輕微嘶哮症，需要食一劑口服類固醇
已經唔輪到你擔心「類固醇喎~唔食藥得唔得?」
因為用類固醇係最直接最快最見效方法
食完藥就開始駁機mon住SpO2 (血含氧量)
嘶哮症係咽喉氣管收窄以致呼吸困難，血含氧量降低
類固醇可幫助放鬆，令血含氧量回升
綑舊野係木木最鍾意玩的腳趾上，你話會點? 仲唔發狂去扯甩佢咩!
我果幾日就係不停趁木木唔為意同佢著返隻襪
到咁上下，木木夠鐘開餐
呢個時候我好感恩自己係一個母乳媽媽，就咁抱木木入房就得
唔駛帶熱水凍水奶粉奶樽奶咀...
之後有時懶得抱黎抱去，就咁係床邊餵都有 =P
{唔知係咪以前興叫「人乳」架呢?)
令我諗返起木木出世時係新生嬰兒特別護理病房
我每隔幾個鐘就碌落去餵但有人唔肯啜 =.=
而呢度係兒科病房，眼見都好少嬰兒，通常都係已離乳的幼兒/小童
但呢度都已經有兩部醫院級泵奶器 (symphony)，抵讚!
搞到我心郁郁想試下有幾勁...
介紹完廣華兒科病房，我帶大家返黎探下呢位「獅吼BB」
木木住四人房，其餘三個小朋友都係發燒case, 其中一個都係嘶哮症
呢幾日我同木木爸都感受良多，什麼樣的家長就會教出什麼樣的小孩
佢地至少兩三歲，有一個從來無落過地行，另一個會打醫生護士!
而我亦好驚訝佢地好似無意識要隔離自己小朋友防止交叉感染
成日一齊玩，好彩木木細一大截同佢地唔岩玩...
木木食左類回醇之後好快就退燒，狗吠海豹叫都輕微左
你地睇下佢幾精神，好奇寶寶仲周圍八卦四圍摸~
醫院的BB餐 > 有豬肉味無豬肉蹤影的稀粥
木木本身已經進展到食杰粥，呢種食一陣就唔睬我啦
媽媽永遠都係執口水尾果個...
只可以有一個家長24小時陪伴，作為奶媽當然係我陪木木啦
但我只係陪左木木唔夠12小時就已經俾醫院各大小病菌打倒了
所以木木爸決定佢當通宵更!
係好大挑戰...如果木木半夜醒左，爆喊要媽媽，都唔知點算好...
留醫期間木木好痴身要抱訓，我都由佢
唔舒服+陌生環境嘛，媽媽抱住有大大安全感
幸好等木木訓淋左，可以靜雞雞擺返佢上床
呢個時候木木爸黎醫院接更，我返屋企沖涼訓覺
辛苦晒木木爸啦，通左兩晚頂
亦感謝iPad上的曼聯球賽&陪佢渡過漫漫長夜
(有梳化床，不過醒訓木木爸都唔慌訓到)
而我係屋企就好掛住佢地兩父囡，忍唔住喊左出黎...
(木木媽係好鬼眼淺)
NOV30 (SUN)
第二朝七點幾，木木媽又返醫院接更餵早奶
呢個BB無時停，換片唔肯乖乖訓低，又扭抱
去一去廁所，木木喊到癲左 ><
醫生巡完房話要觀察多一晚，晴天pig pig...
點樣消磨時間我已經唔係好記得啦
數下手指腳趾唱下歌睇下故事書訓下覺...
等到木木爸黎接更，我呢條喪屍又返屋企抖抖
係醫院都唔覺，一返到屋企就覺得對腳唔屬於自己
(好明顯係個囡面前要死頂...)
要撻住幾孖休足時間訓先得
DEC1 (MON)
星期一起碼中午先出得院，木木爸媽都拎左假湊呢隻病豬
早上醫生黎巡房，終於批准出院啦!
不過木木仲有咳同鼻水，醫生話係病毒未清晒
無藥食，要慢慢吽返好
多謝各位姨姨關心 =]
野! 木木爸黎接我地出院，終於可以返屋企啦!
雖然我戴住口罩，仍難掩開心之情!
返到姐姐已經大清潔好的屋企，第一時間白白豬再訓返個晏覺先!
木木你要加油，努力啜媽媽奶，唔好再嚇媽媽啦!
感恩木木今次病情輕微，我不至於好緊張擔心到喊果種
至於點解木木會感染病毒，真係不得而知
相信都係返playgroup/ 出席baby gatherings時中招多
社交生活不能避免，唯有再做好衛生防衛，洗手洗手同洗手啦!
而今次選擇政府醫院，其實係因為...未幫木木買住院保險... (同我打佢阿媽100大板!)
木木本身係廣華出世，廣華又近屋企，加上以咁細BB黎講
政府資源分分鐘好過私家，住左三日兩夜，只係$100咋!
之前聽其他媽媽講到政府醫院有幾差，我個人覺得還可以
當然唔抱太高期望，調整自己心態，就唔會有bad feelings。
我地出院時漏左個耳溫槍係病房 (唔係最貴果樣都唔漏...)，本來心諗實無啦，打電話去搏下，佢地竟然有keep起等我打返去認領! 仲話平時會扔，但知幾百蚊一個唔平所以無扔到!
所以我的經驗係正面的。
唯一唔好係出院時鼻液化驗報告仲未出，護士唔肯之後打電話講返我知
另外就係探病時間人數都好大限制，但都係好事，太多人聚集咪只會阻住病人休息
我地隔離床果個兩歲B，長期有媽媽同婆婆，一日有幾次阿嫲嫲，阿大姑媽，阿爸搏大霧走入黎，嫲嫲係咁係婆婆手上搶孫，婆婆食飯好似屋企開飯咁係個大飯壺裝飯落碗食到成地都係，睇見都覺得佢地一家好煩...(唔，如果住私家仲要私家房，咪無呢D情況囉...)
