北投 > HELLO KITTY SWEETS > 誠品 > 台北101
離開北投之後，我地返西門町買鴨肉扁同楊桃冰當lunch (楊桃冰原來好難飲!)
同埋返酒店執返個樣~
忠孝復興站內一幅好長好可愛的牆畫! 好可愛的畫風! 唔捨得走!
基本上就係介紹台北旅遊景點s
我地特登請途人幫我地影台北101，點解? 睇落去就會知
其實呢個下午係去hello kitty sweets朝聖 =]
好可愛呀! 所有甜點都有哈囉吉吉個貓樣 =]
不過好明顯我對hello kitty的熱情已經減退左好多，雖然黎到係好興奮
但係我完全唔著緊，完全無諗過要預先訂檯! 爭d慘食閉門羹...
左下角果件cake，原本係諗住無得坐低食買走都好啦...
點知又好好彩有人no show，即刻可以坐低食 =]
因為有min charge，所以要叫多一個餐一杯飲品
味道就...都係俾相機食啫 =p
無疑d fixtures, deco好靚，仲要全男班waiters
(唔知佢地日日著粉紅色kitty圍裙返工有咩感覺?)
不過我感覺麻麻，由此我就知我已經無以前咁迷hello kitty啦 =]
anyway，多謝bubu陪我坐左好耐仲幫我清晒d唔好食的甜品 =p
紙婚正日晚上，當然要維持小林家傳統，食餐飯慶祝~
黎到信義區，其中一幢大廈外牆︰
(which又提醒我已經係一年前+的事...)
食飯之前，去全台北最大間 (幢) 的誠品逛逛
一年前香港都仲未有誠品，所以誠品係屬於「景點」類別 =p
台灣本土出好多手作書，我亦好唔客氣咁拎左一疊坐底慢慢揭...
好啦好啦去食飯啦~其實今日全日都落住雨，大雨起上黎有d狼狽 ><
後面就係餐廳所在 - 台北101
好似話果時zara岩岩進駐台灣，所以係台北101外牆賣廣告...
我地揀左位於85樓 (!) 的「隨意鳥地方高空觀景餐廳」(個名係有d gap...)
搭升降機時耳膜漲卜卜~
拿~今晚就係食呢個景啦! 又真係幾靚的，望到好遠好遠，都算係萬家燈火~
不過好景不常，我地唔知成日都係咁定係今日天氣唔好
耐唔耐會有厚雲 / 霧 / 閃電，外面景色好似熄機無晒畫面咁 (左)
過一陣又會開機有返畫面 (右)...
大家見到的呢碗湯同包，將會係焗住唯一俾大家睇到的dish
一黎部相機唔多生性影得麻麻地，二黎食物好一般，無乜心機介紹俾大家睇...
(真的! 並唔係因為唔記得) 成晚真係靠食景飽肚架~
話晒慶祝紙婚，我唔會唔做野的~
事前email 溝通過，餐廳會有complementary cake
成晚我最appreciate就係waiter幫我地影左張角度好靚的相 (下)
亦好感恩影相一刻，阿雲好識做咁飄開左 =]
之前已經分享左紙婚手作仔 (詳情按此)
因為餐廳講到明個com cake係頹野 (事實又真係好頹下)
蛋糕一到我就加埋支1仔上去，成件事即刻唔同晒!
仲有上面幅相果個nov7，其實成個trip都有不時拎出黎影相呢 =]
仲整左個相框送俾bubu，想睇可以去返手作仔篇blog~
雖然餐飯麻麻地，希望bubu唔介意，著眼我其他的準備同享受呢一日啦 =]
happy paper anniversary bubu >3<
落返地面之後，我就明白點解剛才如在雲霧中...你睇下! 見唔到頂!
而且仲好鬼大雨，令一心想去影LOVE的我地
好似癲左咁唔擔遮衝埋去，又無得合照><
就係咁，紙婚日係濕漉漉的情況下完結。
---------------------------------------------------------------------------------------
相關閱讀︰
台北四天紙婚小旅行 • DAY1 • HKG > TPE台北四天紙婚小旅行 • DAY1 • 淡水＋美麗華百樂園＋士林夜市
台北四天紙婚小旅行 • DAY2 • 濛濛的九份
台北四天紙婚小旅行 • DAY2 • 漫遊東區再乾杯
台北四天紙婚小旅行 • DAY3 • 去北投泡個熱呼呼溫泉
