林林 • 十三至十六週小記

JUN 24-30, 2017
[十三週] 又愛又恨的家姐

雖然已經夠三個月，喺公司只係通知左我老闆同最親近的隔離位同事，無乜必要，都唔想特別俾人太早知自己有左 (唔知點解，無得解)。有時都會刻意收下個肚，唔好成隻蟹咁行法。不過個肚 (定腩?) 實在係遮唔住，都開始有零星同事發現，問起都會認嘅。平時公司平均一年大約兩三個staff大肚，自從自己有左之後，已知後面有三個staff跟住大肚，好旺呢! 我第一時間諗到嘅係，希望2017/2018出生率唔好太高...

至於木木，仍然經常徘徊於接受到 / 接受唔到之間。有時佢會叫自己做baby，想我做佢姐姐，唔想自己做林林個家姐，仲會打我個肚話要林林跌出黎；有時就會錫我個肚，會話呢對鞋 / 呢件衫我唔岩著就會俾林林著，如果林林喊，我會呵呵佢，話佢知媽媽就到。

不過講到最哭笑不得係，佢已經識得抽林林水，我同佢講，媽媽食嘅嘢會經臍帶俾林林食，於是有個古惑女就將自己唔想食果啲菜、紅蘿蔔塞俾我食，話係請林林食! 奸得佢!

------------------------------

JUL 1-7, 2017
[十四週] 乾、癢、漲

感恩木木媽身體皮膚一向無乜嘢 (咪講)，但上胎陀木木時都有肚皮痕癢嘅問題，今胎初初都有，但轉左防肚紋產品之後就無問題。但係呢個星期開始，大脾開始好癢好癢好癢 X10000，起晒紅點，R得多會損同結焦 T.T 唔知道係唔係妊娠濕疹呢? 要等下次產檢時問醫生。

全身皮膚亦變得好乾，乾到小腿龜裂，乾到似冬天最凍時嘅情況，連馬油都出動埋，返返下工都要搵嘢搽，好乾呀 ><

好多孕婦都會喺懷孕期乳房漲起，身體自自然然為哺乳做準備。但我上胎呢...依然好似無乜咁，哈哈! 今胎可能因為乳腺之前已經返左兩年工，比較易嗌返醒佢，所以終於有少少料到，大概由AAA變成AA級別咁...

------------------------------

JUL 8-14, 2017
[十五週] 林林來跟陽光玩遊戲

2017年下水禮! 諗返起上胎兩個大人，真係唔會無啦啦夏天去海灘，所以木木喺媽媽肚入面時係無去過海灘的。十五週，肚有少少，身未腫脹，仲可以著下bikini =P



似乎已經有胎動呢，好輕微咁一兩下，等多少少再confirm，話唔埋只係啲腸臑動呢。

------------------------------

JUL 15-21, 2017

[十六週] 胎動再臨



本星期實實在在地感受到胎動! 唔只一下兩下，係接連幾下，連遲鈍木木媽都幾可肯定係啦! 新手媽媽會問胎動係點，我聽通常都係形容似有條金魚游黎游去，而我自己就覺得似一個小水泡由肚底浮上面咁樣。第二胎，果然係快啲。

因為木木嘅關係，之前一直好少時間同林林互動 (而且理性地知道胎兒仲未聽到外間聲音)，當林林開始有胎動之後，木木媽開始多左留意返個肚，好期待下一次嘅胎動! 

不過，公司正值裝修期，林林就慘啦，莫講話佢，木木媽我都好辛苦，日日轟轟轟鑽個不停，點專心做野? (咁唯有打BLOG啦...)，加上沙塵滾滾，自己出入都要格外小心。

講開又講，老闆自從知道我有左，已經多次表面懶關心實質諸多為難，例如要我講得出由依家到放產假前邊日要放sick leave (政府產檢點會知?)，要求我約星期六私家產檢 (我已經唔放全日，唔會讓步轉星期六)，約appointment要約最早/最晏，病假照扣，但就要睇完即仆返公司/做到最後一刻先離開公司等等....佢同上胎果個衰老闆的確不分上下架! 而且我今星期先知，原來同team有另一位同事都有左! 預產期仲只相差兩星期，唔怪得老闆咁癲... 

[十五週六天] 產前檢查 • 私家 • 5

Jul 14, 2017 • w15d6 • 劉珮琪醫生 • 5 OZ • BPM: 163

自從八週後，相隔左七週先再返去劉醫生度覆診 (因期間第十一週去左劉子健醫生度做NIFTY)。今次特登約下午晏少少時間，等我地可以返屋企接埋木木去探林林 =] 木木知道有得探林林都覺得好新奇，但未至於係好興奮期待果種。


石門診所有個play area，所以帶哥哥姐姐黎都唔怕悶親佢地，而且劉醫生都唔駛等太耐，玩一陣就可以入去了。今次一睇，就覺得林林又大左好多! CRL已經爭啲度唔到 (大約9cm)，而重就大約5oz。同上次NIFTY照USG時一樣，林林所有fetus measurement都超過50%， 肚圍 (AC, Abdominal circumference) 仲去到87%，比預產期大左幾日，唔通林林係大碼B? 千祈唔好呀，太大隻木木媽生唔出架 ><

劉醫生有轉3D俾我地睇，但林林暫時未長肉，所以3D照係有啲恐怖，我形容係好似螳螂咁...木木對於一切 (熄燈、媽媽訓上床) 都覺得好新奇，好hyper咁大叫，走來走去，對於on screen嘅林林，就未有太大興趣，下次再帶佢探林林啦。

[十五週三天] 產前檢查 • 政府 • 4

Jul 11, 2017 • w15d3 • 廣華醫院 • 許詠詩醫生 • BP 98/65 

十五週終於第一次去公立醫院產檢! 廣華醫院會將初診孕婦group埋同一日的，所以呢日會比較混亂同耗時。十點準時去到徐展堂門診大樓四樓，先放低預約紙，然後等叫名去 (1) 量血壓、(2) 驗尿 (要事前用樽仔預備好)、(3) 度高磅重、(4)抽血。之後就會進入無了期嘅等待...



同上次唔同，今次等等下有個年輕女實習醫生帶我去另一邊房仔，詳細地問我病歷輸入電腦，準備一陣見醫生用。我問佢有無份會診，佢話無，好大怨氣咁話一日到黑都係打字打字同打字...公立醫療系統承受好大壓力，醫護人員好大怨氣...

喺等待期間，可以睇下牆上無限loop嘅video，或者睇下廣華派嘅書仔，我返去拎返上胎果啲去比較，都係差唔多，但就多左關於餵哺母乳嘅 reinforcement。同時等候大堂亦有位姑娘解釋俾大家聽每次產檢程序。



等左好耐好耐...差唔多專科上午時段結束時 (1PM)，先至嗌到我，當時個等待大堂已經由好多人變到無人咁滯...



今次見一位女醫生，都係問病歷同上胎生產情況，然後就上床打開個肚聽心跳，醫生行埋黎摸下個肚 (佢同上胎年輕女醫生一樣，都係話唔好意思隻手比較冰凍!)，就咁完左。唔同嘅係，醫生竟然問我要到診紙定病假紙。

上胎廣華係死都唔肯俾病假紙的，只會俾半日到診紙，上胎份工還好接受到診紙，但今胎間公司唔接受的! 本來都好苦惱，依家突然間一天都光晒，仲要俾足全日假紙，unbelievable! (可惜衰老闆係唔會俾你放足一日...)

最後成點幾先走得，因為今日係初診日，樓下一定好多姨姨派贈品，我落到去時姨姨們仲喺度，幾個姨姨圍住晒，只需要填一份，姨姨們就會幫你抄其他果啲，贈品就到手，哈哈!

林林 • 九至十二週小記

MAY 27 - JUN 2, 2017
[九週] 午餐好難過

雖然依然無嘔過，但估唔到作嘔作悶嘅感覺竟然又返返黎，亦開始尿頻，我仲天真地以為已經過晒添! 不過相比其他食乜嘔乜嘅大肚媽媽，或者兩餐都要在外解決嘅，我知道自己係幸福的 =]

最應該食魚嘅孕婦，依家一食魚就覺得好腥唔想食，仲有午餐(帶飯)，每次叮完返黎都唔多想開動，打開蓋聞到陣飯味仲會即刻覺得胃頂，成日好想食垃圾食物，次次木木爸宵夜食韓國黑辛辣麵我都好想搶黎食...上胎我自問都算係勁乖，戒得好清，今胎蟹、芒果、茶啡、生冷野呢啲我依然會戒食，但我諗我會比上胎放縱少少 (聽住先)

唔多「湊米氣」嘅木木媽，結果有一晚宵夜真係忍唔住隊左成個黑辛辣麵，之後果晚就去左我最愛嘅拉麵店，跟住半夜就肚痛痛醒兼肚痾...嗚嗚嗚，睇黎林林唔俾媽媽食立雜野...

因為已經開始食materna，會比較難有便便，睇返上胎係食西梅，呢胎就暫時食yogurt已經好work。

上星期五產檢見到「閃閃」後，最後都忍唔住同木木透露肚裡面有baby呢一件事，始終都要為最近媽媽經常陪唔到佢玩，抱唔到佢有個解釋。未講清楚前，純粹以「媽媽唔舒服」做擋箭牌為由拒絕木木嘅要求，木木反而能夠面對，可以自發搵alternatives；講左之後，木木媽覺得佢係明啲唔明啲，亦未接受到，於是又有啲不穩定嘅行為出現。好了解呢個囡需要時間接受，木木媽會加油，陪木木慢慢適應!

------------------------------

JUN 3-9, 2017
[十週] 肚現現

個肚好似突然現左好多咁，著衫要著超勁鬆先無咁覺眼，知情人仕都話我孕味濃 T.T

胃口依然係咁上下，最唔鍾意食飯食魚，最鍾意食麵，會食食下突然到頂，會即時停手唔想再食落去。長期唔夠訓狀態，陪木木食飯食一半會頂唔順去左訓覺，陪木木訓九成九會自己訓著先，因為訓得多，skip左宵夜，體重回落至88磅，不過木木媽唔擔心，食返兩晚宵夜就會喺返度 =]

有關營養補充品，除左食materna，都開始食DHA，上胎食mumomega / 惠氏藻油，今胎發現美贊臣都出埋一份，為左搶market share，玩吉樽+$38換30粒裝，抵到無朋友，要知道，DHA真係好貴，原價成$10+/粒架～



木木嘅行為問題，喺我同木木爸源源不絕咁灌愛俾佢之後，情況又好轉返。呢粒囡，嘴裡說OK，身體卻很誠實，木木媽之前同佢講媽媽想休息，佢口話OK，但其實心裡面應該好想媽媽陪佢，結果就直接由行為反映出黎 (扭計)，我又了解木木多左啦 =] 之後可以的話我都儘量照顧左佢先，真係太太太攰先搵木木爸救命，因為木木可以獨佔媽媽嘅時間，已經開始倒數了...

木木絕對唔係一個母愛泛濫嘅小女孩，佢暫時對肚裡面嘅baby唔大感覺，我唔提起的話佢都唔會aware of，不過叫佢摸下肚皮，叫下林林，佢都願意。無論問過幾多次，佢都係答我想要妹妹，會俾晒佢唔岩著果啲裙仔鞋仔妹妹著，如果係弟弟的話就要我再生一個妹妹(!)...well, let's see!

------------------------------

JUN 10-16, 2017
[十一週] 苦口良藥

記得上胎十一週就已經有人讓座，今胎轉左工，好多時木木爸都車埋我返工放工，就算自己搭車都係搭小巴，所以被讓座機會大減 =P

妊娠反應開始連果少少無乜，只係仍然唔太好住家飯，好恨食街外野，聽人講頭三個月胎兒唔係靠媽媽營養，我就已經喺度盤算我仲可以食多幾多次魚蛋燒賣...上胎我戒得好清，結果木木so far皮膚還好，所以我都應該要公平啲嘅...

有左之後木木婆婆捉我去睇左幾次中醫，其實木木媽唔太鍾意飲中藥，不過真係有需要調理下，又順下老人家意。之後婆婆同公公去旅行，我就甩難啦! 停左兩星期唔駛飲藥...然後今個星期，又黎過...之前陪6299去東華三院專科門診睇，順便自己又排新症，仲排左個好老好老嘅女顧問醫師 - 張秀霞，今個星期終於排到有得睇...



我睇BK佢好似幫左好多不孕個案，佢把脈時有個年輕中醫師負責幫佢做電腦輸入，把完脈就間唔時恰下眼訓 =P 喺東華三院睇中醫除左可以代煎藥，最估唔到係竟然有宅配服務，實在方便到一個點! 其實西醫有講過，懷孕期間鼻敏感會嚴重左，所以我都唔知飲中藥有無效，姑且當安胎藥咁補氣養血啦。

診所對面就係油麻地果欄，睇完去買左啲適合孕婦食嘅車厘子、牛油果，仲買左芒果整芒果布甸俾木木爸食 =] 自製牛油果多士，好健康!



------------------------------

JUN 17-23, 2017
[十二週] 安全過渡第一孕期!

12! 12! 12! 不經不覺，咁就陀左林林三個月啦，多謝林林，木木媽喺呢十二週裡面無嘔無暈，無見紅流啡，只係有少少頂胃同比以前易攰，你同木木家姐都一樣咁錫媽媽呢 =]

上星期仲講緊未有被讓座，本星期由於要搭港鐵外出覆診，就已經有位中年男士讓座啦! 不過我都無坐到，讓左俾另一位伯伯坐。但行路搭車堅係要小心啲大陸人，佢地真係「目中無人」的!

木木爸準備第二次做爸爸，依然未係好識心理上照顧懷孕太太，有時會整喊荷爾蒙亂晒籠嘅木木媽，不過木木爸喺其他方面係好成熟的，例如佢已經日夜苦思點樣再安排家中陳設去迎接林林，我呢...就只係負責shopping的(!)

木木爸知道我唔多想食白飯，就炒飯俾我帶飯 >3



本星期正值父親節，去左洲際食 semi-buffet lunch，木木爸你好好享受，出年應該無得咁悠閒架啦...而我作為一名孕婦，去食自助餐絕對係蝕本貨，沙律雪糕都無我份，最慘係去the steak house無得食牛，望住木木爸個filet mignon流晒口水...



食食下server仲推左兩個巨型wagyu burger出黎(!) 
原本係一片嫩嫩的和牛



最後我請chef幫我將舊和牛變成咁，雖然依然味美，但感覺好灰...

(懷孕飲食小知識 其實孕婦食牛唔一定要食well done，因為最出事嘅李斯特菌只會停留喺肉類表面，只要表面seal至攝氏160度就算安全，裡面係medium都無問題。當然，食完會唔安樂嘅，就寧願唔食啦。而burger就反而需要well done，因為burger meat由肉碎組成，每粒肉碎面都可以有菌，所以一定要煮熟晒。)



上胎完成第一孕期嘅獎勵係多糖多奶多醬格仔餅一底，今胎我仲邊有咁乖，未夠十二週已經食左 > < 本胎完成第一孕期獎勵係...Haagen Dazs一小杯 =]



...由於NIFTY的關係...十二週完結前小林家已經知道林林嘅性別啦 =]
遲少少先開估 =P

[十二週三天] 唐氏綜合症篩查 • 廣華醫院

Jun 20, 2017 • w12d3 • 廣華醫院 • CRL: 6.19cm
Nasal Bone: Present
Nuchal Translucency: 1.31mm

第一個喺廣華做嘅檢查就係唐氏綜合症篩查，有關資料上胎已經寫過晒，所以有需要嘅媽媽請移步至此︰[十二週四天] 唐氏綜合症篩查 • 廣華醫院 (咁岩都係[十二週第四天]做!)

appointment又係早上九點，見上胎早到可以第一個睇半個鐘走得，今次就懶醒咁照辦煮碗早少少去睇video。時隔四年，科技終於進步，唔再係播錄影帶 XD 點知啲姑娘成九點半先開工，我都已經第二個入去架啦，點知林林可能未訓醒，搵個背脊「得」住我地，結果姑娘要我出去行下，照多兩個先再叫返我入去。

今次林林就好乖咁平訓俾姑娘睇啦，係二號房嘅伍淑珍姑娘，北翼十樓始終唔同產房，姑娘工作悠閒啲語氣都好好多，伍姑娘比上胎姑娘講得多野，唔係剩係照頸皮睇鼻骨，會同我地講呢度係大脾，果個係心跳，我地仲見到林林揮揮手添呀 =]

今胎頸皮厚度1.31mm，比上胎同期1.56mm數字更靚! CRL亦好似偏長咁，我見姑娘寫早左EDD幾日...

最後去度高磅重抽血，媽呀抽血勁痛! 好耐未試過咁痛! 痛到想 XYZ!

大約個半鐘先搞掂晒，無電話等如好消息。提提大家，如果喺政府唐氏綜合症篩查前後會做NIFTY/T21，記得唔好同姑娘講，講左佢地可能會唔俾你做政府果個架!