小林家 • 木木

Thursday, August 28, 2014

成長記錄 • 七個月

[16 JUL - 15 AUG 2014]

身高體重
7.185kg > 7.43kg (50th percentile)
呢幾個月都唔駛返健康院，咁要個個月都去圓方啦 XD

作息時間
遺傳? 木木媽自細已經唔訓晏覺，木木亦係唔鍾意訓的baby
依家有時由晏晝三四點一直撐到九點先訓...鐵造的乎?
之前我以為木木開始有分離焦慮(separation anxiety)，原來果時都未算係
呢個月木木開始好粘人，行開去個廁所都唔得，開住門都爆喊
訓覺就更甚，以前好乖擺低熄燈俾buddy開音樂掩門，5mins左右就訓
依家一行開就喊，有時甚至要抱住訓，好驚養成壞習慣呀 ><

飲食模式
足六個月又再嘗試餵糊仔，不同稀杰度都試過，木木都麻麻地
試左一星期我就轉煲粥仔，驚喜木木終於肯開口啦!
四個月返健康院時姑娘有講過全人奶B可以skip糊仔直接試粥仔
雖然唔知點解，但姑娘批得好準喎!

食左一星期白粥之後就開始試加蔬果，今個月試過
LIKE 節瓜，甘筍，香蕉
DISLIKE 冬瓜，蘋果
粥仔只係煮一湯匙米分兩餐試
通常食到一半 (一湯匙的一半再一半，其實好少) 就會左擰右擰唔肯食
中午果餐婆婆/姐姐餵都還好少少
夜晚我餵木木有時會扭埋身食奶 ><

肢體發展
今個月小肌肉們鍾意玩繩 - 床圍繩、玩具繩、木木媽的bra帶...
先用手指舞一輪，最後當然係放入口試下味啦!
坐已經坐得好定兼唔駛用手撐住，但依然懶轉身懶爬，可以hold住一個姿勢好耐都唔悶。但換片又唔同講法，因為唔鍾意訓低，扭來扭去完全不受控，周圍搞搞震，換一次片成身汗 (我)

語言能力
好有趣! 木木開始不停講野，以前都會同木木爸傾計，但依家個感覺唔同的，似係同我地一齊生活咁，見到我地的動作/說話會有意見想發表，自己好悶又識得大叫召我地去陪佢，仲有就係...朝早會umumchumchum直至叫醒你為止...

當然以上都只係木木先聽得明的BB話 =]

DAY208︰果日黃昏我埋身餵完奶，木木望住我同我傾計 (好少可架)，我教佢講「媽」，佢真係「MA」左一下! 難以形容的興奮! 不過同日木木爸都話聽到木木嗌「BA」喎...之後又無再聽到啦...

睡寶寶真係太天使太可愛啦!

心口掛個勇字，衝擊人山人海之書展!

扮行路 XD

小林家地方淺窄無位放大玩具，唯有去朋友仔屋企玩jumperoo啦!
木木，有得玩好玩啦...

仲有私家泳池，幾個babies同游無難度!
你以為木木好enjoy?

其實佢一落水就喪喊...

但去baby spa又無野喎! 可能因為係暖水啦...

木木最愛的繪本 - 小雞逛超市

冧死人的笑容 (木木仲係無牙妹呀~)

初嘗白粥，第一次嘗試無奶味的食物

DAY200 送木木一隻RODY，初次見面就懶熟咁同人地「咬耳仔」

木木︰我七個月大啦!

Tuesday, August 19, 2014

成長記錄 • 六個月

[16 JUN - 15 JUL 2014]

身高體重
6.5kg > 7.185kg (50th percentile)

健康院發展評估
左右手交替玩玩具
姑娘遞個玩具俾木木，佢一貫地scan左好耐都唔出手，我地三個大人係度等...等左陣佢終於肯伸雙手拎住，姑娘好心急，未見佢左手交右手已經話pass...
扶住企
木木最愛，完全無問題
自己坐
木木最憎，對腳撐到直一直，我同姑娘講佢唔係坐唔到係唔肯坐，於是姑娘用少少力迫佢坐，終於肯坐，仲坐得好定，但爆喊...

身體狀況
六個月分別去左kinetics / 健康院打六合一 / 13價針，慣例喊幾聲就無事，之後亦無事無幹無發燒，之後果日仲可以去游水，木木勁呀~

作息時間
同上個月無咩分別，都係跟木木媽起身，晚上大約9:30訓覺
但木木似乎慣性地六點左右會合埋眼地喊，俾奶咀拍兩拍就會訓返到我再叫醒佢
唔知點樣可以避免埋佢呢?
而nap time就愈來愈少，以前都起碼有一覺訓到一個鐘以上
依家無呢支歌仔唱，好似較左鬧鐘咁半個鐘即醒 ._.

飲食模式
木木一向都係少食多餐，由兩個幾月開始一直維持住三個鐘一餐
呢個月已嘗試加到去180ml (六安)一餐，依然係三個鐘就呱呱嘈...
感恩係樽餵媽媽奶方面好ok，已可以自己揸住奶樽，靠住三角枕係playmat嘆奶
埋身快左少少，有時15-20mins已經ok

至於固體，木木媽就唔心急
有見食人奶食得好，固體可以足六個月先開始俾
不過最後爭三日先夠六個月已經試餵左米糊
因為果幾日木木爸日日開工，我希望第一口固體，爸爸都一同見證啊
結果木木脷頂兼唔識吞lur返晒出黎 ><
代表木木仲未ready開始進食固體，唯有遲d再試啦。

肢體發展
小肌肉發展唔錯，鍾意用手指玩label，見到最愛的龜龜牙膠會雙眼放光，伸長雙手去拎。坐由原本三秒就會左右倒地，變成可用手撐住坐到多過一分鐘! 未爬，有見過靜雞雞入後波~

語言能力
之前的五個月都覺得木木只係randomly發出聲音，但呢個月明顯唔同左，佢會自言自語同自己傾計，又開始知道自己個名，我地叫佢，佢會擰頭過黎望下邊個叫佢! 另外亦似乎少少聽得明我地的說話，每朝起身換完片我要擺低佢去洗手先餵奶，肚仔餓的木木當然呱呱嘈，但當我同佢講媽媽行開好快返，佢係會收聲等我返黎!

DAY158的木木

訓覺除左有buddy，木木仲鍾意lui住被仔，有安全感

(亮點︰粉波!) 被仔係紗巾，放心，唔會俾佢窒息 (!)

DAY158的木木

大pat pat，肥肥脾~~~

DAY158的木木

同朋友仔聚會

DAY162的木木

totoro baby on totoro tummy

DAY162的木木

第一次去公共泳池游水，粉紅鯊出沒注意!

DAY162的木木

因為木木之前一忟憎就扯自己的頭髮，扯到得返中間果著勁punk!

第一次剪髮獻出俾小林家髮型師 (剪咋，唔捨得剃!)

DAY164的木木

每月一整by木木爸

「你是如此的難以忘記...」連眼神都配合埋!

DAY167的木木
同同日生的babies影合照

DAY171的木木
roomwear係透心涼的u記窿窿衫

DAY172的木木

同同醫院出世的babies慶祝半歲生日

happy 1/2 birthday!

DAY174的木木
人地瓜子口面，木木係木口木面兼正方面...

DAY176的木木

學坐中，應該過兩三秒就倒地架啦

DAY179的木木

第一口米糊!

DAY179的木木

呢個月最愛玩label，呢類label玩具本身都有個真label

木木最鍾意就係真果個...

DAY182的木木
六個月大快樂!

Wednesday, July 30, 2014

[體驗] 嬰兒水療 • 童樂BABY SPA

多謝Yes-Parents & 童樂 Baby Spa邀請體驗嬰兒水療服務 =]

依家小朋友的生活真係可以好富貴，做spa喎!

木木媽我都係大學畢業之後，同木木爸去沙巴旅行先至第一次spa...

基於我唔抵得，之前從來無諗過俾木木去(!)，而且我驚好危險咁

所以收到邀請之後我都問長問短左一大輪先放心俾木木一試

貴婦木去做spa，嘩啦嘩啦~

驟眼睇牆上的spa babies都係笑口噬噬的...
之前同木木試過係屋企浴缸 / 公共幼童泳池 / 朋友家的充氣水池玩過
最後都係喊包收場，唔知木木今次會唔會鍾意呢?

童樂 Baby Spa係香港第一間嬰兒水療中心
藉水療運動提升嬰兒潛能，配合嬰兒按摩去提升嬰兒的腦部發展

開始時姨姨先幫木木沖涼，磅重，量度心跳/血含量
再做下熱身運動 ( = 郁下手手腳腳)，評估過身體狀況ok先可以落水

spa的費用已經包括游水尿片 x1

(好靚的片片! 我買果隻pampers上面係唔可愛的dora...)

亦包括毛巾。毛巾經臭氧機消毒，可安心使用

換好片片，揀個岩心水的swimava泳圈就可以準備落水

木木媽當然揀最愛的粉波!

究竟木木會唔會爆喊呢...? 我都好想知!

呢個樣即係想點呀? 哈哈!!!

初初一落水木木係扁咀架，我略嫌姨姨放佢落水放得太快
都未知咩事已經浸左係水裡面 XD
過左一陣開始覺得好玩，就識得笑同手腳亂fing啦 =]

有時木木會好似大人游水咁，有時好似坐係度腳仔伸上水面歎世界咁

姨姨話要夠腰力腳力先可以做得到!

呢張相唔知點解木木媽覺得好好笑
好似日本卡通果d俾車轆壓扁左之後飄走咁樣 XD

來個側面~! 最值回票價就係呢個shot!

要捉住木木先影到合照，如果唔係會飄走~
木木︰唔好捉住我，我要游水水!

babies狀態好的話一般會游十五分鐘
上水後亦見工作人員立即放水再清洗浴缸，加上池水用可飲用過濾水
水質方面 - ok!

話明係spa，除左水療仲會有按摩~

baby massage對生理心理發展都好好，大肚時都有聽過學過

不過木木出世時天氣凍，好少剝佢光豬做按摩

今日睇姨姨幫木木按摩又可以重溫返，返去多d按先~

(其實呢個士多啤啤粉波我都好想揀!)

睇睇配套設施 - 主打做babies生意，有換片檯

仲有貼心的哺乳設施，要知道babies玩完咁大運動量的SPA會肚仔餓
母乳媽媽唔駛煩搵地方餵奶~

除左做spa，佢地另外有開設適合不同月齡的playgroup

整個體驗大約四十五分鐘

回程木木唔駛五分鐘已經係carseat訓左
baby spa的確係一項高度放電活動 XD

童樂 Baby Spa
地址︰九龍觀塘巧明街117號港貿中心10樓03室
網址︰http://bspa.com.hk

Facebook︰http://www.facebook.com/babyspahk

Tuesday, July 22, 2014

成長記錄 • 五個月

[16 MAY - 15 JUN 2014]

體重
6.125kg > 6.5kg (50th percentile)
五個月唔駛返健康院，自己約略磅的~

日常作息
繼續一日六餐，埋身大約30min+，樽餵150-160ml
有感木木好似重得慢左又好似瘦左，木木爸強烈要求加奶
而木木又好似無底深淵咁俾幾多飲幾多，木木媽都開始有追奶壓力
但我都好多謝木木，當同期bb唔少都有厭奶情況的時候
木木係好捧場從來一滴人奶都唔浪費，令我煩少一瓣 =]

食少左一餐連帶訓覺時間都提早左少少，約2130-2200入睡
但日頭又訓少左，以前可以早上nap兩個鐘，依家nap半個鐘就醒...
全日大概訓13個鐘左右

肢體/感官發展
反身成功!
滿四個月當日就反身成功啦~!
其實有時我都唔肯定係唔係木木的第一次架，工人未必會講我知
所以我同自己講，眼見為實，我見到的先當第一次，木木爸見到都唔當係!
之前我地人手反轉木木，佢會自己反返轉
好啦，依家識得自己反啦，就反而唔識得反返轉肚向天，好奇怪?
所以佢反身之後會維持「趴」的狀態好耐，直至佢唔耐煩先會喊 =]
而且木木有偏好，特別鍾意係自己床仔反身
擺得佢落BB床就梗係想佢nap下，結果次次行開一陣返黎check
已經係反轉左身望住你笑...
大叫! 尖叫!
好hyper，non-stop咁尖叫，係開心果種，但我都驚佢嗌爛自己喉嚨
學似張栢芝咁老牛聲就唔好啦 XD
但後來又漸漸無乜點再大叫尖叫，連講野都少左
於是新手木木媽又係度擔心一大爛餐...
分離焦慮 separation anxiety
上個月仲講緊剛剛認到自己人，今個月已經識得分陌生人
有次大學朋友黎探木木，木木爸去左打波工人放假得我一個湊木木
諗住木木係任抱mode，就過手俾佢地抱我去沖個茶
點知木木扁咀然後喊! 拿拿聲抱返呵返~
後來有次帶木木見6299，只係個零星期無見，扁咀喊!
搞到兩老好無癮...+對住公公都係...
話雖如此，但「扁咀喊」呢套行為好過癮好想笑!
吃的興趣
話說我每朝餵完木木都會擺佢落bouncer陪我泵奶食早飯
(你無睇錯我無寫錯，我仍然維持緊早午晚都食飯!)
之前都已經會定晴望住我食
依家直情係個咀仔會跟住我郁郁下，然後就會流一大篤口水...
食腳趾
睇住木木呢個月由識得起飛腳，手掂到腳板但捉唔實會甩手
到捉得實再放腳趾公入口，食得津津有味...
BB的自然發展，amazing!
鍾意企
四個月去健康院，姑娘話可以開始學坐同企，我心諗應該坐先過企?
點知木木小姐唔係好鍾意坐，成日一坐就拗後條腰明係玩野
反而扶住佢企就好開心，好快已經由踮高腳尖變成腳(掌)踏實地
但我唔敢俾佢企得太耐呢，怕O腿
乜都咬
由之前的食手指，咬牙膠，已經進化到乜都咬一餐
玩具呢d不在話下，抱起佢連我膊頭手臂都唔放過
一個唔留神就有一大灘口水...
嘴巴最好玩
講到尾，最好玩都係自己個嘴仔。
呢期鍾意扮咳引人注意，又鍾意搣起個咀 =]

DAY119的木木
木木表現不同類型model - 超模 (左) / 娘模 (右上) / 口靚模 (右下)