[體驗] 余仁生親子半日有機農莊遊

27DEC, 2015

謝謝余仁生邀請出席親子半日有機農莊遊活動
謝謝BABY-MO從中安排

如果唔係余仁生邀請，住係市區的小林家真係好少去郊區呢
而且呢類場所通常唔會自己無啦啦貢入去而係圑體參加多
所以一知道就舉手應邀!

當日本來有專車係尖沙咀接載參加者，小林家就自己揸車入去會合大家
呢日去西沙園藝農場，座落於入西貢必經之路旁邊
就算自己係沙田搭299入都好方便架

農場負責人帶大家遊一圈
介紹左一個自絡自足的水池，植物、魚、龜各取所需


小野菊 (野菊花呀野菊花哪裡才是你的家...)


我真係到咁大個女先知指天椒點解叫指天椒 (以下圖解)


睇左好幾款香草，有露絲瑪莉, 檸檬，薄荷，咁岩都係木木媽的最愛
木木就唔太欣賞了


是日三大主打 - 做農夫、焗麵包、手工皂

首先熱下身去耕田先!
主持姨姨講解完大家就落田啦，其實都只係做下樣耙下耙下
不過已足夠俾木木明白農夫的工作係點樣



然後我地去種薄荷葉，裝一半有機泥，擺棵薄荷幼苗入去
上面再舖泥，淋少少水，搞掂 !
(可惜我地未返到屋企，可憐小葉已經...)


之後應該係木木最期待的一個環節 - 包包!
講真平時木木媽整包都係夜晚扔料入麵包機整
木木的確唔知道麵包係點整出黎
不過今日由於時間關係，農場已經為我地預備好一發左的麵團
我地只需要整造型就可以了

有人出盡力咁幫麵團排氣


我地問木木想整熊仔豬仔定兔仔，佢話要整rabbit =]



加d余仁生杞子，其他小朋友拎黎當眼睛 (係喎兔兔眼係紅色!)
木木堅持要用黎做耳仔，至於眼睛
佢自己選擇用芝麻，仲好有心機逐粒執逐粒擺



最後掃層蛋漿令佢靚靚



麵包要時間做二發同烤焗，呢段時間我地去整下手工皂
先睇左主持姨姨示範打皂過程，我地係無份打的
因為打皂需要打熱，又用到氫氧化鈉，有化學反應，唔岩小朋友
木木媽之前學過打母乳皂，我的結論係...玩過一次就夠了 =P

小朋友需要做的事情就係印皂模! 吸印仔喎! 即刻醒神晒!
印好的皂返去擺陰涼處兩星期就用得


話咁快麵包已經焗好，搵唔搵到木木果個?


自從將兔包交到木木手上，佢雙眼就無離開過......


自己親手整，特別美味，記憶亦深刻好多
木木之後講左好耐「木木自己整包包」
木木媽都要試下係屋企同木木整麵包先得~!


食完包口乾乾，余仁生請小朋友飲開奶茶
坦白說木木冋木木媽都係第一次飲
原來係淡淡地的味道


原本之後係自由活動時間，但偏偏影完大合照就開始落雨
雖然無得去農場另一邊的海灘，不過能順利完成大部分行程已經感恩


今次超感謝余仁生的邀請，帶我地離開市區到戶外抖抖氣
小朋友們仲學到好多生活知識，大小都滿有收穫呢！

余仁生
網址︰http://www.euyansang.com.hk

園藝農場網址︰http://www.hkgardenfarm.org

成長記錄 • 二十二十一二十二個月

[16 AUG - 15 NOV 2015] 

身高體重
體重︰10.3kg @20
           10.7kg @21
           11.4kg @22

身高︰高過餐檯，80cm左右掛？
牙齒︰7隻! 相隔三個月終於再出啦，係左下側門牙 @20
           9隻! 終於出大牙啦! 係左上右上小臼齒 @22

飲飲食食

• 講到口臭...俾面自己畢一兩啖就收埋對手等人餵，姐姐餵好快，爸爸媽媽餵就會玩野，企起身情況少左，但變左扭坐其他櫈
• 木木陪大人食飯時就好肯自己食，但礙於屋企開飯時間太夜 (八點後)，所以木木都係要六點零孤獨地食晚飯先 -.-
• 不過係明顯感到木木用匙食飯叻左好多，用水杯飲水亦無乜漏
• 因為講野叻左，可以好清楚咁表達自己唔食呢樣唔食果樣...
• 鑑於木木真係唔多食生果，木木爸嘗試每日打果汁俾木木飲，通常有兩三款生果，木木非常受落

自理/活動能力

• 學識左盤腳坐! 呢點木木應該比其他小朋友叻少少，返playgroup時都無見過其他小朋友識盤腳坐呢~@20
• 終於識得自己打開佢個richell水壺 @20
• 「叻叻」手終於做岩 (之前係好迷茫咁伸隻手出黎唔知點做好) @21
• 識得著鞋、除鞋 (限最易著果對asics) @22
• 學識拉拉鏈 @21
• 有日換片時叫佢坐potty，肯坐仲痾到weewee! 佢媽我開心到尖叫，同時個intelligent potty仲唱歌賀賀佢，唔知關邊樣事，總之木木痾痾下嚇親，從此亦唔肯再係potty度去...@21
• 自從幫potty換左位，木木肯再坐上去啦...不過係隔住片片 >< 唯有慢慢黎啦 @22

情感認知

• 轉數快左，例如木木媽叫木木做一件事，佢會叫返媽媽做果件事...@20
• 終於知道 "shoulder" 係邊度，玩到 "head & shoulders knees & toes" @20
• 顏色認到 white, black, blue, pink, yellow, 最愛黑色 (!) @20
• 佢對時裝真係好有堅持...
• 有咩唔如意就爆喊，媽媽問佢喊完未? 「喊完」喊有無用? 「無用」下次仲仲喊唔喊? 「唔喊」對住佢真係哭笑不得...@21
• 21個月開始好明顯咁進入左TROUBLE 2! 咩都sayNO，唔肯拖住手，特登唔講拜拜，媽媽極度苦惱 -_-
• TROUBLE 2的木木仲會咩都想自己做 e.g. 扔垃圾，著鞋等等，好似扔垃圾咁，因為佢堅持自己做，靠自己學識踩垃圾桶，得得戚咁，媽媽係時候再放手了
• 22個月開始「痴媽症」非常極度嚴重! 朝早唔俾媽媽返工，所有野都唔俾爸爸/姐姐做，話唔要爸爸 (木木爸好傷心)，出街一定要媽媽抱，加上木木媽岩岩轉左工，所以木木媽呢期真係好攰好攰...

語言能力大躍進!

二十個月

• 20個月大的木木算係識講好多野，基本上問佢w questions e.g. 「食左未」「正唔正」「係邊度」都會答到，當然佢有時都係亂答 =]
• 如果木木佢「點解」就會KO佢，唔識答 XD
• 平時成日同木木講的道理規矩，記到，問佢亦答到，做唔做到就另一回事...
• 木木嗌自己個名又唔同左，以前叫「LAN LAU」依家叫「因油」
• 已經有能力組合兩至三組詞彙，講一組時衝口而出，講多少少時就會好搞笑，佢會好用力咁一組組詞彙「登」出黎 e.g. 媽媽、食餅餅、因油 > 即係叫媽媽拎餅餅俾佢食
• 首本名曲︰TWINKLE TWINKLE LITTLE STAR! 提佢歌詞第一個字，佢就會自動唱落去

二十二個月

• 經常自己講一整句說話 e.g. 爸爸媽媽返工，LAN LAU去街街
• 佢又叫返自己做「LAN LAU」...
• 自己無啦啦唱晒成首歌，除左TWINKLE之外，仲識ABC song & Baa Baa Black Sheep (可能因為melody一樣/差唔多)
• LAN LAU食少少，媽媽食多多，ok?
• d尾音好好笑 「媽媽食麵麵丫?」「duffy唔見左添!」「返嚟啦?」

識講的詞彙已經好多，下面已經update唔晒，有時工人姐姐教左佢生字我地唔知，之後同佢睇故事書時會自己講出黎，成日都嚇親我 lol

食物類

奶奶 包包 餅餅 banana apple mum-mum 飯 菜 水 湯 汁汁 提子 cheese 栗米片 麵麵 pizza ice-cream pear pineapple orange kiwi pasta

衣服類

襪襪 帽 衫 褲 裙 鞋

物件類

波波 燈 bubble 櫈 遮 bottle 車車 car clock 星星 心心 叉 羹 杯 廚房 檯 樓梯 眼鏡 bus potty bicycle 飛機 toilet
人物類

媽媽 爸爸 婆婆 嫲嫲 公公 爺爺 hacey 木木 叔叔 姨姨 哥哥 妹妹 姐姐 晴晴 auntie

動物類

貓貓 馬馬 bear 豬豬 panda rabbit turtle dog elephant bird horse pig duck frog penguin mouse dolphin whale hippo tiger lion crocodile

生活類

白白豬 覺覺豬 poo-poo wee-wee  拍拍手 握握手 抺抺手 cloud sky

動詞類

peekaboo open close 抱抱 開 坐 推 呢埋 jump 轉

形容詞類

糟糟 飽飽 yummy 靚靚 開心 鍾意 涼 濕 痛痛 掛住
對話類

拜拜 please 知 好 得 OK yeah 呢度 呢個  咩呀? 呢邊呀 謝謝 thankyou
ABC 12345678910(Eng & Ctn) sorry 無左 走左
身體類
head 頭 hair eye 眼睛 ear 耳仔 nose 鼻鼻 month chin neck shoulder armpit finger tummy patpat 腳腳 toes ankle elbow

---------------------------------------

三個月的成長記錄真係唔講得笑，仲有夏天的相(!)
冋朋友仔來一個浴衣聚會!
木木果件係上年買，80碼，唧晒隻脾脾出黎，so sorry =P



朋友仔屋企出面就係海灘，水退時小朋友都可以



木木去完東京後的好朋友 duffy, 終於係香港迪迪尼搵返shelliemay陪下duffy
註：香港的瘋狂六折，係平過係日本買的...(@0.0063)



小朋友同貓一樣，鍾意捐窿捐罅



其實木木媽好多時都只係將木木可愛一面俾大家睇
當然佢亦經常令我有「想星巴佢」的念頭!

喊到面容扭曲好似好慘咁，但如果我話「俾你食餅多一塊餅餅啦!」
木木絕對會半秒內收聲...



小朋友係唔同階段有唔同喜好，之前喜歡的可以突然好討厭
木木BB時唔抗拒戴headband同夾頭飾
歲半之後就唔再俾人掂佢個頭
難得呢日肯佢係playgroup整的頭環仲笑得咁甜，木木媽當然要影低佢 =]



人細鬼大，見到媽媽化妝佢又化埋一份
但阿囡你好似調轉左個eyeshadow同化妝掃喎(其實係潤唇膏同cream)



重點不在咬腳趾，在木木媽最愛的摺摺同手瓜起𦟌！



第一次叫兒童餐俾木木食，有人食



小林家製心心窩夫，你地睇下木木果個開心到由心底笑出黎的樣...



仲有木木最愛的早餐之選 － cereal



木木爸都有佢的拿手好菜 － 鮮打果汁



玩到連廚房個洗碗盤都上埋頭



小林家如果果日無咩活動，通常去屋企附近的三合一
木木爸去打波，木木媽陪木木去圖書館
之後會合去中間的公園



木木夠力自己吹出泡泡 =]



叫親佢影相，十次有九次好自然就懶有型咁唔望鏡頭
有一輪仲要手插袋 XD



小林先生太太結婚五週年，是為木婚
木木第二年陪我地過啦 =]



相隔兩個多月，小林家又去左轉小旅行，依然係日本
不過係近好多的沖繩！今次真正係小林家旅行啦～
至於遊記呢啲野真係唔好再提...



木木：我二十、二十一、二十二個月大啦！
(20個月個頭係洗完頭未乾，成個中年叔叔咁，so sorry...)

幼稚園學前班，讀唔讀?

答案︰讀

木木爸木木媽都係在職父母，一早決定會安排木木返學前班 (pre-nursery class)
原因唔係想怪獸，兩歲就要識好多野果種
而係希望木木可以過下群體生活，唔駛日日對住四面牆

報名事宜，當然係由木木媽全權打理，木木爸分分鐘面試前一晚先知
至於點揀，其實我都好鬼懶
刨學校網頁、早一年去開放日、買天書睇...我全部都無
只係玩facebook時見到人講又睇下，有whatsapp group又入下咁
都叫掹車邊做左少少功課

報名三寶 - 信封．郵票．證件相

信封，郵票，再加個記低幾時報名截止的excel



證件相，之前幫木木整護照去舖頭影左一次
神奇的執相哥哥係木木爸抱住木木的情況下執走左木木爸隻手臂...
報名用的，需要影好少少
facebook上有間studio影「報名相」好勁，個個小朋友都影到好smart咁
乜都懶懶行的木木媽當然book唔到...
結果...呢個世人永遠都係識人好過識字!
最後誠邀身邊兩位專業攝影師朋友幫木木影

第一次係去朋友H屋企影




第二次朋友S黎我地屋企影
第一張乖乖女咁...




第二三張完全係得戚百厭樣!

  

感謝朋友幫忙，因為以木木性格，studio要一埋位即笑即影
佢實黑面，亦不見得攝影師哥哥氹下就會笑...
係朋友屋企，朋友有囡囡有玩具仲可以慢慢黎
係屋企更加唔駛講，仲要係見過好多次的哥哥

大家覺得影得好唔好?

送張連橫九拍過大家笑下 XDXDXD 中間果格最頂癮，你又鍾意邊格?



以前每到學校報名季節，新聞總會報道家長們通宵排隊拎/交報名表
依家唔駛架啦，通常郵寄已經ok
網上報名就更加好，環保之餘又方便在職媽媽
so far報左六間都只係有一間要求到校交表

係...我報左六間，仲有幾間2016年先報
有名幼，有連鎖，有新校，有屋企樓下
預左會撞面試時間，熱身面試亦需要，至於名幼...當去見識下，無壓力!

木木雖則係大B有優勢，但奈何林小姐極慢熬...
祝木木幸運啦。

[試用] COMVITA MEDIHONEY®醫療級抗菌麥蘆卡蜂蜜

謝謝COMVITA邀請出席活動及試用 =]

老實講，COMVITA PR同我講時，我以為係關於佢地鼎鼎大名的manuka honey
到我到達活動場地時，先知原來係護膚品!



我係有聽過蜂蜜可以幫助傷口癒合，減低感染機會

MEDIHONEY® 用的蜂蜜唔係平時食用果d, 係醫療級抗菌麥蘆卡蜂蜜

加上CE認可標誌，達到歐盟的醫療器材標準

仲係美國FDA認可可用係醫療用途的蜂蜜產品

產品入面仲有呢幾種成份︰

燕麥仁精華     能紓緩肌膚，有效減低痕癢
蘆薈                臨床實證能有效提升肌膚水分
洋甘菊            能鎮靜、紓緩一般肌膚敏感徵狀
植物脂質        蘊含豐富的人體須脂肪酸，有效鎖水及滋養肌膚，讓肌膚再生、充滿活力


而類固醇、羊毛脂、parabens防腐劑、SLS起泡劑、人工色素和香料、礦物油同基因改造原料等有害成分...都係無的，講咁多，即係想講呢個系列的產品天然安全，包裝簡單不謀暴利，我聞過味道好正常無香精味，大人細路都岩 =]

系列一共有五款產品，包括日常護理用的無皂潔膚露、潤膚露 & 強護護膚露

無皂潔膚露(soap free wash) 

用左無皂低敏配方，摔極都無乜泡，代表無用到化學起泡劑係好野，只係我地用慣左泡泡好勁的產品，要改變呢個習慣啦。

潤膚露 (moisturising lotion) & 強護護膚露 (skintentive cream) 

一枝無乜野時用，一枝勁乾爆晒拆時用。木木媽一到冬天隻腳就會變蛇皮，仲會有血痕(R損)，咁多年黎都無乜邊支可以搽一次就可以頂成晚，今個冬天正好試試用! lotion搽上去好吸收無立痴痴，cream搽完就好似有層coating係面，隔左皮膚同空氣咁，唔錯唔錯

另外有兩枝產品係大件事時用的! 

天然特效修護膏 (derma cream) 

專for濕疹用的，有效鎮靜及紓緩紅腫、痕癢肌膚，並平衡肌膚酸鹼值，防止細菌滋生 (其實佢成條line濕疹都岩用的)。身邊有朋友的子女有濕疹困擾，無論外觀/生活都會受影響，絕對有需要用有效兼安全的方法去減輕情況。就算唔係濕疹，突發性的皮膚敏感都可以用啊，有時木木塊面唔知點解紅左一撻，就可以用derma cream。

蜂蜜軟膏 (wound gel) 

聽現場介紹，呢支係勁野! 上文講過蜂蜜有癒合傷口的作用，wound gel可以直接搽係傷口上，厚厚地咁敷，用紗布蓋住，適用於任何表面傷口 (如割傷、燙傷、擦傷及抓傷等)、手術後的傷口、慢性傷口和皮膚潰瘍等情況，好正! 我細個整損時最憎搽紅藍藥水，皮膚染晒色，而且好耐之前已經話唔好再用呢d。咁wound gel就幫到手，傷口可以快d好返，如果唔係，手多多的小朋友一定會去搞，有排都唔會好返...

當日有註冊護士同遊戲導師講解濕疹成因&處理，同埋點樣心理上照顧患濕疹小孩，學到野， 仲有COMVITA&餐廳特別為event用manuka honey而準備的小食及飲品，最重要係木木爸幫我湊住木木，等我可以專心安靜咁聽...

COMVITA

MEDIHONEY®醫療級抗菌麥蘆卡蜂蜜

http://www.comvita.com.hk

小林家東京之旅 • 準備篇

木木爸曾經講過，兩歲前都唔會帶BB出國旅行，試問我又點頂得順? 

自2013年年頭的SAMUI bday trip就無再去過旅行啦!!!

慶幸我都係一個不屈不撓的老婆，哦左好耐，加上AM夠分換機票

上年11月我終於換左今年11月的沖繩機票

...咦? 木木媽你有無打錯標題?

無無無! 我都以為要等到年尾先有得去

年頭同木木契媽傾傾下，又遇著特價，就買左暑假去首爾的機票!

...咦? 木木媽你真係打錯標題喎!

無無無! 因應今年6月韓國爆發MERS，廉航公司又俾免費改地點

終於最後定案 - 東京!

--------------------------------------------------------------------------------------------

AUG5 夜晚1910機，我同木木爸都只請下午假

第一次帶木木離港外遊，仲要搭廉航，坦白講我都真係好淆底!

我好擔心木木係機上會發癲，會水土不服，會發燒，會絕食...

但都唔驚得咁多，凡事都有第一次嘛 =]

唯有執行李時花多少少心思考慮周詳少少

出世紙, 針卡副本
雖然已有護照同身份證，但touchwood有D咩事
出世紙, 針卡都有助證明身份

貼紙 / 玩具 / 畫筆
係飛機、餐廳的急救品，希望佢肯畫下玩下唔好周圍擒同大叫就好...
貼紙主要搵厚身D的泡棉貼紙，佢自己可以撕起同食左我都知(!)
最平淘寶RMB0.37就有一張，木木你唔駛同我慳住玩，哈哈!

餅餅/ 糖糖/ 汁汁

食物比玩具更有效，因為食緊野時係唔得閒講野的!

木木18個月時開始俾下果汁/果蓉佢飲，已極速成為佢的最愛 (平時無得飲的)

預算每日俾一包佢做下午茶頂下肚

餅餅帶左大半包gerber，糖糖帶左一包yogurt melt

唔知會唔會清晒?

片片

初初我都大安旨意諗住去到買，但契媽問完在日港人之後話

遊客區的藥房或超級市場都無片片賣

為穩陣起見，都係執齊左片片同學習褲帶去

用保鮮袋儘量抽真空，都唔算好重好阻定

我預每日早晚各一條片片，日間三條學習褲 (估計出街都唔會換得太密)

平安藥

咁岩木木係出發前四日有少少鼻水，就順便睇埋醫生

開左退燒、收鼻水同咳藥水，醫生話如果肚痾，就由得佢痾清

另外帶左耳溫槍、退熱貼、薄荷膏以防萬一

衫褲鞋襪

去程行李我地只買左30kg，所以我真係無預太多後備

in case 唔夠，木木爸話買; 木木媽話洗 (民宿有洗衣機)

衫 - 衫最容易整濕/ 整污糟，六日行程我帶左8-9件

褲 - 兩短褲一半截裙，上機著legging

鞋 - 一對舒服的asics就夠

襪 - 一日一對

煮食工具
為左木木一日兩餐，我地搵左間民宿住，貪佢有個設備齊全的廚房
但衛生起見我都自備左唔少，帶舊野去，用完扔~!
用具︰砧板&刀, 海棉&抹布，洗奶樽液，微波爐盒，燜燒罐
材料︰米, pasta, baby food

至於外出食飯時就準備左
摺疊杯+碗, 食物剪, 飯衣, 叉匙, 大量濕紙巾 (減少用紗巾)



水
如果唔係因為改地點，其實我無諗住去東京的
既然去得，就盡自己能力提供最多保護俾木木啦
所以...我地帶左6L水過去! (其實5L都夠，不過咁岩一箱6L費事拆)
用黎每日俾木木飲同煮飯俾木木食

其實木木腸胃都算係咁，去到之後我唔記得左溝香港煲的凍滾水，飲晒就直接開蒸餾水俾佢飲，仲要無煲過 (後來有媽媽同我講話煲左好D)

人肉奶媽
最後就緊係要帶我呢個人肉奶媽，早晚供應醒神奶奶/催眠奶奶!

希望東京遊記唔會好似之前的沖繩同關西
仲有根本無寫過的honeymoon咁爛尾啦下...