成長記錄 • 十六十七個月

[16 APR - 15 JUN 2015] 

身高體重
體重︰10.3kg
身高︰76cm (睇黎似足木木媽細細粒)
牙齒︰6隻

飲飲食食

• 已經無再細心記錄木木有d咩新食材，日常適食的都差不多引進晒
• 生果︰開始肯食下蘋果! 菠蘿都肯食，但當然同健康院建議份量仍相距甚遠
• 開始食粒粒分明的大人飯，其實爛飯會食得好d，但既然都肯食就多咀嚼啦，有助言語發展
• 第一次唔肯食自己飯，要等食大人飯餸
• 奶量進一步下跌至「舖樽底」程度，儲成個星期都未必夠一餐，返工索性唔帶泵用手算，但木木愛奶，所以開始俾鮮奶、豆漿等替代，放假繼續全人奶。木木媽算係易塞之人，咁少奶情況下依然塞到變乳腺炎，唉
• 埋身木木識得飲完一邊，幫我拉低件衫，拎拎頭，然後指另一邊話「呢邊」i.e. 媽媽你呢邊無奶奶啦，我要食另一邊...

木木第一次發現啜麵條原來係咁好玩!

第一次整飯團波波，大小姐唔li-ke，寧願食栗米，好傷媽媽心...

好彩對木木媽整的饅頭仲係好俾面，大啖咬~

自理/活動能力

• 食完飯識得除飯衣，學緊抽高褲頭同除褲
• 鞋仔如果係黏貼型會自己貼但貼唔準
• 試過一次同我講 "poo poo"，講完下一秒已經面露「大便中」表情，我當佢係通知我架! 平時木木小姐最喜歡的便便時間係 >>> 午飯期間!
• 可以自己爬上BB滑梯SIR落黎
• 上落梳化/ 床唔駛擰轉身落
• 腳︰開腳合腳、交叉腳、TIP TOE walking
• 疊高積木 (歲半返健康院會考)
• 原地自轉 (轉完會企唔穩!)
• 唱歌跟到少少動作，最叻唱「排排坐」
• 玩認圖咭時，可以運用拇指，一張一張咭咁收集係手 (大家可能唔明我講咩...無教過情況下佢識得放鬆拇指少少，攝入一張咭再夾實，我覺得好amazing! 透過自行觀察學習)

情感認知

• 好鍾意玩煮飯仔，識得開火落鹽胡椒上碟同扮食，栗米例外，會刨 XD
• 切切蔬果反而興趣不大，木木prefer自己用手擘開多d
• 突然同默默地陪左佢年幾的幾隻bear bear們產生左感情，去邊都要bear bear一齊做 e.g. 刷牙食飯換片片訓覺，暫時仲未駛帶埋出街
  
  
• 一歲時健康院話除左要煮飯仔，仲要俾BB佢地照顧。於是少許不情願下都買左個「開眼合眼」膠BB公仔俾木木。而木木亦好用心照料佢，會餵佢飲奶，塞佢食奶咀，用紗巾冚被
• 16m開始大脾氣，有唔順心事情會尖叫，好似獅子老虎咁"wu"，會扭地坐係地下 (未至於訓地...)，到17m時又無乜啦喎
• 聽得明大人講野，有時會同佢講數，通常都係要求佢要學習等待，唔可以所有事都即時滿足佢。最成功例子係朝早俾木木嘈醒，佢係咁「奶奶 奶奶」，我會話佢知媽媽要wee wee，要等媽媽一陣，佢真係好乖咁靜靜地等我返黎
• 教過的動物形態都記得，e.g. 魚游、蝴蝶飛、象鼻
• 模仿能力強左，最近好鍾意tip toe行，又學左手放後咁行路 (模仿自「小雞逛超市」一書封面)，所以可以玩到小明 (前前「後後」火車捐山窿!)
• 對"OPEN&CLOSE"的概念非常清晰亦運用得好好 e.g. 手掌開合，腳開合，腳掌開合，門，最方便就係換片時叫佢open對脾，等我可以慢慢抹

木木發現原來腳趾係對稱的! 

語言能力

木木已變成一隻鸚鵡，基本上你講咩佢就跟口水尾但miss晒中間d字，好似一部壞左的錄音機咁。例如「熱辣辣 > 辣辣」「黑忟忟 > 蚊蚊」「涼浸浸 > 浸浸」其實講咁多疊字對學習詞彙係唔好的，歲半開始會減少同木木講BB話~

佢學識左指住木木爸對拖鞋話「爸爸架!」指住我電話話「媽媽架!」跟足大人口吻，由牙牙學語的toddler講出黎特別好笑 =]

食物類︰奶奶 包包 餅餅 ban-na apple mum-mum

衣服類︰襪襪
物件類︰波波 燈 bubble 櫈 
人物類︰媽媽 爸爸 婆婆 嫲嫲 公公 爺爺 hacey 木木
動物類︰貓貓 馬馬 bear 豬豬 pan-da rabbit turtle dog el-phant
生活類︰白白豬 覺覺豬 poo-poo wee-wee open 飽飽 抱抱
對話類︰拜拜 please 知 好 得 OK yeah 呢度 呢個 yummy 咩呀?
其他　︰糟糟(=烏糟)  peekaboo 靚靚

其他
轉左日間兩nap
片片轉左大碼，因為脾太肥

----------------------------------

SEE? 睇書都要搵埋bear bear齊齊睇

以上的「桌椅組合」係由工人姐姐發明的。

開始要物色下合適的幼兒桌椅...咁岩木木件衫同坐墊襯到絕!



木木一歲生日時收到megabloks & lego duplo各一盒

最近都開埋盒lego俾佢砌，佢都係拆多



反而megabloks木木會有心機玩，可能遲下先再玩lego。
呢棟係木木砌的!



從木木畫畫中會發現佢鍾意畫兩筆就要轉新紙，另外木木明顯地偏好藍色...
(其實一早已發現，只係木木媽接受唔到呢個事實...)



木木你知自己對脾勁就唔好夾硬迫入個盆度啦!



有時木木就係咁坐係書櫃前揀書睇~



真係令人肉緊到想無時無刻都咬佢脾脾!

HAPPY FACE都仲係未篤得準，成日篤左去耳仔 =]



木木對喜惡都有幾強烈的主見，可行的情況下都會儘量尊重佢的選擇。呢對小老鼠鞋原本木木唔鍾意的，因為係新皮鞋硬左少少，好彩之後木木都好似幾like咁 =p



屋企height chart有隻長頸鹿，早兩個月木木玩認圖咭時，會誤認吸塵機係長頸鹿 (好可愛!!!) 依家唔會啦，會搵返隻長頸鹿做配對



細膽木木，去moomin cafe會驚大大隻的公仔!



木木媽呢期瘋狂買鞋! 人仔細細街又無得去都唔知有咁多鞋做咩 =p

木木[扮]食緊大熱的棉花糖甜品~



落街look，之後睇返木木爸話咁著好似PE校服，又係喎!



呢隻木木好鬼古靈精怪，係屋企表情多多

訓練有素，一埋呢個位就自動換POSE俾我影 XD

送多兩張相冧下EE們 =] 下個月再見!



木木︰我十七個月大啦！

成長記錄 • 十四十五個月

[16 FEB - 15 APR 2015] 
第一次失守，變左雙月記...

身高體重
體重︰9.3kg
身高︰76-78cm咁上下
牙齒︰4隻

飲飲食食
本月引入的新食材︰磨菇 西芹 紫菜 昆布 鏗魚 比目魚
食固體表現都係一時時，睇心情睇食咩，鍾意食星星粉、栗米、芝士
有日食芝士栗米豬肉飯，暫時唯一一次自己畢晒成碗飯，好滾動!
其餘通常一開始都會俾下面自己畢黎食，十啖左右就開始掛住玩，要人餵埋剩底果D，幸好都好肯開口食。而且揀人餵，首選係媽媽，次選姐姐，最後係爸爸...

仍然係唔鍾意食生果，所有生果。
半隻蕉係佢呢世囡暫時食過份量最多的生果

零食當然無任歡迎，但我都唔想木木食太多餅乾，所以有時間都會蒸下雞蛋糕，煎下香蕉pancake俾木木做下午茶。在職媽係無咁多花臣野架啦，還好木木超愛 =]

我依然係一名奶媽! 木木早晚埋身食奶，我仲係日泵三次俾木木做下午茶。不過奶量已明顯減少，每泵得1-2安，一個星期要補一包冰奶先僅僅夠。我的心態係，泵唔出就光榮掛泵...
估計埋身都食少左，所以開始正式坐定定食早餐，通常都係麵包+香蕉，麥皮唔鍾意 ><



自理能力
進入toddler時期木木媽開始訓練木木自理，暫時做得到的有

• 換片前同大人一齊捧水兜入房，換片後自己扔大人包好的片片
• 食飯前洗手 (大人幫忙開水唧梘液遞抹手巾...um...)
• 食完飯自己捧飯碗同餐具去廚房，等大人抱起佢擺落鋅盤
• 著衫過頭笠之後自己搵袖穿隻手出黎
• 著鞋著襪會坐係小櫈，自己伸腳入鞋襪 (大人幫忙腳踭)
• 去完街返黎自己擺返對鞋入櫃 (亂擺，因唔夠高)
• 睇完書自己擺返入書架 (要人叫先擺)
• 幫忙掃地 (做下樣而已...)

仲有因為木木已經出晒四隻門牙，幫佢用紗巾刷牙時咬到我好鬼痛，所以轉左用牙刷，但有人懶叻要自己刷，但只係用後面牙肉咬，果度未出牙呀囡...而且唔俾媽媽補刷，有時肯俾木木爸/ 姐姐補刷，但又唔俾我行開，麻煩鬼!

活動能力
相隔兩個月，感覺木木已經唔再論論盡盡，好多野都可以自己諗辦法達到

• 踎低起身已經唔需要用手幫忙撐地
• 坐底著/除鞋襪 - 學習距離感，知道大概倒退幾多先坐落去，不過有時都會坐空patpat落地。坐好之後可以遞起單腳，亦控制到腳趾伸入鞋
• 係大人床成日做半個前空翻的動作但雙腳係撐直的。初初都擔心佢整親，但後來覺得佢自己應識就住就無再理佢
• 識得擺好個波係腳前然後踢
• 前二指 - 小肌肉的生活訓練，木木同好多小朋友一樣好眼利，會睇到D細微野如地上頭髮，麵包碎，連秋葵籽咁細粒佢都睇到執到俾我...

情感認知

• 學識左錫錫，sweeeeet爆! 仲做埋聲效 > mu....ah! 送飛吻都好闊佬，叫到永無托手踭，仲有HUG HUG，打開手木木會走埋黎攬住你/ 俾你攬住
• 扮野 - 識得訓底加聲效扮訓覺，講龜波氣功識得自己中招向後跌，玩煮飯仔扮食野
• 好鍾意玩peekaboo，屋企有一個木木「呢埋」的專用位置，佢會搵野遮住自己，然後大叫"BOO" 彈起身!
• 遇到唔順心的事會大叫大嚷
• 口&鼻有時仲係會指錯
• 鍾意捉住人地隻手指去參與佢玩緊的活動 eg 彈琴, 電器上按鈕 etc
• 唔鍾意戴頭夾戴帽 (明明細個好肯戴headband)，但鍾意孭手袋
• 好鍾意睇書，會自己係書架揀書，叫大人講，唔該都無句就坐係人大脾度等聽故事書 XD
• 講開睇書，不止一次，木木睇同一本繪本睇到喊左出黎...

語言能力

說話能力大躍進! 呢兩個月識講多左好多野，大人講完會跟口水尾講，無聊時依然係講佢最愛的BB話。
食物類︰奶奶 包包 餅餅 ma-ma-ma(=banana) apple
衣服類︰襪襪
人物類︰媽媽 爸爸 婆婆 嫲嫲 
動物類︰貓貓 馬馬 bear
其他　︰糟糟(=烏糟) 拜拜 peekaboo 波波

-----------------------------------------------------------

木木︰媽媽你又爆晒我D瘀事出黎，我無眼睇啦!



大個女啦，要轉用新carseat，可以一齊面向前坐
同時間木木爸都換左七人車，中間仲要係walk through\
木木係車入面可以行黎行去，木木媽照顧木木都方便左 =]



有日木木表妹黎左，拎左木木細個時的baby gym出黎玩
估唔到原來木木對baby gym仲有印象，好開心咁碌
(在旁的表妹表示很無奈...)



有人扮識彈琴扮到好似



出席木木媽師姐囡囡的一歲生日會



仔...點睇都唔似女仔...



古靈精怪 =]



唔知由幾時開始，同木木講話影相啦，佢會自己拍埋牆，gut高腳拗腰擺POSE! 我真係唔知佢係邊度學返黎，可能係inborn ability lol



一歲之後有段時間無返固定playgroup，就帶左木木試下唔同主題的playgroup。木木都算係主動八卦型，以為佢會喜歡gym，點知試左幾間都係極討厭gymnastic的部分，可能木木似木木爸咁畏高? 雙腳唔離得地? 

(爬上爬落行平衡木還可以，吊環單槓就喊晒口了)



繼木木媽生日食NOBU，木木爸生日，又再一次挑戰。
木木全程都好behaved，有餅有菜就肯坐足全程BB車。HUGO的staff亦好好，特登拎左成籃餐包仔俾木木，臨尾仲幫木木爸媽由petit four變成petit twelve，帶呢個囡出街成日都有著數 XD



木木爸生日仲去左IRENE度影CAKE SMASH!



我的可愛契囡融融+好想逃跑的木木



第一次畫畫



逛街睇玩具，有邊個小朋友會唔開心?



係大人床上碰碰跌跌都係一個好玩親子活動!



又黎葉問上身...



其實木木係二月尾又再次因嘶哮症入過醫院。已有上次經驗，今次一見徵狀齊全就星期五漏夜同木木去急症室，星期日中午就出左院，AL都唔駛請，幾有效率...今次入院時值13個月大，比起上次10個月大，大人同木木都更辛苦，不過還好有經驗而且木木好乖，都不太難過，兩次入院，隔離床都係用iPad/ smartphone打發小孩，我欣賞自己同木木爸，完全無俾過!

今次中招原因︰相信係跟媽媽返健康院見母乳姑娘時不敵眾多病毒



雖然成長記錄懶左，但係慶祝蛋糕仔係唔會漏左的 =]
14個月仲係第一次唔係屋企慶祝添~

[試用] Pinguino BoBo Care

感謝Pinguino BoBo Care邀請木木試用
呢個牌子我估大家都未聽過，因為係一個新推出市場的香港本土品牌
搵重點 -「香港本土」當然要大力支持啊!

當然，用係木木身上的不能盲目地人家叫我用就用，都要了解下先
Pinguino BoBo Care產自香港實驗室，佢地團隊用左四年時間去研發出黎，全部產品經由科學方法測試。香港人香港製造，第一時間諗到的優點係，一定比較大機會適合我地香港小朋友。有時聽人講邊隻邊隻歐美牌子好用，都唔一定架，歐美地區氣候不同種族不同，岩佢地用唔代表我地膚質都適用。

木木︰又有新品進貢，今次要我試乜?

打頭炮四款產品，潔膚水/ 爽身噴霧/ 保濕lotion & cream

簡單包裝無多餘無謂野 which is good!





木木︰密密麻麻寫咩?



簡易唔代表求其，樽身背面貼紙清楚列明不含有害物質 (酒精、硅油、鄰苯二甲酸酯、香精)，用法，成份，講明香港製造，有埋香港地址，有咩問題都可以搵返佢地，唔駛e-mail CS到天荒地老 XD

Pinguino BoBo Care 潔膚水
臉用/ 屁股用。唔駛過水，內含德國洋甘菊成份，保濕界好物。抹屁股唔錯，試用期間有日木木條片"up"得耐左有少少泛紅，用呢支代水抹完過一陣就退左。



無理由俾木木的屁股大家睇，抹下面仔都得，再唔係，媽媽們用晒手頭上的toner屋企又無存貨，用呢支一樣得~



Pinguino BoBo Care爽身噴霧
呢支爽身噴霧木木媽推介! 

夏天就到，肥豬木大脾都仲有摺摺，佢依家又無時停，出汗之後好易醃住起熱痱或汗疹。

以前的解決辦法係用爽身「粉」，已經不合時宜，因為爽身粉有滑石粉成份，粉狀容易吸入肺，會破壞嬰兒肺部組織。到我生木木時先知已進步到用爽身「液」，避免左吸粉入肺問題。依家仲有噴霧狀態爽身粉! 夏天熱辣辣，俾我都唔想搽野係身，噴一噴，涼浸浸幾好呢你話~

木木有用開泡泡潔手液，所以一拎支爽身噴霧埋去，佢自動自覺攤開手

Pinguino BoBo Care水份保濕霜 /滋潤保濕乳
蘊含天然成份銀果精華及水蜜桃核仁油，有助增強皮膚抵抗力，防止肌膚老化及出現過敏等現象，有效預防濕疹等皮膚問題
蘊含乳木果及德國洋甘菊，用後皮膚柔軟濕潤、光滑和富有彈性

lotion/ cream 我本來就無乜要求的，又感恩木木無咩嚴重皮膚問題

不過之前木木嘴角有撻濕疹，試左好多牌子都唔work，最後都係要去睇醫生搽steroids先搞得掂，好返之後就要著重保濕以免復發。所以成份天然都好緊要，咁近嘴角，木木好易會hi到入口呢。

左邊呢一支係silky lotion, 右邊係creamy lotion

好明顯silky lotion比較runny, creamy lotion就creamy (廢話)

但推開黎講兩隻一樣易推，可視乎自己膚質同喜好去選擇。



呢個牌子所有產品都好minimal, 無色素同香精，所以用起黎無色無味咁，咁先好呀!

有興趣可睇睇佢地的facebook page =]
https://www.facebook.com/pages/Pinguino-BoBo-Care

[12m] 木木與朋友的一歲生日派對sss

木木媽懷孕時識落好多同月媽媽
依類分為同月、同日、出世醫院、居住地區...
每個組別都會分別籌備一歲生日會
仲有我家木木果個，人地邀請木木去果D
今年一月，個個星期都係出席生日會...

[JAN 4] 同年同月同日BB
地點︰荔枝角香工GATHERLAND
主題︰balloons & clouds
由幾位媽媽主力籌備，準備左「1」字蛋糕、CUPCAKE、BANNER、攝影師
所有BB都著住有「1」字的上衫，女仔下身著tutu，男仔下身牛仔褲



呢個場地好處係有幾個波波池、大型吹氣組合、車仔搖搖馬
唔駛爭玩，又有小朋友桌椅，仲有換片餵奶房
唔好處係冷氣唔夠，成個場都好暗
少窗之餘牆身油上好怪的綠色，攝影師影出黎d相唔靚



一歲咁大件事，平時whatsapp比較寡言的媽媽都有參與!
同年同月同日呢班媽媽，唔算話係太close成日有gathering
但媽媽們都係nice，make sense的人 (好緊要架...)
大家的bb都正常發展無乜大病痛，好感恩 =]



[JAN 11] 2014年1月媽媽會
地點︰EATON HOTEL
主題︰ribbon & bow
同一間酒店大半年前我地先搞過百日宴，轉下眼就到一歲!
咳...咳...咳...木木媽正是搞手之一，後面backdrop亦出自小妹之手
女仔蝴蝶結男仔煲呔，木木都有個蝴蝶結仔係頭殼頂 (無咩野好夾...)



當時木木仲爭幾日先1歲，已經行到幾步但未行得穩
所以爬行比賽都仲玩到，仲爬得好快，贏左 =]



非常豐富的抽獎禮物! 可惜木木抽唔中，大獎俾隔離的tiff BB抽中左



因為呢個媽媽會，木木媽同幾位admin媽媽做左好朋友呢。



[JAN 25] 2014年1月廣華媽媽會
地點︰JOYSTARTER
主題︰safari
其中一位媽媽搞掂晒，勁~!
dress code: white tee + tutu，木木媽貪靚多手淘多左條彩色tutu =P
safari 蛋糕好靚! 
依家潮流興fondant cake，其實cream cake都可以好靚啊!
好似呢個咁cream cake底+fondant公仔都唔錯~
(木木唔肯戴帽，唯有木木媽戴...)



今次生日會少有地係木木媽單拖! 木木爸要返工
木木好乖，肯自己玩玩具，俾我食左兩round野食 =p
呢個場地我原本以為好好，因佢主打做小朋友派對，亦收得唔平
但現場睇地方唔大，波波池漏氣，代訂的到會唔好食
餵奶係拉個布簾圍住自己一個圈...
唯一好係地點方便 - 旺角



著住tutu的BB們，超可愛丫~!



寫寫下唔知點解變左party venue評價文 =p
呢一年的baby gathering又真係去唔少
如果媽媽們無乜idea去邊間好都可以問下木木媽 =]

其實一歲生日會，babies除左知道有玩具玩，都仲係一舊雲咁
希望明年有心的媽媽繼續籌備，大家可一齊慶祝生日啦~