小林家 • 木木

Friday, April 10, 2015

[試用] 噓噓樂紙尿片

感謝噓噓樂邀請木木試穿佢地的透氣輕柔紙尿片 =]

尿片都算係木木生活開支裡面比較重皮一項

因為木木初生時好多朋友都送m字頭日牌尿片

木木著得ok又無紅無漏的情況下，一直都係默默地補購…
心底裡我當然想搵個平靚正品牌替代! 今趟機會實在太好

貼心的噓噓樂仲送上玩具，明係物誘試用專員木木啦XDD

尿片對我黎講最緊要抵，唔漏尿，唔會起尿布疹
尿片對木木黎講最緊要舒服，佢阿媽要換得夠快，唔好阻住佢探索世界

就以官網主打的六大特點去試試佢~
噓噓樂透氣輕柔紙尿片的立體防漏彈性側邊
木木媽摸上手覺得都算軟熟，唔會鞋十十界到肥脾，木木亦無漏尿情況

乾爽透氣表層 / 超薄乾爽吸收體
整塊片片黎講，噓噓樂未算係最薄最軟熟果類，但亦唔差!
比H牌, 綠P牌好，而且因為佢有一層壓到好薄的藍色吸收體，未吸尿前唔會貼實屁股會通爽少少，吸尿後亦唔會話發脹得好厚，屎屎尿尿少機會敷住屁股，自然尿片疹都唔會有

C型動感透氣腰圍，呢D名稱講多無謂
木木媽覺最緊要包晒BB後腰唔好谷起，噓噓樂同木木係夾到的，同埋我鍾意佢後腰位有少少彈性，木木用緊的日牌係無的，同樣都包到屁股，但我拉起貼貼去前面時就覺得有彈性手感好 (連阿媽手感都要照顧埋，真難服待…)

彩色123對位
呢個設計我最LIKE! 對位清晰簡單! 偏執狂木木媽媽有時為要左右對齊會反覆又撕又貼，木木睬我都傻，佢的耐性只容許我貼一次，噓噓樂的三個顏色間距令我未訓醒時都可以一貼到位!

尿濕顯示係尿片前中後三塊小荷葉，有別一般尿濕後會顯色，佢尿濕後係唔見左塊荷葉的

木木用開的日牌搵到最平 (仲要唔知係唔係真野) 都要最少$2+@ (M碼)

相比起台牌噓噓樂價格就非常親民
而且佢並唔係大陸小屁屁們所寵幸的品牌，唔駛擔心搶唔到同埋會有假貨。

辛苦你啦木木，獎你玩玩具 =]

暫時香港噓噓樂提供中碼至加大碼 (M – XXL)
購買點︰藥房或直接打熱線訂貨送到屋企門口，慳力慳時間
媽媽們可以去噓噓樂官網登記索取試用裝試試先︰
http://www.sealer.com.hk/facebook/s/sealer_form.php
仲可以留意住噓噓樂facebook page，不時會有優惠︰
https://www.facebook.com/sealerhk

Tuesday, March 17, 2015

[13m+] 農曆羊年

正月完結前點都要寫好ge~
同大家拜個有遲唔會無的年 =P
祝大家新年進步!

上年新年木木都仲未滿月，木木媽更加唔駛講，喪屍咁...
今年有好朋友代敗日本櫻花全盒，大大提升佈置意慾
仲有今年終於整左小林家利是封! 好開心!
(好想係咁派利是俾人! 哈哈)

第一封當然要派俾小林家木木 =]
木木媽娘家每年都會寫新年賀語係利是封背面俾自己囝囡
我都打算維持呢個做法~

年初一早上，木木已整裝待發啦!
解說下呢一身造型出處︰

賀年服裝 - 花園街
DUFFY利是袋 - 迪士尼樂園
粉紅蘋果襪 - 淘寶
粉波波鞋 - H&M

賀年衫木木媽大概係新年前一個月就買定
桃紅花花小鳳仙，好靚呀，木木媽買得好 XD
(碌落下面睇全身相會清楚d)

仲有木木舅父舅母送的duffy利是袋，新年最重要裝備，哈哈!

年初二
木木仲細，都係係屋企睇住煙花先
呢次應該係佢有生之年第一次睇咁耐電視 XD

電視的畫面+窗外的煙花聲，木木似乎都明明地
指住「喔! 喔!」咁樣

木木媽少有地下廚煮小林家開年飯，LC雲吞雞!

年初三
赤口不宜拜年，小林家選擇左一家三口去公園玩個下午
仲做左一件bb一歲會做的事!

年初四
相約朋友們於樹屋 =]

同融融，波哥，晉晉，豬脾，大爺一齊扔波

一齊隊...小朋友飲品
多謝融融媽特別準備bb飲品!

以前幾個女仔聚會，依家通常x3，好熱鬧!

晚上同契媽們飯聚 (木木媽食緊墨汁pasta =p)
一連四日農曆新年假就係咁完左
期待明年聽到木木講「新年快樂」!

Friday, March 6, 2015

[16 JAN - 15 FEB 2015]

身高體重
體重︰9.23kg
身高︰74cm
牙齒︰2隻

飲飲食食
本月引入的新食材有
牛肉鱈魚蕃茄西柚
呢個月又係另一大挑戰! 有一個星期左右，木木唔肯坐highchair，花盡九牛二虎之力坐好，就合實嘴仔唔肯食...煮淋D煮硬D試pasta試下蕃茄酸maymay都唔鍾意，氹又氹過鬧又鬧過，餵到我同木木爸好沮喪，見住木木隻肥脾瘦左勁心痛 ><

然後唔知幾時開始又逐漸正常返，「正常」係指木木的正常情況，即係都會扭玩扭唔食，不過食物最後能夠入晒佢個肚而唔係奉獻晒俾大地，已經好安慰

但呢隻曳豬係正餐先係咁，零食呢D當然無任歡迎，就算跟我地去6299度食飯，俾白飯同一條菜心佢，又食得好滋味，我係咪應該轉大人飯俾佢呢?

肢體發展

行得都幾穩陣，有時仲急步走，基本上已經唔再爬，跌低左會用手撐返個人起身，「踎低起身開步走」呢套動作非常流暢，當然仍然有企唔穩的時候
屋企playmat差唔多兩吋厚，我地發覺佢明明向前行緊，一到墊邊就會打橫上落，我地大人唔會咁做，應該係佢覺得打橫上落安全D!

情感認知

識得吹口哨! 好amazing，佢見到木木爸吹口哨就跟住吹!
識得飛吻! 不過似掌自己咀多D，哈哈!
問佢 XX 係邊度可以正確無誤指出，當然限於常見的家人同姐姐
著衫著鞋著襪可以自己伸隻手/腳入去正確地方
知道「HAIR」「MOUTH」「BANANA」「GIRAFFE」
叫佢執野 / 俾野某一個人都可以做到

語言能力

貓貓 - 無論真貓假貓，見到就會好肉緊咁指住叫
爸爸 - 識講貓貓先過爸爸，但相信木木爸都已經好滾動~
PEPPA - 我地成日問佢peppa pig係邊，佢除左會指，仲會發類似「pep」「per 」的音

------------------------------------------------------------------------
就咁睇木木都好似幾可愛...

鏡頭一轉，就變返爛仔格!

攝於唔食野果排，唔食都算仲要發脾四，俾木木爸罰佢去爺爺嫲嫲家時無人同佢玩

無論係真假電話木木都愛聽，但唔講野架 XD

仲愛一切新奇事物，包括平平無奇的紙箱

多謝波媽同sa姐姐送megabloks
舅父舅母就送左lego
木木你好幸福呀，媽媽細個都係執你舅父D lego尾玩咋

原來木木的新曆農曆都係16十六，非常好記!
木木媽小時生日，嫲嫲會蒸一底蛋糕同我慶祝
於是我又照辦煮碗，點知蒸衰左 =P

食碗面，反碗底...

去公園玩最開心

有件事我連木木契媽們都唔敢講...我搞到阿囡破相!
事緣木木媽生日前一晚如常同木木埋身食奶奶
明明已訓著的木木無啦啦扎醒爭扎，我一時捉佢唔住
佢就飛左落床邊，面向下撞到嘴角爆缸!
好自責，個心已經盤算定要儲錢俾阿囡做laser...
好彩而家條疤痕已經唔覺
好彩木木爸無鏟我上天花板
好彩木木第二朝訓醒都仲對我甜笑

(契媽們如果睇到呢度實即刻炳鑊我甘!)

好彩依家又變返一名小美女~

木木︰我十三個月大啦!

Wednesday, February 4, 2015

成長記錄 • 十二個月

[16 DEC 2014 - 15 JAN 2015]

身高體重
體重︰9kg > 9.11kg (50th percentile+)
身高︰無高過，73cm
牙齒︰2隻

疫苗注射
一歲要打令人聞風喪膽的三針，分別係麻疹、流行性腮腺炎及德國麻疹混合疫苗第一針 (俗稱MMR)
肺炎球菌疫苗 booster (俗稱13價)
仲有近年新增的水痘疫苗
三針夾埋要觀察針對12日，期間都有機會發燒
十個有九個打完都會，木木之前打針都試過有發燒反應
今次竟然無事! 只有係有日個人微微熱，感恩 =]
不過打針時木木失禮死人，勁爭扎，連姑娘都話佢大力...

另外一歲亦要做發展評估，遇著個好姑娘，對好動木木好有心機
仲讚木木媽我人仔細細餵到咁耐人奶，yeah!

飲飲食食
本月引入的新食材有
蛋白木瓜栗子蘿蔔娃娃菜魚翅瓜
木木好鍾意食飯，明明已經食左粥仔，再跟我地食晚飯時會手指指要食
不過老爺煮的餸比較重口味，只能俾迷你飯團波，食完仲要lam手指 XD

自十個月大開始轉兩固，初初無減奶，仍然係四奶兩固，只係將晚餐奶轉做睡前奶，半夜前會訓住再埋一次身，其實想減呢餐奶好耐，不過木木爸成日都驚木木半夜餓醒 ._. 呢個月木木媽下定決心唔再餵果餐，1 take就搞掂左! 所以依家係三奶兩固，早晚埋身，下午茶一支八安泵奶 =]

肢體發展

唔去參加比賽都唔知原來木木爬得幾快，幾次都係爬得最快果個，又或者咁講，木木係一個容易受誘惑的BB，無論係遙控器定星星餅，一見到雙眼發光發力爬...
一個月內，已經由行一兩步跌入我地的懷抱，變成搖搖擺擺行到十步的toddler! 拖住手仔行一段路都無問題

識得爬三級上大人床，教左好耐之後亦終於識得擰轉身落床
鍾意上樓梯，梯級無論幾高都照抬起隻腳嘗試擱上去
因此係屋企都會搵野踩上，包括walker, hi-fi...
餵粥仔時佢會用自己隻匙羮畢粥，亦擺到入口，不過唔係次次食到

情感認知

hello / 拜拜 / 拍手
會手指指自己想要的野 / 想去的地方
超級無敵鍾意玩peekaboo
認得hello kitty同peppa pig, 因為雪櫃有個kitty磁貼，房門又掛左peppa family，姐姐日講夜講，反而問佢爸爸媽媽係邊，佢都未必指得出...
依家唔可以亂講「奶奶」，有個BB一聽到就會發狂爬去我身上堆跌我
好鍾意沖涼，一聽到話白白豬就急急腳入浴室仲會跨隻腳入浴盤
著衫時話手手會俾手你著 XD 著鞋唔駛講都識得自己伸隻腳入鞋
仲會嘗試伸隻腳入大人鞋 =p

語言能力
同上個月無乜分別，講得最清楚係「奶奶」
「媽媽」通常求救先講，但都聽過一兩次係望住我叫媽媽
木木爸就慘d，仲係「DA-DA」...
唔高興呀，鬧人時就會講「NA-NA-NA!」

--------------------------------------------------

同契媽們去afternoon tea =]