成長記錄 • 三個月

[16 MAR ~ 15 APR 2014]

第三個月，木木媽終於都要返工啦...
復工前一星期，開始好唔捨得木木
日日攬到木木實一實唔肯放手俾婆婆/姐姐幫手湊
不過返左工之後，時間又俾我想像中易過/快過喎!
原本以為自己會望9個鐘頭ip cam，事實係有時間寧願上網找數 / 清email / online shopping，因為返到屋企真係零機會可以係電腦面前做野...

仲有泵奶都呃左公司唔少時間，初初泵三次，後來減泵一次，每次都玩45分鐘 =p
所以唔好問我點解唔打BLOG XD

幸好份工一向都可以準時收工，日日做1800部隊，急急腳返屋企
除左趕住運奶返屋企冰箱，屋企仲有一件等我埋身嘛~

但不幸地返左工兩星期就病左啦，已經戴住口罩埋身餵奶又特別留意衛生
仲唔太敢同木木玩，點知都係傳染左俾佢，唉~

肢體/感官發展
笑出聲
笑到咪晒眼之後會「卡」一聲笑出黎
傾計
四目交投，扮佢依依呀呀咁講野，佢會回應架! 
最常用的詞語係「um咕」「咕呀」，而對象只限佢老豆，佢唔睬我架，嗚~
鬆開拳頭
初生BB拳頭握得好實，依家會有時見到佢鬆開手，係好時機!
快快手清理佢拳頭仔入面，成日都收埋收埋好多毛毛架 XD
雙手握拳
除左鬆開手，仲識得雙手握拳，可以做到「請請」動作~
食手
進入口腔期，無可避免地識得食手，由塞拳頭，慢慢進化成嗒手指，仲左右開弓無難度添...初初我都會嘗試制止，但後來理解到呢個係發展過程一部分，最重要係，根本唔係你想就可以阻止到...
甩頭髮
木木出世時都叫做有頭髮，仲要係兩個轉
依家開始喪甩，又加上木木會成日扯自己的頭髮，搞到由佢自己個身去到床單都佈滿毛毛。不過人地話依家甩的係胎毛，之後再生返的先係頭髮喎...
黑白波點
聽過有媽媽會俾flash card初生BB睇，木木媽因為懶所以絕對唔係呢個類型。
不過我都有自製黑白波點卡，因為初生BB視力仲發展緊，黑白色可以吸引BB視線刺激視覺，而事實上木木又真係好鍾意睇波點，會睇到笑架 =] 

奶奶
踏入第三個月，木木媽成功做到全人奶啦! 灑花轉圈拍拍手!
初初好擔心返工奶量會大跌，會泵唔夠奶俾木木食
好感恩，剛剛夠之餘weekend仲可以儲下冰奶, 完全係我意料之外!

便便
最長試過四日先有poo poo，100%人奶靚便便
原來人奶b便便係唔臭的，但好酸! 
最變態的係，木木媽好鍾意聞不特止，每次都會欣賞下條屎片先捨得扔!

DAY64的木木
由於木木係唔肯訓+醒訓寶寶，之前日頭訓覺有時都要抱住哄訓，我當然知道係唔好，一直都有訓練，呢一日daytime木木可以自己係床仔訓，好滾動呀~

DAY65的木木
波媽提過我，想BB鍾意戴帽/頭飾要自細細個戴，等佢地唔抗拒
於是婆婆耐唔耐都會係屋企同木木戴下 =]

DAY73的木木

似乎每個月木木爸都有搞笑相提供!
佢話木木可以做港版「給力寶寶」!

DAY74的木木

木木開始笑多左，影相變得更有樂趣 & 難度 

DAY81的木木
木木媽有一班懷孕初期認識的朋友，BB們終於係肚外聚首見面啦!
大家的預產期都係一月，最後五位BB「日齡」相差大概半個月
估下邊個係大家姐/大阿哥，邊個係細細妹/細細佬?

DAY85的木木
練習抬頭中

DAY87的木木
中學同學黎探木木
好多陌生面孔，木木好疑惑呢 =]

DAY88的木木
木木媽有份籌備的一月媽媽會百日宴，總共有100個BB出席!
唔知係咪人多菌多，之後木木就病左啦...

DAY91的木木
我三個月大啦!

成長記錄 • 兩個月

[16 FEB ~ 15 MAR 2014]

之前朋友話捱過滿月會有轉機
第二個月，其實木木媽覺得都係差唔多咁地獄
可能因為木木生命裡面暫時最重要果部分 - 食
仍然係困難重重無盡險阻...

不過木木都有佢自己的小進步 =]

肢體/感官發展
抓住物件 - 埋身食奶時會捉住我件衫/bra
玩口水 - 會玩到成口泡，蟹...不過就未流口水出黎
食拳頭/手指 - 口唔係大又要塞晒個拳頭入去，好好笑!
跟隨聲音/物件移動 - 頭仔會跟住發聲玩具 / 黑白圖左右擰
抬頭 - 45角可hold到一陣，抬高到90度都試過，好驚喜!
微笑 - DAY59 終於向媽媽發出第一個微笑! 木木媽個心俾佢溶左 =]

木木滿月後開始好醜樣，原本皮光肉滑，開始甩皮同出粒粒
不過好多媽媽都話甩晒就會滑，出完一輪就會無，一定要呀!

疫苗注射
木木join左坊間的額外疫苗注射計劃，所以大約七星期大時去打六合一 & 食輪狀
呢次木木媽真係豬左，人地問我想俾醫生定姑娘打針
我唔知痴左邊條筋話跟醫生...係人都知姑娘一定熟手過醫生架啦! 
結果木木俾個老醫生拮左一毫子咁大滴血出黎! 睇見都肉赤...

至於輪狀，雖然話甜甜地，但木木都有吐兩三啖出黎，本身個份量都預多左所以OK

之後去健康院打13價第一針，同打六合一一樣
針拮入去後半秒先開始喊，係咁易喊左幾聲咁啦~

健康院
體重︰3.8 (25) > 4.58 (25)
頭圍︰35 (25) > 37.2 (25)
身高︰57 (50)
體重同頭圍維持生長線25th percentile，100%滿意收貨
身高竟然係50，以木木媽身型黎講，唔跌出生長線外已偷笑 XD

奶奶 全人奶人數︰ 14日
接近半個月，離全人奶目標又近左少少!
第二個月繼續努力埋身，餐餐同木木搏鬥
每日大概7-8餐，每次一邊儘量令木木食到25-30分鐘
泵奶開始可以泵到以安計，有時埋完木木仲喊會補2-3安，無泵奶就會補奶粉
大概0000食最尾果餐，大概0445 - 0600之間會醒，唔知算唔算戒左夜奶
有人話可以餵水/拍返都唔好餵奶，但我地覺得始終木木仲細，食多餐奶都係好事
而且埋身太方便，拎高件衫中下中下咁餵，餵完碌返上床就訓得

六星期大，木木好準時咁經歷猛長期，仲長達一星期，就係我口中最地獄的日子
每個鐘都要食，呢頭離口果頭去轉廁所返黎又黎過，灰爆...
真係要有無比意志先撐得過!

便便 [DAY58] nb碼轉s碼
補粉餐數減少，便便開始近似人奶便便，泥黃/橙黃色 / 稀 / 少粒粒
大約1-2日有poo poo，感恩佢唔係一日幾次的類型!

木木媽
第二個月係喊少左...少少 =]
不過滿月後開始有朋友黎探木木，尤其是一眾媽媽級好友
同佢地講下講下就會淚如泉湧，醜死怪失禮晒
全埋身的我亦終於係木木爸強烈鼓勵下第一次出街 (唔計去健康院)
只係去附近的商場，因為我太心掛掛木木啦，又要趕返去餵奶呢。

生木木前重左18磅，生完即時無左12磅，滿月時再減左2磅
不過依家又重返2磅，大約維持住仲有6磅先望見家鄉...
為左餵人奶，一日三餐都食飯，食到好似有左3個月咁 T.T

DAY38的木木
我終於都有名有姓啦! 唔係叫林木木下嘩?

DAY39的木木

半夜扭爆，最後在媽媽的懷中睡著了...

DAY45的木木
拆利是日! 媽媽我要買禮物送俾你~(妄想對白)

DAY51的木木
第一次搭巴士去打針

DAY52的木木
木木爸生日，我地第一次挑戰去shopping mall行街食飯
又近又方便的elements係好選擇!

DAY54的木木
我有我的小天地 - baby gym

DAY55的木木
老豆你又惡搞我...

 

整手腳模型，腳還可以，整手時爆喊了

DAY56的木木
木木媽好愛呢張bouncer (so me!)
好彩木木都鍾意坐~

DAY60的木木
我兩個月大啦!

無形禮物 • 嬰幼兒疫苗接種

為木木添置初生用品時，除左一般傢俱、餵哺、清潔用品等等
其實仲有非實物的考慮，例如保險、疫苗等等

疫苗方面，其實政府的母嬰健康院有提供免費免疫接種服務
由出生至一歲半時會接種的疫苗包括︰
卡介苗(結核病)
乙型肝炎疫苗(乙型肝炎)
四合一疫苗(白喉/破傷風/百日咳/小兒麻痺症)
13價肺炎球菌疫苗(肺炎球菌)
MMR疫苗(麻疹/腮腺炎/德國麻疹)
水痘疫苗 (水痘)－話2014年開始有得打但未cfm
括號內就係疫苗可以預防的小兒傳染病

用過政府服務都知道，政府分俾我地呢班納稅人的資源會有幾多
免疫接種服務的保障程度只係一般
所以木木媽好早已經打算會幫木木額外參加私人疫苗接種服務

通常額外幫嬰幼兒打的疫苗指以下幾種︰

1\ 輪狀病毒疫苗輪狀病毒傳染性高，潛伏期快，經口糞途徑傳播
6-24個月大係感染高峰期，年紀愈細病情愈嚴重
會引致發燒、腹瀉、腹絞痛、嘔吐，嚴重會脫水，可持續8-9日
無藥醫，而疫苗亦唔代表完全免疫，只係一旦感染會減少病徵

2\ 乙型流感嗜血桿菌疫苗 (Hib)

Hib係乙型流感嗜血桿菌的簡稱，通過空氣傳播的細菌
細菌會入侵神經線，所以可導致嚴重疾病

如細菌性腦膜炎、肺炎、敗血症、中耳炎、關節炎、急性會厭炎

3\ 甲型肝炎疫苗

主要預防通過進食受污染的貝殼類海產所引致的病毒性暴發性肝炎

如果會去東南亞地區或開始食高危食物如海產&壽司， 就最好打埋呢隻

疫苗會有十年效力

4\ 四痘混合疫苗 (MMRV)

呢個疫苗其實係將水痘針同麻疹／流行性腮腺炎／德國麻疹MMR針合併

政府有得打MMR，亦有話2014年開始將水痘針納入計劃

不過睇小冊子又話，政府MMR的免疫反應，只得8X%

單獨水痘針的免疫反應，第一針得93%，第二針有97.8%

而MMRV第一針已經有97.2%，打埋第二針有99.8%

仲話政府未必買到水痘針，買到都唔慌係靚疫苗咁話喎…
5\ 腦膜炎雙球菌疫苗(ACWY)

呢隻菌都幾惡，早期病徵唔明顯

但當細菌入侵血液或包圍腦部及脊髓的內膜時，可引致敗血病或腦膜炎

24小時內可致命，死亡率高達10%，20%腦膜炎患者都會有後遺症 (!)

香港唔普遍所以少打呢隻，但係大陸成日都爆發呢，而日日都咁多大陸人黎香港…

市場上都有好幾間醫療機構提供相關服務，內容價錢大同小異
(又或者逐支逐支去私家醫生度打亦得)
我自己睇完一輪之後，都係揀返結婚時用過的毅力 (kinetics)
當時用過婚前身體檢查服務，過程順暢，所以都有信心
我係BB展join的時候，姑娘話仲未有14年1月BB join…

毅力包括的額外疫苗有上面講的1-3，分三個計劃，主要分別係
K1︰政府打12針 / 毅力打6針+2劑口服 = 18針+2劑口服
純粹補打政府唔包的三種疫苗
K2︰政府打6針 / 毅力打6針+2劑口服 = 12針+2劑口服
將政府的「四合一」同「乙肝」結合再加「Hib」，打「六合一」
K3︰毅力打11針+2劑口服
政府＆額外疫苗全部係晒毅力打針

K3成八千幾蚊，俾得起當然最好，唔駛兩邊去又打得最少針數
但八千幾真係太貴，K2木木媽還可以負擔到
同K3只係爭一針，但比起K1打少六針
打少幾針，減少機會有針後反應，BB發燒，大人都辛苦架～

2013年8月BB展的價錢
K1︰$2850 / K2︰$4300 / K3︰$8300
BB展即場參加減$100，星期一至五打減$100
送mustela & huggies samples，疫苗優惠券 etc
木木媽會係在職媽媽，所以唔揀星期一至五打，最後俾$4200

八月join完之後，大概十一二月時媽媽會都搵左毅力搞團購
價錢貴$50-100但就送多d禮物，所以join唔切BB展都唔駛擔心
多d留意媽媽會的offers啦～

成長記錄 • 一個月

好好記錄木木每一個月的成長 =]

木木的頭一個月，佢同木木爸媽都係混亂中渡過
記得帶木木返屋企的第一晚，玩左幾個鐘之後發覺零濕片
嚇到要急召契媽bb飛的過黎幫拖!

我因為係醫院完全無得休息
返到屋企被勒令訓返夠本先準湊木木
所以頭幾晚都係木木爸負責通宵守護住木木
懷孕時成日捉埋佢去聽講座上實習班
唔知係咪因為咁，佢換片餵奶都似模似樣喎!

婆婆頭兩星期都有留宿幫手
婆婆仲為左我同木木特登去左讀陪月班
不過新任婆婆可能興奮得滯，成日掛住影木木同叫我幫佢同木木影相(!)
半夜佢又好鬼好訓，我都無謂叫佢起身幫手
仲有好多好多睇佢唔順超的事情...哈哈! 
我日日都炳婆婆，炳完又覺得自己好不孝咁!
唯有自己睇開D，但求木木齊齊整整就算唔好太picky...

工人係木木第七日大時到埗，佢第一次來港工作俾時間佢適應
所以初初佢只係負責清潔 (wow~屋企從未如此乾淨過)
到木木差唔多滿月先有時過佢手幫手抱下咁

至於木木媽，呢個月只係負責坐月同埋身餵奶
講緊係一餵完婆婆就會接走木木去掃風玩同愔訓
同時叫我返上床訓覺，又唔俾人玩fb whatsapp
徹徹底底係一個「奶媽」...

講返木木的情況先~

黃︰DAY5: 107 > DAY7: 67 > DAY12: 12
上面提到DAY4第一晚返屋企發覺無濕片，大驚! 
因為初生嬰兒要食得多痾得多先可以退黃，好擔心木木黃要返入醫院照燈...
等到DAY5星期一即刻仆去健康院，醫生竟然話退得好好
只得107 (低過100算係已退黃)! 
一星期後覆診退到得返12，滿月再返去時直情唔駛度 =]

重︰DAY1: 2.83 > DAY4: 2.69 (出院)
DAY5: 2.74 > DAY7: 2.765 > DAY12: 2.9 > DAY33: 3.8
懷孕後後期木木都未夠六磅重，於是62出手以花膠湯催谷
結果出世有六磅半! 花膠堅係得! 出院前收水4.9%，低過7%可以順利出院
出院後唔駛兩星期就追返啦，滿月時重左差唔多1kg (0.5kg已合格)
生長線keep到係25，25唔緊要，keep到就ok
畢竟佢阿媽我自己知自己事 XD

頭︰DAY1: 33 > DAY33: 35
懷孕中期木木開始變左做細頭妹，孫醫生話仲好唔駛生得咁辛苦...
木木出世時頭圍係生長線10，滿月時上升至25，唔知之後會唔會變大頭妹?

食︰全人奶日數 - 11日
有關母乳餵哺的辛酸，我一定會另文再講!
木木一出世已經食醫院奶粉，返屋企第一晚為左退黃亦係全奶粉
之後先開始正式埋身，不過木木初生時食奶鐘意訓覺
已經係除衫R腳板底凍面乜都做齊，佢都係訓多過食
但佢又會個零鐘就喊食，我感覺同小檬媽一樣
好似全日坐係同一位餵奶咁!

儘可能我都會堅持餐餐埋身餵
但屋企人見到木木食完係咁伸脷又好快再喊食
每日都總有一兩餐被勸告「不如補奶粉」
我都知道自己少奶，所以有時都會妥協
總結滿月前有1/3日子係全人奶，其餘日子每日補1-3餐，埋身後補1-2安

木木係滿月前已經轉過奶粉
初初係跟返醫院食frisolac
中間有幾日可以全人奶
到之後DAY13要再補奶粉時，就大膽地一下子就轉返我原本揀好的holle!
木木又無乜野喎...

訓︰醒訓bb
初生每兩個鐘就餵一次，木木通常一個鐘鬆d已經喊定
滿月前半夜一樣每兩個鐘就拍醒佢餵奶，所以唔會話訓得好耐
木木都算係醒訓，初初連拖鞋聲都會醒
後來電視聲都ok，但因為小林家係開放式廚房
婆婆同工人係廚房ping ling pang lang，成日嘈醒木木，激死我!

痾︰ok靚 / 次數︰wee wee 12-14, poo poo 8-10 per day
所謂初生的墨綠色胎糞...我係無見過的
木木係醫院跟返我的時候，已經係青色的軟身便便
之後轉返人奶+補粉，慢慢開始變糊狀同咖哩色
補粉的日子，便便會有小顆粒，應該係消化唔到的奶粉
曾經試過有綠色便便，有人話係排出多餘鐵質，亦有人話嚇親
咁岩果幾日係農曆新年，帶左木木去6299俾親戚圍
我就姑且當係嚇親啦...

次數多就預左，初生嘛~
基本上係一路食一路痾，兩日就燒完一包0碼片片
開片先黎weeweepoopoo當然時有發生
不過次次避唔切果個都係木木爸...

DAY4的木木
成日食食下奶奶訓著左

DAY5的木木
初生BB需要安全感，我地用包被札住木木
你睇下佢幾迷茫...

DAY6的木木
衫仔都變做大戲服!



DAY7的小腳掌

DAY10︰甩臍帶
甩臍帶的故事好好笑...
果日下午埋身餵完奶發覺臍帶唔見左! 全家四個大人地式
搵過晒木木接觸過的地方都無
連扔左落垃圾桶的屎片都搵埋...無!
最後婆婆係木木身上搵返，原來甩左出黎係件夾衣入面...

DAY11的木木

有時食奶奶後會笑 =]

雖然知道係初生BB笑只係隨意肌的反應，無意識的

但木木媽都已經甜入心啦!

DAY15︰跟木木媽去見孫醫生
產後檢查本來唔需要帶木木，但孫醫生喎~梗要帶去見下 =]
(雖然佢到後期不停老點我，哈哈! 算啦!)

第一次去健康院以外的地方呢。

DAY16︰出世後第一個節日 - 農曆新年
收到木木爸媽的大利是!

DAY20的木木
木木其實有酒粒架，不過初生時少笑所以唔明顯
好難先捕捉到~

DAY23︰木木媽生日節目 - newborn photo shooting

DAY30︰情人節被整 ><
呢個木木爸...得閒無事最鍾意整古佢個囡
話晒人地都係你前世情人...

DAY31︰木木滿月啦!
木木仲細，無出外慶祝到
但都好隆重咁係FINE FOODS訂左個豹紋蛋糕賀賀佢~!

咁就一個月啦! 真係可以用「眠乾睡濕」黎總結
有時聽其他媽媽講自己BB的情況之後
我諗返木木第一個月黎講算係幾惡湊
加上產後荷爾蒙影響，真係三日唔埋兩日就喊
感恩身邊都多過來人，不停支持鼓勵我
佢地話捱到滿月會有轉機，於是我又咬緊牙關撐過去

多謝bubu係生活上&情緒上的照顧
(不過好多時喊都係因為同佢就湊木木的問題而嗌交，哈哈!)
而且佢係我生日的時候送左一樣如magic的東西俾我
有時想喊想喊之際，望住就忍得住啦 =]

a tiffany setting =]

生木木記(下)

DAY1 16jan

生左木木出黎之後，我比生之前燒得更厲害，去到38.9度

被迫母女分離，木木去兒科我去產後房

個人燒到溫溫沌沌，又痛又唔郁得

加上六人房全晚不停有人生得有人生完出出入入

好攰但訓唔著，木木又唔係身邊，無人講俾我聽木木情況點樣

眼淚就忍唔住流出黎 (喊出聲都唔敢，驚嚇親隔離床...)

期間有姑娘黎教點樣手擠奶，好似有叫過我要keep住刺激乳房

(依家回想返，果幾日其實無乜按過擠過泵過，依家仲餵到人奶真係萬幸)

另外會有嬸嬸黎check，生完六個鐘內一定要wee wee到

所以痛爆都要斟壺水焗炒米茶狂飲...

DAY2 17jan

第二朝，換過套衫 (pink!) 就可以嘗試落床，呢下真係需要好大勇氣!

嬸嬸話唔暈都要坐低15分鐘先可以起身試行

overcome左，之後再上落床雖然都係痛，但明顯感到愈來愈少痛的

廣華會每人派一個水泡，呢個水泡簡直係順產必備

我去到邊都會帶住佢，如果唔係我寧願唔坐!
直至DAY3夜晚先可以say bye...

行得走得，即刻捉住個姑娘問木木係邊
姑娘話木木係北8 (北翼8樓)，仲好好人咁寫晒餵奶時間俾我

我見仲未夠鐘，就去上下育嬰講座

點知姑娘話無b實習唔到又趕我走...(你估我唔想帶埋木木黎咩?)

嬲爆位黎啦!

11點我以"zombie style"由南9去北8

門口姑娘話︰「你bb唔係北8喎!」下?

姑娘叫我去南8碰下運氣 (!)

去到南8，問左兩三個姑娘先搵到我個囡

算，餵奶要緊

點知姑娘話︰「餵奶時間過左啦喎!」下?

原來南8的餵奶時間係07,10,13,15,19

11點幾去到，木木已經食飽奶粉啦 ><

連木木頭髮都見唔到一條又俾人趕走左...

都算，後來先知，原來呢日1200可以見兒科醫生問情況

南8姑娘又唔講我知，到我1300再落去餵奶，又miss左!

因為之後係星期六日，無得見兒科醫生

i.e. 由我生完到出院都未見過醫生，while講緊我係發燒生仔case

你話係咪嬲爆丫?

end up我係生木木16小時之後先可以再見到木木...

抱木木入懷的時候，點樣辛苦點痛都唔記得

整個世界好似得返我同木木咁...(陶醉中)

之前youtube睇breast crawl video，講到bb天生就識得搵食

我就好天真咁以為抱木木埋黎就開得餐...

腦裡面係有thoery，始終自己就咁practice真係唔知岩唔岩

因為我又miss左1000有母乳顧問駐場果轉

我只係知木木對媽媽nipple無乜興趣，一味訓訓訓...

而且同場媽媽個個都胸前偉大無比，目標物(nipple)亦好大範圍

奶白色的奶奶大大滴咁漏出黎

只係唧到一小滴透明奶水的我，真係想擰轉背對住幅牆餵...

半個鐘左右姑娘就會入黎趕媽媽走
係木木基本上無啜過的情況下，當然要補奶粉
唔單止埋身，連餵樽木木都唔多睬我
但姑娘一出手就geligulu飲晒!
所以有時我都會扮到好攰，務求姑娘出聲話接手
等木木快快趣趣有奶落肚好過...

木木DAY2食35ml，DAY3已經食50ml
我望住枝奶，已經愁緊返屋企點追奶...

1800-2000係探病時間，爸爸媽媽，老爺奶奶同哥哥都有黎探我
(係，只係探我，因為兒科只準爸爸媽媽入內)
之後木木兩位契媽都黎左探我，一見到面我就喪喊!
你問我喊咩? 當時我都唔係好講得出，總之就好委屈要喊囉!
依家諗返，不外乎係發燒好辛苦，下面好痛，擔心木木
仲有就係老爺自把自為去藥材舖執左劑野要我飲三日...

喊喊下，bubu突然浦頭，手拎一個tiffany紙袋 =]
呢份就係我的生仔小禮物啦~



DAY3 18jan
第三日，照計呢日要出院
但我先岩岩退晒燒，仲係要定時定侯返上床打drip
加上我仲未知其實木木有無因為我而發燒
好多uncertainties...

醫生巡房之後，話我可以唔駛再打drip，但要轉食抗生素
而且唔可以出院住，要觀察多一晚
晴天霹靂! 我再留係度我會抑鬱死! 
忍唔住對住姑娘喊...喊住同姑娘講
「訓唔到好辛苦」「未見過兒科醫生唔知BB點」「BB唔肯啜」
姑娘氹我，話留多晚仲好，因為木木係兒科都應該未出得院住
係呢度反而可以落去密密餵，仲話會叫母乳顧問去餵奶房教我

唯有係咁，同自己講句加油唔好喊又起程落去餵奶
落到去母乳顧問已經等緊我~
係佢指導下木木有俾面啜下，顧問一擰轉頭木木就甩咀(!)

餵完出去補奶粉，兒科姑娘話木木今晚七點可以出院!
下? 但我岩岩先應承左樓上stay多晚，玩野咩...
結果夜晚八點幾木木上返黎跟我，造就左一晚「母嬰同室」



呢一晚雖然好開心，知道木木係無大礙先可以跟返媽媽
但突然俾返個囡我，我望住佢，完全無從入手...
初初木木好安靜，到半夜先開始喊
第一次同木木搏鬥，唔知佢喊邊瓣，又驚嘈親人
有理無理質木木個頭埋黎啜，一啜就啜左個幾鐘...
仲未計換片，條條都係poo poo，勁呢hea，搞到我成床都係...

玩到三點幾，唔知點樣可以令木木唔喊
好衰囡咁按鐘叫姑娘，好彩黎左個妹妹仔
一拉開簾見到我成床都係屎片，就二話不說推走木木 =p
兩個鐘後，自己去育嬰室推返木木返去
又啜成粒鐘...
跟住? 都差唔多天光，day4啦 XD

DAY4 19jan
可以母女齊齊整整出院，原來都唔容易
先講我間六人房，乜人都有
我同另一個港女BB係兒科
一個南亞裔，餵奶粉
兩個單非，一個餵奶粉一個餵人奶
仲有一個未成年17歲(!)，餵人奶

餵人奶果兩個，BB同時都收水太多同黃疸指數高
出院規定收水超過7%要補粉，補完都唔夠就唔出得院
相反，木木食左兩日奶粉，就算尋晚跟我餓足一晚
都合格可以出院 XD
所以我當時都有少少慶幸木木落左兒科
如果唔係以我狀態，一定餵唔飽木木!

好好彩係我未出院之前，又有一個母乳姑娘黎教我埋身餵人奶
教得好好，仲幫我手擠左一小杯黃色的初乳
令我有返晒信心!

最後等bubu媽媽奶奶黎幫手做出院準備
記得要落兒科還尿片同廚房紙
木木住兩日要還20條NB碼(任何牌子)&11吋廚房紙一卷

換返私家衫，準備返屋企啦~!



我的四日三夜生仔之旅終於完結
返到屋企又係另一個新挑戰!



後記︰
兩個半月後再寫，都可以寫得咁詳盡
你話生仔係幾咁刻骨銘心的一件事...

自認思想行為都好細路女，加上hormones影響
果幾日真係日喊夜喊 (唔駛湊囡得閒喊...)
不停同自己講「你大個女做左人阿媽架啦，堅強!」先撐得過
bubu不停來回醫院同屋企，係病房外攬住我，係兒科病房外面等我
我先知原來我係幾咁需要佢，生木木，係小林家的事!

生完老公問我，仲會唔會再生? 再生會唔會係政府生?
我當時答佢唔會! 真係有左一定要搵孫醫生去私家開刀!
如果依家再問我...唔知呢? 諗諗下都唔係痛左好耐者...