托賴身體無病無痛，健健康康 (係細粒d者~)
但懷孕之後，唔到我再亂咁黎，我食乜木木就食乜架啦...
產前講座聽過有關懷孕期營養的題目
孕婦需要比正常人intake更多鈣質、鐵質、蛋白質等等
建議孕婦每日所需
葉酸︰600微克
DHA︰200毫克
鈣質︰1000毫克
鐵質︰27毫克
唔駛計都估到平時飲食一定攝取得唔夠
唔夠分俾木木的話，俾佢扯走晒
尤其係鈣，我唔想骨質疏鬆 / 甩牙呀!
所以我會選擇添加丸裝補充品
當然日常飲食都要調整，但同老爺講完都係繼續佢有佢煮...
我唯有weekend做小林家煮婦時先可以遷就到
(左至右) 維他命C水溶片 / 葉酸 / 綜合維他命 / 魚油丸
維他命C+鋅水溶片
維他命C最主要用黎增強抵抗力 / 作病時唔好惡化至病
同埋有時天氣熱口淡淡又唔飲得汽水，「炸炸」就係我的救星
其實應該飲康鈣C，順便補下鈣
不過呢隻＋鋅的屋企仲有好多存貨，飲埋先轉
葉酸
葉酸對早期懷孕好重要，因為懷孕初期係胎兒發展神經系統的時期
缺乏葉酸會增加發育異常的風險
因為木木係計劃內的結晶品，我係準備懷孕時已經開始食葉酸
未有木木前每日食一粒 (400mcg) 有左木木後每日早晚各一粒 (800 mcg)
最好都係有左之後睇婦產科醫生時問醫生意見
因為我聽過有醫生話孕婦每日需要5mg的
而我係完成第一孕期， 懷孕三個月後就無再單獨食葉酸
轉食隔離果樽︰
綜合維他命
懷孕期間一個人食兩個人吸收，單單從食物有時未必足夠
我食materna，一粒有齊23種維他命同礦物質
胎兒發展最需要的葉酸、DHA、鐵、鈣等等都有
品牌建議未有前已經開始食，我自己就係懷孕三個月開始，打算食到生
至於各大品牌的媽媽奶亦宣稱有齊所需營養
但無論係醫生定係媽媽級朋友都話無需要飲
仲只會肥媽唔肥B!
之前媽媽見我跌磅，係咁叫我飲都唔制!
魚油丸
materna已經有DHA，但日日俾奶粉廣告洗腦都知
DHA對胎兒>嬰兒>幼兒腦部發展好重要
所以又額外食supplement，之前隔日一粒，懷孕六個月開始每日一粒
+晚晚食飯迫自己夾多d魚 (唔鍾意都要)
+再儘量每星期週末自己煮三文魚 (熟的)
鈣片
鈣片係醫生建議我要額外intake的
因為醫生話我骨架細，鈣含量已經俾同齡女性少，好易被木木搶走晒
咁我老來就會變骨頭脆卜卜的無牙婆婆 ><
所以懷孕無耐我已經每日一粒鈣片 + 每朝一杯高鈣低脂奶
其實由我細到大都吞藥丸唔叻，細個試過粒藥丸溶左都未吞到，苦到呢...
依家要每日啪丸不特止，仲要咁鬼大粒!!!
不過為左自己，為左木木，頂硬上
經過幾個月以黎的訓練，我依家已經視佢地如無物 =]
(左至右): 鈣片 / materna (綜合維他命) / mumomega (魚油丸)
後來第二次的政府醫院產檢，驗血報告顯示我有輕微貧血 (放心，好小事)
醫生開左鐵丸俾我，自此我每日又啪多一粒丸仔
poo poo仲變左黑色 =p
另外講返魚油丸，其實有好多媽媽都想食唔敢食
因為一般魚油丸的重要成份 - DHA
大多提煉自深海魚 eg 三文魚、吞拿魚等等
而深海魚類身體積聚過多海洋污染物，尤其係水銀，孕婦要避免進食
咁點算~?
之前知道CATALO有隻魚油丸，DHA成份係由海藻提煉的
最近惠氏亦推出同類產品，唔係想幫佢地賣廣告
而係真係有人唔鍾意食魚，連魚腥味都頂唔順
亦有人係vegetarian，起碼有alternative嘛
我呢樽試用裝 (8粒) 係打去惠氏媽媽會hotline request的
咁細樽都免費送貨去屋企，抵讚
以上純粹分享木木媽的，懷孕中的你，最好都係問返自己醫生
有需要先食，始終最好都係由食物吸收嘛~
