[三十週六天] 產前檢查 • 私家 • 10

Oct 27, 2017 • w30d6 • 高錦安醫生 • 3 LBS 7 OZ • BPM: 146

等左四星期，終於可以再見到林林啦 (其實係佢阿媽慳皮隔咁耐先再私家產檢)。今次又轉左另一個醫生，因為劉珮琪醫生太full，唯有轉睇同診所嘅高錦安醫生，呢位醫生朋友同媽媽會都睇過話好的。

上胎全程都由孫錫鴻醫生睇，仲記得果時佢岩岩搬新診所，添置左新超聲波儀器，產檢時睇3/4D佢仲興奮過我，自己不停搵最佳角度，仲整色整水調較顏色，好有andy warhol style。呢胎由於照結構、睇3D最黃金時間嘅二十零週都唔喺孫醫生旗下診所睇，所以一直都未有好清楚嘅林林3D照。今次三十週再返去睇，自己都有少少期望...

之前都係去石門診所，今次book左闊別近四年嘅尖沙咀診所，一開門真係嚇親! 以前人都多，但多極都係坐滿梳化，有部份人會落左去harbour city行街。但今日係人山人海，坐滿梳化不特止仲企左好多人，要離開診所都左穿右插咁好誇張! 本來諗住有排等，但姑娘又竟然話下一個到我，唔通個個都睇孫醫生?





高醫生比我想像中年輕，但感覺就無我聽返黎講到咁細心，係咁易問兩句，亦無問我拎結構報告睇就話過隔離照啦。

其實林林同木木都超乖 (喺肚入面計)，一直都無令木木媽辛苦 / 擔心，平平安安咁長大，近排開始聽啲媽媽話臍帶纏頸 (其實好common & 纏幾圈好小事)，我又多口問一句高醫生林林有無，結果當然係無啦 =] 各項數值都合乎週數，胎水充足，林林重大約三磅半，媽媽體重血壓都OK (重左13磅)，所以都好快就照完...

至於林林個樣，高醫生都深明媽媽們需要，有盡力搵林林個樣，都係口腫鼻腫咁啦，哈哈! 希望三星期後再去都仲睇到個樣，因為今日三十週六，林林頭仔已經向左下啦，無乜野都唔好亂郁啦知無?
頭骨橫徑  BPD   7.73cm
頭圍         HC      28.05cm
肚圍         AC      26.59cm
大腿骨長  FL      5.58cm

----------------------------------

產檢如果無帶木木，就係我倆拍拖食好西之日 =]

見LCX開左度小月，上次喺台灣食度小月都已經好幾年前嘅事了，就諗住入去食碗擔仔麵就走人，點知一碗$28，每人最低消費$60，哈哈，奸計不得逞，唯有每人隊多碗魯肉飯 =P

林林 • 二十五至二十八週小記

SEP 16-22, 2017 
[二十五週] 腰痛來了

呢個星期起身開始覺得腰痛，係時候要戴托腹帶了。

------------------------------

SEP 23-29, 2017 
[二十六週] 滴 • 滴 • 滴雞精


胎動感覺︰像一頭伸懶腰的怪獸，而呢隻怪獸仲開始有hipcups =]

之前BB展試左幾間依家好興嘅滴雞精，都有興趣飲下補身，因為明顯感覺到陀林林呢胎，兩邊父母都無上胎咁緊張 (可能諗住都第二胎唔駛點理我 =P)，佢地年紀大左 (唉我自己都老左幾年啦)，唔期望辛苦佢地煲嘢俾我補身，所以滴雞精絕對係方便直接簡單之選。

最後我揀左王朝滴雞精，join左團購whatsapp group，比門市平，大約$33/包，一盒十包，三盒起送貨，但唔好係個團購過千人，admin得一個，處理時間要好耐又易被遺忘，而且入數要俾多幾蚊幾毫個團主賺。

飲用極之方便，冰格拎一包出嚟放入滾水 (已熄火)，浸三分鐘就可以剪開包裝倒出嚟飲，暫時都係weekend先會飲，一星期一兩包，所以未見明顯效用住。

------------------------------

SEP 30 - OCT 6, 2017 
[二十七週] 兩孕傻六年

人地話「一孕傻三年」，真係無錯架! 即係話我岩岩先傻完，依家又再傻過! 最明顯就係記性差到一個點，所有野轉個頭就唔記得。近期最嚴重係之前朋友幫我買左張月餅卷，木木爸幫我交收完交俾我，正常嘅我係會放好入銀包...但呢個星期諗住拎去換時，我翻天覆地咁搵都都搵唔到! 咁就無左一盒好好味嘅奶黃月 T.T 


------------------------------

OCT 7-13, 2017 
[二十八週] 結束第二孕期

時間真係過得好快，轉眼第二孕期就要結束啦! 第二孕期的確係最舒服嘅階段，行得走得，又唔駛太戒口，去迪迪尼都仲得 =]

不過明顯覺得個肚大左好多，有時烏低身會覺得頂住頂住，行路會不自覺會挺個肚出黎，所以密左戴托腹帶，夜晚訓覺亦開始要左轉右轉先搵到個舒服嘅姿勢。

而且天氣終於開始轉涼，秋燥令我流左成個星期鼻血 (血絲居多)，好乖咁即刻煲雪梨蘋果水，早晚必定用油浸肚，再去入手孕婦leggings。

仲有天氣涼左令我減低好想食雪糕嘅慾望，平時都無咁覺，有左就對唔食得嘅特別在意...今個夏天，agnes b出軟雪糕、haagen daze出新口味、個個牌子都做買一送一，木木爸仲買movenpick package...天氣涼啦! 大家都唔準再食雪糕!

希望第三孕期唔會太難過，提醒自己事事小心啲!

木木媽的護膚妝品 • 續

的確我有寫上一篇的 (click here)，就係上一胎懷孕之時。
本胎就一於review下上胎產品+介紹入宮新品 =]

(以下非廣告文，全部都係木木媽真金白銀購入)

護膚品
一如既往，木木媽真係唔係每晚搽幾十樣嘢上面嘅人，不過咁岩用開果幾樣護膚品都剛剛見樽底，就索性轉pregnancy-safe嘅品牌。

今胎用韓國品牌primera =] primera早係木木出世時已經有朋友送過同牌baby body wash，坦白講body wash就一般，但呢個牌子不含呢樣果樣，包裝環保，已經令我有好感。上年去韓國旅行買左幾款試下，覺得好好啊! 成份天然，用植物為主打，所以宣稱孕婦可用。可惜係想買時偏偏無人去韓國玩，最後焗住喺Gmarket訂返黎...



幸好G都有贈品送，babymoon時可以用了 =]



潤唇膏都轉左，本身係用ettusais，但睇唔明啲日文唔知道咩成份，雖然我估應不含石油，但都係唔用好，網購時見到下圖左呢支badger unscented organic lip balm, USDA Certified Organic，成份只係好簡單嘅beewax同其他兩三樣嘢，但滋潤度好足夠，又平 (購入價約HK$17)

中間erbaviva organic lip and check balm好好用，但我唔只係用喺lip & cheek，而係帶出街當萬用膏，有時出出下街/ 返返下工個肚 / 大脾突然好痕，我就會用佢劃幾下，即時舒緩，唔痴立立，又唔會成手cream

圖右係e.raorganics complete cream，本身唔係特別孕婦用，只係見佢呢個美國家庭式營運嘅小品牌成份好好，無多餘化學物，亦適合所有膚質，就買黎試下用。聞落有陣椰子味，偏向杰身但易推，有時我沖涼後揸完belly butter & oil，臨訓前會再封多層complete cream進一步護肚




化妝品
本來已經唔多化妝嘅木木媽，依幾年出門口前仲要張羅木木小姐嘅嘢，就更加無時間...化妝品我依然本住「最緊要個底安全」呢個諗法，不過上胎用過嘅beyorg礦物粉已經俾我打左入冷宮，唔係隻粉唔好，反而係個撲好易俾我撲爛，已經特登去返beyorg配過個撲，好快又爛，我放棄...

今胎得其他媽媽介紹，知道日本有個品牌naturaglace，係孕婦安全之選。有個入門set包括BB cream & 碎粉，夠我得閒用下架啦 =] beyorg有賣呢個牌子，但markup左好多，我搵朋友幫我喺日本帶返黎的。



香水、止汗劑、指甲油
香水其實自從有左木木已經戒左，上胎好憎人工香味，木木出左世埋身餵奶亦唔可以噴香水。呢胎都一樣好討厭，家中珍藏香水已經被塞到不見天日的陰暗角落，我枝jo malone仲益左木木爸...

止汗劑孕婦要避免用走珠型/ 噴霧型，最好用天然消臭石，木木媽用日本牌子soft stone，第一代仲要濕水果款用左好幾年仲用緊，原來依家已經有第二代，係膏狀無需濕水，仲方便呢。

指甲油，一知道有左就立即卸左佢，未來又起碼年幾兩年唔駛再搽...坊間有少數牌子話孕婦可用，但木木媽依然建議安全行先，扮靚行埋一邊。

防妊娠紋產品
上胎主要用bio oil，後期加左支l'occitane輔助，end up產後紋都無條，木木媽覺得功勞係歸婆婆遺傳嘅，因為實在聽過太多無論搽幾多都係爆紋嘅個案...

今胎四、五週已經去搵代購買左枝水貨bio oil，同上胎一樣七週開始搽，搽左一兩星期之後突然有覺悟，立即停用! 發生左咩事? 

原因係上胎我用左bio oil一排之後左右腰位都好痕，一痕我就補油，痕左好耐好耐...但當時唔覺得有問題架喎(!) 今胎照辦煮碗，用左一個星期後又係同一部位開始好痕! 我先猛然醒覺，其實我係咪對bio oil敏感? 之後停用一兩日，立即唔痕! OMG! 我實在太後知後覺，遲左幾年先發現真相...故此我又要找尋另一款防妊娠紋產品...

以下係我今胎嘅護肚大軍︰



anti-stretch mark oil:
左起︰mambino organics body toning oil, e.raorganics belly oil, erbaviva stretch mark oil, weleda stretch mark massage oil



mambino organics - 美國有機母嬰品牌，USDA certified organic，香港sogo, mothercare，網上amazon等有售，喺媽媽group都有聽過其他媽媽有用，入門通常買set - belly butter (見下段) & body toning oil。呢set最早買落，我會晚上同belly butter一齊用，由十二週開始每日用，廿六週用完，大概用左三個半月。

e.raorganics - 美國有機小品牌，USDA certified organic，應該無乜人識，但amazon好評什多，亦只在amazon上銷售，會出現因為小量生產而搞到amazon無貨出要等嘅情況，由此可見產品好「新鮮」而品牌經常好闊佬地send 20% or 30% coupon code。belly oil主要油分來自 sunflower, borage, rosehip, extra virgin oilive, apricot seed & primrose oil。我會早上單搽呢枝油。

erbaviva - 美國有機品牌，USDA certified organic，唔知香港有無得賣，官網買25% off first purchase。比較少人提及，我自己都係買完MO之後驚唔夠成個孕期用先試多一個牌子。

weleda - 來自瑞士嘅老品牌，雖然無USDA certified organic，但品牌口碑好，大部分產品都被推薦，日本都好興呢個牌子，木木媽喺網站iHerb購入。

四枝油其實成份都好安全，搽出黎除左erbaviva之外，其他三隻都算吸收得快
erbabviva除左索得慢，個樽口設計仲好差，成個五豪子咁濶，一唔小心就會倒左半枝去




以性價比黎講︰
mambino organics - set裝價唔識計，如以amazon貨size計，hkd240 / 150ml = $1.6/ml
e.raorganics - hkd176 / 125ml = $1.41/ml
erbaviva - hkd183 / 125ml = $1.46/ml
weleda - hkd138 / 150ml = $0.92/ml

最抵用係weleda!

belly butter / cream:
左︰mambino organics organic oh baby! belly butter
右︰erbaviva stretch mark cream



mambino organics充滿橙香，butter出奇地非常易取易推，到夏天時texture再軟身啲，真係好似牛油咁會溶啲，哈哈! 因為每晚用喺胸、肚、臀、脾，用量頗多，用左兩個月後中間開始見底



erbaviva係cream，估唔到仲難推過butter! 要唧好多要夠搽成個肚，極速用晒，所以erbaviva無論係油定係膏都麻麻地，不推薦。

--------------------------------

分享報告完畢。 上胎無爆，無理由第二胎要失手right? 努力護肚!

嬰兒用品・螢光劑大測試

現今父母，有能力的話都想提供最好嘅俾自己小朋友。
但有時貴買以為品質好嘅嘢，結果原來唔係果下慘。
前排睇新聞，話測試名牌BB衫，十居其九都含高螢光劑!
話有機棉，亦只係指棉花以有機方法種植，並唔代表製衣過程無其他添加

螢光劑全名係「螢光增白劑」，係一種合成染料，有增白嘅效果，所以常被用於紡織物。螢光增白劑毒性不大，但始終係一種化學物質，如BB係敏感底，有機會出現皮膚敏感，例如痕癢或紅腫，亦有說法話螢光增白劑會致癌。

而螢光增白劑有分可遷移性 & 不可遷移性，無遷移性嘅對人體唔會有害，可遷移性嘅螢光物質會藉住洗滌、磨擦、或碰觸而轉移去其他地方或人體皮膚。

眾多嬰兒品牌所送嘅免費贈品，一直都知道就算望落OK，其實品質成疑
所以今胎的起心肝去淘左枝螢光劑測試棒，嚟個大測試!
當然你問我幾廿蚊一枝測試棒信唔信得過，我都唔知架，哈哈!
測試棒用法好簡單，對住布料「嘟」就會顯示螢光劑含量

含量多與少請參照下圖︰

因為無乜點買新衫俾林林，而木木果啲洗左無限次不能作準，所以今次主要針對奶粉/尿片商嘅贈品做測試 (亦比較有機會有驚人結果!)
紗巾類 (贈品)
 雪印 - 0.00 (無)
 美贊臣 - 0.00 (無)
 生寶臍帶升庫 - 0.02 (弱)
 cordlife - 7.03 (強)

紗巾類 (真金白銀購入)
 soft touch - 0.00 (無)
 日本購入，中國製 - 0.00 (無)
 韓國購入，韓國製 - 0.05 (弱)
 日本購入，日本製 - 0.45 (弱)
 日本購入，日本製 - 5.61 (強) OMG...

口水肩類 (贈品)
 雀巢 - 0.00 (無)
 美贊臣 X natures purest - 0.00 (無)
 不知名，淘寶貨 - 0.01 (弱)
 cordlife - 0.08 (弱)
 美贊臣 - 5.57 (強)
 安滿 - 5.87 (強)
 雅培 - 6.07 (強)

被仔 (贈品)
 雀巢 - 0.00 (無)
 美素佳兒 - 2.27 (中)
 美贊臣 - 5.12 (強)
 美贊臣A+款 - 6.22 (強)

其他
 美素佳兒汗巾 - 0.00 (無)
 雅培BB枕頭 - 0.00 (無)
 美贊臣和尚袍 + 手套 - 0.00 (無)
 H&M 帽 - 0.09 (弱)
 雪印咬咬巾 - 0.28 (弱)
 雪印衫仔 - 5.68 (強)


睇完上面嘅測試結果，原來都有部分贈品做到不含螢光劑，亦會有同品牌嘅贈品有啲好多有啲完全無，仲有日本製嘅都唔代表絕對無添加。

你問我仲會唔會用含高螢光劑嘅贈品...都真係未必會，可能你話，唏你咪又係咁大 (經常聽到)，木木果時咪又係咁用...我覺得以前還以前，時代會進步，試下叫啲機不離手嘅大媽唔準再玩candycrush睇下佢肯唔肯? 既然科技與資訊都進步左，就更應該有效利用去改善生活而非故步自封囉。


戴頭盔︰以上測試純屬個人自娛性質，不應視作參考資料，睇完「嘩」下好啦 =]

各大媽媽會著數情報

呢種事情其實應該第一胎先會咁熱血去做，第二胎應該好求其，好hea架嘛...
木木媽岩岩有左時都係咁講架，不過上網click幾下就有紗巾尿片送，連咁都懶就似乎太說不過去，所以都有入下啲媽媽會，如果產前講座時間岩地點近都會報下，但絕對唔會再好似上一胎咁誇張，有時間都陪多啲木木啦。我記得果時啲媽媽朋友消息好靈通，一知道有講座報就會吹雞叫大家報名，最後我臨生前stock take過初生用嘅尿片，免費得來嘅有過百條之多...

所以，本篇係一篇不負責任而且唔多齊全嘅報告文 (攤手)

首先講下入會途徑︰
1) 各大奶粉/ 尿片/ 嬰兒用品品牌網頁
要入會，首先要有懷孕證明在手，scan定做.jpg，通常登記時要upload埋或者之後要email/ whatsapp返俾佢地，之後就等收入會/ 迎新禮物。木木媽通常都虎頭蛇尾，記得登記但唔會mon住，收到就收，收唔到就算，家下又唔係等佢開飯 =P 通常美素佳兒、惠氏、美贊臣呢啲大奶粉商，會有專人打黎再核實資料，吹下水，問下打算餵母乳定奶粉然後好假咁話「嗯! 母乳係好好架...」之後就會寄/ 速遞禮物到府上。

2) 婦產科醫生診所
第一次去產檢，可以多口問下姑娘有無得填媽媽會入會表格，好處係一來可以打發等待嘅時間，二來診所通常有齊各大媽媽會表格，一次過搞掂晒唔駛煩，最好係姑娘仲會即時執藥咁執晒所有入會/ 迎新禮物俾你拎走，如果果位婦產科醫生熱衷於出席產前講座做speaker，仲可以優先喺佢診所報名。

呢啲係我喺平時普通產檢果間診所度拎嘅




呢啲係來自照結構果間診所，啲一號奶粉多到...



3) 綜合網站
有啲網站可以一站式咁幫你入晒所有媽媽會，不過請閣下三思私隱問題。有個網站 http://healthtalk.hk/tc/ 列晒各大產前講座報名連結，好很方便，如同我上一胎啲媽媽朋友咁勁。

仲冇一間叫cheer baby 樂兒網，要預先網上登記做會員，登記完又要再預約時間 (office hour)去佢荔枝角office拎贈品，我當日想早少少去，打去問就話一定要預約時間先可以去，結果上到去係一個孕媽媽都無囉...禮物亦不見得吸引，不推薦。



至於入會 / 出席產前講座有咩禮物，難唔難報名，講座有無用(以木木媽第二胎當豬養黎講，堅係無乜心機聽)，儘我pregnancy brain 2.0所能簡述如下︰

美贊臣
[入會] 唔知點解分左兩個郵包寄黎，一個有口水肩+書 (潮媽媽懷孕篇)，另一個有條大紗巾，紗巾估計係因為微信綁定左之類所以有，值得綁喎! 大紗巾當浴巾用，實用野! 至於本書，第一胎媽媽值得睇下架，睇完會對成個孕期有多少少概念，even我第二胎都會睇下重溫返



[產前講座] 我記得係第一次產檢喺診所見到張poster就用手機scan QR code報名，一星期後已經收到SMS確認報名，講座前又再SMS提醒，貼心。講座喺酒店ballroom舉辦，一定舒服，內容一半講產前，一半講初生護理。以我經驗，通常前半講產前營養都係晒氣，西醫梗係話咩都食得連咖啡一日一杯都無問題，然後你返到屋企咪又係俾阿媽哦你寒涼少少都唔準食...通常後半兒科醫生講新生兒護理係比較值得聽，因為，第一胎的話你真係唔會知原來一個初生嬰兒係有咁多種疹同斑可以出...

禮物方面，影相post fb有圍兜 (木木媽時機未到，無去拎)，follow微信有和尚袍+手套 (微信豪俾佢，無所謂)，完場慢慢排隊有餵奶枕，木木媽主要都係為左呢個枕而來，家中已有一個六甲村，想要佢個套做replacement cover。現場仲有得用$100買DHA30粒裝，食開的話一定係抵買。



美素佳兒
[入會] 以SMS形式去換領中心換一張牛牛咕臣被，三包媽媽奶同一本懷孕書。要特登去旺角銀城換，都幾唔方便大肚婆。




[產前講座] 都係必定要去聽嘅講座，因為會有三角枕送，呢個枕由懷孕中期已經開始有用，可以俾孕婦抬高隻腳 / 攝住個肚訓覺。到BB出左世，仲可以餵完奶後放佢上去斜斜地咁防止嘔奶，大個啲仲可以訓練佢自己訓喺度嘆奶。

講座咁多年嚟次次都係尖沙咀holiday inn搞，而且勁密，唔駛擔心抽唔中，成個孕期總會抽得中，抽中多過一次再去都唔係壞事，拎多個剩係要個套黎替換都好(!) 另外場內仲有其他booth，玩下遊戲就會有汗巾 / 媽媽奶試用裝送。




[網上有奬遊戲] 美素佳兒都算係比較多網絡活動嘅奶粉商，今次懷孕期間就遇著兩個 -「營孕之旅」同「陀B產檢好EASY」。前者係每個月log-in入去睇下佢啲資訊，儲夠分就可以換禮物，我大概陀到六個月就已經換左個兩個保溫壺，好實用! 後者就要去產檢時問姑娘拎QR code，可以換到一個baby planner嘅湊BB班同一個超聲波圖片飾物 (未收到)。

 

惠氏
[入會] 收到會員咭 (我對過上胎果張會員號碼係一樣) 同一疊優惠券，要去不同商戶度換禮物，唔方便唔吸引，去開先會去換。惠氏會員咭去護協買野有折，去同珍買薑醋用嘅甜醋都有折。另外會速遞兩盒媽媽奶到家，記得上惠氏網站索取埋藻油DHA試用裝(8粒)，會一併送埋黎。





雅培
[入會] 保溫瓶一枚，無通知情況下速遞去屋企的。



[產前講座] 通常喺科學館 / 觀塘基督教家庭服務中心搞，要自己常常登入雅培媽媽會網頁捕住，講座前兩日先會知有無抽中 (e-mail/ SMS通知)。講座第一部分係兒科專科洪之韻醫生講初生營養，無耐我都開始好專心聽，因為洪醫生唔係講乜斑乜斑，要飲幾多奶果種，而係講香港嬰兒&哺乳媽媽對比其他地區，比較缺乏邊種營養 (維他命D、鈣、碘)，另外亦有講得較多關於代謝病 (which講緊三年前木木出世時仲係好新嘅嘢)。當然，諗深一層會知道其實都係想幫partnered parties宣傳...

第二部分係kinetics周姑娘講，講下點揀孕婦/初生嬰兒用品果啲。四年前係佢講，四年後依然係佢講，周姑娘講嘢係生鬼的，心得亦係實用，不過有部分關於佢喺政府做助產士嘅information已經過時了。

講座完結後填好問卷，禮物有一罐雅培媽媽奶、雅培BB枕、braun換片墊、mustela沐浴護膚套裝、kinetics coupons (如果打算join kinetics疫苗package就好有用)，仲有一張換領卷去佢其中一間診所換兩罐雅培初生奶粉，如果打算人奶行先，呢兩罐拎黎做backup岩晒



雀巢
[產前講座] 通常喺旺角royal plaza搞，都係要登入雀巢媽媽會網頁捕住，facebook都好似有宣傳，不過懷孕初期我會避免facebook connect以免曝露孕蹤，寧願自己上網check。

依家啲奶粉講座比以前更加積極宣傳母乳，印象中都真係無乜點聽到佢地提奶粉，雀巢能恩主打低敏，所以都講得比較多關於敏感。另外有幾個陪月EE教沖涼餵奶掃風，合新手父母，我就當然花時間去排隊玩小遊戲，因為有禮物 (cetaphil套裝) =P

而講座禮物就相對比較失色，只有braun換片墊、滴露、洗奶樽液、女性潔膚液、cetaphil沐浴護膚套裝、瑞士寶寶試用裝、仲有張鴻福堂豬腳薑換領劵，記得去換! 呀...佢個手提袋比幾年前果款係靚左好多嘅...




kinetics
[入會] 會收到SMS，去佢其中一間診所 (銅鑼灣/佐敦/荃灣) 領取一本kinetics關於疫苗資訊小冊子 + 一套cetaphil沐浴護膚套裝。



[產前講座] 留意facebook newsfeed去佢地網站報名，抽中左的話會收到電郵要回覆去唔去。地點同上次雅培一樣喺科學館，講座內容上半講疫苗，下半同雅培一樣，都係kinetics果位周姑娘講點揀孕婦/初生嬰兒用品。今次帶左木木爸，主要係要update下佢喺新生嬰兒疫苗方面資訊，同埋疫苗plan動輒幾千蚊，呢啲時候當然要搵米飯班主話事join邊個plan =P

禮物方面，有fitti尿片試用裝、mustela沐浴護膚套裝、紗巾、惠氏藻油DHA試用裝(八粒)、mumomega DHA試用裝、lactacyd。



卡洛塔妮
[入會] 有四包羊奶粉同兩包羊奶片，有幾張現金劵，最奇怪係左下角圖片顯示揹帶咬咬巾果張紙寫「媽媽會迎新禮物」，但郵包唔見有，紙上亦無寫換領方法...



merries
[入會] 網上登記試用會有尿片3枚 (最細只可以揀S碼，無NB揀)，仲有一條可愛兔兔小方巾。




GOON+思詩樂
[入會] 網上登記試用會有GOON尿片2枚，思詩樂有乾棉同濕棉試用裝。



雪印
[入會] 大部分媽媽會我都係同期上網登記，陸陸續續都收到入會迎新禮物，唯獨雪印係好遲 (我上胎好似直情無收到)。禮物係媽媽奶同一件BB衫，仲有會員咭。



[產前講座] 雪印講座大約一個月搞一次，又係要捕住雪印網站一出就要報名(仲記得上胎好難抽中，又好神秘，要收到email先有得報)。地點又係方便至極嘅旺角帝京酒店。講座分三部分，第一部分講孕婦營養，第二部分由專業人仕講普拉提運動 (pilates)，產前講座未聽過呢個topic，都幾新鮮! 之後有個小休，可以用換領卷換lucky cookie。



第三部分講坐月，個陪月姨姨講到自己profile好勁，但只係跟ppt讀，又趕住準時完場，麻麻地。禮物方面，感覺普遍都比上胎縮水好多，雪印有自家揹帶咬咬巾、GOON尿片試用裝、思詩樂乾濕棉試用裝、NUK乳墊試用裝、arau洗衣液試用裝、Oilatum試用裝，雪印個媽媽袋似乎都幾實用硬淨，好過上胎美贊臣個藍色波點袋。




以上呢啲講座我大約到懷孕五個月左右就無再報了，一來屋企已太多贈品 (而又唔係全部都用得著)，二來都想趁林林出世前多啲陪木木 & 木木爸，三來後期要預時間去政府醫院嘅講座呢。