TOY STORY LAND 率先試玩!

DISNEYLAND最新的TOY STORY LAND聽日 (18nov) 就會正式開幕啦!!!

娘家有人打迪迪尼工，所以佢未開幕時我已經去踩過下泥地
開左之後都最少去左十幾廿次，密到bubu問我可唔可以隔耐d先再去 XD
鬼咩，細細個果時唔知邊個送左盒disney casette帶過我，日日洗腦
加埋果時睇disney princess movies睇到有公主病 (bubu望到呢句一定大力點頭認同)
連之後入大學做intern臨grad搵工都係望住迪迪尼發夢
我又點會唔愛佢呢...

叉開左話題添 =p
其實今次試玩都唔輪到我地去架，你咪話，嫁左之後係娘家地位真係急降
(又鬼叫你呢半個月忙到返唔到去食一餐飯...(咁呢排個個weekend都要去飲咁滯嘛...))
都係因為未來嫂子已經去過，媽媽話讓下d後生
我地先可以係候補名單升上坐正咋陰功 ><

2nov星期三，準時放工即撇飛半個鐘頭車仆倒入迪迪尼!



果晚TOY STORY LAND八點先開
我地七點左右就入場，可以他他條條行下shops睇埋煙花
之後就要戴返條手帶先可以入TOY STORY LAND
如果唔係個個睇完煙花就會借d意跟埋入land架啦~



果晚係cast member family night，一個cast member可以帶兩個親友
個entry pack好good架，除左有入park免費飛，入land手帶，仲有幾張tickets︰
1) 三枝雪條，唔駛問梗係揀最貴果款，就係米奇頭雪糕批啦~
2) 三個著燈badges，呢d限量版買都買唔到，超愛!
3) 一張可以換相既coupon，即係平時幾廿蚊一張買完好肉痛返去又攝埋一二邊果d...

除左以上，個cast member仲可以參加lucky draw，抽中會有部ipad2!
又會無啦啦有檔賣souvenirs，一舊水五隻毛毛公仔，個個好似唔駛錢咁湧埋去
好明顯係人地賣剩蔗先益班員工親友啦 XD
迫到買到一大袋好似好叻咁，但其實之後見到d人一抽二袋咁玩不知幾狼狽
難為我件針織新衫仲俾佢地勾爛左少少 ><
(你見我咁講，即代表我都有入去迫啦...不過我迫左三十秒就回復清醒迫返出黎...)



講左咁耐，其實都未行到去TOY STORY LAND既範圍...
呢張相影得好好呀! 你知嘛，我同bubu影相唔叻，好少拎埋腳架四圍去
通常我唔開口搵人幫手都唔會有正常合照 (自拍拍到塊面成個波果d我唔叫正常...)
仲要聰明絕頂的bubu明白我想點擺pose喎
所以呢張影得咁合拍真係好難得!



終於都到啦!!! hi woody!!! 你好巨型呀!!!
woody隻boot同我差唔多高!

其實個LAND超級細，基本上入左去之後得一條大路，直望可以望到最尾果度...
不過細還細，d佈局好有心思，唔會話行完呢度要行多陣先有野睇 (梗係啦，咁細...)
係movie裡面，玩具做細既；係呢度，佢地做大既!好似調返轉我地係andy個後花園，做woody既玩具咁 =]
(有woody但係無buzz light year同三眼仔喎 XD
因為巴斯生係TOMORROW LAND果邊射緊鐳射槍嘛)
周圍都係放大左好多倍既積木、搖搖、玩具盒
真係會有「俾叮噹個電筒縮細左」的感覺!


(夜晚實在影唔到靚景俾大家睇，唯有去官網借...)

land裡面有三個玩得既attractions，因為有人見到勁果d attraction腳都軟埋
(係邊個就唔講啦，不過我同娘家既人玩跳樓機都面不改容囉 XD)
所以我地先向最可愛既入手 - 轉轉彈弓狗 (SLINKY DOG SPIN) 
呢個attraction要由高空睇先見到可愛之處 =]
彈弓狗圍住d骨頭係咁轉圈，永遠都係個頭追住條尾，哈哈!
右邊slinky dog玩具包裝盒，就係排隊既地方
thumbs up for imagineers! you guys are so creative!



刺激度︰1/5最快既果圈都唔覺得好快，岩晒小朋友玩~
我地一截彈弓坐三個人，唔夠人坐會有空位
於是最細份既我就俾隻狗撞黎撞去，好鬼痛 ><



之後我地向第二個attration進發
 玩具兵團跳降傘 (TOY SOLDIER PARACHUT DROP)bubu已經開始面有難色，不過仍然係我地半推半就之下跟左我地入去排隊 XD
未玩之前扮下降傘兵先

呢個attraction有六個降落傘，每個降落傘坐六個人，bubu唔駛講一定係坐中間 XD
經屋企人教路，我地坐左係景觀最開揚果個
升到最頂時睇到晒TOY STORY LAND全景
仲偷望到隔離施緊工既新LAND!

刺激度︰2/5
我自己覺得好小兒科，好似中童版跳樓機咁
(因為都有返三層樓咁上下高，對小童黎講就好似高左少少)
上到頂會chok幾下先落，再上返頂一兩次先慢返少返
離心力都無乜，不過隔離果位話有，仲鬼殺咁嘈 XD



之後見人多，我地去左醫肚先
平時去DISNEYLAND，雖然free entry抵左，都要慳住食慳住買，因為所有野都好x貴
不過我地今次可以用豪食黎形容!
未開始玩之前已經隊左兩枝drink，兩條栗米加一隻熱狗，埋單只係卅蚊!
中場醫肚去左banquet hall，叫左一個雜扒餐、一個拉麵餐加支可樂
你又估下呢度幾多錢埋單?
個拉麵平時要$65，果晚只係$19.5!
個雜扒平時要$90，果晚只係$30! i.e. 70% off !!!

你睇我興奮到要同張發票影相就知啦!
果晚所有F&B都係三折! 買野都係咁上下折頭，真係食得開懷 =]

食飽就要返去挑戰最終極果個attraction (希望唔會嘔返晒頭先食果d啦)
沖天遙控車 RC RACER!
最細膽果個一早表明打死都唔會玩，咁我都唔會咁殘忍逼迫佢既
我都唔想未到結婚一週年就...哈哈!
所以只係得我同屋企人入去排隊玩
 (無錯，雖然係private event，不過都好多人要排下隊)

呢個影相位，架「模型車」係我未來嫂子整架! 一定要影影影~



刺激度︰5/5!
本來我未排隊之前驚都無驚過，諗住都係勁OP個海盜船少少者!
點知排緊隊果時bubu打電話俾我，話佢見到有個女仔喊住走返出黎!
問同我一齊排緊隊果位，佢話無乜野就唔好玩多次...
下!
咁講我先開始識驚，不過又唔可以縮沙，咁樣衰一定俾bubu笑到面黃，唯有頂硬上...

坐左係尾二果行，唔洗守尾門已經暗呼好彩
一開波頭四下就衝到兩邊最高點，差唔多90度! 以為死梗啦...
點知玩玩下又覺得唔係咁驚，離心力係有兼大
不過真係覺得同海盜船差唔多
玩多次都仲應該ok，三次就免啦...

如果你唔嚇得，其實個LAND都有好多影相位，度度都係靚位 =]
多謝屋企人幫我地影左好多合照呢~

行到最尾仲見到阿rex! 成口都係繩...



當晚都有得同woody & jessie影相
可惜我地玩晒所有野想去排隊的時候就cut左人龍lu
唔緊要，我地自己影 =] 呢個位，外型好似一個倒瀉左的玩具桶咁架~

八點入LAND，玩到十一點幾先捨得走呢~
拜拜啦woody，可能我christmas又入過黎探你都唔定?
(bubu︰下，你岩岩先去完咋喎)

-----------------------------------------------------------------------

有無發覺呢個blogpost個tone唔同左?
因為呢排刨緊一個top blog，人地用口語化寫下下都好到肉
於是我又試下咁囉...
好明顯比平時寫得快，因為我手寫我心嘛，我d文采其實麻麻地!
大家睇邊種會順眼d?