[17m] 申請特區護照+身份證

歲半的木木將會係下個月首次外遊，佢 (阿媽我) 心情當然係極度興奮!
對上一次旅行已經係13年2月去samui，已經兩年半無去過旅行啦!!!

而出名臨急抱佛腳的木木媽，又係拖到最後先幫木木申請護照
講起護照，又令我回憶起一件我俾木木爸炳一世的事...
想當年我曾經係blog同大家講過 (click me)︰

可以成功上機，是一個奇蹟

《驚險十五小時》，回來再分享

好明顯返左黎幾年都未曾分享 XDDDDD
其實隔左幾年都仲記得好清楚，咁唔blog唔得啦!
難得最近打blog意慾高漲，等我寫返件事再講返木木

---------------------------------------------------------------------

想當年7號結完婚，10號就上機去honeymoon

大家都知婚後一日有幾忙，8號要周圍還呢樣還果樣

好似仲食左回門飯，9號先真正有時間執行李

當時其實已經係10號凌晨，我再re-check D證件文件時

望住我本passport，得返三個月有效期，有少少迷茫咁問bubu︰

「passport係咪要有最少半年有效期架?」
(事後估計當時籌備婚禮太投入，成個人去左另一星球咁)

問完即時恍然大悟咁意識到自己今次好X大鑊
亦即時俾bubu鏟左上天花板，炳到腫過豬頭炳!
一般黎講，passport一日未到期都仲可以香港出境
但航空公司同當地入境部門絕對有權拒絕乘客登機及入境

當時已經夜深，仲可以點? 咪周圍打電話問朋友同上網求救
結論︰maldives係無左旅遊業會死得的國家，應該唔會拒絕我入境，但回程stopover新加坡就唔敢包...
最壞打算︰去到新加坡唔俾入境的話，就即轉機返香港 (純粹自己想像，完全無考慮過可行性)

問問下有人提議去入境處搏一搏換新證
不過入境處網頁寫到明︰觀光旅遊不會被接納為急需簽發護照的理由
抱住「試左有機會得，唔試一定唔得」的心態，第二朝會去灣仔走一轉
決定好之後，就細聲啜泣就繼續執我的行李...
(當你大概知道一個maldives honeymoon trip的價錢，就會明白點解要啜泣)

第二朝倒塔咁早，我父母就陪我去灣仔入境處
點解唔係bubu? 因為經討論後bubu要係屋企standby，有奇蹟就機場會合
去到灣仔天橋尾，已經見到有一個蛇餅! 九成都係賓賓，南亞裔人仕
我地排排排，排到九點就放人入入境處

我地一個箭步就去詢問處度拎form，詢問處職員狠狠咁拋底一句
「最快都要廿幾日架，走啦」雖然係預期答案但果下真係好失望...
但後來我爸爸媽媽唔服氣，趁呢個職員行開左問另外一個
呢個職員的答案係180度不同!「你快D填好影埋相交去俾主任啦!」
有一絲曙光!
拿拿臨填表、影證件相 、等叫名...
(想像下一個喊到雙眼腫晒的豬頭強顏歡笑咁影!)

嗌我名時個心真係跳得無敵快!
當時我坐低面對玻璃窗後一個叔叔級主任，爸爸媽媽就企係我後面
一開波我條淚線就自動開turbo咁流眼淚
喊住咁將我的情況一五一十咁講俾主任知
交晒我的機票e-ticket, resort voucher, 仲有新鮮滾熱辣的結婚證書!
(仲要連埋特別訂製的精美證書套一個 XD)

其實除左我喊，更誇張係我身後的雙親都陪我一齊喊 T.T
都喊得幾淒涼下! (我咁眼淺咪就係遺傳自我媽媽...)
人地唔知真係會以為我地一家三口要趕赴外地 "bun song"...(睬!)

主任叔叔其實keep住強調最快都要晏晝四點先有證
而我班機1525就起飛
但我地都決定等到最後一刻i.e. ~1230，先離開去機場
等
等

等


等



等 (果種想快知結果的感覺同高考放榜差唔多)
等到十二點幾，廣播叫我名!!! 新passport已經印好拎得!
開心到無法形容之餘仲覺得非常不可思議! 真係有奇蹟!

拎到證之後竟然仲有時間俾我地搭MTR返屋企附近
直接係MTR站口跳上bubu私家車直奔機場
到機場check-in左先可以真正鬆一口氣~

成件事堅離地，由我十點幾見主任計至收到新passport
只係兩個鐘! 只係兩個鐘! 只係兩個鐘!
我仲好記得主任話造證工場唔係果度，叫我唔好抱太大期望
我到依家都唔係好明，以政府黎講，點樣可以兩個鐘內起到貨...
事後我上網刨forum, 莫講話旅遊，就算以工幹原因我都未睇到有咁快的case
UNBELIEVABLE but it did HAPPEN!
呢件咁crazy的事情，仲令我咁大個女第一次phone-in電台節目
有晚「1872遊花園」問旅行徬徨事，我就係咁係大氣電波中講返事情經過

寫返呢件事當然唔係用黎晒命，而係用黎警惕我自己︰唔係次次都咁好彩
重要的事情再三檢查同認真處理，唔好再臨急抱佛腳

而睇返我寫呢篇blogpost的本意...證明我係無汲取到教訓!

---------------------------------------------------------------------------

寫左上一段咁峰迴路轉的，無晒力寫木木果D添 =P

木木今次主要申請特區護照，但申請護照時需要身份證文件
所以係一併申請(1)香港特別特政區護照 + (2)香港永久性身份證 
(1) http://www.immd.gov.hk/hkt/service/travel_document/apply_for_hksar_passport.html

(2) http://www.immd.gov.hk/hkt/services/hkid/reg_replace.html#under_11

而申請途徑有四種 (16歲以下兒童)︰
1. 親身遞交
留意幫兒童申請時，遞交申請/ 領證總要有一次要帶埋兒童去verify
我覺得領證先帶小朋友去方便d，因為領證有得預約時間，應該好快走得
2. 網上申請 不適用於11歲以下兒童
3./4. 郵遞 / 投遞 我選擇左投遞
留意除左親身遞交，其他遞交途徑都要預多2-3個工作天處理，而11歲以下兒童大約需時14個工作天，即係我要預最多17個工作天

證件相︰
首先要睇清楚官方相片規格 [click here]
幸好護照無回鄉證執得咁嚴，所以自己影都容易pass
最緊要有幅白牆同識得後期製作，而最常用的工具係"Passport Photo DIY"
一兩個步驟就製作到合適的JPG檔，就咁拎去晒3R/4R就得
PC下載版︰http://www.openplatform.com.hk/chinese/photoDIY19.htm
Online版︰http://photo.how2do.com.hk/
留意呢個程式無執相功能，如果有要求又唔識執就最好搵人影啦~
木木媽今次係出去影的，因為實在無時間同木木慢慢玩我再慢慢執

呢張證件相，我話你知，木木的左邊其實係木木爸隻手臂 XDD
影相舖d哥哥仔簡直係神乎其技!

所需文件︰呢部分係最易出錯/ 執漏的!
申請護照
1. 護照申請書 [ID842]
2. 證件相一張
3. 父/ 母 身份證
4. 出世紙
5. 申請費用 - $185/32頁，$230/48頁
6. 副署事項表格 [ID641] (要貼一張證件相)
7. 副署人身份證副本

申請身份證
8. 身份證申請書 - 11歲以下人士 [ROP3]
9. 證件相一張
10. 出世紙
如果係親身遞交，所有文件除(7)之外帶正本，俾錢可以係現金/ EPS/ 支票
如果好似我地咁係郵/投遞，所有文件都準備副本，付款一定係劃線支票

兩份申請有文件係重覆，有D又唔知填黎做咩，等我再簡化一下
3份表格︰ID842 /  ID641 / ROP3
3張身份證副本︰父 / 母 / 副署人
3張證件相
1張出世紙副本
1張支票

溫馨小提示︰
填身份證果份表格有一條係問你子女曾否居港滿七年以上...
我個囡先得果歲半? 呢條問題我自己同媽媽朋友「是 / 否」都填過
結果都一樣申請成功的放心~

另外副署係適用於11歲以下兒童，如果小朋友已返學，有學校文件如手冊，show到名+出世日期+學生相+學校印，可以唔駛做countersign，但好似countersign易過關d...

記得唔好搵自己老公填! 搵其他人，四大長老什至工人姐姐都ok
佢地要係份表格上橫跨小朋友張相咁簽名(即由紙簽到上張相度)
唔好諗住去到先求其搵個人幫你，依家呢個世界無好人架啦~

-----------------------------------------------------------------------------------------------------

我係26jun遞交申請的，7jul收到領證通知書，即係只需7個工作天咋!
最快領證時間係23jul，一收到領證通知書就上網預約領證日期時間
前後唔駛一個月啊!

因為木木媽請唔到假，所以由木木爸帶木木領證
又因為申請人係木木媽，所以要填授權書 [ ID678]
要帶 
1. 領證通知書
2. 授權書
3.  出世紙正本
4. 申請人身份證正本 (木木媽)
5. 代取人身份證正本 (木木爸)
如果自己親自帶小朋去去領證就只需 1+3+4
我地最後約左24jul 1430, 木木爸話去到仍要拎籌，等左15-20分鐘就拎到

木木可以離港外遊啦!

備註︰
以上係木木媽幫木木 (16歲以下兒童) 係只得出世紙的情況下第一次申領特區護照同身份證的經驗，只作參考，唔同歲數情況都唔同，最好都係依據入境處網頁
http://www.immd.gov.hk/hkt/services/travel_document/index.html

-----------------------------------------------------------------------------------------------------

打呢篇文章時再做下功課
原來呢條link可以check到自己的護照是否合乎目的地的護照要求
http://www.iatatravelcentre.com/passport-visa-health-travel-document-requirements.htm

即刻check check當時兩個desitinations - maldives & singapore
結果係，maldives 只要護照仲有效就得，singapore 就要有6個月有效期!