[15m] 婆婆嫲嫲節 • DISNEYLAND hotel

9may

木木出左世之後，大節時大節變得好忙

以前最緊要夾好邊日同男家邊日同女家做節就OK

依家仲要安排埋小林家自己過節日

母親節更加係一個好重要的節日，自己做左媽媽好明白，無論幾多歲的媽媽，都好想呢日被重視，於是我同木木爸安排左兩家一齊去迪迪尼酒店的中菜廳晶荷軒飲茶，重點除左點心好可愛，當然係佢地粒寶貝孫更可愛 =]



晶荷軒都好識做，每位在座媽媽都獲贈一杯飲品

連飲管都拗埋心心，加分~
(我有擔心過佢地會唔會唔知我係媽媽......)

呢杯係木木爸私人醒我的，Shelliemay (duffy's girlfriend) milkshake!

去晶荷軒就係為左呢幾籠造型點心!

要提前預訂的，因為今次識人有得平
都好豪氣咁叫晒咁滯~

(最近仲出左BAYMAX醫神包!)

三眼仔



迪士尼小熊甜包
木木媽已一早迷上左duffy & shelliemay! 今次黎最開心食到佢!



小白寶寶豆沙包
因為OLAF的造型有齊成個body唔剩得個頭，佢係蒸籠入面企唔穩 XD



呢幾隻天鵝就遜色得多!



米奇煎薄餅
因為相機食左好耐好耐，到得閒食佢時，已經又凍又un



木木對於外界新事物有佢自己一套，有時會好主動接觸，有時會驚到調轉頭走，完全無得估。對於咁可愛的點心，木木小心翼翼地伸出食指輕輕掂左三眼仔一下...然後縮手!



仲要推開，真係好唔鐘意喎! 
有咩咁驚呢阿囡? 你自己咪又係孭住個shelliemay手袋仔!



但搣少少俾佢又食，真係吹漲~~~



自攜食物 (西芹)，唔好話俾人知呀 shhhh



向大家介紹，呢位係木木表妹晴晴，細木木11個月，都係人奶B，同個豬仔包一樣咁可愛，好期待佢快D識行識走同木木爭野玩啊!





今日主角係一眾媽媽，當然要食下甜品滋潤下
先來養生桂花甜湯
後面濛濛地果個係椰香奶皇綠茶卷



呢個陳皮燉雪梨真係不得了! 好香陳皮味又甜! 潤喉之選
晶荷軒其實唔剩係得D可愛點心，其他菜式都係堅好食



食飽飯就當然要係酒店影下相
果期木木一聽到話影相就會自己拍埋牆擺佢認為好正的pose XD



繼而入shop睇精品...
你睇，一粒豆丁，後面一個grandgrandma兩個grandma
我同木木爸無眼睇，結伴去掃貨...
(果日咁岩係銀卡日兼迪迪尼做六折，太吸引!)



最後木木緊係有收穫啦，氹到嫲嫲買玩具! 完全勸喻無效無法阻上...
grandma個仔話，佢都好想做人地個孫，係咁易望下就有禮物收喎 XD

希望婆婆，太嫲同嫲嫲有一個開心母親節!

BTW，我好滿意木木呢日的打扮 =]