[十週六天] 產前檢查 • 私家 • 2

27 JUN 2013 • WEEK10 DAY6 • 張國良醫生 • CRL: 3.43cm

上次產檢提過會睇兩個醫生比較，點揀呢?
如果最後決定係私家醫院分娩，我會希望醫生由產檢一直跟進到接生
所以我會依據醫生係邊間醫院掛單而選擇
而我的私家醫院選擇就只有聖德肋撒 (法國) ／ 仁安

第一次產檢的醫生就搵左仁安醫院的駐診醫生
第二次要搵一位係法國醫院掛單的，睇網上評價，揀左
張國良醫生，用三個字概括︰平、靚、正

不過做預約都唔係一件易事
五月中下旬打去book，都要打左幾次先打得通
當時只係 [五週] 左右，姑娘一俾就俾到接近 [十一週] 的期!
我只係問有無得早少少，姑娘爭d想cut我線咁滯…

-----------------------------------------------------------------------------------------------------

繼上次產檢，單思三星期之後，終於到同木木再見面的日子!
[七週六天] 時木木只係一粒豆，今次唔知佢大個左幾多呢?

診所係佐敦地鐵站出口側，預約時間係五點
新症首先要登記資料，然後要去洗手間留小便
帶住一條「已處理」的試紙返黎，姑娘望一望就話無問題扔得
我到依家都唔知究竟係驗乜野…

跟住上磅量體重，88.5磅，已經 [十週六天]
我連「懷孕前希望有90磅」都未達標 >< 

姑娘話可以走先，大概兩個鐘後返
不過我見出面好熱，寧願坐係診所等bubu
同時亦發現，在座好多內地孕婦...

最後，真係等到七點先到我，足足兩個鐘 (!)
而且好奇怪，每次會叫兩三個人名

入到去坐底，但張醫生唔係度…
過左陣見張醫生行黎行去，又過左陣姑娘叫我地入USG房
房入面另一個孕婦出黎同我地調位
張醫生依然唔知去左邊，得姑娘指示我上床，做照USG的準備
再過左陣張醫生終於返黎照USG  (gel是涼涼的...)



我又傻笑啦哈哈~
木木已經唔再係一粒豆，唔駛醫生解說
我都見到佢同身一樣大的頭，同頭一樣大的身 =P
仲有郁郁下的手手腳腳，so amazing!!!

張醫生第一次睇我，check左子宮無問題之後
就指示俾我睇木木身體大致部位
仲指住一個波波問我係咩...唔...
話係蛋黃 (下? 未聽過，亦google唔到...)

然後張醫生話睇到頸皮，順手度埋 ( 大愛呢下順手)
係螢幕中，頸皮係背部位置，一條黑線，量度有幾闊
0.1cm，張醫生話係low risk
因為一般都係11-13wk先做，所以我唔知10wk的ref range係點
但0.1點睇都係一個good sign =]

照完，自己抹抹gel準備落床
點知張醫生衝返入黎話爭少少
嚇鬼死我，我又已經抹走晒gel...
但望兩眼又話ok咩都無再講...

(事後我懷疑，唔知係咪佢唔記得print相?)

出返去頭先間房又等...
等到張醫生返黎
就講左一輪︰

- 唔好食當歸人參
- 可以食凍食辣食咖喱 (仲問聽到係咪好開心)
- 最好打側訓

至於我準備左的問題，突然乜都唔記得晒 ><
剩係問左關於體重不升反跌的事
張醫生話，呢個時候木木只有~4g
如果我重左就係自己肥，唔關木木事

仲話我好細粒，我多口問埋順產有無困難
張醫生話如果木木有七磅以上，好難自己生
但佢睇死我陀唔出七磅B...

講開開刀 / 順產，又順口問埋張醫生收費
真係平到無朋友...

出去等一陣俾錢拎藥
再講多次，真係平到無朋友...
$280包照超聲波+葉酸+鈣片
簡直頂爛市!

張醫生又唔係收得貴，但就咁辛苦自己，移形換影撲黎撲去
我覺得佢係一個有醫德的婦產科醫生
但我真的有諗過同一時間睇兩三個孕婦，會唔會較大機會診錯症?
而且等候時間真係太耐 (2hrs)，照USG設備亦好舊 (小牛龜)
網上評價都係講開刀多，而我傾向順產...

但低廉的分娩收費又真係好吸引! (法國+張國良醫生)

慶幸木木唔係龍B，如果唔係，根據張醫生所講
[十週] 已經唔需要再苦惱係唔係、係邊間生
因為私家醫院 [七週] 已經滿左...