通告話(1)可以選擇著華服返學同(2)需要帶一個電子花燈，當時我仲心諗，竟然唔駛做親子環保花燈，咁憐憫我地新手家長? 於是我就一心一意咁去揀套靚華服...
點知中秋節前一個星期六晚上，我先至領會到「親子環保花燈」呢個命運係註定嘅 (詳情略去)，而且仲要星期一就交，真係晴天霹霹...如果有多少少時間，我會認認真真諗點樣可以更環保同小孩參與度比較高，但得返星期日少少時間，要開turbo了...
環顧屋企嘅物資，我揀左一個蝴蝶酥嘅內膽紙盒去做一隻中秋白兔嘅身體，邀請左木木去幫耳仔塗色，自己揀材料再貼下眼睛耳仔鼻哥尾巴。
至於幫身體打洞透光呢部分由木木媽負責。
木木媽手癢，界埋木木個英文名出嚟，之後加左燈膽先知，原來會有咁嘅效果! 早知我調返轉啲字母黎挑啦 =P
雖然整完之後木木媽覺得缺少左環保意味 (因為個盒太新淨)，還好木木好喜歡呢隻佢有份製作嘅白兔燈籠，小心翼翼咁帶佢上校車，放學返黎仲話俾我聽佢喺上面 (老師掛左係天花板)。學校喺中秋之後先發還，白兔歸家時，少左隻耳仔，無左幾條鬚鬚，哈哈!
過幾日就到中秋節，但果個星期話有個超級颱風襲港，學校立即出通告提前一日舉行提燈會 (結果風打唔成，正日正常返學...)
木木華服look終於出場啦!有鑑木木都屬於有少少肉地型，優雅系列唔太適合佢，所以木木媽揀左件森林動物圖案嘅短袖長衫
髮型都早早諗好左，春麗頭係不二之選
學校提燈會需要帶一個電子花燈回校，依家小朋友好幸福，燈籠又點止一個? 呢個時候總會有鍚到佢地燶嘅家人sss會送上，木木揀左帶peppa pig返學，開心得佢!
木木嘅學校會影小朋友嘅上學情況俾家長睇，對學前班家長尤其重要，因為小朋友呢個時候仲未能夠好清楚咁表達係學校做過啲咩。睇相得知，大部分女同學都有著靚靚華服，而男同學就唔多，始終男仔衫真係比較少選擇
佢地真係有「提燈」行黎行去，仲有去認識中秋食品，嘩! 菱角，爭啲唔記得左中秋有你份，太多年無見過! 仲有，木木人生第一口月餅，就係喺學校食的 =]
呢個就係木木第一次認真認識嘅中秋節啦 =]
嚟緊又要積極準備下一個節日 =P
