Baby Birthday Ticker Ticker

Friday, July 29, 2016

木木媽拋夫棄囡首爾遊 • 前

我真係無諗過,我都會有呢一個機會...

事緣舊年本來同兩位木木契媽,三家人去韓國首爾的,之後韓國爆發MERS,我地搭果間廉航又竟然俾改機票,於是小林家同ff家就轉戰東京,bb家照去但延期。


今年年頭,有人問 (唔好問邊個) 有無興趣走返轉韓國,HK express做緊買去程送回程,連千四有找! 日期時間方面,就下呢個就下果個,最後揀左五月中,星期五晚放工後飛,玩三個全日,星期二凌晨飛返黎接住返工,呢個咁「青春無敵」的組合真係好癲!


木木爸係痴身男,由拍拖以黎我都未試過扔低佢同朋友去旅行,依家有左木木更加唔駛諗,所以我能夠去到,到依家依然覺得amazing...


機票搞掂,住唔駛諗一定係airbnb,三人一致認同選址交通方便最重要,因為我地時間有限得好緊要! 不過我地凌晨到 / 深夜走,要搵個肯幫忙keep行李的host都唔容易。幸好end up都搵到一間,係duplex! 個host仲要回覆得好快 (呢點都好重要),地點係首爾站隔離,方便到埗時有late night bus直到。契媽f有airbnb credit,扣完之後千五兩晚,每人五舊水。
https://www.airbnb.com/


搭車用的T-money咭 (= 香港八達通),由契媽b提供。

http://big5chinese.visitkorea.or.kr/cht/TR/TR_CH_5_9.jsp

上網,租蛋。契媽b租過crazy egg無乜問題,照跟,醒起要租果日岩岩係earlybird offer最後一日,每日十五蚊,租兩部五日(豬左,應該租三日就夠),盛惠百五。
https://www.crazyegg.com.hk


基本野大約二千搞掂,要留返d錢買野嘛 XD


至於行程,無買旅遊書,主要靠問韓國精朋友,同埋上網睇遊記。
GOOGLE map係韓國係廢的,英文譯名把鬼...
反而用韓巢地圖多,起碼中文睇得明先,可以事先pin埋景點,好方便
http://map.cn.konest.com/
搭metro編排會用韓巢地鐵路線圖(中文) (連結同上)
或者用官方網頁 (英/韓文)
https://www.smrt.co.kr/program/cyberStation/main2.jsp?lang=e
去到當地就用韓巢app+其他subway app配搭用,加上契媽f係最強導航,契媽b上年去完,加上木木媽我都唔係蠢嘅,第一次首爾遊應該無問題!

--------------------------


DAY 0只係上機,寫埋先 =]


DAY0 may20, 2016


六點正放工,落樓跳上木木爸的車,飛返屋企沖個涼再飛去機場

三家人係T2食個dinner

契媽b怕契囡y會唔捨得會喊,而木木媽我就評估過木木應該無問題

於是帶埋佢去送機,見多一陣 =] 



木木無乜野咁同我揮手拜拜,我應該開心定傷心...
唔知道佢係未明白定係無唔捨得媽媽呢?
木木爸就不停叫我小心D小心D小心D,我知道佢一定會好掛住我 =]
唯有買多幾件衫回饋佢 =P



飛機上大家都要積極入睡以應付到埗後的緊密行程
不過廣播太多,亦經常開晒燈
我應該有斷斷續續訓著過...掛?

Monday, July 25, 2016

[30m] 每年一度單拖日 - seas ahoy + 科學館

JUL 23, 2016

是咁的,每年總有個weekend木木爸要工作陪唔到我地,呢個機會非常低,雖然平時一家三口去街好開心又有木木爸照顧我地,但我都好期待呢個單拖週末,可以同木木獨處 + 挑戰自己帶木木出街嘛 =]



今年單拖週末,我地約左木木的朋友仔一齊去親子餐廳 seas ahoy
呢個以blue sailing為主題的餐廳,自佢開幕我已經好想去了!
訂檯需要落訂的,可能營運成本高怕家庭客易甩底?

餐廳係尖東地舖,尚算易搵,地方大概容納到六七十人左右
部分餐檯貼住小朋友玩樂的平台,訂檯時可要求坐呢邊方便照顧小朋友



食物方面有minimum charge,大人$100,小童$80
每位小朋友有一本遊戲冊+貼紙,可以自己揀 main / side / dessert / drink,貼好搵server落order就可以,kid meal盛惠$88



至於a la carte menu,一般salad / pasta / pizza都過百,基本上每人揀一樣就meet到min charge,不過估唔到portion少得可憐,呢個pizza六吋都無...



木木揀左照燒雞+薯仔,好有趣,估唔到佢會揀呢d,一黎到仲好興奮咁主動拎叉匙食! 木木媽請朋友仔分左d意粉俾木木,又分左件pizza俾佢。木木姐算好俾面我,無離開過位,一路密密食,只係因為張booster seat唔夠高而要幫下佢卷意粉





至於玩木木又無乜興趣,呢點我預左,木木無返playgroup太耐,唔習慣同小朋友相處而變得非常慢熱,見到小朋友會走夾唔抖。



唯有同媽媽影下相啦! 今日著左母女裝,可惜遮住左 > <



今日一齊玩的朋友仔 =]



對於呢間餐廳,我覺得有少少失望。

餐廳每個時段只有兩個鐘,對小朋友又食又玩時間真係唔多夠
min charge我接受到,不過食物份量方面孤寒左少少
無乜玩具,牆壁亦好殘舊,最好係本遊戲冊,仲送一筒木顏色筆
應該唔會再幫襯了。

--------------------------

之後木木同其中一位朋友仔去科學館 (去公園真係怕媽媽們會暈...)
正值科學館做緊專題展覽 - 古怪動物園



裡面展出平時少見而又核突的生物 eg 烏繩、糞金龜、絛蟲等等
有d木木好鍾意有d就好驚,捉唔到路





另外同層有兒童天地,呢度有多種裝置比小朋友操作體驗背後原理



而最吸引呢位小妹妹...都係building blocks =]



「鏡子世界」都好好玩! 有凹凸肥瘦鏡,我有呢對長腿就好了



仲有萬花筒



呢個同上次去trick eye museum的一模一樣



就咁消磨左一個下午,離開時太陽開始收,岩岩好!
返屋企時木木亦好乖,全程無扭過抱,肯拖實我慢慢行返去,之後仲周圍同人講今日出去時巴士唔等我地,於是搭的士,又搭左火車,仲見到ambulance,好搞笑!

------------------------------------

下個月(AUG1, 2016)開始,博物館通行證申請費用會下調50%,一年家庭通行證 (四人) 只係$100,可以有效期內無限次參觀五間博物館,包括好適合小朋友的香港文化博物館、香港科學館! 去一次已經回本,絕對要申請啦 =]

詳情可參考呢度︰

Friday, July 22, 2016

[30m] 探索大自然遊學園 x 動物農莊 2016

JUL16
nature fun x happy farm 2016

謝謝《Baby-mo》邀請,今年暑假又可以去「探索大自然遊學園 x 動物農莊」玩啦! 呢個活動上年玩過覺得唔錯,全因正值炎炎夏日之時,可以唔駛身水身汗就睇到動物,瀡到嘉年華先有得玩的充氣滑梯,玩到泥沙,仲有多種體驗...總括黎講,都係有冷氣呢下最好 =P





場內活動大概分幾類︰

充氣類

木木玩左個八爪魚,需要穿過窿窿,爬高又滑落咁,我同木木爸就係外圍跟住佢跑



充氣滑梯,試下問木木肯唔肯玩但要自己上去,出奇地say yes(!),到佢玩時係有少少淆底的,但helper姐姐已經一手的左佢入去,再扶住佢爬左一半,佢自己爬埋上去,再開開心心咁瀡落黎,嗌encore! 木木一向比較細膽,咩都要媽媽陪,欣賞佢能夠鼓起勇氣放手嘗試,木木媽好滾動 =]




木木仲要求玩呢個水果彈床 (其實佢未夠秤玩的),又係望一望我就放膽爬上去玩 (叻女!),玩到一仆一碌,基本上要helper哥哥扶住先行到



小提示

充氣滑梯全部都要排隊,如果一早入場可以玩左先,愈晏愈多人就有排排架啦
另外充氣遊戲有分大小B區,可留意場刊上標示


體驗類

CP小廚師 - 必玩! 小朋友會獲分派圍裙同廚房帽,係父母協助下製作一條蛋腸卷 (小朋友咬下外面好啦,因為入面蛋漿未熟透的),係fb分享仲可以帶走半打雞蛋!





有個小朋友太心急了



插秧 - 有假膠稻米俾小朋友體驗下插秧,另有真實水種稻米,好好呀,因為平時孩子真係零機會接觸,睇圖遠遠不及俾小朋友睇到摸到佢食緊的米飯係點樣黎 (雖然唔係去真正稻田,都好過完全未見過丫)




小菜苗 - 呢個有少少hea,簡單裝飾下個花盆就拎去俾helper擺泥土同小樹苗入去。之前我地去農莊都有類似經驗,小小植物未返到屋企已經宣告死亡 >< 今次希望唔會再扼殺生命之餘,仲可以令佢長大啦 =P



子母奶牛牛 - (隔離有gerber星星餅攤位,可惜緣慳一籌!) 用紙碟製作乳牛,木木媽負責剪,木木爸負責教木木貼,整好可以得到一隻乳牛同一包紙包奶。



我地同木木講,拎住隻牛牛影相有奶奶飲,佢就咁嘅樣 ._.



小提示

部分攤位需要預先排籌,尤其小廚師非常熱門,建議未開始玩前去各個攤位睇取籌時間,大約安排一下次序,爸爸到時到候就去排籌,perfect XD

動物類

餵飼小山羊 - 以我所知1pm & 3:30pm都有派草時間,搵定爸爸早排早拎草早d餵,遲去無位餵d羊咩咩又飽晒架啦! 呢個係與動物互動性最高的一個,必餵



兔仔 龍貓 倉鼠 - 上年有得摸兔仔,今年無有d失望呢。


餵飼水母 - 我好鍾意望住水母的,估唔到木木都好鍾意,仲有機會餵水母,好開心! 原來養水母係用豐年蝦作為食物,係helper協助下用滴管將豐年蝦放係水母附近,其實都唔知佢有無食到 (!) anyway係好新鮮的體驗,連媽媽我都未試過




寄居蟹 小丑魚 - 木木無睇過finding nemo,對佢黎講小丑魚只係魚魚的一種 XD 而寄居蟹平時係繪本中比較少見,木木媽用蝸牛比喻俾佢知



海星 - 同上年一樣有得摸海星,時間關係我地今次無機會去睇 ><

小提示

接觸完小動物記得洗手呀! 通常附近會有小童洗手台,唔駛去洗手間的

玩樂類

巧虎 - 主舞台可以同巧虎影相! 但鑑於木木同巧虎唔太熟,佢係唔多想同佢影的 (!)



另外巧虎會提供佢地的教材玩具俾小朋友試玩,另外亦可以即場訂閱,再唔係過多個星期係書展都可以訂到


playright (智樂) - playright好貼心咁分左大小B區,然而我地連續兩年都去左大B區玩沙 XD 玩沙唔駛怕,佢玩沙範圍無水,唔會痴住晒,再唔係帶少少爽身粉,撤上腳就好易撥走d沙啦。



小B區除左玩沙仲有手推車可以做搬運工人幾過癮架 =]



仲有其他︰






稻草人製作 - 趕時間只係扎左個十字身...


----------------------

我地十點零到場,都玩到挨住四點先走,講緊都未玩晒,仲有有好多都想玩! 如果預左玩全日,可以吸個手印中途離場的,場外有少少餐廳,再唔係可以搭一個站機鐵去機場食野,第一次坐機鐵的木木表現興奮 =]



另外記得著易除的鞋同著襪,因為充氣果d全部要除鞋著襪,而玩沙果d就可以著涼鞋 / 赤腳,仲有帶足乾糧俾小朋友,玩到唔願走都有野食頂肚,你知啦場內食物貴貴地又...

入場記得去拎份地圖同優惠卷,優惠卷都有一半以上可以like下fb就換到禮物,所以記得帶個環保袋啦。



完晒先出到呢篇遊玩心得俾大家,真心無鬼用! 唯有下年去之前返黎睇參考下啦 =]